Koteā Te Moʼoni ʼo ʼUhiga Mo Te ʼAtua?

1, 2. ʼI te agamāhani, he koʼe ʼe lelei ke tou fai he ʼu fehuʼi?

KUA koutou fakatokagaʼi koa ia te faʼahiga fai fehuʼi ʼaē ʼa te ʼu kihiʼi tamaliki? Tokolahi ʼo nātou ʼe nātou kamata fai fehuʼi mokā nātou popoto ʼi te palalau. ʼE nātou sioʼi lelei koutou, pea mo nātou fehuʼi atu: He koʼe ʼe lanu ʼuʼui te lagi? He koʼe ʼe gigila te ʼu fetuʼu? Ko ai ʼaē neʼe ina akoʼi age ki te ʼu manu lele tanatou faʼahiga tagi? E lagi koutou faiga anai ke koutou tali kiai, kae ʼe mole faigafua tuʼumaʼu. Logola kua koutou tali lelei age kiā nātou, kae ʼe nātou toe lagaʼi atu pe anai he tahi ʼu fehuʼi: He koʼe koa ʼe feiā mo feiā?

² ʼE mole ko te ʼu tamaliki pe ʼaē ʼe fai fehuʼi. Heʼe ka tou lahilahi ake, ʼe kei ʼi ai pe tatatou ʼu fehuʼi. Ohage la ʼe tou fia ʼiloʼi te ala ʼaē ʼe tonu ke tou ʼolo ai, ʼe tou fia ʼiloʼi te ʼu tuʼutāmaki ʼaē ʼe mole tonu ke tou tō kiai, peʼe ko he tahi ʼu faʼahi ʼe tou fia ʼiloʼi. Kae ko te tokolahi ʼe mole kei nātou fai fehuʼi, peʼe mole nātou fia ʼiloʼi tona ʼu tali, tāfito ʼo ʼuhiga mo te ʼu faʼahi ʼaē ʼe maʼuhiga tāfito.

3. He koʼe ko te tokolahi ʼe mole kei nātou faigaʼi ke nātou ʼiloʼi te ʼu tali ki te ʼu fehuʼi ʼaē ʼe maʼuhiga ʼaupito?

³ Koutou fakakaukauʼi age muʼa te fehuʼi ʼaē ʼe tuʼu ʼi te takafi ʼo te tohi ʼaenī, mo te ʼu fehuʼi ʼaē ʼe lagaʼi ʼi te ʼu ʼuluaki pasina, peʼe ko te ʼu fehuʼi ʼaē ʼe lagaʼi ʼi te kamata ʼo te kapite ʼaenī. ʼE ko he ʼu fehuʼi ʼe maʼuhiga ʼaupito ke koutou fai. Kae tokolahi te hahaʼi ʼe mole kei nātou faigaʼi ke nātou ʼiloʼi tona ʼu tali. Koteā tona tupuʼaga? ʼE maʼu koa tona ʼu tali ʼi te Tohi-Tapu? Ko ʼihi ʼe nātou ʼui ʼe faigataʼa fau hanatou mahino ki te ʼu tali ʼaē ʼe tuku mai ʼi te Tohi-Tapu. Ko ʼihi ʼe nātou tuʼania naʼa nātou fai he ʼu fehuʼi ʼe nātou mata lainoa ai. Pea ko ʼihi ʼe nātou ʼui ʼe lelei age ke vakaʼi te ʼu fehuʼi ʼaia e te kau takitaki lotu pea mo te hahaʼi faiako lotu. Kaeā koutou?

4, 5. Ko te ʼu fehuʼi maʼuhiga fea ʼaē ʼe feala ke tou fai ʼo ʼuhiga mo te maʼuli, pea he koʼe ʼe tonu ke tou kumi tona ʼu tali?

⁴ ʼE mahino ia ʼe koutou fia ʼiloʼi te ʼu tali ki te ʼu fehuʼi maʼuhiga ʼo ʼuhiga mo te maʼuli. ʼI ʼihi temi, neʼe lagi koutou fai te ʼu fehuʼi ʼaenī: ‘Koteā koa te tupuʼaga ʼo te maʼuli? ʼE tonu pe koa ke feiā te maʼuli? E feafeaʼi moʼoni koa te ʼAtua?’ ʼE lelei ke koutou fai te taʼi ʼu fehuʼi ʼaia, pea ke koutou faiga fakamalotoloto ke koutou maʼu tona ʼu tali moʼoni. Neʼe ʼui fēnei e te tagata faiakonaki ʼiloa ko Sesu Kilisito: “Koutou haga kole, pea ʼe foaki atu anai kiā koutou; koutou haga kumi, pea ʼe koutou maʼu anai; koutou haga fisifisi, pea ʼe avahi atu anai kiā koutou.”​—Mateo 7:​7, MN.

⁵ Kapau ʼe “koutou haga kumi” te ʼu tali ki te ʼu fehuʼi maʼuhiga ʼaia, ʼe koutou maʼu ai anai he ʼu fua lelei kiā koutou. (Tāʼaga Lea 2:​1-5) Tatau aipe peʼe koteā te ʼu meʼa kua ʼui atu e ʼihi, kae ʼi te Tohi-Tapu ʼe ʼi ai tona ʼu tali, pea ʼe feala hakotou maʼu ai. ʼE mole faigataʼa fau tatatou mahino ki tona ʼu tali. Pea ʼe toe lelei tāfito te ʼu tali ʼaia, koteʼuhi ʼe tou maʼu ai he ʼamanaki pea mo he fiafia. ʼE nātou lava tokoni atu ke koutou maʼuli fiafia ʼi te temi nei. Moʼo kamata, ʼe tou vakaʼi anai te fehuʼi ʼe fia maʼu e te tokolahi tona tali kiai.

ʼE LĪTUʼA PEA MO AGAKOVI KOA TE ʼATUA KIĀ TATOU?

6. He koʼe ko te tokolahi ʼe nātou manatu ko te ʼAtua ʼe mole tokaga ki te ʼu mamahi ʼaē ʼe tau mo te malamanei?

⁶ Ko te tokolahi ʼe nātou manatu feiā. Heʼe nātou ʼui fēnei: ‘Kapau neʼe tokaga te ʼAtua kiā tatou, pea ʼe mole feiā anai te malamanei.’ ʼI te malamanei, ʼe tou sio ki te tau, te fehiʼa pea mo te maʼuli fakaʼofaʼofa ʼa te hahaʼi. Pea ʼe tou tau mo te mahaki, ʼe tou maʼuli mamahi, pea ʼe mamate te ʼu hahaʼi ʼaē ʼe tou ʼoʼofa ki ai. Koia ʼe ʼui ai e te tokolahi: ‘Kapau ʼe tokaga te ʼAtua kiā tatou pea mo totatou ʼu fihifihia,ʼe mole ina tuku anai ke hoko te ʼu meʼa ʼaia.’

7. (a) Koteā ʼaē ʼe fai e te kau faiako lotu ʼaē ʼe tupu ai te ʼui ʼa te tokolahi ʼe agakovi te ʼAtua? (b) Koteā ʼaē ʼe ʼakoʼi moʼoni mai ʼi te Tohi-Tapu ʼo ʼuhiga mo te ʼu mamahi ʼaē ʼe hoko kiā tatou?

⁷ Ko te meʼa ʼaē ʼe kovi age, heʼe ʼi ʼihi temi ʼe tupu te ʼui ʼa te hahaʼi ko te ʼAtua ʼe agakovi, ʼuhi ko te kau faiako lotu. ʼUhi koteā? Heʼe ka hoko he tuʼutāmaki, ʼe nātou ʼui ʼe ko te finegalo ʼo te ʼAtua. Ei, ko te kau faiako ʼaia ʼe nātou tukugakoviʼi te ʼAtua ʼo ʼuhiga mo te ʼu meʼa kovi ʼaē ʼe hoko. Kae ʼe moʼoni koa te faʼahi ʼaia ʼo ʼuhiga mo te ʼAtua? Koteā ʼaē ʼe akoʼi moʼoni mai e te Tohi-Tapu? ʼE tali fēnei iā Sakopo 1:13 (MN ): “Ke ʼaua naʼa ʼui e he tahi ʼi te ʼahiʼahi: ‘ ʼe ʼahiʼahiʼi au e te ʼAtua.’ Koteʼuhi ʼe mole feala ke ʼahiʼahiʼi te ʼAtua ʼaki he ʼu meʼa ʼe kovi, pea ko ia totonu ʼe mole ina ʼahiʼahiʼi [feiā] he tahi.” Koia ʼe mole ko te ʼAtua te tupuʼaga ʼo te agakovi ʼaē ʼe tou sio kiai ʼi te malamanei. (Sopo 34:​10-12) ʼE moʼoni, ʼe ina fakagafua ke hoko te ʼu meʼa kovi. Kae ʼe kehekehe ʼaupito te ʼui ʼaē ʼe ina fakagafua te agakovi pea mo te ʼui ʼaē ʼe ko ia te tupuʼaga ʼo te agakovi.

8, 9. (a) Koteā te faʼifaʼitaki ʼe feala hakotou fakaʼaogaʼi moʼo fakahā te kehekehe ʼo te fakagafua ʼo te agakovi pea mo tona tupuʼaga mai? (b) He koʼe ʼe mole tonu ke tou valokiʼi te fakagafua ʼa te ʼAtua ke fai e te malamanei te aga ʼaē ʼe kovi?

⁸ Tou toʼo te faʼifaʼitaki ʼa he tāmai poto pea mo ʼofa, ʼe ʼi ai tona foha kua lahi, kae ʼe kei nofo iā nāua, ʼaē ko ʼana mātuʼa. Ka fiatuʼu tona foha pea mo fia mavae ʼi tonā ʼapi, ʼe mole tāʼofi anai ia ia e tana tāmai. ʼE fai anai e te tama he ʼu aga ʼe kovi ʼo tupu ai tona ʼu fihifihia. Kae ʼe ko te tāmai koa te tupuʼaga ʼo te ʼu fihifihia ʼo tona foha? Kailoa. (Luka 15:​11-13) ʼO toe feiā pe, neʼe mole tāʼofi e te ʼAtua te tagata ʼi tana fia fai te aga ʼaē ʼe kovi, kae ʼe mole ko te ʼAtua te tupuʼaga ʼo te ʼu fihifihia ʼo tana aga ʼaia. Koia ʼe mole tonu ke tukugakoviʼi te ʼAtua ʼo ʼuhiga mo te ʼu mamahi fuli ʼaē ʼe tau mo te malamanei.

⁹ ʼE ʼi ai te ʼu tupuʼaga lelei ʼo te fakagafua e te ʼAtua ke fai e te malamanei te aga ʼaē ʼe kovi. ʼUhi ko ia ko te Matapuna ʼo te poto pea mo te mālohi, ʼe mole maʼua ke ina fakamahino mai kiā tatou tona ʼu tupuʼaga. Kae ʼaki tana ʼofa, ʼe foaki mai e te ʼAtua te ʼu fakamahino. ʼE koutou mahino lelei anai ki te ʼu tupuʼaga ʼaia ʼi te Kapite 11 ʼo te tohi ʼaenī. Kae ʼe tonu ke tou ʼiloʼi papau ʼe mole ko te ʼAtua te tupuʼaga ʼo te ʼu fihifihia ʼaē ʼe felāveʼi mo tatou, heʼe ʼi tona fakahagatonu ʼe ina foaki mai te puleʼaki ʼaē ʼe lelei tokotahi.​—Isaia 33:2.

10. He koʼe ʼe feala hatatou falala ʼe fakagata anai e te ʼAtua te fua kovi fuli ʼo te agakovi?

¹⁰ Tahi ʼaē meʼa, ko te ʼAtua ʼe maʼoniʼoni. (Isaia 6:3) Ko tona faka ʼuhiga ko he ʼAtua ʼe maʼa pea mo haohaoa. ʼE mole he agakovi iā te ia. Koia ʼe feala hatatou falala kātoa kiā te ia. ʼE mole hage ia ko te tagata, ʼaē ʼihi temi ʼe aga fakakākā. Māʼia pe la mo te tagata maʼu tuʼulaga ʼaē ʼe agatonu ʼosi, ʼi te agamāhani ʼe mole feala hana fakatokatoka te ʼu meʼa kovi ʼaē ʼe fai e te hahaʼi agakovi. Kae ko te ʼAtua ʼe Māfimāfi, koia ʼe feala kiā te ia ke ina fakagata anai te ʼu fua kovi ʼo te agakovi ki te malamanei. Ka fai puleʼaki anai te ʼAtua, ʼe ina fai anai moʼo fakagata te agakovi ʼo talu ai.​—Pesalemo 37:​9-11.

ʼE MALAVE FEAFEAʼI KI TE ʼATUA TE ʼU AGA KOVI ʼAĒ ʼE HOKO KIĀ TATOU?

11. (a) ʼE malave feafeaʼi ki te ʼAtua te ʼu aga kovi? (b) ʼE malave feafeaʼi ki te ʼAtua tokotou ʼu mamahi?

¹¹ ʼI te temi ʼaenī, ʼe malave feafeaʼi ki te ʼAtua te ʼu meʼa ʼaē ʼe hoko ʼi tokotou maʼuli? ʼE akoʼi mai ʼi te Tohi-Tapu, ko te ʼAtua “ ʼe ʼofa ki te faitotonu.” (Pesalemo 37:28) Koia ʼe mole mata noa kiā ia te meʼa ʼaē ʼe lelei pea mo te meʼa ʼaē ʼe kovi. ʼE fehiʼa ki te ʼu aga kovi fuli. ʼE ʼui ʼi te Tohi-Tapu neʼe ‘mamahi te loto’ ʼo te ʼAtua ʼi te ʼu aga kovi ʼaē neʼe hoko ʼi te malamanei ʼi te ʼu temi muʼa. (Senesi 6:​5, 6) ʼE mole heʼeki fetogi te ʼAtua. (Malakia 3:6) ʼE ko he meʼa fakaloto mamahi kiā ia tana sio ki te ʼu mamahi ʼaē ʼe hoko ʼi te malamanei kātoa. Pea ʼe mole loto e te ʼAtua ke maʼuli mamahi te hahaʼi, ohage ko tona ʼui ʼi te Tohi-Tapu: “ ʼE tokaga ia kiā koutou.”​—1 Petelo 5:​7, MN.

12, 13. (a) He koʼe ʼe tou maʼu te ʼu kalitātē lelei ohage ko te ʼofa, pea ʼuhi ʼaē ʼe tou ʼofa, koteā ʼaē ʼe tou fia fai ʼo ʼuhiga mo te malamanei? (b) He koʼe ʼe tou lava tui papau ko te ʼAtua ʼe ina fai moʼoni anai he meʼa ʼo ʼuhiga mo te ʼu fihifihia ʼo te malamanei?

¹² E feafeaʼi hatatou ʼiloʼi papau, ʼe mole loto e te ʼAtua ke tou maʼuli mamahi? Koʼeni te tahi fakamoʼoni. ʼE akoʼi mai ʼi te Tohi-Tapu ko te tagata neʼe fakatupu ʼo mulimuli ki te pāki ʼo te ʼAtua. (Senesi 1:26) Koia ʼe tou maʼu te ʼu kalitātē lelei, koteʼuhi ʼe maʼu e te ʼAtua te ʼu kalitātē lelei. Ohage la, ʼe koutou mamahi koa mokā koutou sio ʼe maʼuli mamahi he ʼu hahaʼi neʼe mole nātou fai he ʼu meʼa ʼe kovi? Kapau ʼe malave feiā kiā koutou te ʼu aga kovi ʼaia, pea koutou tui papau ʼe toe malave mālohi age ki te ʼAtua.

¹³ Ko te kalitātē ʼe maʼu e te tagata, ko te ʼofa. Ko te tahi agaaga ʼaia ʼo te ʼAtua, koteʼuhi ʼe akoʼi mai ʼi te Tohi-Tapu ko “te ʼAtua ʼe ʼofa.” (1 Soane 4:​8, MN ) ʼE tou ʼofa koteʼuhi ʼe ʼofa te ʼAtua. Ko te ʼofa ʼe ina uga anai koa koutou ke koutou fakagata te ʼu mamahi pea mo te ʼu aga kovi ʼaē ʼe koutou sio kiai ʼi te malamanei? Kanapaula neʼe koutou lava fai ia te faʼahi aia, ʼe mahino ia ʼe koutou fai anai. ʼO toe feiā pe, ʼe feala hakotou tui papau ʼe fakagata anai e te ʼAtua te ʼu mamahi pea mo te ʼu aga kovi. Ko te ʼu fakapapau ʼaē ʼe tuʼu ʼi te kamata ʼo te tohi ʼaenī ʼe mole ko he ʼu moemisi peʼe ko he ʼu ʼamanaki ʼe mole hoko anai. ʼE hoko moʼoni anai te ʼu fakapapau ʼa te ʼAtua! Kae ke feala hakotou tui ki te ʼu fakapapau ʼaia, ʼe tonu ke koutou ʼiloʼi lelei age ia te ʼAtua ʼaē neʼe ina fai te ʼu fakapapau ʼaia.

ʼE LOTO E TE ʼATUA KE KOUTOU ʼILOʼI PEʼE KO AI IA IA

14. Ko ai te huafa ʼo te ʼAtua, pea he koʼe ʼe tonu ke tou fakaʼaogaʼi?

¹⁴ Kapau ʼe koutou loto ke ʼiloʼi koutou e he tahi, koteā ʼaē ʼe tonu ke koutou fai? ʼE koutou fakahā age anai tokotou higoa kiā ia. ʼE ʼi ai koa he huafa ʼo te ʼAtua? ʼE lahi te ʼu lotu ʼe nātou ʼui ko tona huafa ʼe ko “ ʼAtua” peʼe “ ʼAliki,” kae ʼe mole ko he ʼu higoa ʼaia. ʼE ko he ʼu tuʼulaga, ohage ko te ʼu tuʼulaga ʼaē ko “te hau” pea mo “te pelesita.” ʼE akoʼi mai ʼi te Tohi-Tapu, ʼe lahi te ʼu tuʼulaga ʼo te ʼAtua, pea ʼe kau kiai tona ʼu tuʼulaga “ ʼAtua” pea mo “ ʼAliki.” Kae ʼe toe akoʼi mai foki ʼi te Tohi-Tapu, ʼe ʼi ai te huafa totonu ʼo te ʼAtua: ko Sehova. ʼE ʼui fēnei ʼi te Pesalemo 83:18: “Ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele kātoa.” Kapau ʼe mole tuʼu ʼi takotou Tohi-Tapu te huafa ʼaia, pea ʼe feala hakotou vakaʼi Te Tahi ʼu Fakamahino, ʼi te pasina 195 ki te pasina 197 ʼo te tohi ʼaenī. ʼI tona fakahagatonu, ʼi te ʼu tohi ʼāfea ʼo te Tohi-Tapu, ʼe lauʼi afe te ʼu vaega ʼaē ʼe tuʼu ai te huafa ʼo te ʼAtua. Koia, ʼe loto e Sehova ke koutou ʼiloʼi tona huafa pea mo koutou fakaʼaogaʼi. ʼE feala ke tou ʼui, ʼe ina fakaʼaogaʼi te Tohi-Tapu moʼo fakahā mai peʼe ko ai ia ia.

15. Koteā te faka ʼuhiga ʼo te huafa ʼo Sehova?

¹⁵ ʼE ʼi ai te faka ʼuhiga ʼo te huafa ʼo te ʼAtua. Ko tona huafa, ko Sehova, ʼe ina faka ʼuhiga ko te ʼAtua ʼe feala ke ina fakahoko tana ʼu fakapapau fuli pea mo tana ʼu fakatuʼutuʼu fuli.a Ko te huafa ʼo te ʼAtua ʼe makehe, pea ʼe ʼaʼana tokotahi pe. ʼE lahi te ʼu ʼaluʼaga ʼe makehe ai ia Sehova. Koteā te ʼu ʼaluʼaga ʼaia?

16, 17. Koteā ʼe tou lava ako ʼo ʼuhiga mo Sehova ʼaki tona ʼu tuʼulaga ʼaenī: (a) “te Māfimāfi”? (b) “te Hau ʼo te heʼegata”? (c) “te Tupuʼaga”?

¹⁶ ʼO ʼuhiga mo Sehova, neʼe tou lau iā Pesalemo 83:18: “Ko koe tokotahi pe, te Māʼoluga ʼAupito.” ʼE toe ʼui foki ko Sehova tokotahi “te Māfimāfi.” ʼE ʼui fēnei iā Apokalipesi 15:3 (MN ): “ ʼE lahi pea mo fakaofoofo tau ʼu gāue, Sehova ʼAtua, te Māfimāfi. ʼE faitotonu pea mo moʼoni tou ʼu ala, Hau ʼo te heʼegata.” Ko te tuʼulaga “te Māfimāfi,” ʼe akoʼi mai ai ʼe mole he tahi ʼe mālohi ʼaupito age iā Sehova. ʼE mole he fakatatau ʼo tona mālohi, pea ʼe nofo mo te tuʼulaga ʼaē ʼe māʼoluga tokotahi pe. Pea ko te tuʼulaga “Hau ʼo te heʼegata” ʼe ina fakamanatuʼi mai ko Sehova ʼe makehe ʼi tona tahi ʼaluʼaga. Ko ia tokotahi pe neʼe mole hona kamataʼaga. ʼE ʼui fēnei ʼi te Pesalemo 90:2: “Mai te ʼu temi heʼegata ʼo aʼu ki he ʼu temi heʼegata [peʼe ʼo talu ai] ʼe ke ʼAtua.” Ko te manatu ʼaia ʼe ina fakatupu ia tatou he loto manavasiʼi kiā te ia.

¹⁷ ʼE toe makehe te ʼAtua heʼe ko ia tokotahi pe te Tupuʼaga. ʼE tou lau fēnei iā Apokalipesi 4:11 (MN ): “ ʼE tāu mo koe, Sehova, ʼio tomatou ʼAtua, ke ke tali te kolōlia, pea mo te fakaʼapaʼapa, pea mo te mālohi, heʼe ko koe ʼaē neʼe ke fakatupu ia meʼa fuli, pea ʼuhi ko tou finegalo neʼe nātou māʼuʼuli ai pea mo fakatupu ai ia nātou.” Ko meʼa fuli ʼaē ʼe feala ke koutou manatu kiai​—te ʼu ʼāselo ʼaē ʼi selo, te ʼu fetuʼu, te ʼu fisiʼi teu, pea mo te ʼu ika ʼo te tai pea mo te ʼu vaitafe​—ʼe ko te ʼu faʼu ʼaia ʼa Sehova te Tupuʼaga.

ʼE FEALA KOA HAKOTOU FAKAŌVI KIĀ SEHOVA?

18. He koʼe ko ʼihi ʼe nātou manatu ʼe mole feala anai ke nātou fakaōvi ki te ʼAtua, kae koteā ʼaē ʼe akoʼi mai ʼi te Tohi-Tapu?

¹⁸ Ko ʼihi ʼe nātou tuʼania, mokā nātou lau te ʼu fakamatala ʼo ʼuhiga mo te ʼu kalitātē fakamanavahe ʼo Sehova. ʼE nātou matataku, heʼemaʼa nātou ʼe māʼoluga fau te ʼAtua, pea ʼe mole feala anai ʼi he temi hanatou fakaōvi kiā te ia, peʼe nātou manatu ʼe mole tokagaʼi anai nātou e he ʼAtua māʼoluga feiā. Kae ʼe tonu koa te manatu ʼaia? ʼE mole akoʼi mai te faʼahi ʼaia ʼi te Tohi-Tapu. ʼE ina ʼui ʼo ʼuhiga mo Sehova: “ ʼI tona fakahagatonu, ʼe mole mamaʼo ia tatou takitokotahi.” (Gaue 17:​27, MN ) ʼE fai mai te fakaloto mālohi ʼaenī ʼi te Tohi-Tapu: “Koutou fakaōvi ki te ʼAtua pea ʼe fakaōvi atu anai kiā koutou.”​—Sakopo 4:​8, MN.

19. (a) ʼE tou lava fakaōvi feafeaʼi ki te ʼAtua, pea koteā anai tona fua lelei kiā tatou? (b) Ko te ʼu kalitātē fea ʼo te ʼAtua ʼe koutou leleiʼia tāfito?

¹⁹ ʼE tou lava fakaōvi feafeaʼi ki te ʼAtua? ʼUluaki, koutou haga fai te meʼa ʼaē ʼe koutou fai ʼi te temi nei: koutou ako ke koutou ʼiloʼi te ʼAtua. Neʼe ʼui fēnei e Sesu: “Ko te faka ʼuhiga ʼaenī ʼo te maʼuli heʼegata, ke nātou ako ke nātou ʼiloʼi ia koe, te ʼAtua moʼoni pe ʼaē e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:​3, MN ) ʼEi, ʼe akoʼi mai e te Tohi-Tapu ʼe tou maʼu anai “te maʼuli heʼegata” mo kapau ʼe tou ʼiloʼi ia Sehova pea mo Sesu. Ohage ko te meʼa ʼaē neʼe tou vakaʼi, “ko te ʼAtua ʼe ʼofa.” (1 Soane 4:​16, MN ) ʼE toe ʼi ai foki mo te tahi ʼu tuʼuga kalitātē taulekaleka pea mo lelei ʼo Sehova. Ohage la, ʼe ʼui ʼi te Tohi-Tapu ko Sehova ʼe ko he “ ʼAtua manavaʼofa pea mo agaʼofa, tuai ʼi te ʼita pea mo mohu ʼi te lotoʼofa pea mo te moʼoni.” (Ekesote 34:6; 1 Soane 4:​8, 16) ʼE “agalelei pea mo fakamolemole gafua.” (Pesalemo 86:5) ʼE ko he ʼAtua ʼe faʼa kātaki. (2 Petelo 3:9) ʼE agatonu. (Apokalipesi 15:4) ʼI takotou haga lau ia te Tohi-Tapu, ʼe koutou sio ai anai ko Sehova ʼe ina maʼu te ʼu kalitātē ʼaia pea mo te tahi atu ʼu kalitātē.

20-22. (a) ʼE mole feala koa ke tou fakaōvi ki te ʼAtua, ʼuhi heʼe fakapulipuli? Koutou fakamahino. (b) Koteā ʼaē ʼe feala ke ʼui atu e ʼihi ʼo ʼuhiga mo takotou ako, pea koteā ʼaē ʼe tonu ke koutou fai?

²⁰ ʼE moʼoni, ʼe mole feala ke koutou sio ki te ʼAtua, koteʼuhi ʼe ko he laumālie fakapulipuli. (Soane 1:18; 4:24; 1 Timoteo 1:17) Kae kapau ʼe koutou ako te Tohi-Tapu ke koutou ʼiloʼi ia ia, ʼe koutou faka tui anai ʼe maʼuli moʼoni. Ohage ko tana ʼui e te tagata fai pesalemo, ʼe feala ai anai ke koutou “sio ki te matalelei ʼo Sehova.” (Pesalemo 27:4; Loma 1:20) Ka lahi anai te ʼu meʼa ʼaē ʼe koutou ako ʼo ʼuhiga mo Sehova, pea ʼe toe lahi age anai mo takotou tui moʼoni kiā te ia, mo ʼofa kiā te ia pea mo koutou ōvi kiā te ia.

²¹ ʼAki te temi, ʼe koutou mahino lelei anai pe koʼe ʼe akoʼi mai ʼi te Tohi-Tapu ke tou ʼui ko Sehova ko tatatou Tāmai. (Mateo 6:9) Ko ia te Matapuna ʼo te maʼuli, pea ʼe ina loto tāfito ke tou maʼuli fiafia, ohage pe ko te fakaʼamu ʼa te tāmai fuli ʼo ʼuhiga mo tana fānau. (Pesalemo 36:9) ʼE toe akoʼi mai ʼi te Tohi-Tapu, ko te tagata ʼe lava liliu ko he kaumeʼa ʼo te ʼAtua. (Sakopo 2:23) ʼI toe pilivilesio makehe hatatou liliu ko he ʼu kaumeʼa ʼo te Tupuʼaga ʼo te ʼatulaulau!

²² ʼI te hoko atu ʼo takotou ako ia te Tohi-Tapu, ʼe ʼi ai te ʼu hahaʼi, ʼi tanatou mole mahino, ʼe nātou ʼui atu anai ke koutou tuku takotou ako. ʼE lagi nātou tuʼania naʼa koutou fetogi lotu. Kae ʼaua naʼa koutou tuku ki he tahi ke ina tāʼofi takotou fia liliu ko he kaumeʼa ʼo te ʼAtua.

23, 24. (a) He koʼe ʼe tonu ke koutou haga fai he ʼu fehuʼi ʼo ʼuhiga mo te ʼu meʼa ʼaē ʼe koutou ako? (b) Ko te faʼahi fea ʼaē ka tou vakaʼi anai ʼi te kapite ʼaē ka hoa mai?

²³ ʼE moʼoni ʼi te kamata ʼe ʼi ai te ʼu meʼa ʼe mole koutou mahino anai kiai. Kae ʼe tonu anai ke koutou fia agavaivai ʼo kole age ki he tahi ke tokoni atu, kae ʼaua naʼa koutou nofo ʼaki takotou umiuminoa. Neʼe ʼui e Sesu ʼe lelei hakita fia agavaivai, ohage ko nātou liliki. (Mateo 18:​2-4) Pea ʼe tou ʼiloʼi ko te ʼu kihiʼi tamaliki ʼe lahi tanatou ʼu fehuʼi. Koia ʼe loto e te ʼAtua ke koutou maʼu tona ʼu tali. ʼE ʼi ai te ʼu hahaʼi ʼe vikiʼi e te Tohi-Tapu, he neʼe nātou fia ʼiloʼi lelei te ʼAtua. Neʼe nātou vakavakaʼi lelei te Tohi-Tapu ke nātou ʼiloʼi papau peʼe moʼoni te ʼu meʼa ʼaē neʼe nātou ako.​—Gaue 17:11.

²⁴ Kapau ʼe koutou fia ʼiloʼi lelei ia Sehova, ʼe tonu ke koutou ako te Tohi-Tapu. ʼE ko he tohi ia ʼe kehe mo te ʼu tohi fuli ʼaē. Koteā tona kehekehe? ʼE tou vakaʼi anai te faʼahi ʼaia ʼi te kapite ʼaē ka hoa mai.