Tou Tokoni Ki Te Kau Ako Tohi-Tapu Ke Natou Liliu Ko He Kau Fai Fakamafola ʼo Te Logo Lelei ʼo Te Puleʼaga
1 Ko te gāue ʼaē neʼe foaki e Sesu ki tana ʼu tisipulo ʼaē ʼe tuʼu iā Mateo 28:19, 20 neʼe lolotoga tuputupu ʼi te temi ʼaia. Neʼe fakatotonu ki te kau tisipulo ʼa Kilisito ke lahi age tanatou fai he ʼu tisipulo, ʼaē ki muli age, kā natou hoko atu anai ia te gāue ʼaē ko te fai ʼo ni ʼu tisipulo. ʼE ko he fakatafito anai ki te fakamafola fakamuli ʼo te logo lelei ʼo te Puleʼaga ʼo te ʼAtua ʼi te mālamanei kātoa, ʼi te temi maʼuhiga ʼo te fakaʼosi, ʼaē ʼe tou māʼuʼuli ai nei.—Mat. 24:14.
2 Ko tatatou kau ako Tohi-Tapu ʼe lagi ko hatatou ʼu fānau peʼe ko ʼihi atu ʼe natou fia ako ia te Tohi-Tapu mo tātou. ʼE tou fia tokoni moʼoni kiā nātou ʼaia ke natou tali te maʼua ʼaē ʼe tou maʼu takitokotahi, ʼaē ko te tokoni ki te hahaʼi ke natou liliu ko he ʼu tisipulo ʼa Sesu Kilisito.—Luka 6:40.
3 Kotou Teuteuʼi Nātou Ke Natou Fai Fakamafola: Kotou fakalotomālohi ia nātou ʼaē ʼe ako mo koutou ke natou vaevae mo ʼihi atu te ʼu meʼa ʼaē ʼe natou ako. Fakamatala age kiā nātou he ʼu meʼa fakaloto mālohi neʼe hoko ʼi te fai fakamafola. Kotou akoako takotou ʼu fānau ʼi te temi ʼaē kei liliki ai ke natou sisio ki te ʼu fua lelei ʼo tanatou kau ki te minisitelio, ʼo mulimuli pē ki tonatou ʼu fealagia. (Pes. 148:12, 13) ʼAki takotou ʼu palalau pea mo te faʼifaʼitaki ʼaē ʼe kotou tuku age kiā nātou ʼe kotou fakahā takotou leleiʼia ia te minisitelio.—1 Tim. 1:12.
4 ʼE fakaʼaogaʼi pē e Sehova ia nātou ʼaē ʼe natou tali lelei pea mo mulimuli ki tana ʼu lēkula faitotonu. ʼE mahino ia, ʼe mole heʼeki māhani te kau fai fakamafola ohagē ko te kau minisi ʼo te Puleʼaga ʼaē kua māhani ʼi te fai fakamafola, kua foaki tonatou maʼuli pea kua papitema. Kae ko te kau fai fakamafola ʼe tonu ke natou tui pea mo lava fakamahino ia te ʼu akonaki tāfito ʼo te Tohi-Tapu. (Vakaʼi ia te pepa ʼaē neʼe tufa tahi mo Te Minisitelio ʼo Te Puleʼaga ʼo Novepeli ʼo te taʼu 2006, p. 3.) ʼI tanatou kua mavae mai ia “Papiloni Lahi” pea mo tanatou mole kei kau ki te ʼu meʼa fakapolitike, ʼe tonu ke natou kau tuʼumaʼu ki te ʼu fono.—Fakh. 18:2, 4; Soa. 17:16; Hep. 10:24, 25.
5 ʼI te temi pē ʼaē ʼe kotou manatu ai kua feala ki he tahi ʼi takotou kau ako Tohi-Tapu ke liliu ko he kaugā fagona mole heʼeki papitema, pea ʼe tonu ke kotou fakahā ki te taupau pelesitā. ʼE ina fakatuʼutuʼu anai he ʼu tagata ʼāfea e toko lua ke fai palalau mo koutou pea mo ia ʼaē ʼe ako, ke natou ʼiloʼi ai pe kua feala ke liliu ko he kaugā fagona ʼo te logo lelei ʼo te Puleʼaga mole heʼeki papitema, ʼo fakatahi mo te kōkelekāsio. ʼE ko hokotou pilivilēsio leva ke kotou hoko atu te akoako ʼo takotou ako fakatohi-tapu, ʼo kaugā ʼalu mo koutou ʼi te fai fakamafola.