Ko Te Tauhi Fea ʼAē ʼe Tali e Te ʼAtua?

1. Koteā anai tona ʼu fua lelei kiā tatou mo kapau ʼe tou tauhi ki te ʼAtua ʼo mulimuli ki tona finegalo?

ʼE TOKAGA ʼaupito ia Sehova ʼAtua kiā tatou pea ʼe fia tokoni mai kiā tatou. Kapau ʼe tou tauhi kiā te ia ʼo mulimuli ki tona finegalo, pea ʼe tou fiafia pea mo tekeʼi anai te ʼu tuʼuga fihifihia ʼo te maʼuli. ʼE tou toe maʼu anai tana tapuakina pea mo tana tokoni. (Isaia 48:17) Kae ʼe lauʼi teau te ʼu lotu ʼe nātou lau ʼe nātou tala ia te moʼoni ʼo ʼuhiga mo te ʼAtua. Kae ʼi tona fakahagatonu, ʼe mole nātou fakahā te moʼoni ʼo ʼuhiga mo te ʼAtua pea mo te ʼu meʼa ʼaē ʼe ina fakamaʼua mai.

2. E feafeaʼi hatatou ʼiloʼi te faʼahiga tauhi ʼaē ʼe leleiʼia e Sehova, pea ko te fakatā fea ʼaē ʼe feala ai hatatou mahino ki te faʼahi ʼaia?

² E feafeaʼi hakotou ʼiloʼi ia te faʼahiga tauhi ʼaē ʼe leleiʼia e Sehova? ʼE mole he ʼuhiga ʼo hakotou ako pea mo fakatatau te ʼu akonaki ʼa te ʼu lotu fuli moʼo ʼiloʼi peʼe kofea te lotu moʼoni. ʼE tonu pe ke koutou ako te ʼu meʼa ʼaē ʼe fakahā moʼoni ʼi te Tohi-Tapu ʼo ʼuhiga mo te tauhi moʼoni. Tou toʼo he fakatā: ʼE lahi te ʼu fenua, ʼe nātou fihifihia ʼuhi ko te falā loi. Kapau ʼe foaki atu hakotou gāue ke koutou kumi te falā loi, ʼe koutou kumi feafeaʼi anai ia te falā ʼaia? ʼE koutou ako fakaʼatamai anai koa ke koutou ʼiloʼi kehe ia te agaaga ʼo te ʼu faʼahiga falā loi? Kailoa ia. ʼE koutou fakaʼaogaʼi lelei anai tokotou temi moʼo akoako fakalelei peʼe feafeaʼi te falā moʼoni. Ka koutou ʼiloʼi leva te agaaga ʼo te falā moʼoni, ʼe feala ai leva hakotou ʼiloʼi kehe ia te falā loi. ʼE toe feiā pe, kapau ʼe tou ako ke tou ʼiloʼi ia te lotu moʼoni, ʼe feala ai hatatou ʼiloʼi ia te ʼu lotu hala.

3. Koteā ʼaē neʼe ʼui e Sesu ke tou fai mo kapau ʼe tou loto ke tali tatou e te ʼAtua?

³ ʼE maʼuhiga ke tou tauhi kiā Sehova ʼo mulimuli ki tona finegalo. ʼI te manatu ʼa te tokolahi, ko te ʼu lotu fuli ʼe leleiʼia e te ʼAtua, kae ʼe mole ʼui ʼi te Tohi-Tapu ia te meʼa ʼaia. ʼE ʼi ai te tahi meʼa ʼe tonu ke fai e ia ʼaē ʼe ina ʼui ʼe Kilisitiano. Neʼe ʼui fēnei e Sesu: “ ʼE mole ko nātou ʼaē ʼe nātou ʼui mai kiā te au: ‘ ʼAliki, ʼAliki,’ ka nātou hū anai ki te puleʼaga ʼo selo, kae ko ʼaē ʼe ina fai te finegalo ʼo taku Tāmai ʼaē ʼe ʼi selo.” Koia ke tali tatou e te ʼAtua, ʼe tonu ke tou ʼiloʼi te ʼu meʼa ʼaē ʼe ina fakamaʼua mai pea mo tou maʼuliʼi. Neʼe fakahigoaʼi e Sesu ia te hahaʼi ʼaē ʼe mole nātou fai te finegalo ʼo te ʼAtua ko “he ʼu tagata ʼe nātou manuki ki te lao.” (Mateo 7:​21-23, MN ) Ohage ko te falā loi, ko te lotu hala ʼe mole hona ʼaoga. Pea ʼe toe kovi age, heʼe ko te lotu ʼaia ʼe fakatupu tuʼutāmaki moʼoni ki te maʼuli ʼo te hahaʼi.

4. Koteā te faka ʼuhiga ʼo te ʼu ala e lua ʼaē neʼe talanoa kiai Sesu, pea ʼe nā iku kifea?

⁴ ʼE foaki e Sehova ki te hahaʼi fuli ia te fealagia ʼaē ke nātou maʼu te maʼuli heʼegata. Kae ke feala hatatou maʼu ia te maʼuli heʼegata ʼi te Palatiso, ʼe tonu ke tou tauhi ki te ʼAtua ʼaki te tauhi ʼaē ʼe ina leleiʼia, pea mo tou māʼuʼuli ʼi te temi nei ʼo mulimuli ki te faʼahiga maʼuli ʼaē ʼe ina leleiʼia. Kae ko te tokolahi ʼe nātou fakafisi ki te ʼu faʼahi ʼaia. Koia ʼaē neʼe ʼui ai e Sesu: “Koutou hū ʼi te matapā fāveliveli; heʼe laulahi pea mo ʼātea ia te ala ʼaē ʼe fakatau ki te fakaʼauha, pea e tokolahi ia nātou ʼe hū ai; kae fāveliveli ia te matapā pea mo lauveliveli ia te ala ʼaē ʼe fakatau ki te maʼuli, pea e tokosiʼi ia nātou ʼe nātou maʼu.” (Mateo 7:​13, 14, MN ) Ko te lotu moʼoni ʼe ina taki tatou ki te maʼuli heʼegata, kae ko te lotu hala ʼe ina taki tatou ki te fakaʼauha. ʼE mole loto e Sehova ke fakaʼauha he tahi, koia ʼaē neʼe ina foaki ai ki te hahaʼi ʼi te ʼu potu fuli ʼo te kele ia te faigamālie ʼaē ke nātou ʼiloʼi ia ia. (2 Petelo 3:9) Koia ko tatatou faʼahiga tauhi ʼaē ki te ʼAtua ʼe feala ke ina fakaiku ai tatou ki te maʼuli peʼe ki te mate.

E FEAFEAʼI HATATOU ʼILOʼI IA TE LOTU MOʼONI?

5. ʼE tou lava ʼiloʼi feafeaʼi ia te hahaʼi ʼaē ʼe nātou maʼuliʼi te lotu moʼoni?

⁵ ʼE tou lava maʼu feafeaʼi ‘te ala ʼo te maʼuli’? Neʼe ʼui e Sesu, ʼe ʼiloga anai te lotu moʼoni ʼi te maʼuli ʼo te hahaʼi ʼaē ʼe nātou maʼuliʼi. Neʼe ina ʼui fēnei: “ ʼE koutou ʼiloʼi anai ia nātou ʼi tonatou ʼu fua . . . ko te ʼakau lelei fuli pe ʼe fua ʼaki te ʼu fua matalelei.” (Mateo 7:​16, 17, MN ) Ko tona faka ʼuhiga, ʼe ʼiloga anai te hahaʼi ʼaē ʼe nātou maʼuliʼi te lotu moʼoni ʼi tanatou tauhi pea mo tanatou ʼu aga. Logola ʼe nātou heʼe haohaoa pea mo nātou lakahala, kae ko te kau atolasio moʼoni ʼe nātou faiga ke nātou fai ia te finegalo ʼo te ʼAtua. Tou vakaʼi age muʼa te ʼu puani e ono moʼo ʼiloʼi ia te hahaʼi ʼaē ʼe nātou maʼuliʼi te lotu moʼoni.

6, 7. Koteā te manatu ʼa te ʼu kaugana ʼa te ʼAtua ʼo ʼuhiga mo te Tohi-Tapu, pea koteā te faʼifaʼitaki lelei ʼaē neʼe tuku e Sesu ʼo ʼuhiga mo te faʼahi ʼaia?

⁶ Ko te ʼu kaugana ʼa te ʼAtua ʼe nātou fakatafito tanatou ʼu akonaki ki te Tohi-Tapu. ʼE ʼui fēnei ʼi te Tohi-Tapu: “Ko te Tohi-Tapu kātoa ʼe haʼu mai te ʼAtua pea ʼe ʼaoga moʼo akoʼi, moʼo fakatonutonuʼi, moʼo fakatokatoka ʼo te ʼu meʼa, moʼo akonakiʼi ʼi te faitotonu, koteʼuhi ke kātoa lelei te tagata [peʼe ko te fafine] ʼa te ʼAtua, pea mo teuteu lelei ki te ʼu gāue lelei fuli pe.” (2 Timoteo 3:​16, 17, MN ) Neʼe ʼui e te ʼapositolo ko Paulo ki tona ʼu kaumeʼa Kilisitiano: “I tautou tali te folafola a te Atua nee koutou logo ki ai maià matou, nee mole koutou tali o hage ko he tala a te tagata, kae nee koutou tali i tona uhiga mooni, ko he folafola a te Atua.” (1 Tesalonika 2:13) Koia, ʼe mole fakatafito te ʼu akonaki pea mo te ʼu gāue ʼa te lotu moʼoni ki te ʼu manatu fakatagata peʼe ki he ʼu talatisio. ʼE fakatafito ki te Folafola ʼa te ʼAtua, te Tohi-Tapu.

⁷ Neʼe tuku e Sesu Kilisito te faʼifaʼitaki lelei he neʼe ina fakatafito tana ʼu akonaki ki te Folafola ʼa te ʼAtua. ʼI tana faikole ki tana Tāmai ʼaē ʼe ʼi selo, neʼe ina ʼui fēnei: “E ko te Mooni tau folafola.” (Soane 17:17) Neʼe tui ia Sesu ki te Folafola ʼa te ʼAtua, pea ko meʼa fuli neʼe ina akoʼi ki te hahaʼi neʼe alutahi mo te Tohi-Tapu. Neʼe tautau ʼui e Sesu: “ ʼE tohi fēnei.” (Mateo 4:​4, 7, 10, MN ) Pea neʼe fakaʼaogaʼi e Sesu he vaega. ʼO toe feiā pe, ko te hahaʼi ʼa te ʼAtua ia ʼaho nei ʼe mole nātou akoʼi tanatou ʼu manatu totonu. ʼE nātou faka tui ko te Tohi-Tapu ʼe ko te Folafola ʼa te ʼAtua, pea ʼe nātou fakatafito tanatou ʼu akonaki kiai.

8. Koteā ʼaē ʼe fakamaʼua ʼi te tauhi ʼaē kiā Sehova?

⁸ Ko te hahaʼi ʼaē ʼe nātou maʼuliʼi te lotu moʼoni ʼe nātou atolasio pe kiā Sehova pea ʼe nātou faka mafola tona huafa. Neʼe ʼui fēnei e Sesu: “Ko Sehova, tou ʼAtua, ʼaē ʼe maʼua ke ke atolasio ki ai pea ʼe ko ia tokotahi pe ʼaē ʼe maʼua ke ke tauhi ki ai ʼaki he tauhi tapu.” (Mateo 4:​10, MN ) Koia ko te ʼu kaugana ʼa te ʼAtua ʼe nātou tauhi pe kiā Sehova. ʼE fakamaʼua ʼi te tauhi ʼaia ke ʼiloʼi e te hahaʼi peʼe ko ai te huafa ʼo te ʼAtua moʼoni pea e feafeaʼi te ʼAtua ʼaia. ʼE ʼui iā Pesalemo 83:18: “Ko koe, ʼaē ko tou huafa ko Sehova, ko koe tokotahi pe, te Māʼoluga ʼAupito ʼi te kele kātoa.” Neʼe tuku mai e Sesu te faʼifaʼitaki ʼo ʼuhiga mo te tokoni ʼaē ke fai ki te hahaʼi ke nātou ʼiloʼi ia te ʼAtua, ohage ko tana ʼui ʼi tana faikole ʼaenī: “Neʼe au fakaʼilo tou huafa ki te kau tagata ʼaē neʼe ke foaki mai kiā te au, mai te lotolotoiga ʼo te malamanei.” (Soane 17:​6, MN ) ʼO toe feiā pe, ko te kau atolasio moʼoni ia ʼaho nei ʼe nātou akoʼi ki te hahaʼi ia te huafa ʼo te ʼAtua, mo tana ʼu fakatuʼutuʼu pea mo tona ʼu kalitātē.

9, 10. Ko te ʼu ʼaluʼaga fea ʼaē ʼe fefakahāʼaki ai e te kau Kilisitiano moʼoni ia tonatou ʼofa?

⁹ Ko te hahaʼi ʼa te ʼAtua ʼe nātou maʼu te feʼofaʼofani moʼoni. Neʼe ʼui e Sesu: “Aki te mea aia, e iloi anai e te tagata fuape, ko koutou ko aku tisipulo, kapau e koutou maù te feʼofaʼofani.” (Soane 13:35) Neʼe maʼu e te kau ʼuluaki Kilisitiano te taʼi feʼofaʼofani ʼaia. ʼAki te ʼofa ʼaē ʼe akoʼi mai e te ʼAtua, ʼe tou lava tauʼi te ʼu fihifihia fakafenua, faka sosiale, faka puleʼaga, pea mo ina fakatahiʼi te hahaʼi ke nātou liliu ko he foʼi famili fale tautehina moʼoni. (Kolose 3:14) ʼE lahi te ʼu lotu hala ʼe mole ʼasi ʼi tonatou ʼu hahaʼi ia te taʼi ʼofa ʼaia. Koteā tona fakamoʼoni? ʼE tou sio ki tanatou ʼu hahaʼi ʼe fefakapogiʼaki ʼuhi ko te ʼu tokakovi faka puleʼaga peʼe fakafenua. Kae ko te kau Kilisitiano moʼoni ʼe mole nātou fakaʼaogaʼi te ʼu mahafu tau moʼo matehi tonatou ʼu tēhina Kilisitiano peʼe ko niʼihi age. ʼE ʼui ʼi te Tohi-Tapu: “Aki te mea aeni e ha ai te u fanau a te Atua mo te u fanau a te temonio: Ko he tahi e mole ina mauliʼi te susitisia e mole ʼa te Atua, pea mo ia ae e mole ofa ki tona tehina. . . . E tonu ke tou feʼofaʼaki. E mole hage ko Kaino, nee fakatahi mo te Kovi, pea nee ina fakapogi tona tehina.”​—1 Soane 3:​10-12; 4:​20, 21.

¹⁰ Kae ko te ʼofa moʼoni ʼe mole gata ʼaki tatatou mole matehi ʼo niʼihi. Ko te kau Kilisitiano moʼoni ʼe nātou fakaʼaogaʼi lahi tonatou temi, mo tonatou mālohi, pea mo tonatou ʼu koloā moʼo fetokoniʼaki pea mo fefakaloto mālohiʼaki. (Hepeleo 10:​24, 25) ʼE nātou fetokoniʼaki ʼi te ʼu temi faigataʼaʼia, pea ʼe mole nātou fai he ʼu aga fakakākā ki te hahaʼi. ʼE nātou maʼuliʼi te tokoni ʼa te Tohi-Tapu ʼaē ʼe ʼui ai ke nātou “fai ia te lelei ki te tagata fuape.”​—Kalate 6:10.

11. He koʼe ʼe maʼuhiga ke tou tali ia Sesu Kilisito ʼe ko totatou fakamaʼuli ʼaē neʼe hinoʼi e te ʼAtua?

¹¹ ʼE tali e te kau Kilisitiano moʼoni ia Sesu Kilisito ʼe ko tonatou fakamaʼuli ʼaē neʼe hinoʼi e te ʼAtua. ʼE ʼui ʼi te Tohi-Tapu: “E mole mau te mauli heegata i he tahiʼage, koteuhi e mole he tahiʼage higoa nee kua foaki ki te tagata i te lalolagi e tonu ke fakamauli ai tatou.” (Gaue 4:12) Ohage ko tona fakahā ʼi te Kapite 5, neʼe foaki e Sesu tona maʼuli moʼo totogi ia te hahaʼi fakalogo mai te agahala. (Mateo 20:28) Tahi ʼaē meʼa, ko Sesu ʼe ko te Hau ʼaē neʼe fakanofo e te ʼAtua ʼi te Puleʼaga ʼi selo moʼo takitaki ia te kele kātoa. Pea ko te ʼAtua ʼe ina fakamaʼua mai mo kapau ʼe tou fia maʼu te maʼuli heʼegata, ke tou fakalogo kiā Sesu pea mo maʼuliʼi tana ʼu akonaki. Koia ʼe ʼui ai ʼi te Tohi-Tapu: “Kia ia e tui ki te Alo e ina maù te mauli heegata; pea kia ia e mole fakalogo ki te Alo e mole mamata anai ki te mauli.”​—Soane 3:36.

12. Koteā te ʼu meʼa ʼo te malamanei ʼe mole kau kiai te kau Kilisitiano?

¹² Ko te kau atolasio moʼoni ʼe mole nātou kau ʼi te malamanei. ʼI tona fakamāuʼi iā muʼa ʼo te pule Loma ko Pilato, neʼe ʼui fēnei e Sesu: “E mole i te malama aeni toku puleagahau.” (Soane 18:36) ʼI te ʼu potu fuli ʼaē ʼe māʼuʼuli ai te ʼu tisipulo moʼoni ʼa Sesu, ʼe nātou fakalogo ki te takitaki ʼo tona Puleʼaga ʼi selo pea ʼe mole nātou kau ki te ʼu meʼa faka politike ʼo te malamanei, pea mo tona ʼu tokakovi. Kae ʼe mole tāʼofi e te kau atolasio ʼa Sehova ia te hahaʼi ke nātou kau ki te ʼu meʼa faka politike, ohage la ko te fia maʼu tuʼulaga ʼi he kūtuga faka politike peʼe ko te vote. Logola tanatou mole kau ki te ʼu meʼa faka politike, kae ʼe nātou fakaʼapaʼapa ki te ʼu lao a te puleʼaga. Koteā tona tupuʼaga? Koteʼuhi ko te Folafola ʼa te ʼAtua ʼe ina fakatotonu age kiā nātou ke nātou “fakalogo” ki te “ ʼu pule māʼoluga.” (Loma 13:​1, MN ) Ka mole ʼalutahi te ʼu lao ʼa te ʼAtua pea mo te ʼu fakatuʼutuʼu ʼa te kau politike, pea ʼe muliʼi anai e te kau atolasio moʼoni ia te faʼifaʼitaki ʼa te kau ʼapositolo, ʼaē neʼe nātou ʼui fēnei: “E maua ke fakalogo ki te Atua i te fakalogo ki te tagata.”​—Gaue 5:29; Maleko 12:17.

13. ʼE mahino feafeaʼi te Puleʼaga ʼo te ʼAtua ki te ʼu tisipulo moʼoni ʼa Sesu, pea koteā ʼaē neʼe tonu ke nātou fai?

¹³ Ko te ʼu tisiplo moʼoni ʼa Sesu ʼe nātou faka mafola ko te Puleʼaga ʼo te ʼAtua ʼe ko te falalaʼaga pe ʼaia e tahi ʼa te malamanei. Neʼe fakakikite fēnei e Sesu: “Pea ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.” (Mateo 24:14) Ko te kau tisipulo moʼoni ʼa Sesu Kilisito ʼe nātou faka mafola ko te Puleʼaga ʼo te ʼAtua ʼi selo ʼe ko te falalaʼaga pe ʼaia ki te malamanei, kae ʼe mole nātou uga te hahaʼi ke nātou falala ki te kau takitaki ʼo te tuʼu ʼaenī moʼo fakatokatoka tonatou ʼu fihifihia. (Pesalemo 146:3) Neʼe akoʼi mai e Sesu ke tou faikole ki te puleʼaga haohaoa ʼaia, ʼi tana ʼui ʼaenī: “Ke hoko mai tou puleʼaga. Ke fai tou finegalo i te kele ohage ko selo.” (Mateo 6:​10, MN ) Neʼe fakakikite ʼi te Folafola ʼa te ʼAtua, ko tona Puleʼaga ʼe ʼi selo ʼe ina “laliki anai pea mo fakagata anai te ʼu puleʼaga fuli ʼaia [ʼo te temi nei], pea ko ia totonu ʼe tuʼu anai ʼo aʼu ki he ʼu temi ʼe mole ʼiloʼi hona gataʼaga.”​—Taniela 2:44.

14. ʼI takotou manatu, ko te lotu fea ʼaē ʼe ina fakahoko te ʼu meʼa fuli ʼaē ʼe fakamaʼua mai ʼo ʼuhiga mo te tauhi moʼoni?

¹⁴ ʼAki te ʼu puani ʼaē neʼe tou talanoa kiai, koutou fai te ʼu fehuʼi ʼaenī: ‘Ko te lotu fea ʼaē ʼe fakatafito tana ʼu akonaki ki te Tohi-Tapu pea mo ina fakaʼiloʼilo te huafa ʼo Sehova? Ko te lotu fea ʼaē ʼe ina maʼuliʼi te ʼofa ʼaē ʼe akoʼi mai e te ʼAtua, mo tui kiā Sesu, ʼe mole kau ki te ʼu meʼa ʼo te malamanei, pea ʼe ina faka mafola ko te Puleʼaga ʼo te ʼAtua ʼe ko te falalaʼaga pe ʼaia ʼo te malamanei? ʼI te ʼu lotu fuli ʼaē ʼe maʼu ʼi te malamanei, ko te lotu fea ʼaē ʼe ina fakahoko te ʼu faʼahi fuli ʼaia?’ ʼE lahi te ʼu fakamoʼoni ʼe ʼasi lelei ai, ʼe ko te kau Fakamoʼoni ʼa Sehova.​—Isaia 43:​10-12.

KOTEĀ ʼAĒ KA KOUTOU FAI ANAI?

15. Koteā te tahi ʼu meʼa ʼaē ʼe fakamaʼua mai e te ʼAtua, ʼo hilifaki ki tatatou tui ʼaē ʼe maʼuli moʼoni?

¹⁵ ʼE mole feʼauga pe hatatou tui ki te ʼAtua ke feala hana tali tatou. ʼE ʼui ʼi te Tohi-Tapu, māʼiape la mo te ʼu temonio ʼe nātou tui ʼe ʼi ai te ʼAtua. (Sakopo 2:19) Kae ʼe mole nātou fai te finegalo ʼo te ʼAtua pea ʼe mole ina tali nātou. Koia ke leleiʼia tatou e te ʼAtua, ʼe mole tonu pe ke tou tui ʼe maʼuli moʼoni kae ʼe toe tonu foki ke tou fai tona finegalo, mo tou mavae mai te lotu hala pea mo tou kau ki te tauhi moʼoni.

16. Koteā te ʼu meʼa ʼaē ʼe tonu ke tou fai moʼo mavae mai te lotu hala?

¹⁶ Neʼe fakahā e te ʼapositolo ko Paulo, ʼe tonu ke tou mavae mai te lotu hala. Neʼe ina tohi fēnei: “ ‘Koutou mavae mai te lotolotoiga ʼo nātou, pea ke koutou mavae mai ai, ko te ʼui ʼaia ʼa Sehova, pea ʼaua naʼa koutou fāfā ki te meʼa ʼaē ʼe heʼemaʼa’; ‘pea ʼe au tali anai koutou.’ ” (2 Kolonito 6:​17, MN; Isaia 52:11) Koia ko te kau Kilisitiano moʼoni ʼe nātou fakafeagai kiā meʼa fuli ʼe ʼi ai hona pikipikiga mo te tauhi hala.

17, 18. Koteā ʼaē ʼe fakatātā e “Papiloni Lahi,” pea he koʼe ʼe maʼuhiga ke tou foimo “mavae maia te ia”?

¹⁷ ʼE fakahā ʼi te Tohi-Tapu ko te ʼu lotu hala fuli ʼe nātou kau ki te “Papiloni Lahi.”a (Apokalipesi 17:​5, MN ) Ko te higoa ʼaia ʼe ina fakamanatuʼi mai ia te kolo ʼāfea ko Papiloni, ʼaē neʼe ko te kamataʼaga ʼaia ʼo te lotu hala ʼi te ʼosi ʼo te Tulivio ʼi te temi ʼo Noe. ʼE lahi te ʼu akonaki pea mo te ʼu toʼotoʼoga ʼe fai ʼi te temi nei ʼi te ʼu lotu hala ʼe haʼu mai te Papiloni ʼāfea. Ohage la, ko te hahaʼi ʼo Papiloni neʼe nātou atolasio ki te ʼu atua e tolu, peʼe ko te ʼu tahitolu. Ia ʼaho nei, ʼe lahi te ʼu lotu ko tanatou akonaki tāfito ʼe ko te Tahitolu. Kae ʼe akoʼi lelei mai ʼi te Tohi-Tapu ko te ʼAtua moʼoni pe e tahi, ko Sehova, pea ko Sesu Kilisito ʼe ko tona ʼAlo. (Soane 17:3) Neʼe toe tui te kau Papiloni ko te hahaʼi ʼe ʼi ai tonatou nefesi tuputupua mokā nātou mamate pea ʼe feala ke fakamamahiʼi te ʼu nefesi ʼaia ʼi he ifeli. Ia ʼaho nei, ʼe lahi te ʼu lotu ʼe nātou akoʼi ki te hahaʼi ko te nefesi tuputupua peʼe ko te laumālie ʼe feala ke fakamamahiʼi ʼi he ifeli.

¹⁸ Mai tona ʼaluʼaga ʼaē kua mafola ʼi te malamanei kātoa ia te tauhi faka Papiloni, koia ʼe feala ke tou ʼui ko te Papiloni Lahi ʼo te temi nei ʼe ko te kautahi faka malamanei ʼo te ʼu lotu hala. Pea ko te ʼAtua neʼe ina fakakikite, ʼe fakaʼauha fakafokifā anai ia te kautahi ʼaia ʼo te ʼu lotu hala. (Apokalipesi 18:8) Kua mahino koa ʼi te temi nei pe koʼe ʼe maʼuhiga ke koutou mavae mai te ʼu faʼahi fuli ʼo Papiloni Lahi? ʼE loto e Sehova ʼAtua ke koutou foimo “mavae maia te ia” heʼe kei maʼu te temi ke koutou feholaki.​—Apokalipesi 18:4.

19. Koteā te ʼu tapukina ʼaē ka koutou maʼu anai mo kapau ʼe koutou tauhi kiā Sehova?

¹⁹ Kapau ʼe koutou mavae mai te lotu hala, ko ʼihi ʼo tokotou ʼu kaumeʼa ʼe mole nātou toe fia fakatahi anai mo koutou. Kae ʼe lahi age anai te ʼu tapuakina ʼaē ka koutou maʼu mo kapau ʼe koutou tauhi mo tana hahaʼi kiā Sehova. Ohage ko te ʼu ʼuluaki tisipulo ʼa Sesu ʼi tanatou līaki te ʼu meʼa fuli ʼaē, kae nātou muli ia te ia, ʼe koutou maʼu anai tokotou ʼu tēhina mo tuagaʼane e tokolahi. ʼE koutou kau ʼi te foʼi famili ʼi te malamanei kātoa ʼo te toko lauʼi miliona kau Kilisitiano moʼoni ʼe nātou ʼoʼofa moʼoni kiā koutou. Pea ʼe koutou maʼu anai ia te ʼamanaki taulekaleka ʼo te maʼuli heʼegata “ ʼi te tuʼu ʼo te ʼu faʼahiga meʼa ka haʼu.” (Maleko 10:​28-30, MN ) ʼE feala ʼaki te temi, kiā nātou ʼaē neʼe nātou fakafisi kiā koutou ʼuhi ko takotou tui, ke nātou ako ia te Tohi-Tapu, ʼo nātou liliu ko he kau atolasio ʼa Sehova.

20. ʼE feafeaʼi anai te ka haʼu ʼo nātou ʼaē ʼe nātou maʼuliʼi te tauhi moʼoni?

²⁰ ʼE akoʼi mai ʼi te Tohi-Tapu, kua tou fakaōvi ki te temi ʼaē ka fakaʼauha ai e te ʼAtua ia te mālama agakovi ʼaenī, kae ina fakatuʼu he mālama foʼou mo faitotonu ʼe fakalogo ki te takitaki ʼo tona Puleʼaga. (2 Petelo 3:​9, 13) ʼE ko he mālama taulekaleka anai! Pea ʼi te mālama foʼou pea mo faitotonu ʼaia, ʼe ko te lotu pe anai e tahi, ia te tauhi moʼoni. Koia ʼe lelei anai ke koutou fai te ʼu fetogi ʼaē ka nātou faka fealagia anai ke koutou kau fakatahi mo te kau atolasio moʼoni ʼo te temi nei.