Te ʼu Fehuʼi ʼa Te Kau Lautohi

He koʼē neʼe ʼui e Sesu ki te fafine ʼaē neʼe ʼiloʼi ko te fafine agahala, kua fakamolemole tana ʼu agahala?—Luka 7:37, 48.

ʼI te lolotoga kai ʼa Sesu ʼi te ʼapi ʼo te Faliseo ʼaē ʼe higoa ko Simone, neʼe haʼu te fafine ‘ ʼo nofo ʼi te ʼu muli vaʼe ʼo Sesu.’ ʼAki ʼona loʼimata neʼe ina fakapalapalaʼi tona ʼu vae pea ina holoholoʼi ʼaki tona lauʼulu. Pea neʼe ʼuma mamahi ia ki te ʼu vae ʼo Sesu pea mo tākai ʼaki te lolo magoni. ʼE ʼui fēnei ʼi te fakamatala ʼo te Evaselio: “Neʼe ʼiloʼi [te fafine] ʼi te kolo ko te fafine agahala.” ʼE moʼoni, ʼe agahala te tagata heʼe haohaoa fuli pē, kae ʼi te agamāhani ʼe fakaʼaogaʼi te kupu ʼaia ʼi te Tohi-Tapu moʼo talanoa ʼo ʼuhiga mo he tahi ʼe ʼiloa ʼuhi ko tana ʼu agahala. Ko te fafine ʼaia neʼe lagi ko he fafine paʼomutu. ʼE ko te faʼahiga fafine ʼaia ʼaē neʼe ʼui fēnei e Sesu: “Kua fakamolemole tau ʼu agahala.” (Luka 7:36-38, 48) ʼE fakaʼuhiga feafeaʼi te ʼu palalau ʼaē neʼe fai e Sesu? Mai tona ʼaluʼaga ʼaē neʼe mole heʼeki foaki ia te sākilifisio faitotogi, neʼe lava fakamolemole feafeaʼi ia te ʼu agahala?

ʼI te kua ʼosi fufulu e te fafine ia te ʼu vaʼe ʼo Sesu pea mo tākai ʼaki te lolo, kae ʼi muʼa ʼo te fakamolemole e Sesu tana ʼu agahala, neʼe fai e Sesu ia te lea fakatātā moʼo fakamahino ia te puani maʼuhiga kiā Simone ia ia ʼaē neʼe ina fakaafe ia ia. ʼI te fakatatau ʼaē e Sesu te agahala ki he tuʼu maʼua neʼe lahi fau hona huʼi, neʼe ina ʼui fēnei kiā Simone: “Ko tagata e toko lua, neʼe tuʼu maʼua ki te tagata foaki maʼua; ko te maʼua ʼo te tahi ko tenalio e nimageau, pea ko te tahi ko te nimagofulu. Pea ʼi te mole ʼi ai ʼaē ʼo hanā meʼa ke nā huʼi ʼaki, neʼe ina molehi fakaʼofa age kiā nāua. Ko ai lā ʼaē iā nāua kā lahi anai tona ʼofa ki ai?” Neʼe tali e Simone, ʼo ʼui māʼana: “ ʼE au mahalo ko ia aē neʼe lahi tana molehi fakaʼofa ki ai.” Pea tali age e Sesu: “ ʼE tonu tau fakamāu.” (Luka 7:41-43) ʼE fakamaʼua kiā tātou fuli ke tou fakalogo ki te ʼAtua, koia kā tou talagataʼa kiā te ia pea mo tou agahala, ʼe mole tou lava huʼi ki te ʼAtua totatou ʼu maʼua ʼaē kiā te ia. Koia ʼe tānaki ai totatou ʼu maʼua ʼo lahi. Kae ʼe hagē ia Sehova ko he tagata foaki maʼua, ʼaē ʼe lotolelei ia ke ina molehi te ʼu maʼua. Koia lā ʼaē neʼe fakalotomālohiʼi ai e Sesu ia tana ʼu tisipulo ke natou faikole ki te ʼAtua pea mo kole fēnei: “Ke ke fakamolemole ʼomatou maʼua, ohagē foki ko tamatou fakamolemole kiā nātou ʼe maʼua mai kiā mātou.” (Mat. 6:12) ʼE fakahā iā Luka 11:4, ko te ʼu maʼua ʼaia ʼe ko te ʼu agahala.

ʼI te temi muʼa, koteā ʼaē neʼe fakatafito kiai e te ʼAtua ia tana fakamolemole te ʼu agahala? Ko tana faitotonu haohaoa ʼe ina fakamaʼua ke tūʼā ki te mate mokā fai e he tahi he agahala. Koia, neʼe totogi e Atama tana agahala ʼaki tona maʼuli. Kae ʼi te Lao ʼaē neʼe foaki e te ʼAtua ki te puleʼaga ʼo Iselaele, neʼe feala ai ke fakamolemole te ʼu agahala ʼa he tahi ʼaki tana sākilifisioʼi ia he manu maʼa Sehova. Neʼe ʼui fēnei e te ʼapositolo ko Paulo: “ ʼE teitei pē kiā meʼa fuli ke fakamaʼa ʼaki he toto ʼi te Lao, pea ʼe mole he fakamolemole gata pē mokā ʼe liligi he toto.” (Hep. 9:22) Neʼe ko te faʼahiga fai pē ʼaia e tahi neʼe ʼiloʼi e te kau Sutea ʼe feala ai ke fakamolemole e te ʼAtua tanatou ʼu agahala. Koia ʼe mole tou punamaʼuli ai, ki te fakafihiʼi ʼaē e te hahaʼi ʼi te temi ʼo Sesu te ʼu palalau ʼaē neʼe ina fai ki te fafine. Ko nātou ʼaē neʼe fai kakai mo Sesu, neʼe natou feʼekeʼaki fēnei ʼi tonatou loto: “Ko ai koa te tagata ʼaenī ʼaē ʼe māʼia mo te ʼu agahala ʼe ina fakamolemole.” (Luka 7:49) Koia koteā ʼaē neʼe feala ke fakatafito kiai te fakamolemole ʼo te ʼu talagataʼa ʼa te fafine ʼagahala?

Ko te ʼuluaki lea fakapolofetā ʼaē neʼe fai ʼi te hili ʼo te talagataʼa ʼa te ʼuluaki taumātuʼa, ʼaē neʼe talanoa ʼo ʼuhiga mo te fakatuʼutuʼu ʼa Sehova ke ina fakatupu he “hako” kā maumauʼi anai tona muliʼi vaʼe e Satana mo tona “hako.” (Sen. 3:15) Neʼe hoko te maumau ʼaia ʼi te temi ʼaē neʼe matehi ai Sesu e te ʼu fili ʼo te ʼAtua. (Kal. 3:13, 16) Ko te taʼataʼa ʼo Kilisito ʼe ko te totogi ʼaē kā ina fakaʼāteaina ai te mālamanei mai te agahala pea mo te mate. Mai tona ʼaluʼaga ʼaē ʼe mole he meʼa ʼe feala ke ina tāʼofi Sehova ke ina fakahoko te gāue ʼaē neʼe fakatuʼutuʼu kiai, ʼi te temi pē ʼaē neʼe fai ai te ʼu palalau ʼaē iā Senesi 3:15, kiā mata ʼo te ʼAtua neʼe kua hagē pē ia kua ʼosi foaki ia te totogi. Neʼe kua feala ai ke ina fakamolemole ia nātou ʼaē neʼe tui ki tana ʼu fakapapau.

ʼI te temi ʼi muʼa ʼo te kau Kilisitiano, neʼe lau e Sehova te hahaʼi tokolahi ko te kau faitotonu. Iā nātou ʼaia neʼe kau ai ia Enoke, mo Noe, mo Apalahamo, mo Laape, pea mo Sopo. ʼAki te tui, neʼe natou sio mamaʼo ki te fakahoko ʼo te ʼu fakapapau ʼa te ʼAtua. Neʼe tohi fēnei e te tisipulo ko Sake: “Neʼe tui ia Apalahamo kiā Sehova, pea neʼe lau te meʼa ʼaia kiā ia ko te faitotonu.” ʼO ʼuhiga mo Laape, neʼe ʼui fēnei e Sake: “ ʼO fēia aipē ko te fafine paomutu ko Laape, neʼe mole tala koa lā mo ia neʼe agatonu ʼaki tana ʼu gāue.”—Sake 2:21-25.

Ko te Hau ko Tavite ʼo te Iselaele ʼāfea, neʼe tuʼa lahi tana fai te ʼu agahala mamafa, kae neʼe mālohi tana tui ʼaē ki te ʼAtua moʼoni pea mo ina fakahā he loto fakahemala moʼoni ʼi te temi fuli pē ʼaē neʼe agahala ai. Tahi ʼaē, ʼe ʼui fēnei ʼi te Tohi-Tapu: “Neʼe tuku e te ʼAtua ia [Sesu] ohagē ko he mōlaga ʼo te faifakalelei, ʼaki te tui ki tona taʼataʼa, moʼo fakahā ai tana faitotonu, koteʼuhi neʼe ina fakamolemole te ʼu agahala ʼaē neʼe fai ʼi te temi muʼa, ʼaē neʼe kātaki fualoa ai te ʼAtua; ke feala hana fakahā tana faitotonu ʼi te lākaga nei, koteʼuhi ke faitotonu ia, māʼia mokā ina tala ʼe faitotonu te tagata ʼaē ʼe tui kiā Sesu.” (Loma 3:25, 26) ʼO fakatafito ki te sākilifisio faitotogi ʼaē neʼe foaki e Sesu ki muli age, neʼe feala ai leva kiā Sehova ke fakamolemole ki te ʼu talagataʼa ʼa Tavite, ʼo mole fakafeagai ia ki Tana ʼu lēkula faitotonu.

ʼE mahino ia, neʼe toe fēia pē mo te ʼaluʼaga ʼo te fafine ʼaē neʼe ina tākai ia te ʼu vaʼe ʼo Sesu ʼaki te lolo. Neʼe ina fai te ʼu aga heʼeʼaoga ʼi tona maʼuli, kae neʼe loto fakahemala, pea neʼe ina ʼiloʼi ia te ʼaoga ʼaē kiā ia ke fakamolemole tana ʼu agahala, pea neʼe ina fakahā ʼi te ʼu meʼa ʼaē neʼe ina fai, tana loto fakafetaʼi moʼoni ki te tagata ʼaē neʼe fakaʼaogaʼi e Sehova moʼo foaki te fakamolemole ʼaia. Logolā te mole heʼeki foaki ʼo te totogi ʼi te temi ʼaia, kae ʼi te kua ʼiloʼi papau ʼe hoko anai te sākilifisio ʼaia, neʼe kua feala pē ke fakaʼaogaʼi ia te maʼuhiga ʼo te sākilifisio ʼaia ki te faʼahiga hahaʼi ohagē ko te fafine. Koia, neʼe ʼui fēnei ai e Sesu kiā te ia: “Kua fakamolemole tau ʼu agahala.”

Ohagē ko tona fakahā lelei mai ʼi te fakamatala ʼaia, neʼe mole fakamamaʼo Sesu mai te hahaʼi agahala. Neʼe ina fai te meʼa ʼaē ʼe lelei kiā nātou. Tahi ʼaē meʼa, ʼe lotolelei Sehova ke ina fakamolemole ki te kau agahala. ʼE ko he fakapapau taulekaleka pea mo fakalotomafana kiā tātou ʼaē ko te hahaʼi agahala!

[Paki ʼo te pasina 23]

Neʼe lau nātou ʼe natou faitotonu