Neʼe Fakaʼapaʼapaʼi Ia Sesu ʼi Muʼa ʼo Tana Tupu

ʼI te ʼosi fakaha age e te ʼaselo ko Kapeliele ki te taʼahine ko Malia ʼe ina fuafatuʼi anai he tama, ʼe higoa anai ko Sesu pea ʼe hau anai ʼo talu ai, neʼe fehuʼi fenei age e Malia: “ ʼE hoko feafeaʼi anai te faʼahi ʼaia, koteʼuhi neʼe heʼeki au momoe mo he tagata?”—Luka 1:34.

Neʼe tali fenei e Kapeliele: “ ʼE hifo mai anai te laumalie maʼoniʼoni kia koe, pea ʼe maluʼi anai koe e te malohi ʼo te Maʼoluga. Ko te tupuʼaga la ʼaia ʼo te maʼoniʼoni ʼo ia ʼae ka tupu mai pea ʼe fakahigoaʼi anai ko te ʼAlo ʼo te ʼAtua.”—Luka 1:35.

Moʼo lagi tokoni kia Malia ke tui ki tana logo, neʼe hoko atu fenei e Kapeliele: “Ko Elisapeta tou kaiga, kua ina fuafatuʼi mo ia he tama, kaʼe kua finematuʼa. Ko tona mahina ono ʼaeni, ia ia ʼae neʼe ui ʼe ko he fafine paʼa, he ʼe mole he meʼa ʼe faigataʼa ki te ʼAtua.”—Luka 1:36, 37.

Neʼe ha ʼi te tali ʼae neʼe fai e Malia tana tui ki te ʼu palalau ʼa Kapeliele. Neʼe ina ui fenei: “Ko au ko te kaugana ʼa Sehova! Ke hoko kia au ʼo mulimuli ki tau folafola.”—Luka 1:38.

ʼI te ʼosi mavae ʼa Kapeliele, neʼe teuteu ia Malia ke alu ʼo fakasiosio ia Elisapeta mo tona ʼohoana, ia Sakalia. Neʼe nā nonofo ovi ki Selusalemi ʼi te ʼu moʼuga ʼo Sutea. Neʼe feala ke ʼaho tolu peʼe fa tana faifagona mai Nasaleti.

ʼI te kaku atu ʼa Malia ki te ʼapi ʼo Sakalia, neʼe hu ki loto pea neʼe fakamalo ki tona kaiga ko Elisapeta. ʼI te temi pe ʼaia, neʼe fonu ia Elisapeta ʼi te laumalie maʼoniʼoni, pea neʼe ina ui fenei kia Malia: “Manuʼia ia koe ʼi te fafine fuape, pea manuʼia te fua ʼo tou ʼalo! He koʼe ʼe fakamaʼuhigaʼi feiaʼi au, ke ʼaʼahi au e te faʼe ʼo toku ʼAliki? ʼI taku logo ki tau fakamalo, neʼe gaūgaūe fakafiafia te kiʼi tamasiʼi ʼi toku fatu.”—Luka 1:42-44.

Neʼe tali fenei leva e Malia ʼaki he lotofakafetaʼi: “ ʼE au fakavikiviki kia Sehova, pea ʼe fiafia toku loto ʼi te ʼAtua toku Fakamaʼuli, koteʼuhi neʼe sio ifo kia au, tana fafine kaugana masiva. Pea ʼe fakamatala anai e te ʼu taʼiake fuli toku fiafia, koteʼuhi ʼe lahi te ʼu gaue neʼe fai maʼaku e te Mafimafi.” Logo la tona ʼofainaʼi e te ʼAtua, kaʼe ʼe tou tokagaʼi neʼe tuku e Malia te fakavikiviki katoa ki te ʼAtua. Neʼe ina ui fenei: “ ʼE maʼoniʼoni tona huafa pea ʼe manavaʼofa kia natou ʼae ʼe manavasiʼi kia te ia mai te taʼiake ki te taʼiake.”—Luka 1:46-50.

Pea neʼe fakaʼaogaʼi e Malia he ʼu lea fakapolofeta moʼo fakavikiviki ki te ʼAtua, ʼo ina ui fenei: “Neʼe ina fai he gaue malohi ʼaki tona nima, pea neʼe ina fakamavetevete ia natou ʼae ʼe ha tanatou fialahi ʼi te ʼu fakatuʼutuʼu ʼo ʼonatou loto. Neʼe ina fakahifo te ʼu tagata malolohi mai ʼonatou hekaʼaga fakahau, pea mo hikihiki ia natou ʼae neʼe malalo. Neʼe ina fakafimalie katoa ia natou ʼae neʼe pakupaku ʼaki he ʼu meʼa lelei, kaʼe neʼe ina fakaliliu ʼatea ia natou ʼae neʼe maʼu koloa. Neʼe tokoni ia ki tana kaugana ko Iselaele, ʼi tana manatuʼi tona manavaʼofa, ohage ko tana fakaha ki ʼatatou kui, ko Apalahamo pea mo tona hakoga, ʼo talu ai.”—Luka 1:51-55.

Neʼe nofo ia Malia mo Elisapeta lolotoga teitei mahina ʼe tolu, lagi ke tokoni kia Elisapeta he neʼe kua vave fanau. Neʼe ko he meʼa lelei ki te ʼu fafine agatonu ʼaia ʼe lua, ke nā nonofo fakatahi ʼi te temi maʼuhiga ʼaia ʼo tonā maʼuli.

Pea tou tokagaʼi te fakaʼapaʼapaʼi ʼo Sesu kaʼe neʼe heʼeki tupu. Neʼe fakahigoaʼi ia ia e Elisapeta ko “toku ʼAliki,” pea ko te tamasiʼi ʼae neʼe ʼi te fatu ʼo Elisapeta “neʼe gaūgaūe fakafiafia” ʼi te temi ʼae neʼe ʼalofa age ai ia Malia kia Elisapeta. ʼE tou vakaʼi anai, neʼe mole tatau te aga ʼaia mo ʼae ka fai anai e ʼihi ki muli age kia Malia pea mo tana tamasiʼi ʼae ka ina fanauʼi.