Kapite 28

Ko Te Fehuʼi ʼo ʼUhiga Mo Te ʼAukai

KUA teitei ʼosi kiai te taʼu katoa ki te kau ʼaē ʼa Sesu ki te Pāsikate ʼo te taʼu 30. Ko Soane Patita ʼe ʼi te pilisoni kua hili nei kiai te ʼu māhina. Neʼe loto ia ke liliu tana ʼu tisipulo ko he ʼu tisipulo ʼa Kilisito, kae neʼe mole nātou fai fuli te meʼa ʼaia.

ʼI te temi nei, neʼe ʼi ai ʼihi ʼi tana ʼu tisipulo neʼe ʼōmai kia Sesu ʼo fehuʼi age ki ai: “He koʼe ʼe fai ia ʼe mātou mo te kau Faliseo te ʼaukai, ka mole ʼaukai tau ʼu tisipulo? ” Ko te kau Faliseo ʼe nātou fai te ʼaukai ʼo tuʼa lua ʼi te vāhaʼa; ko te agamāhani ʼaia ʼe fakatotonu e tanatou lotu. Ka ki te kau tisipulo ʼa Soane, e lagi nātou mulimuli ki he tahi aga ʼe tatau mo te aga ʼaia. E lagi toe feala pe ke nātou ʼaukai ʼuhi ko te pilisoniʼi ʼo Soane pea koia ʼe nātou ʼeke ai pe koteā te tupuʼaga ʼo te mole fakahā e te ʼu tisipulo ʼa Sesu tonatou loto mamahi ohage ko nātou.

Moʼo tali ki tanatou fehuʼi, neʼe fakamahino age e Sesu: “ ʼE tonu koa ke fakamamahi te ʼu kaumeʼa ʼo te tagata ʼohoana ʼi te temi ʼaē ʼe kei nofo ai mo nātou? Kaʼe hoko mai anai te ʼu ʼaho ʼe toʼo ai te tagata ʼohoana ia nātou, pea ʼe nātou ʼaukai ai leva.”

Ko te ʼu tisipulo ʼa Soane neʼe lagi nātou manatuʼi foki neʼe fakahigoa e Soane ia Sesu ko te tagata ʼOhoana. Koia, ʼi te kei nofo ʼa Sesu ʼi te kele, neʼe mole mata feʼauga kia Soane te fai ʼo he ʼaukai, pea ʼe toe feiā pe mo te ʼu tisipulo ʼa Sesu. Kae ki muli age, mokā mate anai ia Sesu, pea hoki fakamamahi ai leva tana ʼu tisipulo pea mo nātou ʼaukai. Kae ka toe fakatuʼuake anai pea mo hake ki selo, ʼe mole toe ʼi ai anai he ʼuhiga ʼo hanatou ʼaukai ke nātou fakamamahi ai.

ʼOsi ʼaia pea fai age e Sesu kia nātou te ʼu lea fakatātā ʼaenī: “ ʼE mole he tahi ʼe ina tui he moʼi kie foʼou ki he mutuʼi kofu tuʼa ʼāfea; heʼe ko [te moʼi kie] ʼe ina toho anai ʼi tona mālohi katoa ki te mutuʼi kofu tuʼa pea ʼe ʼāsili kovi anai te mahae. Pea ʼe mole ʼuʼutu te vino foʼou ki he ʼu taga kiliʼi manu ʼāfea; he kapau koia, pea ʼe makahaehae te ʼu taga, pea tafe ki tuʼa te vino, pea maumau mo te ʼu taga. Kaʼe ʼuʼutu te vino foʼou ki he ʼu taga foʼou.” Koteā koa te faka ʼuhiga ʼo te ʼu lea fakatātā ʼaia pea mo te ʼaukai?

Neʼe tokoni ia Sesu ki te ʼu tisipulo ʼa Soane Patita ke nātou mahino ʼe mole tonu ke ʼamanaki he tahi ʼe mulimuli anai tana ʼu tisipulo ki te ʼu tauhi ʼaē kua ʼāfea ʼo te lotu faka sutea ohage la ko te taupau tuʼumaʼu ʼo te ʼaukai. Neʼe mole haʼu ia ko he mono pea mo he fakaloaloa atu ʼo he ʼu faʼahiga tauhi kua ʼāfea pea kua vave pe tona līaki. Ko te lotu faka kilisitiano ʼe mole faʼifaʼitaki anai ia ki te lotu faka sutea ʼo te temi ʼaia, peʼe ki tana ʼu talatisio fakatagata. Kailoa, ʼe mole hage anai ia ko he moʼi kie foʼou ʼe tui ki he mutuʼi kofu ʼāfea, peʼe ko he vino foʼou neʼe ʼuʼutu ki he taga kiliʼi manu ʼāfea. Mateo 9:14-17; Maleko 2:18-22; Luka 5:33-39; Soane 3:27-29.

▪ Ko ai ʼaē ʼe nātou fai te ʼaukai, pea huʼuga kiteā?

▪ He koʼe ʼe mole ʼaukai te kau tisipulo ʼa Sesu ʼi tana kei nofo ʼaē mo nātou, pea ki muli age koteā te ʼu faʼahiga meʼa anai ka hoko ʼaē ʼe mole toe ʼi ai he ʼuhiga ʼo tanatou ʼaukai?

▪ Koteā te ʼu lea fakatātā neʼe fai e Sesu, pea koteā tona faka ʼuhiga?