Tou Maʼu He Fua Lelei ʼi Te Fakatahi Faka Tisitilike ʼo Te Taʼu 1993 “Akonaki Fakaʼatua”
1 “Akoʼi ʼau, ê Sehova” (Pes. 86:11). ʼE ko te kole mālohi ʼaia ʼe tonu ke fai e nātou fuli ʼaē kua nātou foaki ia nātou ki te ʼAtua ke nātou kaugana kia te ia. ʼE tou fai fakamalotoloto ke ʼaua naʼa gata ia tatatou ako pea mo maʼuliʼi te meʼa ʼaē ʼe tou akoʼi. ʼI ʼihi temi ʼe ʼaoga ke fakatonutonuʼi tatou, pea ohage ko te tagata fai pesalemo, ʼe tonu ke tou kole mamahi ki te ʼAtua ke ina fakatahiʼi totatou loto ke ʼaua naʼa vaelua. Ko te polokalama ʼo te fakatahi faka tisitilike “Akonaki fakaʼatua” ʼe ina foaki mai anai he ako ʼe ʼaoga pea ʼe ina uga ai tatou ke tou toe vakaʼi ʼihi ʼu puani, ke feala ai tatatou kaugana agatonu ki te ʼAtua ʼi te lotolotoiga ʼo te ʼu faigataʼaʼia ʼo te faʼahiga meʼa ʼo te tuʼu ʼaenī.
2 Fakatahi ʼaho e fā: Ko te polokalama ʼe fai anai ʼi Niu-Kaletonia pea mo Vanuatu. Ko te polokalama ʼe kamata anai ʼi te felianima ʼi te hola 1 ʼosi 20 pea fakaʼosi anai ʼi te ʼahotapu hili hoʼatā ʼo fakatuʼutuʼu ki te hola 4 ʼosi 15. Ko te ʼu matapā ʼe ava anai ʼi te hola 7 ʼosi 30 ʼi te uhu fuli ʼo te fakatahi. Koutou tokaga ʼe mole feala anai ke hū he tahi ia muʼa ʼo te hola 7 ʼosi 30, gata pe mo kapau ʼe kau ia ki he gāue ʼe fai ʼi te temi ʼaia. ʼI Niu-Kaletonia ko te fakatahi ʼe fai anai ʼi te Fale fai gaoʼi ʼi Lasi-Pata ʼo kamata ʼi te ʼaho 2 ki te ʼaho 5 ʼo sepetepeli 1993. ʼI Vanuatu, ʼe fai anai te fakatahi ʼi te lea faka pisilama ʼi te Fale ʼo te Puleʼaga ʼo Luganville ʼe tuʼu ʼi te motu ko Santo ʼo kamata ʼi te ʼaho 26 ki te ʼaho 29 ʼo ʼaukusito 1993.
3 Koteā te meʼa ka foaki mai kia tatou e te fakatahi ʼaia? Ko he meʼa kai fakalaumālie lahi ʼe fakahā ʼi te ʼu faʼahi kehekehe: ʼaki te ʼu akonaki, te ʼu faʼifaʼitaki, te ʼu fakafehuʼi, pea mo te ʼu fai gaoʼi e lua. Ke ʼaua naʼa tou hāla ʼi te ako maʼuhiga ʼaia! Pea, ʼe tou nonofo ʼamanaki ke tou toe felāveʼi mo niʼihi neʼe kua fualoa tatatou mole kei fesioʼaki pea mo maʼu ʼo he ʼu kaumeʼa foʼou.
4 ʼE tou ʼave fuli koa te time ki te faleoko? Ia Malakia 3:10, neʼe fakapapau e Sehova ki te kau Iselaele, kapau ʼe nātou teuteu ʼo ʼahiʼahiʼi ia ia ʼo nātou ʼave te time katoa ki te faleoko, ʼe ina liligi anai kia nātou he tapuakina ʼo aʼu ki he temi ʼe mole ʼi ai he hoge.
5 Ki ʼihi, ko te ʼahiʼahiʼi ʼaē ʼo Sehova ko tona faka ʼuhiga ko te ʼalu fakavilivili ki tonatou patolo ʼo kole he ʼu ʼaho mālōlō peʼe ko he ʼu ʼaho mālōlō mole totogi ke feala ai hanatou kau ki te fakatahi. ʼI ʼihi temi, ʼe lotolotolua ni ʼu tēhina ʼi te fai ʼo te faʼahi ʼaia, heʼe ʼi tanatou manatu ʼe mole foaki age anai e tonatou patolo he ʼu ʼaho mālōlō ʼo ʼuhiga mo te fakatahi. Kae, kapau ko he tahi faʼahi, ʼe mole nātou lotolotolua anai ʼi te fakahā age ki ai ʼo te meʼa ʼaē ʼe nātou ʼolo ʼo fai.
6 ʼE tonu anai ke tou fai te fehuʼi ʼaenī: Kapau ʼe ʼohoana hoku kaumeʼa ʼe mā feʼiloʼiʼaki lelei, ʼi he tahi koga meʼa, ʼe mole ʼau ʼalu anai koa ʼo kole ki toku patolo he ʼu ʼaho mālōlō ke feala ai haku ʼalu ki tona ʼohoana? Pea kapau ʼe hage ʼe lotolotolua ia, ʼe mole ʼau fakamahino fakaʼapaʼapa age koa ki ai ʼe maʼuhiga te meʼa ʼaia ki toku loto? ʼE moʼoni, ko te akoʼi ʼaē e Sehova ʼe maʼuhiga age ia ʼi te ʼalu ki he fai ʼohoana! Kapau ʼe tou ʼiloʼi papau ʼe maʼuhiga ʼaupito ki totatou tuputupu fakalaumālie, ʼe faigafua anai tatatou fakalotoʼi totatou patolo ke ina foaki mai hotatou ʼu ʼaho mālōlō ke tou kau ki te fakatahi — Sake 1:7, 8.
7 ʼI Iselaele, ko te time neʼe ko he lagolago meʼa ʼofa ki te koga meʼa ʼaē ʼe fai ai te tauhi kia Sehova. Ia ʼaho nei, ko te time ʼe fakatā ki te temi, te mālohi pea mo te paʼaga ʼaē ʼe fakaʼaogaʼi fakahagatonu moʼo kaugana kia Sehova pea mo lagolago ki te gāue ʼo te Puleʼaga. ʼE kau ai mo te temi ʼaē ʼe tou ʼolo ai ki te ʼu fono pea mo te ʼu fakatahi, ʼo feiā foki ki te fakamaʼa pea mo te teuteuʼi ʼo te ʼu koga meʼa ʼaē ʼe tou fono ai. ʼI te fakatahi faka tisitilike “Akonaki fakaʼatua, ʼe lahi anai te ʼu temi faigamalie ke tou foaki ai te time ki te faleoko fakalaumālie ʼo Sehova. Koteā koa te ʼu meʼa ʼaia?
8 ʼE tou ʼave anai te time ʼaki tatatou fakalogo fakalelei ki te ʼu akonaki, ʼaki tatatou hiva fakafiafia te ʼu katiko ʼo te Puleʼaga, pea mo fakalogo fakalelei lolotoga te ʼu faikole ke feala ai hatatou tali fakamalotoloto, ameni.
9 Ko ʼatatou faiga ʼi te moʼoni ʼe fakalogo tāfito ia ki tatatou faʼahiga fakalogo. ʼI he fale lahi ʼe faigafua hatatou mole tokaga ʼuhi ko te logoaʼa ʼa te hahaʼi ʼi ʼotatou tafa. Koia ʼaē, ʼe tonu ke tou tokaga tuʼumaʼu ki tatatou ʼu manatu. Tou teuteu fakalelei ki te fakatahi, ʼo tou ʼave tatatou Tohi-Tapu, te katiko, he peni pea mo he kaupepa, ʼo feiā foki mo Te Tule Leʼo ʼaē ʼe talanoa anai ki ai ʼi te vāhaʼa ʼaia. ʼE ʼaoga ke tohi te ʼu manatu pea mo te ʼu vaega faka tohi-tapu ʼaē ʼe fakahā e te ʼu tagata fai akonaki. ʼE lelei ke fakanounou te ʼu meʼa ʼaē ʼe tou tohi; ko te lahi ʼo te ʼu meʼa ʼaē ʼe tohi ʼe mole ina faka fealagia ia te fakakaukau ki te ʼu akonaki. Ko te kau tūpulaga ʼe tonu foki ke nātou ako ke nātou fakalogo lelei. Ko te ʼu fānau ʼe nātou foaki anai te time ʼaki tanatou fakatahi mo tanatou ʼu mātuʼa ʼo mulimuli fakalelei ki te ʼu akonaki.
10 Ko ʼihi ʼu mātuʼa ʼe nātou fakatuʼutuʼu ʼi te ʼaho fuli ʼi tonatou ʼapi he temi ʼo nātou fakaafe tanatou ʼu fānau ke nātou lau he tohi ʼa te Sosiete peʼe ko te vakaʼi ʼo he lea fakatātā. ʼAki te ako lelei ʼaia, ʼe faigafua anai ki te ʼu fānau tanatou heheka fakalelei ʼi te ʼu fono pea mo te ʼu fakatahi. Ko te ʼu mātuʼa ʼaē ʼe nātou ako fakalelei tanatou ʼu fānau ʼe nātou ʼui mai ʼe mole nātou fakagafua ki tanatou ʼu fānau ke nātou ʼave tanatou ʼu meʼa gaoʼi pea mo te ʼu tohi fai pena ki te ʼu fono. ʼE toe feala pe foki te akoʼi te ʼu fānau ʼaē kei liliki, ko te ʼolo ʼaē ki te ʼu fono ʼe ko he tauhi ʼaia kia Sehova. Ko te ʼu mātuʼa ʼaē ʼe nātou ako ki tanatou fānau te ʼuhiga kia nātou ʼo te foaki katoa ʼo te time ki te faleoko ʼe tāu mo nātou he ʼu fakavikiviki.
11 ʼE feala foki ke tou foaki te time ʼaki tatatou foaki totatou temi pea mo totatou mālohi moʼo kau ki te teuteuʼi ʼo te fakatahi. ʼI he ʼu koga meʼa, ʼe fakatuʼutuʼu ke fai he fakamaʼa ʼi te ʼu koga meʼa ʼaia ʼi he ʼaho e tahi peʼe lua ia muʼa ʼo te fakatahi. Kapau ʼe tou nonofo ʼo ōvi kiai, he koʼe ʼe mole tou fakatuʼutuʼu ke tou kau ki ai mo totatou famili katoa? Ko ʼihi tēhina ʼe nātou ʼave te hahaʼi ʼaē ʼe tuputupu ʼi tanatou ako faka tohi-tapu, ke feala ai hanatou akoʼi te faka ʼuhiga ʼo te lagolago ki te tauhi ʼa Sehova, ia muʼa ʼo tonatou papitema. ʼE lahi te ʼu meʼa ʼe tonu ke fai ke fua lelei ai te fakatahi. He koʼe ʼe mole tohi ki te gāue ʼi te fakatahi mo totatou famili?
12 Ko tatatou lagolago paʼaga ki te fakatahi ʼe ko te tahi ʼaia faʼahi ʼe tou foaki ai te time. ʼI tana fakamahino ʼaē ko te ʼu meʼa ʼofa paʼaga ʼe faka ʼuhiga ki te lagolago ki te tauhi maʼa, neʼe foaki age e Sehova te fakatotonu ki te kau Iselaele: “ ʼE mole he tahi anai ʼe hā ia muʼa ʼo Sehova mo tona ʼu nima ʼātea. Ko te meʼa ʼofa ʼo te nima ʼo te tagata takitokotahi ʼe ʼalutahi anai mo te tapuakina ʼa Sehova, tou ʼAtua, ʼaē neʼe ina foaki atu.” (Teu. 16:16, 17). Peʼe siʼisiʼi peʼe maʼuhiga, ʼo ʼalutahi pe mo te ʼu faigamālie ʼaē ʼa te kau Iselaele takitokotahi, ko te ʼu mōlaga ʼaē neʼe teuteuʼi e te hahaʼi neʼe leleiʼia e Sehova. ʼO tatau aipe, tokolahi te ʼu tēhina ʼe nātou fakakaukauʼi ʼi te faikole ʼo ʼuhiga mo te mōlaga ka nātou fai, peʼe fai paʼaga peʼe fai seki (ʼo fakatuʼu ki te kau “Fakamoʼoni ʼa Sehova”). Neʼe kua tou tuku koa ʼatatou fānau ke nātou ʼai he meʼa ʼofa ki te kesi ʼaē ʼe fakaʼaogaʼi ki te faʼahi ʼaia?
13 Ke ia tatou te ako ʼo totatou hāofakiʼaga, te ʼAtua: ʼAki he ʼu aga ʼe lelei, ʼe feala ke “ia tatou katoa te ako ʼo totatou Hāofakiʼaga, te ʼAtua”. (Tito 2:10.) Ko tona faka ʼuhiga, ʼe feala ke tou fakahā ʼi te ʼu koga meʼa ʼaē ʼe fai ai te fakatahi ʼe tou maʼuliʼi te ako fakaʼatua.
14 Kaeā koa tatatou ʼu aga? ʼI te temi nei ʼi te mālama, kua tahitahiga te tokaga lelei ki te kāiga? Kae, ko te ʼu kaugana ʼa Sehova ʼaē ʼe nātou muliʼi te ʼu fakatuʼutuʼu ʼa te Tohi-Tapu ʼe mole nātou manatu kia nātou pe, kae ki tonatou kāiga (Filp. 2:4). ʼE tou tokaga lelei kia nātou ʼaē ʼi ʼotatou tafa: mokā ʼe tou tutuʼu moʼo toʼo meʼa kai peʼe ko te toʼo ʼo te ʼu tohi, ʼe mole tou faiga anai ke tou mumuʼa ia nātou ʼaē; tou fakaʼapaʼapa ki te hahaʼi matutuʼa pea mo te ʼu tamaliki ʼaē kei liliki ʼe lagi tutuʼu mo tanatou ʼu mātuʼa pea ʼe faigafua pe tonatou humuhumuki e te hahaʼi lalahi ʼaē ʼe mole nātou tokagaʼi.
15 Ko tatatou aga faka lotu ʼe fakatupu talatuʼu kia nātou ʼaē ʼio tatou tafa. ʼI te taʼu kua hili, ʼi he kolo neʼe fai ai he fakatahi, ko he tagata polisi neʼe gāue ʼi ai talu mai ia taʼu e 21 neʼe ina ʼui fēnei: “Ko te ako ʼaē neʼe hā ʼi takotou ʼu aga neʼe ʼau punamaʼuli ai. [ʼE koutou] lelei ʼaupito; ʼe koutou tae te ʼu ʼotaʼota kae mole fakatotonuʼi atu e he tahi, pea ʼe koutou aga fakatokatoka, ko takotou fakatahi neʼe teuteuʼi lelei.” Neʼe ina toe ʼui fēnei: ʼE koutou malimali mai kia mātou? ʼE ko he fakaʼiloga lelei. Ko te meʼa la ʼaia ʼe mātou kumi. ʼE hā mai ai ʼe koutou agaʼi kāiga pea ʼe mole ʼi ai he meʼa ʼe koutou fufū. ʼE mātou sio ai foki ki te ʼu fānau ʼe nātou nonofo mo tanatou ʼu mātuʼa pea ʼe fakatonutonuʼi nātou. Faka tui mai, ko te meʼa ʼaia ʼe lave kia te ʼau. ʼE ʼau fiafia ʼi te gāue ʼi henī.”
16 Ko he ʼu tagata pule ʼi he koga meʼa neʼe nātou ʼomai totonu ki te Petele ʼo fakaafe ke fai age he fakatahi ki tonatou kolo. Neʼe tali e te Sosiete tanatou fakaafe fonu ʼi te ʼofa, pea neʼe mole nātou fakahemala. Ko te tagata lagolago ʼo te pule ʼo te kolo neʼe ina ʼui fēnei: “ ʼE mātou fiafia lahi ʼaki pe te manatu ʼaē ke mātou sio ki he kaugamālie maʼuhiga ke nātou fakatahi ʼi tomatou kolo. Neʼe mātou fai ia meʼa fuli ke koutou ʼomai ai ki henī (...) pea ʼe mole he meʼa ʼe ina fakafiafia mātou ʼo lahi ake.” ʼUhi ko te lelei ʼo te aga ʼo te ʼu tēhina pea mo te ʼu tuagaʼane takitokotahi neʼe feala ai te foaki ʼo he fakamoʼoni lelei ʼi te kolo ʼaia.
17 ʼE ia tatou takitokotahi koa te ako ʼo totatou Hāofakiʼaga, te ʼAtua, ʼaki te lelei ʼo tatatou aga? ʼE feala ke tou fai ʼi te ʼu faʼahi kehekehe.
Teu pea mo te faʼu: ʼI tatatou kau ki te fakatahi, ʼe mole tonu anai ke tou ʼui ʼe tou mālōlō. ʼE tou ʼolo kia Sehova ke ina akoʼi tatou. Kapau ʼe feiā, ʼe mole tonu anai koa ke tatau totatou teu mokā tou ʼolo ʼaē ki te ʼu fono ʼi te Fale ʼo te Puleʼaga (1 Tim. 2:9, 10)? Tahi ʼaē meʼa, ʼe tonu anai ke tou tokaga ki ʼotatou ʼu mutuʼi meʼa ʼi te ʼosi ʼo te ʼu fakatahi. ʼI tatatou liliu ki totatou ʼapi, ʼe lelei anai koa, te fetogi ʼo totatou teu fakapoipoi ʼaki he teu ʼe mole maʼa ʼo tou hage ai leva ko te hahaʼi ʼo te mālama? ʼE mole hā ʼaki mai ai koa ko te ʼu mutuʼi meʼa ʼaē ʼe tou ʼai ki te ʼu fono ʼe ko he meʼa pe ia ʼi tuʼa kae mole ko te ʼata ia ʼo totatou maʼuli? Tou manatuʼi ʼe tou ʼamo te huafa ʼo Sehova, pea tou tokaga ke ʼaua naʼa fai mai he fakahalahala ki te ala ʼo te moʼoni.
Ke ʼaua naʼa galo ia nātou ʼaē ʼe papitema ʼe mole lelei anai ke tui he ʼu kofu sino ʼe tuʼu ʼi ai he ʼu paki pea mo he ʼu faʼahiga palalau ʼa te mālama ʼi te toʼotoʼoga ʼaia. ʼE tokaga anai te ʼu tagata ʼāfea ke fai fakatomuʼa te ʼu fehuʼi ʼo ʼuhiga mo te papitema, pea ke ʼiloʼi fakatomuʼa ʼe nātou ʼaē ka papitema peʼe nātou papitema peʼe kailoa. (ʼI te vakaʼi ʼaē ʼo te ʼu fehuʼi, ʼe lelei anai ke foaki ʼi te temi totonu he ʼu tokoni ʼo ʼuhiga mo te teu ʼe mata feʼauga pea mo matatau ki te papitema.) ʼE mole ʼui age anai kia nātou ʼaē ka papitema ke nātou ʼolo ʼo tohi ʼonatou higoa ʼi tanatou kaku atu ʼaē ki te fakatahi mokā neʼe tali e te ʼu tagata ʼāfea.
Ko te ʼu meʼa nofo: Ke tou maʼuliʼi te ʼu fua ʼo te laumālie mokā tou kaku ki te ʼu ʼapi ʼo te ʼu tēhina.
He koʼe ʼe mole tou vakaʼi faka famili peʼe feala ke tou tali he ʼu tēhina ʼe ʼomai mai te vao peʼe ko te ʼu motu. Ko te tali kāiga ʼe ko he tahi faʼahi ʼaia moʼo lagolago ʼo te ʼu meʼa ʼo te Puleʼaga ʼe tou foaki ai te time. ʼE tonu anai ke toʼo e te ʼu mātuʼa he temi ia muʼa ʼo te fakatahi ke nātou toe vakaʼi mo tanatou ʼu fānau te meʼa ʼaē ʼe tonu ke nātou fai ʼo ʼuhiga mo tanatou aga, ʼo fakamanatuʼi age kia nātou ko tonatou maʼua ke nātou maʼuliʼi te ʼu fakatuʼutuʼu faka kilisitiano ʼi tonatou maʼuli.
Te ʼu meʼa puke leʼo: Logope la te fakagafua ʼo te ʼu kamela viteo, ʼe feala tamatou falala ki takotou aga fakaʼapaʼapa. ʼE mole ko he agaofa anai ta kita pupunu te fia sio ʼa ʼihi ʼuhi ko ta kita fia fai fime. Kapau ʼe feala hakotou fai fime mai tokotou hekaʼaga ʼe mole ʼi ai he fakafihi ia ki te faʼahi ʼaia. Koutou fakatokagaʼi ʼe mole ʼi ai he foʼi fime peʼe ko he tahi meʼa puke leʼo ʼe fakapipiki ki te hila peʼe ki te fakatuʼutuʼu ʼo te mikolo ʼo te fakatahi, pea ke ʼaua naʼa ʼai he ʼu meʼa fai paki ʼi te faʼahi ʼaē ʼe feʼaluʼaki ai te hahaʼi.
Hekaʼaga: Koutou manatuʼi ʼo koutou TAUPAU PE HE ʼU HEKAʼAGA ʼO TOKOTOU FAMILI TOTONU PEA MO NĀTOU ʼAĒ NEʼE ʼOMAI MO KOUTOU. ʼI te ʼu fakatahi fuli ʼe ʼi ai te ʼu faʼahi ʼe tuku ki te hahaʼi matutuʼa pea mo nātou ʼaē ʼe māʼimoa. Koutou tokaga lelei ki te hahaʼi matutuʼa. ʼI muʼa, ko ʼihi tēhina matutuʼa neʼe nātou heheka ʼi te ʼu faʼahi ʼe mole lelei kia nātou koteʼuhi neʼe nofoʼi e te kau tūpulaga te ʼu hekaʼaga ʼaē neʼe fakatuʼutuʼu ki te hahaʼi matutuʼa. ʼE mātou fakalelei atu ʼuhi ko te mole feala ʼaē ʼo hamatou tāʼofi he ʼu faʼahi pe ko he ʼu koga fale maʼa nātou ʼaē ʼe mahamahaki.
Ko ʼatatou ʼu meʼa takitokotahi: ʼE koleʼi mai ke ʼaua naʼa lahi te ʼu meʼa ʼe tou ʼaumai ki te fakatahi. Kapau ʼe mole hū he faʼahiga meʼa ki tokotou hekaʼaga, ʼe tonu ke tuku ʼi tokotou ʼapi peʼe ki te taumuli ʼo te motokā. ʼO ʼuhiga mo te tokalelei, ko te ʼu ʼaisi taki lalahi ʼe mole feala tona tuku ki te faʼahi ʼaē ʼe tou haʼele ai, pea kapau ʼe koutou hili ki he hekaʼaga ʼio koutou tafa, ʼe mole koutou faka fealagia anai ki he tahi ke heka ʼi ai.
18 ʼAki totatou ʼofa ki te kāiga, tou fakatuʼutuʼu ke tou ʼomai fakatomuʼa ki te fakatahi ʼi te ʼaho fuli, tāfito te felianima, heʼe lagi loaloaga anai te temi ʼe fakaʼaoga moʼo tau ʼo te motokā pea mo kumi ʼo he lapalasi.
19 Ko te akoʼi ʼaē e Sehova ʼe ko he pilivilesio moʼoni. Kapau ʼe tou fakaʼaogaʼi totatou temi, totatou mālohi pea mo ʼatatou koloā fakamālama moʼo lagolago ki te fakatahi faka tisitilike ʼi te taʼu ʼaenī “ Ako fakaʼatua”, ko totatou famili pea mo tatou totonu ʼe tou maʼu anai he ʼu tapuakina loaloaga ʼi te faʼahi fakalaumālie.
Fakatahi faka tisitilike — Puani ke manatuʼi
Te ʼu aga ʼe tonu ke fai: ʼE maʼuhiga kia nātou fuli ʼaē ʼe kau ki te fakatahi ke lelei tanatou aga, ʼo nātou fakaʼapaʼapa ki te faʼahi ʼaē ʼe fai ai te fakatahi ohage ko “te fale ʼo te ʼAtua”. (Pes. 55:14.) Lolotoga te ʼu akonaki, te ʼu gaoʼi, te ʼu katiko pea tāfito te ʼu faikole, ke ʼaua naʼa koutou fai he meʼa ʼe fakatupu logoaʼa kia nātou ʼi te fakatahi. ʼE mole ko he aga fakaʼapaʼapa mokā ʼe tou feʼaluʼaki noa, peʼe fai palalau, peʼe ko te fakaʼaogaʼi ʼo he ʼu meʼa fai paki hila peʼe ko he ʼu viteo ke mata faigataʼa anai te mulimuli ʼanatou ʼaē ʼe faiga ke nātou muliʼi te akonaki ʼaē ʼe fai. ʼAki tatatou fakaʼapaʼapa pea mo te lelei ʼo tatatou aga, ʼe tou fakahā anai ʼe tou faka maʼuhigaʼi te ako fakaʼatua pea neʼe tou ʼomai ki te fakatahi ke akoʼi tatou e Sehova.
Meʼa nofo: Ko takotou kau ki te selevisi kumi meʼa nofo ʼe ko he meʼa lelei lahi.
Ko te ʼu sikalaipe ʼo te ʼu kokelekasio ʼe nātou fakatokaga ki te ʼu Kole pea mo te ʼu Foaki meʼa nofo ke fai mo ʼave fakatomuʼa ki te tuʼasila ʼaē ʼe tonu ke ʼave kiai. Kapau ʼe koutou fakafisi ki takotou kole ʼo ʼuhiga mo te meʼa nofo, faitohi fakavilivili ki te selevisi fakatuʼutuʼu ʼo te meʼa nofo, ke feala tana foaki te meʼa nofo ʼaia ki he tahi age.
Te ʼu saliote toho tamaliki: Ko ʼihi faʼahi, ʼe tapu te fakaʼaogaʼi ʼo te ʼu saliote toho tamaliki ʼi te ʼu fakatahi. Ko te ʼu fakatuʼutuʼu ki te hāofaki ʼe mole ina fakagafua ke tuku ʼi te ʼu haʼele ʼaga peʼe ʼi loto ʼo te ʼu ʼatu hekaʼaga. E lahi te hahaʼi ʼe feala ke nātou feʼiʼaki, ko te ʼu meʼa toho tamaliki ʼe fakatupu ai te ʼu tuʼutāmaki ki te ʼu toe kei liliki ʼo feiā foki ki te hahaʼi ʼaē ʼe feala anai ke fetokaʼi ki te ʼu toe. Koutou fakatokaga ke ʼaua naʼa koutou ʼaumai te ʼu meʼa ʼaia ki te fakatahi. Kae, ko te ʼu hekaʼaga toe peʼe ko te ʼu hekaʼaga ʼaē ʼe nātou nonofo ai ʼi te motokā, ʼe feala ke fakapipiki e te ʼu mātuʼa ki he hekaʼaga ʼi ʼonatou tafa. Ko te logo tahi ʼi te faʼahi ʼaia ʼe ʼaoga ʼaupito.
Papitema: Ko nātou ʼaē ʼe papitema ʼe nātou faiga anai ʼo nātou heheka ʼi te ʼu hekaʼaga ʼaē ʼi muʼa, ia muʼa ʼo te kamata ʼo te fakatahi ʼi te moeaki uhu. Ke nātou tahi maʼu honatou teu maʼanu ʼe mata fakaʼapaʼapa pea mo he tupenu holoholo. ʼI te ʼosi fai ʼo te akonaki ʼo te papitema pea mo te faikole, ko te taupau pelesitā ʼo te fakatahi ʼe ina fakahā anai he ʼu fakatuʼutuʼu kia nātou ʼaē ʼe papitema, pea ʼosi pea ina fakahivaʼi te katiko. ʼI te ʼosi ʼo te katiko, ko nātou ʼaē ʼe kau ki te gāue fakatalitali ʼe nātou taki anai ia nātou ʼe kau ki te papitema ki te faʼahi ʼaē ʼe fai ai peʼe ki te ʼu motokā ʼaē ʼe ʼave ai nātou. Ko te papitema ko te fakatā ʼo te foaki ʼo kita, koia ʼe ko he meʼa ʼa kita tokotahi pea mo Sehova, ʼe mole fai he ʼu fakatuʼutuʼu ke fai he ʼu fai papitema “faka kaugā” ʼo he tokolua peʼe tokolahi ʼe fāʼufua peʼe nā tapiki lolotoga te hū ʼaē ki te vai.
Selevisi kia nātou ʼe fia gāue: Ko te tokoni ʼa nātou ʼe fia gāue ʼe ʼaoga ki te fakaʼalu lelei ʼo te fakatahi faka tisitilike. Tatau aipe peʼe koutou gāue kogaʼi ʼaho pe ʼi te fakatahi, ko takotou tokoni ʼe ko he meʼa ʼe leleiʼia anai. Kapau ʼe feala takotou tokoni, koutou ʼolo kia ia ʼaē neʼe hinoʼi ki te faʼahi ʼaia mokā koutou aʼu mai ki te fakatahi. Ko te ʼu toe ʼaē ʼe mole heʼeki katoa tonatou taʼu 16 ʼe feala tanatou kau ki te gāue ʼi te fakatahi, kae ʼe tonu ke nātou gāue tahi mo tanatou matuʼa, tanatou faʼe peʼe ko he tahi ʼatu kua aga fakapotopoto.
Te ʼu pepa fakaʼiloga: Koutou ʼai takotou pepa fakaʼiloga, ʼi te fakatahi ʼo tatau aipe mo takotou ʼu feʼaluʼaki haʼele pea mo takotou liliu. ʼE feala ai takotou tuku he faʼifaʼitaki lelei.
Ko he fakaʼiloga: ʼO mole gata ʼaki pe te pepa fakaʼiloga ʼaē ʼo te fakatahi “Akonaki fakaʼatua”, ʼe fakaloto mālohiʼi mai tatou ke ia tatou te foʼi kate “instructions medicales”. Ko nātou ʼaē ʼe kau ki te famili ʼo te Petele pea mo te kau pionie ʼe tonu ke ia nātou tuʼumaʼu tanatou ʼu carte dʼidentité pea mo te faʼahi ʼaē ʼe nātou gāue ai.
Te ʼu fakatokaga: ʼI te faʼahi ʼaē ʼe koutou tau ai takotou motokā, māpunuʼi tuʼumaʼu te ʼu matapā ʼo kalaviʼi pea ʼaua naʼa tuku he ʼu faʼahiga meʼa ʼo feala ke sioʼi e te hahaʼi ʼaē ʼe feʼaluʼaki ʼi te ala. Kapau ʼe feala, māpunuʼi takotou ʼu meʼa ʼi te taumuli ʼo takotou motokā. ʼAua naʼa tuku fakahāhā he meʼa maʼuhiga ʼi tokotou hekaʼaga. Ko he ʼu fakatokaga ʼo ʼuhiga mo ni hahaʼi neʼe nātou faigaʼi ke mavae te ʼu tamaliki ʼaē kei liliki ki tuʼa ʼi te faʼahi ʼaē ʼe fai ai te fakatahi. Koutou nonofo tokaga.