Tou Sioʼi Te Hahaʼi Mokā Tou Fai Palalau Mo Nātou
1 ʼI te agamāhani ka tou fagonogono faigamālie pea mo fai faka mafola ʼi te ʼu ʼapi, ʼe tou sioʼi muʼa te agaaga ʼa te hahaʼi pea hoki tou palalau age leva. ʼI te kiʼi temi nounou ʼaia, ʼe tou lava ʼiloʼi ʼi te agaaga ʼo tonatou fofoga, peʼe nātou tali leleiʼi anai tatou pea mo tou lava ʼiloʼi peʼe nātou fiafia peʼe nātou ʼiʼita. ʼO feiā mo te hahaʼi, ʼe feala ʼaki te agaaga ʼo totatou fofoga ke nātou mahino kiā tatou. Neʼe ʼui fēnei e te fafine ʼo ʼuhiga mo te ʼaʼahi ʼa te tuagaʼane: “ ʼE au manatuʼi tona fofoga, neʼe mata malimali pea neʼe agamalū. Pea neʼe au fia ʼiloʼi pe koʼe ʼe agalelei feiā.” ʼUhi pe ko tana sio ki te mata malimali ʼa te Fakamoʼoni, neʼe tupu ai te fia logo ʼa te fafine ki te logo lelei.
2 ʼE feala ʼaki tatatou sio fakahagatonu ki te hahaʼi ke tou kamata ai he fai palalau ʼi te ala peʼe ʼi te ʼu koga meʼa ʼaē ʼe ʼi ai he kaugamālie. ʼE ʼi ai te tēhina, ka fakaōvi atu ki te hahaʼi, pea ʼe sio fakahagatonu kiā nātou. ʼI tana sio ʼaia kiā nātou, ʼe malimali pea ina fakahā age leva te ʼu nusipepa. ʼAki tana taʼi fai ʼaia, ʼe lahi tona ʼu faigamālie ke fai palalau ai mo te hahaʼi pea mo lahi ai mo te ʼu tohi ʼaē ʼe ina tufa.
3 Tou Mahino Ki Te ʼu Meʼa ʼAē ʼi Te Loto ʼo Te Hahaʼi: ʼE tou mahino anai ki te ʼu meʼa ʼi te loto ʼo te hahaʼi mo kapau ʼe tou sioʼi nātou ʼi tatatou fai palalau. Ohage la, ʼi te agamāhani ʼe ʼiloga ʼi te ʼu fofoga ʼo te hahaʼi tanatou mole mahino ki tatatou ʼu palalau peʼe ka nātou fakafeagai kiā tatou. ʼE toe ʼiloga ʼi tonatou fofoga, mokā ʼe nātou maʼumaʼua peʼe nātou fakavilivili. Kapau koia, pea ʼe feala anai hatatou fakanounou tatatou ʼu palalau. ʼE tou fakahā tatatou tōkakaga fakamalotoloto ki te hahaʼi, mo kapau ʼe tou tokagaʼi te ʼu meʼa ʼaē ʼi ʼonatou loto.
4 Tou Aga Fakamalotoloto Pea Mo Poto ʼi Te Fakalotoʼi: ʼI ʼihi agaʼi fenua, ʼe hā tatatou tokaga fakamalotoloto ki te hahaʼi mo kapau ʼe tou sioʼi nātou ʼi tatatou ʼu fai palalau. Koutou fakatokagaʼi te meʼa ʼaē neʼe fai e Sesu ʼi te temi ʼaē neʼe fehuʼi age e tana ʼu tisipulo: ‘Ko ai koa ʼaē ʼe feala ke hāo?’ ʼE ʼui fēnei ʼi te Tohi-Tapu: “Neʼe sio ʼo hagahaga lelei kiā nātou, pea ʼui age e Sesu kiā nātou: ‘Ki te tagata ʼe mole feala ia, kae ki te ʼAtua ko meʼa fuli ʼe feala.’ ” (Mat. 19:25, 26, MN ) ʼE mahino ia, neʼe ʼiloga ʼi te ʼu mata ʼa Sesu, tana tui papau ki te faʼahi ʼaia, koia ʼaē neʼe toe lahi age te tui ʼa te ʼu tisipulo ki tana ʼu palalau. ʼO toe feiā pe, kapau ʼe tou sioʼi te hahaʼi lolotoga he fai palalau, ʼe feala anai hatatou palalau ʼaki he loto fakamalotoloto pea mo he tui papau ʼo ʼuhiga mo te logo ʼo te Puleʼaga.—2 Ko. 2:17; 1 Tes. 1:5.