ʼE Akoʼi Te Kau Faifakamafola ʼo Te Puleʼaga

1-3. Kotea ʼae neʼe fai e Sesu ke hoko atu te gaue faifakamafola, pea kotea te ʼu fehuʼi ʼe feala ke tou fai?

LOLOTOGA taʼu ʼe lua, neʼe faifakamafola ia Sesu ʼi Kalilea katoa. (Lau ia Mateo 9:35-38.) Neʼe alu ia ki te ʼu kolo lalahi mo liliki, ʼo akonaki ʼi te ʼu sinakoka pea mo fakamafola te logo lelei ʼo te Puleʼaga. ʼI he potu pe neʼe faifakamafola ai, neʼe fakatahitahi age kia te ia te toe hahaʼi kaugā malie. Koia neʼe ui ai e Sesu “e lahi te taukai” pea mo ʼaoga ni kau gaue ʼe tokolahi.

² Pea neʼe fai e Sesu he ʼu fakatuʼutuʼu ke hoko atu te gaue faifakamafola. Neʼe kotea te ʼu fakatuʼutuʼu ʼaia? Neʼe ina fekauʼi ʼana apositolo ʼe toko 12 ke natou “olo o fagonogono te puleaga o te Atua.” (Luka 9:1, 2) Kaʼe neʼe lagi feʼekeʼaki e te kau apositolo pe feafeaʼi hanatou fakahoko ia te gaue ʼaia. ʼI muʼa ʼo tana fekauʼi natou, neʼe ʼofa ia Sesu ʼo ina akoʼi natou ohage pe ko te akoʼi ʼo ia e tana Tamai ʼae ʼi selo.

³ ʼE feala ke tou fai ia te ’u fehuʼi ʼaeni: Kotea te ako neʼe maʼu e Sesu mai tana Tamai? Kotea te ako neʼe fai e Sesu ki ʼana apositolo? Pea ʼe feafeaʼi ia ʼaho nei, ʼe kei akoʼi koa e te Hau Fakamesia ʼana tisipulo ke feala hanatou fakahoko tanatou minisitelio? Kapau koia, pea ʼe feafeaʼi tana fai ia te faʼahi ʼaia?

“E Au Palalau o Mulimuli Ki Te Mea Nee Ako Mai Kia Au e Te Tamai”

4. Ko te temi fea ʼae neʼe akoʼi ai Sesu e tana Tamai pea ʼifea?

⁴ Neʼe fakaha lelei pe e Sesu neʼe akoʼi ia ia e tana Tamai. ʼI tana faifakamafola, neʼe ina ui fenei: “E au palalau o mulimuli ki te mea nee ako mai kia au e te Tamai.” (Soa. 8:28) Ko te temi fea ʼae neʼe akoʼi ai Sesu pea ʼifea? ʼE mahino ia hili te fakatupu ʼo te ʼAlo ʼulutokotahi ʼo te ʼAtua ia Sesu, neʼe kamata atu aipe tona akoʼi e tana Tamai. (Kol. 1:15) Neʼe fakatahi te ʼAlo mo tana Tamai ʼi selo. Pea lolotoga ni lau ʼi taʼu neʼe fakalogo pea mo sio ki te “Faiako Lahi.” (Esa. 30:20, MN) Neʼe maʼu ai e te ʼAlo ia he ako ʼe lelei tuku pau, ʼo ina akoʼi te ʼu kalitate mo te ʼu gaue pea mo te ʼu fakatuʼutuʼu ʼo tana Tamai.

5. Kotea ʼae neʼe akoʼi age e te Tamai ki tona ʼAlo moʼo fakahoko ʼaki tana minisitelio ʼi te kele?

⁵ ʼI tona temi totonu, neʼe akoʼi e Sehova ki tona ʼAlo ia te minisitelio ʼae neʼe tonu ke ina fakahoko ʼi te kele. Tou vakaʼi ia te lea fakapolofeta ʼae ʼe fakamatala ai te ʼu felogoʼi ʼa te Faiako Lahi pea mo tona ʼAlo ʼulutokotahi. (Lau ia Esaia 50:4, 5.) ʼE ui ʼi te lea fakapolofeta ʼaia, neʼe fafagu e Sehova tona ʼAlo “i te uhu fuli.” ʼE hage pe ʼi te ʼu palalau fakata ʼaia, ko he tagata faiako ʼe ina fafagu ʼi te kei hegihegi tana tama ako, moʼo akoʼi ia ia. ʼE ui fenei ʼi te tahi tohi: “ ʼE hage. . . ʼe fakahu [e Sehova] ia ia ki te loto kalasi, pea mo ina akoʼi age te meʼa ʼae ʼe tonu ke ina fakamafola pea mo tona faʼahiga fai.” Koia ʼi selo, neʼe akoʼi ai e Sehova ki tona ʼAlo ia “te mea ae e tonu ke [ina] fakaha pea mo akonaki ki ai.” (Soa. 12:49) Neʼe toe akoʼi age e tana Tamai pe feafeaʼi tana akoʼi ʼihi.a Pea ʼi tana ʼi te kele, neʼe fakaʼaogaʼi lelei e Sesu tona akoʼi ʼaia, ʼo ina fakahoko ai tana minisitelio pea mo ina akoʼi ʼana tisipulo ke natou fakahoko tanatou minisitelio.

6, 7. (1) Kotea te ako neʼe fai e Sesu ki ʼana apositolo, pea kotea ʼae neʼe feala ai ke natou fakahoko? (2) Ia ʼaho nei, kotea ʼae ʼe tokaga ki ai ia Sesu ke akoʼi ki ʼana tisipulo?

⁶ Ohage ko tatatou ui ʼi te kamata, kotea te ako neʼe fai e Sesu ki ʼana apositolo? ʼI te tohi ʼo Mateo ʼi te kapite 10, neʼe ina foaki ai kia natou he ʼu fakatotonu ʼo ʼuhiga mo tanatou faifakamafola, ohage la: Te telituale ʼae neʼe tonu ke natou olo ki ai (vaega 5 mo te 6), te logo ʼae neʼe tonu ke natou tala (vaega 7), ke natou falala kia Sehova (vaega 9 mo te 10), pe feafeaʼi hanatou felogoʼi mo te hahaʼi (vaega 11-13), pe feafeaʼi moka mole tali natou (vaega 14 mo te 15), pea mo feafeaʼi moka fakatagaʼi natou (vaega 16-23).b ʼAki te akoʼi lelei ʼaia e Sesu ʼana apositolo neʼe feala ai ke natou fakamafola te logo lelei ʼi tonatou temi.

⁷ Kaʼe ʼe feafeaʼi ia ʼaho nei? Ko Sesu, te Hau ʼo te Puleʼaga ʼo te ʼAtua, neʼe ina tuku age ki ʼana tisipulo ia he toe gaue lahi, ʼae ko te fakamafola ia “te logo lelei . . . o te puleaga i te malamanei katoa . . . ke fakamooni ki te u puleaga fuli.” (Mat. 24:14) ʼE kei akoʼi koa tatou e te Hau ke tou fakahoko ia te gaue maʼuhiga ʼaia? ʼEi! Mai selo, ʼe tokaga ia te Hau ke akoʼi ki ʼana tisipulo pe feafeaʼi te fakahoko ʼo te faifakamafola ʼi tuʼa atu ʼo te kokelekasio pea mo feafeaʼi te fakahoko ʼo te ʼu maʼua ʼi te loto kokelekasio.

ʼE Akoʼi Natou Ki Te Fakamafola ʼo Te Evaselio

8, 9. (1) Kotea te fakatuʼutuʼu tafitō ʼo te Ako Fakateokalatike? (2) ʼE tokoni feafeaʼi atu ia te Ako Fakateokalatike ke hikihiki tau fakamafola ia te Puleʼaga?

⁸ Talu mai fualoa mo te fakaʼaogaʼi e te kautahi ʼa Sehova ia te ʼu fakatahi lalahi pea mo te ʼu fono, ohage ko te Fono Gaue, moʼo akoʼi te hahaʼi ʼa te ʼAtua ki te faifakamafola. Kaʼe ʼo kamata mai ʼi te ʼu taʼu 1940, neʼe fakatuʼutuʼu ai e te ʼu tehina takitaki ʼo ʼatatou pilo lalahi ke fai he ʼu ako kehekehe.

⁹ Te Ako Fakateokalatike. Ohage ko tatatou vakaʼi ʼi te kapite ʼaeni kua ʼosi atu, neʼe kamata ia te ako ʼaia ʼi te taʼu 1943. ʼE ko te fakatuʼutuʼu pe koa ʼo te ako ke tou liliu ʼo faiva ʼi te faiakonaki? Kailoa ia. Talu mai te kamata, ko te fakatuʼutuʼu tafitō ʼo te ako ʼaia ʼe ko te akoʼi ki te hahaʼi ʼa te ʼAtua ke natou fakaʼaogaʼi te fealagia ʼae ko te palalau moʼo fakavikiviki kia Sehova ʼi te faifakamafola. (Pes. 150:6) Pea ko te ʼu tehina mo tuagaʼane ʼae ʼe kau ki te ako ʼaia, ʼe natou hikihiki ai tanatou fakamafola ia te Puleʼaga.

10, 11. ʼI te temi nei, ko ai ʼae ʼe kau ki te Ako ʼo Kileate, pea kotea te fakatuʼutuʼu ʼo te ako ʼaia?

¹⁰ Te Ako Tohi-Tapu ʼo Kileate ʼa Te Watchtower. Ko te ako ʼaia ʼae kua higoa ʼi te temi nei ko te Ako Tohi-Tapu ʼo Kileate ʼa Te Watchtower, neʼe kamata ʼi te Monite ʼaho 1 ʼo Fepualio 1943. ʼI te kamata, neʼe ko te fakatuʼutuʼu ʼo te ako ʼaia ke akoʼi ki te kau pionie pea mo natou ʼae ʼi he selevisi temi katoa ke natou liliu ko he kau misionea. Kaʼe talu mai te mahina ʼo Oketopeli 2011, ʼe ko natou pe ʼae kua kau ʼi he selevisi temi katoa ʼae ʼe mulimuli ki te ako ʼaia, ohage ko te kau pionie makehe, mo te ʼu taupau feʼoloʼaki mo ʼonatou ʼohoana, mo te kau Petelite, pea mo te kau misionea ʼae heʼeki natou fai te ako ʼaia.

¹¹ Kotea te fakatuʼutuʼu ʼo te Ako ʼo Kileate? ʼE tali fenei e te tehina ʼe faiako ʼi te ako ʼaia talu mai fualoa: “[Ko tona fakatuʼutuʼu] ke liliu ʼo malohi ia te tui ʼa te kau ako ʼaki tanatou ako ia te Tohi-Tapu katoa pea ke natou fakatuputupu te ʼu kalitate fakalaumalie ʼae ʼe ʼaoga moʼo tauʼi te ʼu faigataʼaia ʼi tonatou telituale foʼou. Pea ʼe ina toe uga foki ia te kau ako ke lahi age tanatou fia kau ki te faifakamafola.”—Efe. 4:11.

12, 13. Kotea te fua ʼo te ako ʼaia ki te gaue faifakamafola ʼi te malamanei? Tuku mai he faʼifaʼitaki.

¹² Kotea te fua ʼo te ako ʼaia ki te gaue faifakamafola ʼi te malamanei? Talu mai te taʼu 1943, ko tehina mo tuagaʼane ʼe toko 8 500 neʼe kau ki te ako ʼaia,c pea ko te ʼu misionea ʼae neʼe natou fai ia te ako ʼaia neʼe fekauʼi natou kia fenua ʼe 170. ʼE fakaʼaogaʼi lelei e te kau misionea tanatou ako ʼaia, ʼo natou tuku he faʼifaʼitaki lelei ʼi te faifakamafola pea mo natou akoʼi ʼihi ke natou fai feia mo natou. ʼI te agamahani, neʼe olo te kau misionea ʼo faifakamafola ʼi he ʼu koga meʼa neʼe tokosiʼi pe neʼe mole ʼi ai pe la he kau faifakamafola.

¹³ Tou vakaʼi muʼa te aluʼaga neʼe hoko ʼi Saponia. Lolotoga te Lua Tau Fakamalamanei neʼe mole kei fakatuʼutuʼu ia te faifakamafola ʼi te ʼu ʼapi. ʼI te mahina ʼo ʼAukusito 1949, neʼe ko te kau faifakamafola ʼe toko 10 ʼi Saponia. Kaʼe ʼi te fakaʼosi ʼo te taʼu ʼaia, neʼe faifakamafola lahi ʼi Saponia ia te toko 13 kau misionea neʼe natou fai te ako ʼo Kileate. Pea neʼe fekauʼi leva kiai te tahi kau misionea. ʼI te kamata, neʼe natou faifakamafola tafitō ʼi te ʼu kolo lalahi; pea ki muli age neʼe olo ki te ʼu kolo liliki. Neʼe fakalotomalohiʼi e te kau misionea ia tanatou kau ako pea mo ʼihi atu ke natou toʼo te selevisi pionie. Neʼe tapuakina lahi te ʼu faiga ʼaia ʼa te kau misionea. Ia ʼaho nei, ko te kau faifakamafola ʼe toko 216 000 tupu ʼi Saponia, pea ko te teitei toko 40 ki te teau ia natou ʼaia ʼe natou pionie.d

14. Kotea ʼae ʼe fakamoʼoni kiai te tahi ʼu ako fakateokalatike? (Vakaʼi mo te fakamatala ʼae ʼi te ʼa takai “Te ʼu Ako ʼAe ʼe Fai Ki Te Hahaʼi Fakalogo ʼo Te Puleʼaga,” ʼi te pasina 188.)

¹⁴ Te tahi ʼu ako fakateokalatike. Ko te Ako ʼo Te Kau Pionie, mo te Ako Tohi-Tapu ʼo Te ʼu Taumatu’a Kilisitiano pea mo te Ako Tohi-Tapu ʼo Te ’u Tehina Selipatea neʼe tokoni kia natou ʼae neʼe kau kiai ke natou malolohi ʼi te faʼahi fakalaumalie pea mo natou faʼafai ʼi te gaue faifakamafola.e Ko te ʼu ako fuli ʼaia ʼe ko he fakamoʼoni lahi ki te akoʼi fakalelei e totatou Hau ʼana tisipulo ke feala hanatou fakahoko tanatou minisitelio.—2 Tim. 4:5.

ʼE Akoʼi Te ʼu Tehina Ke Natou Fakahoko Te ʼu Maʼua ʼi Te Kautahi

15. Kotea te faʼahiga fai ʼa Sesu ʼe fia faʼifaʼitakiʼi e te ʼu tehina ʼae ʼe ʼi ai ʼonatou maʼua?

¹⁵ Tou manatuʼi ia te lea fakapolofeta ʼo Esaia, ʼae ʼe ui ai ko Sesu neʼe akoʼi e te ʼAtua. ʼI tona akoʼi ʼaia, neʼe iloʼi ai e te ʼAlo ia “te palalau ae e aoga ki ae e gaegae.” (Esa. 50:4) Pea neʼe maʼuliʼi e Sesu tona akoʼi ʼaia. Koteʼuhi ʼi tana ʼi te kele, neʼe ina fakafimalieʼi ia natou ʼae neʼe “vaivai mo mafasia.” (Mat. 11:28-30) Pea ohage pe ko Sesu, ko te ʼu tehina ʼae ʼe ʼi ai ʼonatou maʼua ʼi te kokelekasio ʼe natou fia fakalotofimalieʼi ʼonatou tehina mo tuagaʼane. ʼO ʼuhiga leva mo te faʼahi ʼaia, neʼe fakatuʼu te ʼu ako kehekehe moʼo akoʼi te ʼu tehina.

16, 17. Kotea te fakatuʼutuʼu ʼo te Ako ʼo Te Minisitelio ʼo Te Puleʼaga? (Vakaʼi mo te nota.)

¹⁶ Te Ako ʼo Te Minisitelio ʼo Te Puleʼaga. Ko te ʼuluaki kalasi ʼo te ako ʼaia neʼe kamata ʼi te ʼaho 9 ʼo Malesio 1959, ʼi te kolo ko South Lansing, ʼi Amelika. Neʼe kau ki ai te ʼu taupau feʼoloʼaki pea mo te ʼu tehina taupau ʼi te ʼu kokelekasio pea neʼe fai lolotoga te mahina katoa. Ki muli age, neʼe fakaliliu te ako ʼaia mai te Fakapilitania ki te tahi age ʼu lea. Neʼe feala ai, ʼaki te temi, ke mulimuli te ʼu tehina ʼi te malamanei ki te ako ʼaia.f

¹⁷ ʼO ʼuhiga mo te fakatuʼutuʼu ʼo te ako ʼaia, neʼe ui fenei ʼi te Annuaire des Témoins de Jéhovah 1962: “ ʼI te malama ʼaeni ʼe maʼumaʼua lahi ai te hahaʼi. Koia, ko he tehina taupau ʼi te kokelekasio ʼe tonu ko he tahi ʼe poto ʼi te fakaalualu ʼo tona maʼuli, ke feala hana tokaga fakalelei kia natou fuli ʼi te kokelekasio pea mo liliu ko he tapuakina kia natou. Pea ʼe tonu foki ke tokaga ke ʼaua naʼa ina meʼa noaʼi ʼona maʼua fakafamili he ʼe kua tokaga tafitō pe ia ki te kokelekasio. ʼE tonu ke fakapotopoto. ʼE ko he faigamalie lahi ʼe foaki ki te ʼu tehina taupau ʼi te ʼu kokelekasio ʼi te malamanei katoa, ke natou fakatahi ki te Ako ʼaia ke akoʼi natou. ʼE tokoni anai ke natou mulimuli ki te ʼu fakamaʼua ʼae ʼe tonu ke fakahoko e he tehina taupau ohage ko tona tuʼu ʼi te Tohi-Tapu.”—1 Tim. 3:1-7; Tito 1:5-9.

18. ʼE fua lelei feafeaʼi ki te hahaʼi fuli ʼa te ʼAtua ia te Ako ʼo Te Minisitelio ʼo Te Puleʼaga?

¹⁸ ʼE fua lelei ki te hahaʼi fuli ʼa te ʼAtua ia te Ako ʼo Te Minisitelio ʼo Te Puleʼaga. ʼO feafeaʼi? Koteʼuhi, ka maʼuliʼi e te kau tagata ʼafeā mo te kau tagata faifekau fakaminisitelio ia te ʼu tokoni ʼae neʼe natou ako, pea ʼe natou hage ai ko Sesu, ʼo fakafimalieʼi ʼonatou tehina mo tuagaʼane. ʼE mahino ia ʼe ke leleiʼia moka ʼe fai atu e he tagata ʼafeā peʼe ko he tagata faifekau fakaminisitelio ia he ʼu palalau ʼe lelei, peʼe fagono lelei atu, pea moka natou ʼaʼahi moʼo fakalotomalohiʼi koe. (1 Tes. 5:11) ʼE ko he tapuakina lahi ia ʼe tou maʼu mai te ʼu tehina ʼaia.

19. Kotea te tahi ʼu ako ʼe tokaga ki ai te Komite ʼo Te ’u Akonaki ʼo Te Kolesi Pule, pea kotea te fakatuʼutuʼu ʼo te ʼu ako ʼaia?

¹⁹ Te tahi ʼu ako fakateokalatike. ʼE tokaga te Komite ʼo Te ’u Akonaki ʼo Te Kolesi Pule ki te tahi ʼu ako ʼae ʼe fai ki te ʼu tehina ʼae ʼe ʼi ai ʼonatou maʼua ʼi te kautahi. Neʼe fakatuʼutuʼu te ʼu ako ʼaia moʼo tokoni ki te ʼu tehina ke natou fakahoko lelei ʼonatou maʼua fuli. Ohage la, ʼe kau ki ai te ako ki te kau tagata ʼafeā, mo te kau taupau feʼoloʼaki pea mo te ʼu tehina ʼo te ʼu Komite ʼo Te ʼu Filiale. Ko te ʼu ako Fakatohi-tapu ʼaia ʼe ina fakalotomalohiʼi te ʼu tehina ke natou malolohi ʼi te faʼahi fakalaumalie. ʼE toe tokoni ki te ʼu tehina ke natou mulimuli ki te ʼu pelesepeto Fakatohi-tapu moka natou tokakaga ki te faga ovi maʼuhiga ʼae neʼe tuku age e Sehova.—1 Pet. 5:1-3.

20. He ko ʼe neʼe feala ke ui e Sesu ʼe akoʼi fuli tatou e Sehova, pea kotea ʼae ʼe ke faiga anai ke ke fai?

²⁰ ʼE ha mai ai, ʼe kei tokaga pe ia te Hau Fakamesia ke akoʼi fakalelei ʼana tisipulo. Neʼe ʼuluaki akoʼi e Sehova tona ʼAlo, pea neʼe akoʼi leva e tona ʼAlo ʼana tisipulo. Koia neʼe feala ai ke ui e Sesu ʼe akoʼi fuli tatou e Sehova. (Soa. 6:45; Esa. 54:13) Tou faiga ke tou maʼu te ʼu lelei ʼo te akoʼi ʼaia ʼo tatou e totatou Hau, ʼaki te Ako Fakateokalatike mo te tahi ʼu fono, peʼe ko te tahi ʼu ako ʼae neʼe tou talanoa ki ai ʼi te kapite ʼaeni. Pea tou manatuʼi ko te fakatuʼutuʼu tafitō ʼo te ʼu ako ʼaia ʼe ko te tokoni mai ke tou malolohi ʼi te faʼahi fakalaumalie ke feala hatatou fakahoko katoa tatatou minisitelio.