Koteā ʼAē ʼe Ako e Te Hahaʼi ʼi Tanatou Sisio Atu?
1. Koteā ʼaē neʼe ako e te ʼu tisipulo ʼa Sesu ʼi tanatou sisio kiā te ia?
1 Neʼe ʼui fēnei e Sesu: “Kotou toʼo kiā koutou taku ʼakau ʼamo pea ke kotou ako iā te au.” (Mat. 11:29) ʼE hā lelei mai, neʼe mole gata tana akoʼi te hahaʼi ʼaki pē tana ʼu palalau, kae neʼe ina toe tuku mo he faʼifaʼitaki lelei. Kotou fakakaukauʼi age muʼa te ʼu meʼa ʼaē neʼe ako e te ʼu tisipulo ʼi tanatou sisio kiā Sesu. Neʼe agamalū, mo agalelei, pea mo ʼofa. (Mat. 8:1-3; Mko. 6:30-34) Neʼe agavaivai moʼoni. (Soa. 13:2-5) ʼI tanatou kaugā ʼolo mo Sesu ʼi te minisitelio, neʼe sio ai te ʼu tisipulo ko Sesu ʼe faʼa gāue, pea mo fua lelei ia tana akoʼi ia te moʼoni ki te hahaʼi. (Luka 8:1; 21:37, 38) ʼE malave feafeaʼi ki ʼihi mokā sisio mai kiā tātou ʼi te minisitelio?
2. ʼE fua lelei feafeaʼi ki te hahaʼi te faʼifaʼitaki lelei ʼaē ʼe tou tuku ʼi tatatou faʼahiga teuteu pea mo tatatou aga?
2 Te Hahaʼi ʼi Te Telituale: ʼE feala ke malave lahi ki te hahaʼi ʼi te telituale tatatou faʼahiga teuteu fakaʼapaʼapa, mo tatatou aga fakaʼapaʼapa, pea mo tatatou fakalogo lelei kiā nātou mokā natou palalau mai. (2 Ko. 6:3; Filp. 1:27) ʼE natou tokagaʼi ʼe tou fakaʼaogaʼi tuʼumaʼu pē ia te Tohi-Tapu. ʼE punamaʼuli ʼihi ʼuhi ko tatatou fakalogo ʼaki he aga fakaʼapaʼapa mokā natou palalau mai. ʼAua naʼa tou meʼa noaʼi ia te fia logo ʼa te hahaʼi ki te logo ʼo te Puleʼaga ʼuhi ko te faʼifaʼitaki lelei ʼaē ʼe tou tuku ʼi te ʼu faʼahi ʼaia.
3. Koteā te fua lelei ʼo tatatou aga ki totatou ʼu tehina?
3 Totatou ʼu Tehina: Kotou toe fakakaukauʼi age mo tona fua lelei ki totatou ʼu tehina. ʼE natou faʼafai anai ʼi te minisitelio mokā natou sisio mai ʼe tou faʼafai ʼi te minisitelio. Ohagē pē ko te ukamea ʼe fakamāsila ʼaki he ukamea, ko tatatou teuteuʼi lelei tatatou ʼu ʼuluaki palalau ʼe ina uga ai ʼihi ke natou hikihiki ke lelei age tanatou poto ʼi te fai fakamafola. (Taag. 27:17) Kā tou tohi fakalelei ia te ʼu nota ʼo ʼuhiga mo te hahaʼi ʼaē neʼe fia logo pea mo tou foimo liliu ʼo fai te ʼu ʼaʼahi, pea ʼe uga ai ʼihi ke natou fai fēia mo nātou. ʼE fua lelei anai tatatou aga ki totatou ʼu tehina mo tuagaʼane ʼaki tatatou fakahoko kātoa tatatou minisitelio.—2 Tim. 4:5.
4. He koʼē ʼe tonu ke tou tautau vakavakaʼi te faʼifaʼitaki ʼaē ʼe tou tuku ki ʼihi?
4 He koʼē koa ʼe mole kotou tautau vakavakaʼi ia te ʼu meʼa ʼaē ʼe kotou fai pea mo takotou ʼu palalau, pea mo feafeaʼi te malave ʼo takotou faʼifaʼitaki ki ʼihi atu? Ko tatatou faʼifaʼitaki lelei ʼe ina fakafiafiaʼi ai anai ia Sehova pea mo feala ke tou hagē ko te ʼapositolo ko Paulo ʼi tana ʼui fēnei: “Ke kotou faʼifaʼitaki kiā te au, ohagē pē ko taku faʼifaʼitakiʼi ʼaē ia Kilisito.”—1 Ko. 11:1.