Koutou Aga Fakapotopoto ʼi Te Kua Ōvi Mai ʼo Te Fakaʼosi
1 ʼE tuʼa lahi te fakamatala e te Folafola ʼa te ʼAtua ia te ʼaho ʼo Sehova ʼaē ka hoko mai “o hage he tagata kaihaʼa”—ʼe haʼu fakafokifā, mo fakapunamaʼuli, pea mo fakavilivili. (1 Tes. 5:2; Mat. 24:43; 2 Pet. 3:10; Apk. 3:3; 16:15) Neʼe ʼui fēnei e Sesu: “Koia, koutou nofo teuteu, koteuhi e haele mai te Foha o te tagata i te hola e mole koutou manatu ki ai.” (Mat. 24:44) ʼE tou lava nonofo teuteu feafeaʼi ʼi te faʼahi fakalaumālie ʼi te kua ōvi mai ʼo te fakaʼosi? ʼE maʼu te puleʼaki ʼi te tokoni fakaʼatua ʼaenī: “Koutou aga fakapotopoto.”—1 Pet. 4:7.
2 Ke tou maʼu te aga fakapotopoto ʼe tonu ke tou manatu ohage ko Sehova. (Ef. 5:17) ʼE tokoni mai te faʼahi ʼaia kia tatou ke tou faka ʼuhiga ia tatou ohage “ko he hahai e nofo fakatemi pea mo matapule” ʼi te tuʼu ʼaenī. (1 Pet. 2:11) ʼE feala ai ke tou ʼiloʼi te ʼu meʼa ʼaē ʼe maʼuhiga moʼoni, ke tou fakamuʼamuʼa te ʼu meʼa ʼaia, pea mo fai he ʼu tonu ʼe lelei.—Filp. 1:10.
3 Tou Fai He ʼu Fakatuʼutuʼu Fakalaumālie: Ko te fai pea mo fakahoko ʼa he ʼu fakatuʼutuʼu fakalaumālie ʼe tokoni mai ke tou aga fakapotopoto. ʼE ʼi ai koa hakotou ʼu fakatuʼutuʼu fakalaumālie ʼe koutou lolotoga faiga nei ke koutou fakahoko? ʼE koutou faiga koa ke koutou lau te Tohi-Tapu ʼi te ʼaho fuli pe, ke koutou kau ki te ʼu fono fuli, ke koutou lau te ʼu Tule Leʼo pea mo te ʼu Réveillez-vous ! fuli, peʼe ke lahi age takotou kau ki te minisitelio? Kapau ʼe koutou fai he ʼu fakatuʼutuʼu ʼe lelei maʼa koutou, mo koutou faiga ke koutou fakahoko, pea mo koutou faikole kia Sehova ke ina tapuakina takotou ʼu faiga, pea ʼe lagi koutou punamaʼuli anai ki tona ʼu fua lelei.
4 Neʼe kole e te tagata ʼāfea ki te taumatuʼa peʼe koteā tanā ʼu fakatuʼutuʼu fakalaumālie. ʼAki te fehuʼi ʼaia, neʼe nā mahino ai kapau ʼe nā faka faigafua tonā maʼuli pea mo huʼi fuli tonā maʼua mamafa, pea ʼe feala ke nā pionie. Neʼe nā fakatuʼutuʼu ke nā fai te faʼahi ʼaia. Neʼe nā huʼi fakalelei te maʼua pea mo nā maʼu he puleʼaki moʼo fakasiʼisiʼi te ʼu gāue ʼaē neʼe nā fakaʼaogaʼi lahi kiai tonā temi pea mo tonā mālohi. Hili pe te taʼu katoa, neʼe nā fakahoko tanā fakatuʼutuʼu. Neʼe koteā tona fua? ʼE ʼui fēnei e te tagata ʼohoana: “Kapau neʼe mole ma fai hamā ʼu fakatuʼutuʼu, pea neʼe mole feala ke ma liliu ohage ko te temi nei. Kua ma fiafia ʼaupito. Kua tokalelei pea mo lelei age tomā maʼuli. Kua ʼi ai he faka ʼuhiga moʼoni pea mo he fakatuʼutuʼu ʼi tomā maʼuli.”
5 ʼI tatatou atalitali ki te ʼaho ʼo Sehova, ʼofa pe ke tou nonofo teuteu ʼi te faʼahi fakalaumālie ʼo tou aga fakapotopoto ʼi totatou maʼuli, pea mo tokaga tāfito ke tou fai te finegalo ʼo te ʼAtua.—Tito 2:11-13.