ʼE Koutou “Loto” Koa Ke Koutou Tokoni Ki Te Hahaʼi?
1 Neʼe tokaga moʼoni ia Sesu ki te hahaʼi. ʼI te temi ʼaē neʼe kole age e te tagata kilia ke tokoni age kia ia, neʼe faoʼi e Sesu tona nima, mo ina fāfā ki te tagata, pea ʼui maʼana: “E au loto ke ke maʼa.” (Mko. 1:40-42) ʼE lava feafeaʼi hatatou faʼifaʼitakiʼi te aga ʼa Sesu moʼo tokoni ki te hahaʼi?
2 Te Hahaʼi ʼAē ʼe Fia Logo: Ko tatou fuli ʼi te kokelekasio ʼe feala ke tou tokoni ki te hahaʼi ʼaē ʼe fia logo ke nātou liliu ko he kau atolasio ʼa Sehova. Ka ʼōmai he ʼu hahaʼi foʼou ki te ʼu fono, koutou ʼalofa kia nātou pea mo feʼiloʼiʼaki mo nātou. Koutou kumi he ʼu ʼaluʼaga ke koutou fakaloto mālohiʼi nātou. Fakamālo ki tanatou ʼu fai tali. Vikiʼi tanatou faiga ʼaē ke nātou maʼuliʼi te ʼu pelesepeto ʼo te Tohi-Tapu. Koutou tokoni kia nātou ke nātou mahino ʼe feala ke nātou maʼu he ʼu kaumeʼa moʼoni ʼi te loto kokelekasio.
3 Totatou ʼu Tēhina Pea Mo Tuagaʼane: ʼE ko tatatou “kaiga o te tui” ʼaē ʼe tonu ke tou tokoni tāfito kia nātou ʼi he ʼu ʼaluʼaga kehekehe. (Kal. 6:10) Tokolahi ʼe nātou tau mo he mahaki. Kapau ʼe koutou ʼaʼahi nātou pea mo fakaloto mālohiʼi nātou, pea ʼe nātou maʼu ai honatou kaumeʼa pea ʼe lagi feala pe ke koutou fai mo he ʼu meʼa ʼe ʼaoga kia nātou. Ko ʼihi ʼe lagi tau mo te tahi ʼu fihifihia ʼi tonatou maʼuli. Koutou tokaga kia nātou ʼo koutou toʼo he temi moʼo fakalogo ki tanatou ʼu fakamatala pea mo fakaloto mālohiʼi nātou. (1 Tes. 5:14) ʼE toe ʼaoga tatatou lagolago ki te kau tagata ʼāfea ʼi tanatou fakahoko tanatou ʼu maʼua. (Hep. 13:17) Kapau ʼe tou lotolelei pea mo fia tokoni ki te hahaʼi, pea ʼe feala ke tou “liliu . . . ko he tokoni ʼe fakaloto mālohi” ki tatatou ʼu tēhina pea mo tuagaʼane.—Kol. 4:11, MN.
4 Totatou Famili: ʼE tonu ke tou toe faiga ʼi totatou famili ke tou faʼifaʼitakiʼi te tokaga ʼa Sesu ki te hahaʼi. Ko te loto tokaga lahi ʼa te ʼu mātuʼa, ʼe ina uga nātou ke nātou ‘haga akoʼi tanatou fānau ke nātou maʼu te akonaki pea mo te manatu ʼa Sehova.’ (Ef. 6:4) ʼE feala ke lagolago mo te fānau ʼo nātou foimo tokalelei ki te ako faka famili, peʼe ko te ʼu fono peʼe ko te fai faka mafola. Ko te ʼu fānau ʼaē kua lalahi, ʼe feala ke nātou faʼifaʼitakiʼi te loto manavaʼofa ʼo Sesu, ʼo nātou tokoni fakalelei ki tanatou ʼu mātuʼa ke nātou tauʼi te ʼu faigataʼaʼia ʼi tanatou kua matutuʼa. ʼI te ʼu faʼahi ʼaia pea mo ʼihi atu, ʼe feala kia tatou fuli ke tou “maʼuliʼi . . . te aga faka lotu ʼi [totatou] loto fale.”—1 Tim. 5:4, MN.
5 Ka tou faʼifaʼitakiʼi ia Sesu ʼo tou tokoni ki te hahaʼi, pea ʼe lagi feala ai ke maʼamaʼa te ʼu fihifihia pea mo fakatahiʼi lelei totatou famili pea mo te kokelekasio. Kae ko te meʼa ʼaē ʼe maʼuhiga age, heʼe tou faka kolōlia ai ia Sehova, “te Tamai o te manavaofa fuape.”—2 Ko. 1:3.