Neʼe Faifagona Te Famili ʼo Sesu Ki Selusalemi

Kua hoko mai leva te temi ʼae ke faifagona ai te kiʼi famili ʼo Sosefo, ʼo feia pe mo ʼonatou kaumeʼa pea mo ʼonatou kaiga, ki Selusalemi. Neʼe natou olo ki ai ʼi te taʼu fuli ʼo fakamanatu te Pasikate, ohage ko tona fakatotonu ʼi te Lao. (Tetelonome 16:16) Neʼe vaha mamaʼo ia Nasaleti mo Selusalemi ia teitei kilometa ʼe 120. Neʼe natou maʼumaʼua fuli ʼi te teuteuʼi ʼo te faifagona ʼaia pea neʼe natou fiafia lahi ai. Neʼe kua taʼu 12 ia Sesu, pea neʼe fakaʼamu lahi ke hoko mai la te ʼaho lahi ʼaia kaʼe toe alu ai ki te fale lotu.

Kia Sesu mo tona famili, neʼe mole fai te Pasikate ʼi he ʼaho pe ʼe tahi. ʼI te ʼaho ʼae neʼe hoa ki te Pasikate, neʼe kamata ai te ʼAho Lahi ʼo Te ʼu Pane Hala Fakatupu, pea neʼe fai lolotoga ʼaho ʼe fitu. (Maleko 14:1) Neʼe kau te ʼaho lahi ʼaia ki te temi ʼae neʼe fakamanatuʼi ai te Pasikate. Neʼe mahani ʼe teitei vahaʼa lua tona loaloaga, mai tanatou mavae mai Nasaleti ki Selusalemi, ʼo aʼu ki tanatou toe liliu. Kaʼe ʼi te taʼu ʼaia, neʼe loaloaga age ʼuhi ko te meʼa neʼe fai e Sesu. Neʼe hoko te aluʼaga ʼaia ʼi tanatou mavae ʼae mai Selusalemi.

ʼI tanatou toe liliu ʼaia, neʼe manatu ia Sosefo mo Malia ʼe nofo Sesu mo te ʼu kaiga pea mo te ʼu kaumeʼa ʼae neʼe faifagona fakatahi mo natou. Kaʼe ʼi tanatou manava ʼi te poʼuli, neʼe mole nā sisio ki ai. Koia, neʼe nā kumi ia ia ʼi ʼonā kaiga pea mo ʼonā kaumeʼa, kaʼe neʼe mole nā maʼu ia ia. Koia neʼe nā toe liliu ai ki Selusalemi ʼo kumi ia ia.

Neʼe nā kumi ia ia lolotoga te ʼaho katoa, kaʼe neʼe mole nā maʼu. Pea toe feia ʼi te lua ʼaho. ʼI te tolu ʼaho, neʼe hoki nā maʼu ai leva tanā tamasiʼi ʼi te fale lotu. Neʼe nā sisio kia Sesu neʼe nofo ʼi te lotolotoiga ʼo ʼihi kau faiako Sutea. Neʼe fagono kia natou, mo faifehuʼi, pea neʼe natou punamaʼuli ʼi tana mahino.

Neʼe ui fenei age e Malia: “Tama, he koʼe neʼe ke fai te meʼa ʼaia? Sio ki tau tamai mo au kua ma lotohoha ʼi tou kumi.”—Luka 2:48.

Neʼe punamaʼuli ia Sesu ʼi tanā mole iloʼi te faʼahi ʼae neʼe nofo ai. Neʼe ina fehuʼi fenei age: “He koʼe neʼe kolua kumi au? Neʼe mole kolua iloʼi koa la ʼe tonu ke au nofo ʼi te ʼapi ʼo taku Tamai?”—Luka 2:49.

Neʼe toe liliu ia Sesu ki Nasaleti mo Sosefo mo Malia pea neʼe hoko atu pe tana fakalogo kia naua. Neʼe hoko atu tana tuputupu ʼi te poto pea mo te faʼahi fakasino. Logo la tana kei tamasiʼi, kaʼe neʼe ʼofainaʼi e te ʼAtua pea mo te hahaʼi. ʼEi, ʼo kamata mai te temi ʼae neʼe kei veliveli ai, neʼe tuku e Sesu he faʼifaʼitaki lelei, he neʼe ina leleiʼia te ʼu meʼa fakalaumalie pea neʼe fakaʼapaʼapa ki ʼana matuʼā.