Tou Haga Kātaki ʼi Tatatou Faʼafai
1 Ko te faʼafai ʼaē neʼe maʼu e Apolose ʼo ʼuhiga mo tana minisitelio, ʼe ina fakamanatuʼi mai te faʼafai ʼo totatou ʼu tēhina mo tuagaʼane ʼi te fai faka mafola ʼi te temi nei. (Gaue 18:24-28) Kae ʼe fai mai kiā tatou fuli ia te fakaloto mālohi ʼaenī: “Koutou maʼumaʼua ʼi takotou ʼu gāue, ʼaua naʼa koutou fakapikopiko. Koutou loto māfana.” (Loma 12:11, MN ) Koteā ʼaē ʼe lava tokoni mai ke tou maʼu ia te faʼafai ʼaia ʼi te minisitelio faka Kilisitiano?
2 ʼAki Te ʼAtamai Mālama ʼe Mālohi Ai Tatatou Faʼafai: ʼI te ʼosi hā ʼa Sesu ki tana ʼu tisipulo e toko lua pea mo “fakamahino age kiā nāua te ʼu meʼa ʼaē ʼo ʼuhiga mo ia ʼi te [Tohi-Tapu] kātoa,” neʼe nā ʼui fēnei: “Ko [ʼotā] loto, neʼe mole vela koa la ʼi tana palalau mai ʼaē kiā tāua ʼi te ala?” (Luka 24:27, 32, MN ) ʼE lagi feiā koa la mo ʼotatou loto mokā fakahaʼuhaʼu tatatou mahino lelei ki te Folafola ʼa te ʼAtua? Ei, ko te tui ʼe fafaga ʼaki ia te ʼatamai mālama. ʼE ʼui fēnei iā Loma 10:17: “E tupu te tui mai te fagono.” Ka fonu totatou loto ʼi te falala ki te ʼu fakapapau ʼa Sehova, pea ʼe tou fia palalau tuʼumaʼu anai ki te ʼu meʼa ʼaē neʼe tou logo kiai!—Pes. 145:7; Gaue 4:20.
3 Kapau ʼe tou loto ke mālohi totatou ʼofa ʼaē ki te ʼAtua pea mo tou faʼafai ʼi te tauhi ʼaē kiā te ia, pea ʼe mole tonu ke gata ʼaki pe tatatou mahino ʼaē neʼe tou maʼu ʼi tatatou kamata ako ia te Tohi-Tapu. ʼE toe ʼaoga foki ke tou toe tuputupu ʼi tatatou mahino ki te moʼoni pea mo fakalahi totatou ʼofa ʼaē kiā Sehova. Heʼe kapau ʼe mole tou fai ia te faʼahi ʼaia, pea ʼe feala anai ke vaivai tatatou tauhi ʼaē kiā te ia. (Apk. 2:4) ʼE fakaloto mālohiʼi tatou e te Folafola ʼa te ʼAtua ke tou “haga . . . tuputupu ʼi te ʼatamai mālama totonu ʼa te ʼAtua.”—Kol. 1:9, 10, MN.
4 Tatatou ʼu Agamāhani ʼo ʼUhiga Mo Tatatou Ako Ia Te Tohi-Tapu: ʼE tonu ke tou vakavakaʼi peʼe feafeaʼi tatatou ʼu agamāhani ʼo ʼuhiga mo tatatou ako ia te Folafola. ʼE lagi tou popoto ʼi te maʼu ʼo te ʼu tali ʼi Te Tule Leʼo pea mo fai ia he ʼu tali ʼe totonu. Kae ʼe tou kumi koa te ʼu vaega faka Tohi-Tapu ʼaē ʼe tuʼu ʼi te alatike, pea mo fakakaukauʼi peʼe feafeaʼi honatou fakaʼaogaʼi ʼi totatou maʼuli? ʼAki tatatou lau ia te Tohi-Tapu ʼi te vāhaʼa fuli, ʼe tou faiga koa ke tou fai he tahi ʼu kumi mo kapau ʼe tou fealagia pea mo tou metitāsioʼi te ʼu ako ʼaē ʼe tou lava tāʼofi mai te ʼu hisitolia ʼaē ʼe tou lau? (Pes. 77:11, 12; Taag. 2:1-5) ʼE ko he meʼa lelei hatatou metitāsioʼi pea mo lau tuʼumaʼu ia te Folafola ʼa te ʼAtua! (1 Tim. 4:15, 16) Kapau ʼe feiā tatatou ako ia te Tohi-Tapu, ʼe tou lotomālohi anai pea mo uga ai tatou ke tou “faʼafai ki te ʼu gāue lelei.”—Tito 2:14, MN.