He Ako ʼo ʼUhiga Mo Te Fakamolemole

ʼO mulimuli ki te aluʼaga ʼo tonatou loto, neʼe kehekehe te tali ʼa te hahaʼi ia te ʼu palalau pea mo te ʼu meʼa ʼae neʼe fai e Sesu. Neʼe ha lelei te faʼahi ʼaia ʼi te meʼa neʼe hoko ʼi he ʼapi ʼi Kalilea. Ko te Faliseo neʼe higoa ko Simone, neʼe ina fakaafe ia Sesu ki he kai, he neʼe lagi ina fia iloʼi ia ia ʼae neʼe ina fakahoko he ʼu gaue fakaofoofo. Neʼe tali e Sesu, he neʼe lagi manatu ʼe ko he faigamalie ʼaia kia ia ke tokoni ki te hahaʼi ʼae ka kau anai ki ai, ohage pe ko tana tali te ʼu fakaafe ʼae ke kai mo te kau tanaki tukuhau pea mo te kau agahala.

Kaʼe neʼe mole fai kia Sesu te tali kaiga ʼofa ʼae neʼe fai mahani ki te kau fakaafe. Kapau neʼe haʼele he tahi mo he ʼu taka ʼi te ʼu ala efuʼia ʼo Palesitina, neʼe maka velavela ʼona vaʼe pea ʼuli. Koia moʼo fakaha te tali kaiga, neʼe ko te agaʼi fenua te fufulu ʼo te ʼu vaʼe ʼo ia ʼae neʼe fakaafe ʼaki he moʼi vai mokomoko. Kaʼe neʼe mole fai te faʼahi ʼaia kia Sesu. Neʼe mole fakatalitali ia ia ʼaki he fekita, ohage ko tona fai mahani. Ko te tahi agaʼi fenua moʼo fakaha te ʼofa pea mo te tali kaiga, neʼe ko te takaī lolo ʼo te ʼulu ʼo ia ʼae neʼe fakaafe. Neʼe mole toe fai foki mo te faʼahi ʼaia kia Sesu. Koia neʼe fiafia moʼoni koa ia Simone ʼi tana fakatalitali ia Sesu?

Neʼe kua kamata kakai te kau fakaafe. ʼI tanatou kakai, neʼe ulu fakalogologo mai te fafine neʼe mole fakaafe. Neʼe iloʼi ia ʼe ko he “fafine agahala” ʼi te kolo. (Luka 7:37) Ko te hahaʼi fuli ʼe natou agahala, kaʼe ko te fafine ʼaia neʼe lagi ina fai he ʼu aga heʼe ʼaoga, lagi neʼe ko he fafine paomutu. Neʼe lagi logo ki te ʼu akonaki ʼa Sesu, ʼo feia mo tana fakaafe ‘ia natou fuli ʼae ʼe mafasia ke natou olo age kia te ia pea ʼe ina fakafimalieʼi anai natou.’ (Mateo 11:28, 29) ʼE mahino ia neʼe malave ki tona loto te ʼu palalau pea mo te ʼu meʼa ʼae neʼe fai e Sesu, koia ʼae neʼe ina kumi ai ia Sesu.

Neʼe fakalaka te fafine ia tuʼa ʼo Sesu pea neʼe haʼu ʼo tuʼutuli ifo ʼi ʼona vaʼe. Neʼe tagi, ʼo ina palapalaʼi te ʼu vaʼe ʼo Sesu ʼaki ʼona loʼimata pea neʼe ina holoholoʼi ʼaki tona lauʼulu. Neʼe ʼuma mamahi ki ʼona vaʼe pea ina takaī ʼaki te lolo magoni ʼae neʼe haʼu mo ia. Neʼe mole leleiʼia e Simone te meʼa ʼaia neʼe sio ki ai, he neʼe fakakaukau fenei: “Kapau ʼe ko he polofeta moʼoni ia te tagata ʼaeni, ʼe ina iloʼi pe ko te faʼahiga fafine feafeaʼi ʼae ʼe fa age ki ai, ʼe ko he fafine agahala.”—Luka 7:39.

ʼI tana iloʼi ia te manatu ʼa Simone, neʼe ui fenei age e Sesu: “Simone, ʼe ʼi ai te meʼa ʼe au fia ui atu.” Neʼe ina tali fenei age: “ ʼAliki, ui mai koe!” Neʼe hoko atu fenei e Sesu: “Ko tagata ʼe toko lua neʼe tuʼu maʼua ki he tagata, ko te maʼua ʼo te tahi ko tenalio ʼe 500 pea ko te tahi age ko te 50. ʼI te mole feala ʼae ke nā huʼi ʼonā maʼua, neʼe ina fakamolemole kia naua ʼaki he lotolelei. Koia, ko ai ia naua ʼae ka ʼofa lahi anai kia ia?” Neʼe mole lagi fia mahino ia Simone ki te ʼu palalau ʼaia ʼa Sesu, pea neʼe ina tali fenei: “ ʼI taku manatu, ko ia ʼae neʼe lahi age tana fakamolemole ki ai.”—Luka 7:40-43.

Neʼe ʼio ki ai Sesu. Neʼe sio leva ki te fafine, pea ina ui fenei kia Simone: “Sio ki te fafine ʼaeni. ʼI taku hu mai ki tou loto fale, neʼe mole ke foaki mai he moʼi vai ki ʼoku vaʼe. Kaʼe ko te fafine ʼaeni neʼe ina palapalaʼi ʼoku vaʼe ʼaki ʼona loʼimata pea neʼe ina holoholoʼi ʼaki tona lauʼulu. Neʼe mole ke ʼuma mai, kaʼe ko te fafine ʼaeni, talu mai te hola ʼae neʼe au tau mai ai, neʼe haga ʼuma mamahi pe ki ʼoku vaʼe. Neʼe mole ke takaī lolo toku ʼulu, kaʼe ko te fafine ʼaeni neʼe ina takaī ʼaki te lolo magoni ʼoku vaʼe.” Neʼe mahino kia Sesu neʼe fakaha ai e te fafine ʼaia tana fakahemala fakamalotoloto ki tona maʼuli heʼe ʼaoga. Koia neʼe ina ui fenei: “ ʼE au tala atu kia koutou, ʼuhi ko te faʼahi ʼaia, ʼe fakamolemole ʼana agahala, logope la tona lahi, he neʼe ʼofa lahi. Kaʼe ko ʼae ʼe fakamolemole veliveli pe ki ai, ʼe veliveli pe tona ʼofa.”—Luka 7:44-47.

Neʼe mole fakalakatonuʼi e Sesu te fai ʼo te aga heʼe ʼaoga. Kailoa ia, kaʼe neʼe ina fakaha tona ʼofa pea mo tona lotomahino ki te hahaʼi ʼae neʼe natou fai he ʼu agahala mamafa kaʼe natou fakaha leva tanatou fakahemala pea mo kumi te fakafimalie ia Kilisito. Pea ʼe mahino ia neʼe logoʼi e te fafine ʼaia he fimalie ʼi te ui fenei age e Sesu: “Kua fakamolemole ʼau agahala. . . . Kua haofaki koe e tau tui, alu la ʼi te fimalie.”—Luka 7:48, 50.