Tou Foaki Kia Te Ia Te Tauhi Taputapu ʼi Te ʼAho Mo Te Po
1 ʼE ko he pilivilesio fakaofoofo neʼe tuku mai kia tatou. Ko te pilivilesio ʼaia, ʼe ko te liliu ko he Fakamoʼoni ʼa Sehova. ʼE tou kau ki te kautahi faka malamanei ʼo te hahaʼi fai faka mafola, ʼaē ʼe fakaʼaogaʼi e Sehova moʼo fakahoko te gāue lahi ʼaē ko te kalagaʼi ʼo te Puleʼaga! (Maleko 13:10) ʼI te maʼuhiga ʼo totatou temi, ʼe lahi koa tatatou kau ki te gāue ʼaia?
2 ʼE mole tou ʼiloʼi peʼe ko te tokofia anai ʼaē ka nātou tali tatatou fai faka mafola. ʼE fakamoʼoni mai e Sehova kia tatou ʼe ʼi ai anai te “toe hahaʼi tokolahi,” ia nātou ʼaē ʼe ʼui ʼe nātou “foaki kia te ia te tauhi taputapu ʼi te ʼaho mo te po.” (Fkhā. 7:9, 15) Ko te toko nima miliona tupu kau Fakamoʼoni ʼaē ʼe maʼumaʼua ʼi te gāue ʼa te ʼAtua, ʼe mole ko he ʼu hahaʼi fakalogo pe, peʼe gata ʼaki pe tanatou ʼolo ki te ʼu fono. Kae ʼe nātou kalagaʼi te logo lelei ʼi te malamanei!
3 ʼI te ʼaho fuli, ʼe tou maʼu te ʼu fealagia moʼo fakavikiviki ʼo Sehova, ʼi te fai faka mafola ʼi te ʼu ʼapi peʼe ʼi te fagonogono faigamālie. Koutou fakakaukauʼi te fakamoʼoni lahi ʼaē ʼe feala ke fai mo kapau ʼe tou fakatuʼutuʼu takitokotahi ke tou vaevae te moʼoni mo he tahi ʼi te ʼaho fuli. Ko tatatou loto fakafetaʼi kia Sehova ʼe tonu ke ina uga tatou ke tou palalau ʼo ʼuhiga mo ia ʼaki he loto fiafia.—Pes. 92:1, 2.
4 Tou Tokoni Ki Niʼihi Ke Nātou Fai He Tauhi Taputapu: ʼE hoholo atu te ʼu tapuakina lahi ʼaē ʼe foaki mai e Sehova kia tatou. (Asea 2:7) Lolotoga te taʼu gāue ʼaē kua hili, ʼi Niu Kaletonia, ko te fakafuafua ʼo te ʼu ako Tohi-Tapu ʼaē neʼe fai ʼi te māhina fuli ko te 1 507, pea ko te ʼu ako Tohi-Tapu e 16 neʼe fai ʼi Uvea mo Futuna. Ko tatatou fakatuʼutuʼu ʼi tatatou ako mo te ʼu hahaʼi ʼaia, ko te tokoni kia nātou ke nātou liliu ko te ʼu tisipulo ʼa Sesu. (Mat. 28:19, 20) Tokolahi ia nātou ʼaia kua nātou haʼele lelei ki muʼa ʼi tanatou kau tuʼumaʼu ki te ʼu fono. Kua nātou kamata palalau ki tonatou ʼu kaumeʼa “ ʼo ʼuhiga mo te ʼu meʼa taulekaleka ʼa te ʼAtua” ʼaē neʼe nātou akoʼi. (Gāue 2:11) Kua feala koa honatou fakaafe ʼi te temi nei ke nātou kau ki te minisitelio?
5 ʼI te māhina ʼo ʼApelili ʼe tonu ke tou fai he ʼu faiga makehe moʼo fakaafe ʼo te ʼu hahaʼi foʼou ʼaia, ke nātou fakatahitahi mo tatou ʼi te gāue fai faka mafola. ʼE fakahā atu koa e ia ʼaē ʼe ako mo koutou kua fia kau ki te fai faka mafola? Kapau koia ʼaia, kua ina muliʼi koa te ʼu lekula faka Tohi-Tapu? (Vakaʼi te tohi Notre ministère, ʼi te pasina 98 ki te 100.) Kapau kua loto ia ia ʼaē ʼe ako Tohi-Tapu ke kau ki te fai faka mafola, koutou fakahā te faʼahi ʼaia ki te tagata taupau pelesita, ʼaē ʼe ina fakatuʼutuʼu anai ke ʼolo he ʼu tagata ʼāfea e toko lua ke nātou vakaʼi te faʼahi ʼaia. Kapau kua tali ke liliu ia ia ko he kaugā fagona, pea koutou fakaafe ia ia ke gāue fakatahi mo koutou ʼi te minisitelio. Ko te tagata taupau ki te gāue, pea mo nātou ʼaē ʼe nātou fai te ʼu ako tohi, ʼe tonu ke nātou tokakaga ʼo tokoni kia nātou ʼaē kua feala tanatou kau ki te gāue fai faka mafola ʼi ʼApelili.
6 ʼE feala ke vakaʼi e te ʼu mātuʼa peʼe kua feala he liliu tanatou fānau ko he ʼu kaugā fagona. (Pes. 148:12, 13) Kapau kua fia kau takotou tamasiʼi ki te gāue ʼo te Puleʼaga pea kapau ʼe lelei tana aga, ʼe feala ke koutou fakaōvi ki he tagata ʼāfea ʼi te komite gāue ʼo palalau mo ia ki te faʼahi ʼaia. ʼI tana ʼosi felogoi mo koutou pea mo te tamasiʼi, ʼe vakaʼi anai e te ʼu tagata ʼāfea e toko lua peʼe kua ʼaoga takotou tamasiʼi ke lau ko he kaugā fagona. ʼE ko he meʼa fakafiafia ʼaupito hakita sio ki te fānau ʼe nātou kau fakatahi mo tatou ki te fakavikiviki ki te ʼAtua!
7 Ko Sehova tokotahi pe ʼaē ʼe tāu mo ia ke tou fai ki ai he tauhi taputapu. (Luka 4:8) ʼOfa pe ke tou fakaʼaogaʼi totatou pilivilesio taulekaleka ʼaē ko te fakavikiviki “ ʼaupito” kia te ia.—Pes. 109:30; 113:3.