Ko Ai Koa Ia Sehova?

NEʼE ʼui fēnei e Sehova ki tana tahi tagata kaugana agatonu: “ ʼE mole he tagata ʼe feala ke sio kia te ʼau pea ke maʼuli.” (Ekesote 33:20) “Ko te ʼAtua ʼe Laumālie,” pea ʼe mole feala ke sio te tagata kia te ia ʼaki tona ʼu mata. (Soane 4:24) Ohage pe ko te kovi anai ʼo tatatou ʼu mata mokā tou sioʼi te laʼā ʼi te fetapā, ʼo toe feiā aipe ʼe feala ke tou mamate mo kapau ʼe tou sio ki te Matapuna lahi ʼaupito ʼo te mālohi ʼaē neʼe ina fakatupu tatatou laʼā, pea mo te tahi ʼatu ʼu fetuʼu ʼi te ʼatulaulau.

Meʼa fakafiafia foki, he mole ʼaoga ke tou sio ki te ʼAtua ke tou ʼiloʼi ai pe ko ai ia ia. ʼE fakahā mai e te Tohi-Tapu te higoa ʼo Ia ʼaē neʼe ina teuteuʼi maʼa tatou te meʼa ʼofa lahi ʼaia, ʼaē ko te kele, pea ʼe ina fakahā mai peʼe feafeaʼi tona ʼulugaaga. Koia, ʼe tāu mo feʼauga ke tou vakaʼi te Tohi-Tapu ke tou ʼiloʼi ai pe ko ai te Tāmai ʼaē neʼe ina foaki mai te maʼuli pea mo te nofoʼaga matalelei ʼaē ʼe tou maʼuʼuli fiafia ai.

Te Faka ʼUhiga ʼo Tona Huafa

ʼE maʼu e te ʼu higoa fuli tonatou faka ʼuhiga, tatau aipe peʼe tokolahi ia ʼaho nei ʼe mole nātou tokagaʼi te faʼahi ʼaia. Ohage la ko te higoa ʼo Tavite, ʼe haʼu mai te kupu faka Hepeleo ʼaē ko tona faka ʼuhiga ko “ ʼOfainaʼi.” Ko te huafa ʼo te Tupuʼaga, ʼaē ko Sehova, ʼe toe ʼi ai foki mo tona faka ʼuhiga. Koteā tona faka ʼuhiga ʼaia? ʼI te lea faka Hepeleo ʼo te Tohi-Tapu, neʼe tohi te huafa ʼo te ʼAtua ʼaki te ʼu mataʼi tohi e fā, YHWH, pea ʼe teitei hā tuʼa 7 000 ʼi te ʼu Tohi Faka Hepeleo. Ko te huafa ʼo te ʼAtua ko tona faka ʼuhiga “ ʼE Ina Fakahoko.” ʼAki te poto, ʼe fakahoko e Sehova te ʼu meʼa fuli ʼaē ʼe ʼaoga kia te ia moʼo fakahoko tana ʼu fakatuʼutuʼu. ʼE ko ia te Tupuʼaga, te Tuʼi Fakamāu, te Hāofakiʼaga, te Matapuna ʼo te Maʼuli, koia la ʼaia, ʼe feala ke ina fakahoko tana ʼu fakapapau. Pea ʼi te lea faka Hepeleo, ko te huafa ʼo Sehova ʼe faka ʼuhiga ki he gāue ʼe lolotoga fai. Ei, ʼe fakaliliu e Sehova ia ia totonu ke ina fakahoko tana ʼu fakatuʼutuʼu. ʼE ko he ʼAtua maʼuli!

Te ʼu Kalitate Maʼuhiga ʼa Sehova

ʼE fakahā mai e te Tohi-Tapu ko te Tupuʼaga ʼe ko he “ ʼAtua agaʼofa pea mo manavaʼofa, tuai ʼi te ʼita pea mo mohu ʼi te lotoʼofa pea mo te moʼoni, ʼe ina taupau tona lotoʼofa ki te ʼu lauʼi afe hahaʼi, ʼo ina fakamolemole te hala mo te talagataʼa pea mo te agahala.” (Ekesote 34:​6, 7) Ko te kupu “lotoʼofa” ʼe ko te fakaliliu ʼo te kupu faka Hepeleo ʼe maʼuhiga ʼaupito. ʼE ina fakahā he lotoʼofa ʼe pipiki ki he meʼa ʼo aʼu ki te fakahoko ʼo tana fakatuʼutuʼu. ʼE feala ke toe fakaliliu ʼaki te kupu “ ʼofa agatonu.” Ko te lotoʼofa ʼo Sehova ʼe pipiki ki te hahaʼi ʼaē neʼe ina fakatupu pea ʼe ina fakahoko tana ʼu fakatuʼutuʼu fakaofoofo. ʼE mole koutou leleiʼia koa la te ʼofa ʼaia ʼo Ia ʼaē neʼe ina foaki atu te maʼuli?

ʼE tuai ia Sehova ʼi te ʼita pea ʼe ina fakamolemole vave tatatou ʼu hala. ʼE ko he meʼa fakaloto māfana hatatou kaumeʼa lelei mo he tahi feiā. Kae ʼe mole faka ʼuhiga leva ʼe ina tali te agakovi ʼaē ʼe tou fai. Neʼe ina ʼui fēnei: “Ko ʼau, Sehova, ʼe ʼau ʼofa ki te faitotonu, ʼe ʼau fehiʼa ki te kaihaʼa ʼo feiā pea mo te heʼe faitotonu.” (Isaia 61:8) ʼI tona ʼuhiga ʼAtua ʼo te faitotonu, ʼe mole ina kātakiʼi fualoa anai te hahaʼi agahala mo fiatuʼu ʼaē ʼe hoko atu tanatou agakovi. Koia, tou tui papau ko Sehova, ʼi tona temi totonu, ʼe ina fakatonutonuʼi anai te ʼu aga heʼe faitotonu ʼaē ʼe hoko ʼi te malamanei. ʼE mole ina tuku feiā anai ia ia ʼaē ʼe mamahi.

ʼE mole ko he meʼa faigafua hatatou taupau he fakafuafua lelei ʼi te ʼofa pea mo te faitotonu. Kapau ʼe koutou maʼu fānau, ʼe koutou manatu koa ʼe faigataʼa te ʼiloʼi ʼaē pe ko ʼafea ʼaē ʼe tonu ai ke koutou fakatonutonuʼi takotou fānau, peʼe tonu ke fakahoko feafeaʼi pea koteā anai te fakatonutonuʼi ʼaē ka koutou fai kia nātou mokā neʼe kovi tanatou aga? Ke feala hatatou fakafuafua lelei te faitotonu pea mo te ʼofa, ʼe tonu ke tou maʼu te poto. ʼE ko te kalitate ʼaia ʼaē ʼe lahi tona fakahā e Sehova ʼi tana ʼu felogoi mo te hahaʼi. (Loma 11:33-36) Tahi ʼaē meʼa, ʼe feala ke tou sio ki te poto ʼo te Tupuʼaga ʼi te ʼu potu fuli, ohage la ko te ʼu meʼa matalelei ʼaē neʼe ina fakatupu ʼi totatou ʼu tafaʼaki.​—Pesalemo 104:24; Tāʼaga Lea 3:​19.

Kae ʼe mole feʼauga pe te maʼu ʼo te poto. Moʼo fakahoko tona finegalo, ʼe toe maʼua foki ki te Tupuʼaga ke ina maʼu te mālohi, pea ʼe fakahā e te Tohi-Tapu ʼe mālohi ʼaupito: “Hiki ʼokotou ʼu mata ki ʼoluga pea koutou sio. Ko ai koa ʼaē neʼe ina fakatupu te ʼu meʼa ʼaia? Ko Ia ʼaē neʼe ina fakaʼasi mai ki tuʼa ʼonatou kautau ʼo fai pe ki tonatou kaugamālie, pea ina pāui fuli nātou ʼi ʼonatou higoa. ʼI te lahi ʼo te mālohi, heʼe mālohi foki ia ʼi tona māfimāfi, ʼe mole puli he tahi ia nātou.” (Isaia 40:26) ʼI “te lahi ʼo [tona] mālohi,” ʼe fakahoko e Sehova te ʼu meʼa. Ko tona kalitate ʼaia, ʼe mole ina fakaōvi koa la koutou kia te ia?

Te ʼAtua ʼo Te ʼu Fenua Fuli

ʼE lagi koutou feʼekeʼaki anai: ‘Kae ko Sehova ʼe mole koa la ko te ʼAtua ʼo te “Tauhi ʼĀfea,” te ʼAtua ʼo te Iselaele ʼo te temi muʼa?’ ʼE moʼoni, ko Sehova neʼe ina fakahā ia ia totonu ki te kau Iselaelite. Kae mai tona ʼaluʼaga ʼaē neʼe ko ia ʼaē neʼe ina fakatupu te ʼuluaki taumatuʼa, ʼe ko Sehova te ʼAtua “ ʼaē ʼe maʼu ai e te famili katoa ʼi . . . te kele tonatou higoa.” (Efesi 3:​15) Kapau ʼe koutou tui ʼe tonu ke koutou fakaʼapaʼapa ki takotou ʼu kui, pea ʼe mole tonu koa la ke koutou fakalogo kia Ia ʼaē neʼe ina foaki te maʼuli ki te ʼuluaki tagata, totatou kui, ʼaē ʼe haʼu mai ai te ʼu taʼiake fuli ʼi te kele ʼi te temi ʼaenī?

Ko te Tupuʼaga ʼo te malamanei ʼe mole ina fakapalatahi. ʼE moʼoni, ʼi te tahi temi, neʼe ʼi ai tana ʼu felogoi makehe mo te puleʼaga ʼo Iselaele. Kae ʼi te temi ʼaia, neʼe ina tali ia nātou fuli ʼaē neʼe nātou fetapā ki tona huafa. Neʼe ʼui fēnei e te hau poto ʼo Iselaele kia Sehova: “Ki te matāpule, ʼaē ʼe mole kau ki tau hahaʼi ko Iselaele, ʼaē ʼe haʼu moʼoni mai he fenua mamaʼo ʼuhi ko tou huafa . . . , ke ke fagono mai te lagi, . . . pea mo ke fai ʼo mulimuli ki te ʼu meʼa fuli ʼaē ʼe kole atu e te matāpule; ke ʼiloʼi ai tou huafa e te hahaʼi katoa ʼo te kele.” (1 Hau 8:​41-43) ʼO aʼu mai ki te temi ʼaenī, ʼe feala ki te hahaʼi ʼo te ʼu fenua fuli pe ke ʼōmai ke nātou ʼiloʼi ia Sehova pea mo nātou maʼu he ʼu felogoi maʼuhiga mo ia. Kae ʼe tonu ke lave feafeaʼi te faʼahi ʼaia kia koutou?

Te ʼu Fua Lelei ʼo Te ʼIloʼi ʼo Sehova

Ohage ko te fakatātā ʼaē neʼe tou fakaʼaogaʼi ʼi te ʼuluaki alatike, kapau ʼe koutou maʼu he meʼa ʼofa matalelei, ʼe mahino ia, ʼe koutou fia ʼiloʼi anai te meʼa ʼaē ʼe feala ke koutou fai mo te meʼa ʼofa ʼaia. E feafeaʼi anai koa tona fakaʼaogaʼi pea mo tona taupau? ʼO toe feiā aipe, ʼe tou fia ʼiloʼi te meʼa ʼaē neʼe manatu kiai te ʼAtua ʼi tana teuteuʼi te kele maʼa tatou. ʼE ʼui e te Tohi-Tapu “neʼe mole ina fakatupu noa” te kele, kae “neʼe ina faʼu ke nofoʼi” e te tagata.​—Isaia 45:18.

Kae tokolahi te hahaʼi neʼe mole nātou taupau fakalelei te meʼa ʼofa ʼo te Tupuʼaga. ʼE nātou lolotoga maumauʼi te kele, pea ʼe lotomamahi ʼaupito ai ia Sehova. Kae ʼo mulimuli ki te faka ʼuhiga ʼo tona huafa, ʼe fakahoko moʼoni anai e Sehova tana fakatuʼutuʼu ʼaē neʼe ina fai ʼi te kamataʼaga ʼo ʼuhiga mo te tagata pea mo te kele. (Pesalemo 115:16; Fakahā 11:18) ʼE ina fakatokatoka anai te kele pea mo ina foaki faka tofiʼa anai kia nātou ʼaē ʼe nātou fia maʼuʼuli ohage ko hana ʼu tamaliki fakalogo.​—Mateo 5:5.

ʼE fakamatala e te tohi fakamuli ʼo te Tohi-Tapu peʼe feafeaʼi anai te ʼu meʼa mokā hoko te faʼahi ʼaia: “Koʼeni! Ko te fale fehikitaki ʼo te ʼAtua ʼe nofo mo te hahaʼi, pea ʼe nofo anai mo nātou, pea ʼe nātou liliu anai ko tana ʼu hahaʼi. . . . Pea ʼe ina holoholoʼi anai te ʼu loʼimata fuli pe ʼi ʼonatou mata, pea ko te mate ʼe puli anai ia; ʼe mole toe ʼi ai anai he putu, he kekē, he mamahi. Ko te ʼu meʼa ʼāfea kua puli ia.” (Fakahā 21:​3, 4) ʼE mole he tahi ʼe tagi anai ʼi tana lotomamahi peʼe putu anai he kua mate he tahi neʼe ʼofa ai. ʼE mole he tahi ʼe kalaga anai ke tokoni age he tahi ki ai peʼe mamahi anai ʼi he ʼu mahaki fakatupu mate. Māʼia mo “te mate ʼe tonu ke fakaʼauha.” (1 Kolonito 15:26; Isaia 25:8; 33:24) ʼE ko he fakamatala lelei ʼaia ʼo te faʼahiga maʼuli ʼaē neʼe loto kiai e Sehova ke tou maʼu ʼi te kamataʼaga, ʼi tana fakatupu totatou ʼu ʼuluaki kui.

Kae ʼi te temi nei, ʼe feala ke koutou sio ki te ʼu ʼaluʼaga faka palatiso ʼi te lotolotoiga ʼo te kau atolasio ʼa Sehova. ʼE ina ʼui fēnei kia nātou: “Ko ʼau, Sehova, ko ʼau tou ʼAtua, ia Ia ʼaē ʼe ina akoʼi koe ke ʼaoga kia te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai.” (Isaia 48:17) Ko Sehova ʼe ko he Tāmai agalelei ʼe ina akoʼi mai kia tatou, ʼaē ko tana ʼu fānau, te faʼahiga maʼuli ʼaē ʼe lelei tokotahi. Ko tana ʼu fakatotonu ki te hahaʼi ʼe ko he puipui ʼofa, kae mole ko he ʼu tuʼakoi fefeka. Ko te mulimuli ki te ʼu fakatotonu ʼaia ʼe iku anai ki he ʼāteaina pea mo he fiafia moʼoni, ohage ko tona tohi ʼaenī: “Ko Sehova ʼe Laumālie, pea ʼi te faʼahi ʼaē ʼe nofo ai te laumālie ʼo Sehova, ʼi te faʼahi ʼaia ʼe ʼi ai te ʼāteaina.” (2 Kolonito 3:​17) ʼI tanatou mulimuli ki te ʼu fakatotonu ʼaē ʼe tuʼu ʼi te Tohi-Tapu, ko nātou ʼaē ʼe nātou tali tona pule ʼe nātou ʼiloʼi ʼi te temi ʼaenī te tokalelei ʼo te ʼatamai, ʼaē ka mafola anai ʼi he ʼaho ki te hahaʼi ʼi te malamanei katoa.​—Filipe 4:7.

ʼI Tāmai agaʼofa leva ko Sehova! ʼE koutou fia ʼiloʼi koa he tahi ʼu meʼa ʼo ʼuhiga mo Ia ʼaē neʼe ina fakatupu te ʼu meʼa matalelei fuli? Ko nātou ʼaē ʼe nātou loto kiai, ʼe lahi te ʼu tapuakina ʼaē ʼe nātou maʼu ʼi te temi ʼaenī. Pea ʼi te temi ka haʼu, ʼe heʼegata anai te ʼu tapuakina ʼaia.

[Paki ʼo te pasina 5]

Ko te huafa ʼo te ʼAtua ʼe tohi ʼaki te ʼu mataʼi tohi faka Hepeleo e fā, pea ʼe lahi te ʼu ʼēkelesia ʼāfea ʼe tohi ai te huafa ʼaia ʼi tonatou ʼu kaupā