Te Fakahā—Kua Ovi Mai Tona Ikuʼaga!
1 “Fiafia ia ia ʼaē ʼe ina lau leʼolahi, pea mo nātou ʼaē ʼe logo ki te ʼu folafola ʼo te lea fakapolofetā ʼaenī, pea mo natou mulimuli ki te ʼu meʼa ʼaē ʼe tohi ai; heʼe kua ovi mai te temi ʼaē kua fakakatofa.” (Fakh. 1:3) ʼE fakahā lelei e te ʼu palalau ʼaenī ia te maʼuhiga ʼo te tohi ʼo Fakahā, tāfito lā heʼe kua tou māʼuʼuli nei ʼi te temi ʼaē kua fakakatofa pea ʼe lahi ai ia te ʼu lea fakapolofetā ʼe lolotoga hoko nei. Koia ʼaē ʼe tou hoko atu anai tatatou ako ia te tohi Te Fakahā—Kua Ovi Mai Tona Ikuʼaga! ʼi te Ako Tohi-Tapu ʼo Te Kōkelekāsio ʼi te vāhaʼa ʼo te ʼaho 1 ʼo Malesio.
2 Talu mai ia te temi ʼaē neʼe tou tuku fakatemi ai tatatou ako ia te tohi Te Fakahā ʼi te ʼu Ako Tohi ʼo Te Kōkelekāsio, kua lahi te ʼu ʼaluʼaga kua fetogi ʼi te mālamanei. (1 Ko. 7:31) Pea tahi ʼaē meʼa, tokolahi iā nātou ʼaē kua kau mo tātou ki te fakamafola ʼo te logo lelei ʼo te Puleʼaga neʼe mole heʼeki natou maʼu te pilivilēsio ʼaē ke natou vakavakaʼi ia te ʼu vaega takitahi ʼo te tohi ʼo Fakahā. Ko te ako ʼo te tohi Te Fakahā ʼe tokoni mai anai kiā tātou takitokotahi ke tou haga nonofo ʼalaʼala ʼo ʼuhiga mo te ʼu ʼaluʼaga ʼaē kā ʼamanaki hoko mai.—Fakh. 16:15.
3 Tou fakatuʼutuʼu ke tou kau ki te fono ʼaia ʼi te vāhaʼa fuli. Ko te ʼu manatu ʼaē kā tou vakavakaʼi ʼi te fono ʼaia ʼe tokoni mai anai ke tou nonofo ʼalaʼala, kae ko te ʼu logo ʼaē neʼe fai e Sesu ki te ʼu kōkelekāsio e fitu, ʼe tokoni mai anai ke ʼaua naʼa tou fai he meʼa ʼe feala ai ke fakatupu tuʼutāmaki ki totatou maʼuli fakalaumālie pea mo tatatou kau ʼaē ki te minisitelio.—Fakh. 1:11, 19.
4 Kotou Teuteuʼi Fakalelei: ʼI muʼa ʼo te Ako Tohi Tapu fuli, kotou lau ia te ʼu vaega ʼo te tohi ʼo Fakahā ʼaē kā vakaʼi anai ʼi te fono ʼaia. Kotou tokagaʼi ia te manatu Fakatohi-tapu ʼaē ʼe tokoni ki tona fakamahino. Kotou faigaʼi ke kotou mahino ki te ʼu manatu ʼaē ʼe feala ke malave ki tokotou loto. (Neh. 8:8, 12) Kotou toʼo he temi ke kotou metitāsio ai pea mo kotou fai ia te fehuʼi ʼaenī kiā koutou: ‘Koteā te ako ʼe maʼu mai ai ʼo ʼuhiga mo Sehova pea mo te fakahoko ʼo tana fakatuʼutuʼu? Peʼe feafeaʼi haku maʼuli ke ʼalutahi mo tana fakatuʼutuʼu pea mo tokoni ki te hahaʼi?’
5 Kua hili nei kiai taʼu e hivagofulu-mā-ono talu mai te kamata ʼaē ʼo “te ʼaho ʼo te ʼAliki” ʼi taʼu 1914. (Fakh. 1:10) ʼE tou ʼamanaki nei ki te ʼu ʼaluʼaga fakamataku ʼaē neʼe fakakikite ʼi te tohi ʼo Fakahā. Ko te ako ʼo te tohi Te Fakahā ʼe ina fakafīmālieʼi anai totatou loto mo totatou ʼatamai ʼaki te kua ovi mai ʼo “te tau ʼo te ʼaho lahi ʼo te ʼAtua te Māfimāfi” pea mo te mālama foʼou.—Fakh. 16:14; 21:4, 5.