Neʼe Nātou Fai Te Finegalo ʼo Te ʼAtua

ʼE Fekauʼi e Sesu Tana Kau Tisipulo e Toko 70

NEʼE ko te fasiga taʼu fakatōlau ʼo te taʼu 32 ʼo totatou temi. Neʼe kei toe pe te ʼu kiʼi māhina e ono pea matehi anai ia Sesu. Koia, moʼo fai fakavilivili te gāue fai faka mafola pea mo fakakatoa te akoʼi ʼo te hahaʼi ʼaē neʼe mulimuli kia te ia, neʼe hinoʼi e Sesu tana kau tisipulo e toko 70 ʼo ina “fekauʼi taki toko lua ia nātou, ke nātou muʼamuʼa ia te ia ʼo hū ki te ʼu kolo pea mo te ʼu koga meʼa fuli pe ʼaē neʼe ʼamanaki ke ʼalu tonu kiai.”​—Luka 10:1.a

Neʼe fekauʼi e Sesu tana kau tisipulo “ke nātou muʼamuʼa ia te ia,” ke feala ki te hahaʼi ke nātou foimo ʼiloʼi, pe neʼe nātou fia lagolago peʼe fakafeagai ki te Mesia ʼi te temi ʼaē ʼe haʼu ai anai ia Sesu totonu. Kae he koʼe neʼe ina fekauʼi “taki toko lua” ia nātou? ʼE hā mai, neʼe ina fai te faʼahi ʼaia ke nā fefakaloto mālohiʼaki mokā fai age he ʼu fakafeagai.

ʼI tana fakahā ia te maʼuhiga ʼo te gāue fai faka mafola, neʼe ʼui e Sesu ki tana kau tisipulo: “ ʼIo ko te taʼukai ʼe lahi, kaʼe tokosiʼi te kau gāue. Koia ke koutou kole ki te Pule ʼo te taʼukai ke ina fekauʼi mai he kau gāue ki tana taʼukai.” (Luka 10:2) Neʼe lelei te fakaʼaogaʼi e Sesu te fakatātā ʼo te taʼukai, heʼe kapau neʼe nātou tauhala ʼi te gāue ʼo te taʼukai, pea ʼe maumau noa anai te ʼu fua ʼo te kele. ʼO toe feiā pe mo te kau tisipulo, kapau neʼe nātou meʼa noaʼi tonatou maʼua ʼaē ko te fai faka mafola, pea ʼe mamate anai he ʼu hahaʼi!​—Esekiele 33:6.

Ko He Kau Minisi Neʼe Nātou Tokagaʼi Tāfito Tonatou Minisitelio

Neʼe toe fakatotonu fēnei e Sesu ki tana kau tisipulo: “ ʼAua naʼa koutou ʼave he taga paʼaga, pe ko he kato fafaʼo meʼa kai, pe ko he ʼu tapugā vaʼe, pea ʼaua naʼa koutou fāʼufua ki he tahi ʼi te ala moʼo fefakaʼalofaʼaki.” (Luka 10:4) ʼI te agamāhani, neʼe ʼave e te tagata folau hana kato fafaʼo meʼa kai pea mo hana ʼu tapugā vaʼe foʼou, koteʼuhi neʼe feala ke maumau te lalo sūlie pea mo motu te meʼa haʼi sūlie. Kae neʼe mole tuʼania te kau tisipulo ʼa Sesu ki te ʼu meʼa ʼaia. Neʼe tonu ke nātou falala, ʼe taupau anai nātou e Sehova ʼo ina fakaʼaogaʼi te tahi ʼu hahaʼi Iselaelite, ʼaē neʼe ko tanatou agaʼi fenua te tali kāiga.

Kae he koʼe neʼe tala age e Sesu ki tana kau tisipulo, ke mole nātou fāʼufua ki he tahi moʼo fakaʼalofa ki ai? Neʼe tonu koa ke nātou fakamamaʼo ʼi te hahaʼi, peʼe ke nātou heʼe fakaʼapaʼapa? Kailoa ia! Ko te kupu faka Keleka ko a·spaʹzo·mai, ʼaē ʼe faka ʼuhiga ki te fāʼufua ʼo kita ki he fakaʼalofa, neʼe mole gata pe ki takita ʼui ʼaē “mālo te maʼuli” peʼe “mālo siʼi ʼau kātaki.” Neʼe toe faka ʼuhiga foki ki te ʼu fekita, mo te fefāʼufuaʼaki, pea mo te fai palalau ʼa he toko lua ʼi tanā fakafetaulaki ʼi te ala. ʼE ʼui fēnei e te tagata ʼe ina sivi te ʼu agaʼi fenua: “Ko te ʼu fakaʼalofa ʼi te ʼu fenua ʼo te Potu Hahake, neʼe mole gata pe ki takita fai ʼaki te ʼulu peʼe ʼaki te nima, ohage ko tatatou fai ʼi te ʼu fenua ʼo te Potu Hihifo, kae neʼe nātou fāʼufua, pea mo punou, pea māʼiape la mo tanatou tulolo ʼi te kele. Neʼe ʼaoga kia nātou he temi lahi moʼo fai ai te ʼu meʼa fuli ʼaia.” (Vakaʼi ia 2 Hau 4:​29.) Koia, neʼe tokoni age ia Sesu ki tana kau tisipulo ke nātou līaki te ʼu meʼa ʼaē neʼe mole maʼuhiga, tatau aipe pe neʼe ko he ʼu agaʼi fenua.

Moʼo fakaʼosi, neʼe tala age e Sesu ki tana kau tisipulo, mokā nātou hū ki he ʼapi ʼe tali ai nātou, pea ʼe tonu ke nātou “nonofo ʼi te ʼapi ʼaia, ʼo [nātou] kai pea mo ʼinu te ʼu meʼa ʼaē ka . . . foaki” age anai kia nātou. Kae kapau ʼe nātou hū ki he kolo pea ʼe mole tali lelei ai nātou, pea ʼe tonu ke nātou “ ʼolo ki tona ʼu ala lalahi pea mo [nātou] ʼui, ‘Māʼia mo te efu ʼo tokotou kolo ʼaē kua pipiki ki ʼomātou ʼu vaʼe, ʼe mātou holoholoʼi ʼo fakafeagai kia koutou.’ ” (Luka 10:​7, 10, 11) Ko te holoholoʼi e te kau tisipulo ʼonatou ʼu vaʼe ko tona faka ʼuhiga, neʼe nātou tuku ke fakahoko e te ʼAtua te meʼa ʼaē neʼe loto kiai ki te ʼapi ʼaia peʼe ko te kolo ʼaē neʼe mole tali lelei ai nātou. Kae ko nātou ʼaē neʼe nātou tali fakaleleiʼi te kau tisipulo ʼa Sesu, ʼe nātou maʼu anai he ʼu tapuakina ʼuhi ko tanatou aga ʼaia. ʼI te tahi lakaga, neʼe ʼui fēnei e Sesu ki tana kau ʼapositolo: “Ko ʼaē ʼe ina tali koutou, ʼe ina toe tali mo ʼau, pea ko ʼaē ʼe ina tali ʼau ʼe ina toe tali foki mo ia ʼaē neʼe ina fekauʼi mai ʼau. Pea ko ʼaē ʼe ina foaki moʼo ʼinu he ipu vai momoko pe e tahi ki he tahi ia nātou liliki ʼaenī, koteʼuhi he ko te tisipulo, ʼe ʼau tala moʼoni atu kia koutou, kailoa, ʼe mole hala anai ia ʼi tona fakapale.”​—Mateo 10:40, 42.

Ko Te Ako Kia Tatou

Ko te maʼua ʼaē ko te faka mafola ʼo te logo lelei ʼo te Puleʼaga ʼa te ʼAtua pea mo te fai ʼo ni ʼu tisipulo, ʼe fakahoko ia ʼaho nei e te kau Fakamoʼoni ʼa Sehova e toko 5 000 000 tupu ʼi te malamanei katoa. (Mateo 24:14; 28:19, 20) ʼE mahino kia nātou, ʼe maʼuhiga te meʼa ʼaē ʼe nātou fagonogono ki te hahaʼi. Koia, ʼe nātou fakaʼaogaʼi fakalelei tonatou temi, ʼo nātou līaki te ʼu meʼa fuli ʼaē ʼe feala ke nātou fakatātāʼofi ia nātou ʼi tanatou tokagaʼi tāfito te gāue maʼuhiga ʼaē neʼe tuku age kia nātou.

ʼE faiga te kau Fakamoʼoni ʼa Sehova ke nātou agalelei ki te hahaʼi fuli ʼaē ʼe nātou felāveʼi mo nātou. Kae ʼe mole nātou fai palalau mo nātou ʼo ʼuhiga mo he ʼu meʼa laulaunoa, pea ʼe mole nātou fakafifihi mo te hahaʼi ʼo ʼuhiga mo te ʼu faigataʼaʼia faka sosiale pea mo te mole feala ʼaē ke fakatokatoka e te ʼu puleʼaga te ʼu meʼa heʼe faitotonu ʼaē ʼe hoko. (Soane 17:16) Kae ʼe nātou faka maʼuhigaʼi tanatou fai palalau ʼo ʼuhiga mo te puleʼaki pe ʼaē e tahi ki te ʼu fihifihia ʼo te malamanei: te Puleʼaga ʼo te ʼAtua.

ʼI te agamāhani, ʼe ʼolo taki toko lua te kau Fakamoʼoni ʼa Sehova. Kae ʼe mole lahi age anai koa la tanatou gāue mo kapau neʼe nātou ʼolo takitokotahi? ʼE lagi moʼoni te faʼahi ʼaia. Kae ia ʼaho nei, kua mahino ki te kau Kilisitiano, ʼe ʼaoga tanatou ʼolo fakatahi mo he tahi Kilisitiano. ʼE ko he puipui ʼaia mokā nātou ʼolo ʼo fai faka mafola ʼi he ʼu koga meʼa ʼe feala ke nātou tuʼutāmaki ai. Ko te gāue fakatahi mo he tahi Kilisitiano, ʼe ko he faka fealagia ʼaia kia nātou ʼaē ʼe foʼofoʼou ʼi te gāue fai faka mafola ke nātou ako he ʼu meʼa ia nātou ʼaē kua faiva ʼi te faka mafola ʼo te logo lelei. ʼE moʼoni, ʼe feala ki te ʼu Kilisitiano ʼaia e toko lua ke nā fefakaloto mālohiʼaki.​—Tāʼaga Lea 27:17.

ʼE mahino papau ia, ko te gāue fai faka mafola ʼe ko te gāue maʼuhiga tāfito ʼaia ʼaē ʼe lolotoga hoko ʼi te ʼu “ ʼaho fakamuli” ʼaenī. (2 Timoteo 3:1) ʼE fiafia te kau Fakamoʼoni ʼa Sehova ʼi tanatou maʼu ʼo he famili fakatautehina ʼi te malamanei katoa, ʼe feala ai ke nātou gāue “fakatahi maʼa te tui ʼo te logo lelei.”​—Filipe 1:​27.

[Nota ʼi te lalo pasina]