ʼE Koutou Kau Anai Koa Kiai?
1 Neʼe ʼui fēnei e te tēhina ʼe ko he Fakamoʼoni ʼa Sehova talu mai fualoa: “Kapau ʼe mole koutou kau ʼi te ʼuluaki ʼaho ʼo te fakatahi, pea ʼe lahi ʼaupito te ʼu meʼa ʼaē ʼe koutou hala ai!” He koʼe neʼe manatu feiā? He ko te ʼuluaki ʼaho ʼe ko te kamata ʼaia ʼo he kātoaga lahi ʼi te faʼahi fakalaumālie, neʼe teuteuʼi maʼa tatou e te kautahi ʼa Sehova. (Isa. 25:6) Kapau ʼe tou kau kiai ʼi te kamata pea ʼe tou fakahā ai ʼe tou manatu tahi mo te tagata fai pesalemo, ʼaē neʼe ina ʼui fēnei: “Neʼe ʼau fiafia ʼi tanatou ʼui mai ʼaē: ‘Tou ʼolo ki te ʼapi ʼo Sehova.’ ”—Pes. 122:1.
2 Kae ʼi te taʼu ʼaenī kua hili, ʼi ʼihi Fakatahi Faka Tisitilike, ʼaē neʼe ko tona kupu tāfito “Te ʼu Folafola Faka Polofeta ʼa Te ʼAtua,” neʼe mole hahaʼi age ia nātou ʼaē neʼe kau ʼi te Feliaono ia nātou ʼaē neʼe kau ʼi te Moeaki pea mo te ʼAhotapu. Ko tona faka ʼuhiga, neʼe lahi totatou ʼu tēhina neʼe mole nātou logo ki te ʼu akonaki ʼo te fakatahi ʼaē neʼe fakahā ai te ʼu logo maʼuhiga ʼo ʼuhiga mo te folafola faka polofeta. Pea ko te tahi fakafiafia ʼaē neʼe mole nātou kau kiai, ʼe ko te fakatahi mo totatou ʼu tēhina mo tuagaʼane.
3 ʼAua Naʼa Tāʼofi Koutou e Takotou Gāue: Neʼe mole lagi kau ʼihi ki te fakatahi ʼi te Feliaono, ʼuhi ko tanatou tuʼania ʼaē naʼa fakatupu kovi ki tanatou gāue. Kae tokolahi te kau Fakamoʼoni ʼa Sehova neʼe nātou fakatokagaʼi, kapau ʼe nātou foimo kole fakatomuʼa, pea ʼe tali lelei e tanatou ʼu patolo. Neʼe punamaʼuli ʼaupito te patolo ʼa te tuagaʼane pionie ʼi tana fia kau mālohi ki te ʼu fono fuli ʼo te kokelekasio pea mo te ʼu fakatahi, ʼo tupu ai la tana kau ʼaho katoa ki te fakatahi ʼaē neʼe kau kiai tana fafine gāue.
4 ʼAua naʼa koutou manatu ʼe mole fia tuku atu anai e takotou patolo hakotou ʼaho, peʼe koutou manatu ʼe mole kovi ia mokā koutou tō ʼi he ʼaho pe e tahi ʼo te fakatahi. ʼAki he loto falala, koutou teuteu moʼo fakahā fakalelei ki takotou patolo ʼaki te Tohi-Tapu pe koʼe ʼe maʼuhiga te ʼu fakatahi ʼi tatatou tauhi. (Hep. 10:24, 25) Pea koutou tuku takotou falala katoa ki te ʼu fakapapau ʼa Sehova, ʼo koutou tui ʼe foaki atu anai kia koutou ia meʼa fuli pe ʼaē ka ʼaoga kia koutou ʼi te faʼahi fakasino, mo kapau ʼe koutou haga fakamuʼamuʼa te ʼu meʼa fakalaumālie ʼi tokotou maʼuli.—Mat. 6:33; Hep. 13:5, 6.
5 Ko te faʼahi ʼaē ʼe maʼuhiga tāfito ʼe ko takotou leleiʼia “te ʼu meʼa ʼaē ʼe maʼuhiga tāfito.” (Filp. 1:10, 11, MN; Pes. 27:4) ʼE uga tatou e te faʼahi ʼaia ke tou fai he ʼu fakatuʼutuʼu ke tou maʼu katoa te ʼu fua lelei ʼaē ʼe foaki mai e te fakatuʼutuʼu maʼuhiga ʼaia ʼo Sehova. Koutou kamata fai ʼi te temi nei he ʼu fakatuʼutuʼu, pea koutou faiga mālohi ke koutou kau ki te ʼu ʼaho e tolu ʼo te fakatahi!