ʼE Koutou Lava Fakahā Feafeaʼi Te Agavaivai Moʼoni?
ʼE MAʼUHIGA ʼaupito te agavaivai moʼoni kia mata ʼo te ʼAtua. Neʼe tohi fēnei e Sake: “Ko te ʼAtua ʼe fakafeagai ki te kau fialahi, kae ʼe ina foaki tona ʼofa makehe ki te kau agavaivai.” (Sake 4:6) ʼI te vaega ʼaia, neʼe lagi manatuʼi e Sake te tahi ʼu manatu neʼe fakahā ʼi te ʼu Tohi Faka Hepeleo. “Ko Sehova ʼe māʼoluga, kae ʼe sio kia ia ʼaē ʼe agavaivai; kae ko ia ʼaē ʼe fialahi, ʼe mamaʼo ia te ia.” “Ko te ʼu mata fialahi ʼo te tagata kelekele ʼe fakamālaloʼi anai, pea ko te fiatuʼu ʼo te tagata ʼe tonu anai ke peluki ifo; pea ko Sehova tokotahi pe ʼaē ka hikihiki.” “Kapau ko nātou ko te kau vāvā, pea ʼe vāʼi anai nātou [e te ʼAtua totonu]; kae ʼe ʼofa anai kia nātou ʼaē ʼe agavaivai.”—Pesalemo 138:6; Isaia 2:11; Tāʼaga Lea 3:34.
Ko te ʼapositolo ko Petelo neʼe ina toe fakaloto mālohiʼi foki tatou ke tou agavaivai. Neʼe ina tohi fēnei: “[Ko] koutou fuli, koutou noʼo ia koutou ʼaki te loto agavaivai, heʼe fakafeagai te ʼAtua kia nātou ʼaē ʼe fialahi, kae ʼe ina foaki tona ʼofa makehe kia nātou ʼaē ʼe agavaivai.”—1 Petelo 5:5.
Ko Te Faʼifaʼitaki ʼa Kilisito ʼo ʼUhiga Mo Te Agavaivai
ʼE lagi koutou feʼekeʼaki anai, pe koteā tona ʼaoga ke tou agavaivai? ʼE maʼuhiga ʼaupito te tali ki te fehuʼi ʼaia kia nātou ʼaē ʼe nātou faiga ke nātou maʼuliʼi te lotu faka Kilisitiano, heʼe kapau ʼe nātou agavaivai, pea ʼe nātou faʼifaʼitaki kia Kilisito. Neʼe fakahā e Sesu te taʼi agavaivai ʼaia ʼi tana tali ke fekauʼi ia ia mai selo ki te kele, pea ke tupu tagata, ʼo mālalo age ʼi te kau ʼaselo. (Hepeleo 2:7) Logope la neʼe ko te ʼAlo ʼo te ʼAtua, kae neʼe ina kātakiʼi tona fakalainoaʼi e te kau takitaki lotu ʼaē neʼe fakafeagai kia te ia. Neʼe lotoʼutaki ʼi tana ʼu ʼahiʼahi ʼaia, logope la neʼe feala ke ina pāui he ʼu ʼaselo ke ʼōmai ʼo tokoni age kia te ia.—Mateo 26:53.
Moʼo fakaʼosi, neʼe tautau Sesu ki te pou fakamamahi ʼi he ʼaluʼaga fakaufiufi, kae neʼe nofo agatonu aipe ki tana Tāmai. Koia, neʼe tohi ai e Paulo ʼo ʼuhiga mo ia: “Koutou taupau te loto ʼaia neʼe ia Kilisito Sesu, logope tana maʼuli ʼi te natula ʼo te ʼAtua, neʼe mole manatu ia ki he faʼao tuʼulaga, ke liliu ai ʼo tatau mo te ʼAtua. Kailoa ia, kae neʼe ina fakanoaʼi ia ia totonu, pea mo liliu ai ko he kaugana, ʼo liliu ohage ko he tagata. Tahi ʼaē meʼa, ʼi tana liliu leva ʼo tagata, neʼe ina fakamālaloʼi ia ia totonu pea neʼe liliu ʼo talagafua ʼo aʼu ki te mate, ʼio, ki te mate ʼi he pou fakamamahi.”—Filipe 2:5-8.
Koia, ʼe tou lava fakahā feafeaʼi te agavaivai moʼoni? ʼI te ʼu ʼaluʼaga māhani ʼo te maʼuli, ʼe tou lava fakahā feafeaʼi te agavaivai kae tou līaki te fialahi?
Te Aga ʼo Ia ʼAē ʼe Agavaivai
Tou talanoa ki te agavaivai ʼaē ʼe ʼaoga mokā tou gāue, peʼe ʼi te fale gāue peʼe ʼi te gāue faka Kilisitiano. Ke lava lelei he gāue, ʼe ʼaoga ke ʼi ai he ʼu hahaʼi takitaki. ʼE tonu ke ʼi ai he tahi moʼo fai te ʼu tonu maʼuhiga. ʼE koutou tali feafeaʼi mokā fai atu he tokoni? ʼE koutou manatu koa, “Ko ai koa ia ia ke ina ʼui mai te meʼa ʼaē ʼe tonu ke ʼau fai? Kua fualoa age taku gāue ʼi henī ia ia.” Ei, kapau ʼe koutou fialahi, pea ʼe koutou hoko ʼita anai mokā tonu ke koutou fakalogo. ʼI te tahi faʼahi, ʼe faiga ia ia ʼaē ʼe agavaivai ke “ ʼaua naʼa [ina] fai he meʼa ʼaki he manatu fakataupiepie, peʼe ʼaki he fia hā, kae ʼaki te loto fia mālalo, ʼo [ina] faka ʼuhiga te hahaʼi ohage ʼe nātou māʼoluga age ia [ia].”—Filipe 2:3.
E feafeaʼi takotou manatu mokā fai atu he tokoni e he tūpulaga pe ko he fafine? Kapau ʼe koutou agavaivai, pea ʼe koutou tokagaʼi anai te tokoni ʼaia. Kapau ʼe koutou fialahi, pea ʼe koutou fakafisi atu aipe anai ki te tokoni ʼaē ʼe fai atu. ʼE koutou leleiʼia koa te ʼu fakaoloolo pea mo te ʼu fakalai ʼaē ʼe feala ke fakatapu kovi kia koutou, peʼe koutou leleiʼia koa te tokoni ʼaē ʼe feala ke fua lelei ki tokotou maʼuli?—Tāʼaga Lea 27:9; 29:5.
ʼE koutou lava tauʼi koa tokotou ʼu fihifihia? Ko te agavaivai ʼe tokoni anai kia koutou ke koutou tauʼi te ʼu ʼaluʼaga faigataʼa pea ke koutou kātakiʼi, ohage ko te meʼa ʼaē neʼe fai e Sopo. Kapau ʼe koutou fialahi, pea ʼe koutou lotomamahi anai pea mo fia agatuʼu ʼi te ʼu ʼaluʼaga fakaʼofaʼofa ʼaē ʼe tau mo koutou, peʼe ʼi te ʼu lakaga ʼaē ʼe koutou manatu ai neʼe gaohi koviʼi koutou.—Sopo 1:22; 2:10; 27:2-5.
Ko Te Agavaivai ʼe Lotoʼofa Pea Mo Loto Fakamolemole
ʼE faigataʼa ki ʼihi hanatou ʼui, “ ʼE ʼau faifakalelei atu. Neʼe ʼau faihala. Ko koe ʼaē neʼe tonu.” Koteā tona tupuʼaga? ʼE tupu ko tanatou fialahi fau! Kae ʼe lahi te ʼu kē ʼa te hahaʼi ʼohoana ʼe feala ke tekeʼi mo kapau ʼe faifakalelei fakamalotoloto te taumatuʼa.
ʼE koutou lotolelei koa ke koutou fakamolemole mokā agahala atu he tahi kia koutou? Peʼe koutou fialahi koa, pea mo koutou nofo ʼita lolotoga ni ʼu ʼaho pe ko ni ʼu māhina, ʼo mole kei koutou palalau kia ia ʼaē, ʼi takotou manatu, neʼe agahala atu kia koutou? Peʼe koutou fakafeagai fualoa koa kia ia, ʼi takotou faiga ʼaē ke koutou liufaki age te kovi ʼaē neʼe ina fai atu kia koutou? Ko te taʼi aga ʼaia neʼe tupu ai te mate ʼa ʼihi hahaʼi. Ko ʼihi, neʼe nātou faiga ke nātou maumauʼi te matagafua ʼa he tahi. Kae ko ia ʼaē ʼe agavaivai, ʼe lotoʼofa pea mo loto fakamolemole. Koteā tona tupuʼaga? Koteʼuhi ko te ʼofa ʼe mole ina manatuʼi te kovi. Neʼe lotolelei ia Sehova ke fakamolemole ki te kau Iselaelite mo kapau neʼe nātou tuku tanatou fialahi. Ko ia ʼaē ʼe ina muliʼi ia Sesu ʼaki he agavaivai, ʼe loto fakamolemole, tatau aipe peʼe tonu ke ina fai liuliuga!—Soele 2:12-14; Mateo 18:21, 22; 1 Kolonito 13:5.
Ko ia ʼaē ʼe agavaivai, ‘ ʼe ina tuku he faʼifaʼitaki ʼo ʼuhiga mo te fefakaʼapaʼapaʼaki.’ (Loma 12:10) ʼE ʼui fēnei e te Tohi-Tapu New International Version: “Ke lahi age takotou fakaʼapaʼapa ki te hahaʼi ʼi takotou fakaʼapaʼapa kia koutou totonu.” ʼE koutou fakavikiviki koa ki ʼihi pea mo leleiʼia tonatou ʼu kalitate pea mo tanatou ʼu fealagia? Peʼe koutou faka maʼuhigaʼi tuʼumaʼu koa tanatou ʼu hala moʼo fakatupu kovi ki tonatou matagafua? Ei, ʼe koutou lava fakavikiviki fakamalotoloto koa ki he tahi ʼu hahaʼi? Kapau ʼe faigataʼa kia koutou te fai ʼo te faʼahi ʼaia, pea ʼe mole lagi koutou falala kia koutou totonu pea ʼe koutou fialahi.
Ko he tahi ʼe fialahi ʼe lulutu noa. Ko ia ʼaē ʼe agavaivai ʼe loto faʼa kātaki. Kaeā koutou? ʼE koutou fute atu aipe koa mokā hage kia koutou neʼe fai atu he meʼa ʼe kovi? Ko te taʼi aga ʼaia ʼe fakafeagai ki te loto faʼa kātaki. Kapau ʼe koutou agavaivai, pea ʼe mole koutou manatu fau anai kia koutou totonu. Koutou manatuʼi te meʼa ʼaē neʼe hoko ʼi te temi ʼaē neʼe fialahi ai te kau tisipulo ʼa Sesu—neʼe nātou fefihiʼaki ke nātou ʼiloʼi ai pe ko ai ʼaē neʼe māʼoluga ia nātou. Neʼe galo kia nātou, ko nātou neʼe ko ‘he ʼu tagata kaugana neʼe mole lelei ʼi he meʼa!’—Luka 17:10; 22:24; Maleko 10:35-37, 41.
Neʼe ʼui e te tagata faitohi Falani ko Voltaire ʼo ʼuhiga mo te agavaivai, “ ʼe ko te fia mālalo ʼo te loto . . . mo te faitoʼo ki te fialahi.” Ei, ko te agavaivai ʼe ko te loto fia mālalo. Ko he tahi ʼe agavaivai ʼe mole fia māʼoluga, pea ʼe mole fialahi. ʼE aga fakaʼapaʼapa pea mo agalelei ki te hahaʼi.
Koia, he koʼe ʼe tonu ke tou agavaivai? Heʼe leleiʼia e te ʼAtua te agavaivai pea ko te agavaivai ʼe tokoni mai kia tatou ke takitaki tatou e te ʼAtua. ʼUhi ko te agavaivai ʼaē neʼe fakahā e Taniela, neʼe ʼui e Sehova ʼo ʼuhiga mo te polofeta ʼaia, neʼe ko he tahi neʼe ina “leleiʼia” pea neʼe ina fakahā kia ia he ʼu meʼa ʼaki tana ʼaselo! (Taniela 9:23; 10:11, 19) ʼE lahi te ʼu fakapale ʼaē ʼe koutou maʼu mo kapau ʼe koutou agavaivai. ʼE koutou maʼu ai hakotou ʼu kaumeʼa moʼoni ʼe nātou ʼofa kia koutou. Kae ko te meʼa ʼaē maʼuhiga tāfito, ʼe koutou maʼu ai he ʼu tapuakina mai ia Sehova. “Ko te ikuʼaga ʼo te agavaivai pea mo te manavasiʼi kia Sehova, ʼe ko te ʼu koloā, mo te kolōlia, pea mo te maʼuli.”—Tāʼaga Lea 22:4.
[Paki ʼo te pasina 7]
ʼE feala ke lelei age totatou maʼuli mo kapau ʼe tou faifakalelei