Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 4-10 ʼO FEPUALIO
TE ʼU KOLOA ʼO TE TOHI-TAPU | LOMA 1-3
“Kotou Haga Ako’i ʼOkotou Leʼo ʼo Loto”
(Loma 2:14, 15) Koteʼuhi ka fai e te hahaʼi ʼae ʼe mole Sutea te ʼu meʼa ʼae ʼe tuʼu ʼi te lao, kaʼe mole natou maʼu te lao, ʼe ha ʼi te hahaʼi ʼaia ʼe ʼi ai he lao ʼi ʼonatou loto. 15 ʼE fakaha e natou ʼaia kua tohi te lao ʼi ʼonatou loto. ʼE fakatokaga age e ʼonatou leʼo ʼo loto pe ʼe lelei peʼe kovi ʼanatou aga, pea ʼe tukugakoviʼi peʼe fakalakatonuʼi natou e ʼanatou manatu.
lv 16 6
ʼE Kotou Lava Taupau Feafeaʼi He Leʼo ʼo Loto ʼe Lelei?
6 ʼE ko te ʼu kaugana pē koa ʼa Sehova ʼaē ʼe natou maʼu ia te meʼa ʼofa ʼaia ko te leʼo ʼo loto? Kotou tokagaʼi ia te ʼu palalau ʼaenī neʼe fai e te ʼapositolo ko Paulo ʼaki te takitaki ʼa te ʼAtua: “Kā fai e te hahaʼi ʼo te ʼu puleʼaga ʼaē ʼe mole natou maʼu te lao ia te ʼu meʼa ʼo te lao, ko te hahaʼi ʼaia, logopē lā ʼe mole natou maʼu te lao, ʼe natou liliu ko he lao kiā nātou totonu. ʼE ko nātou totonu ʼaia ʼe natou fakahā ko te meʼa ʼaē ʼi te lao ʼe tohi ʼi tonatou loto, kae ko tonatou leʼo ʼo loto ʼe fakamoʼoni mo nātou, ʼi tanatou ʼu manatu, ʼe fakalakahalaʼi ia nātou peʼe fakalakatonuʼi ia nātou.” (Loma 2:14, 15) Māʼiapē lā mo nātou ʼaē ʼe mole natou ʼiloʼi ia te ʼu lao ʼa Sehova, ʼe feala ʼi ʼihi temi ke uga nātou e tonatou leʼo ʼo loto ke natou fai he meʼa ʼe ʼalutahi mo te ʼu pelesepeto ʼa te ʼAtua.
(Loma 2:15) ʼE fakaha e natou ʼaia kua tohi te lao ʼi ʼonatou loto. ʼE fakatokaga age e ʼonatou leʼo ʼo loto pe ʼe lelei peʼe kovi ʼanatou aga, pea ʼe tukugakoviʼi peʼe fakalakatonuʼi natou e ʼanatou manatu.
lv 17-18 8-9
ʼE Kotou Lava Taupau Feafeaʼi He Leʼo ʼo Loto ʼe Lelei?
8 ʼE feafeaʼi hakotou fai he tonu ʼe fakatafito ki tokotou leʼo ʼo loto? Ko ʼihi ʼe hā mai kā nātou fai he tonu, pea ʼe natou mulimuli pē ki te ʼu meʼa ʼaē ʼe holi kiai tonatou loto, ʼo natou fai ai he puleʼaki ʼo ʼuhiga mo te meʼa kā natou fai. ʼE lagi natou ʼui fēnei: “ ʼE mole hoha toku leʼo ʼo loto ki te tonu ʼaenī neʼe au fai.” ʼE feala ke mālohi te ʼu holi ʼo te loto, ʼo tupu ai te hehē ʼo te leʼo ʼo loto. ʼE ʼui fēnei ʼi te Tohi-Tapu: “ ʼE kākā te loto, ʼo laka age iā meʼa fuli pē, pea ʼe kovi ʼaupitō ia. Ko ai ʼaē ʼe ina lava ʼiloʼi?” (Selemia 17:9) Koia ʼe mole tonu anai ke tou fakamaʼuhigaʼi fau te ʼu holi ʼo totatou loto. Kae ʼe tou fia fakamuʼamuʼa anai ia te ʼu meʼa ʼaē ʼe leleiʼia e Sehova ʼAtua.
9 Kapau ko te tonu ʼaē ʼe tou fai, ʼe fakatafito ki he leʼo ʼo loto neʼe akoʼi, pea ʼe hā ai anai tatatou manavasiʼi ʼaē ki te ʼAtua, kae ʼe mole ko totatou ʼu holi ʼaē ʼe tou fakamuʼamuʼa. Tou vakaʼi age muʼa ia te faʼifaʼitaki ʼaenī: Ko te kōvanā agatonu ko Nehemia neʼe feala ke ina fakamaʼua ki te hahaʼi ʼi Selusalemi he ʼu tukuhau. Kae neʼe mole ina fai ia te faʼahi ʼaia. Koteā tona tupuʼaga? Neʼe mole loto ke ʼita ia Sehova ʼi tana haga ʼaē ʼo fakamafasia ia tana hahaʼi. Neʼe ina ʼui fēnei: “Neʼe mole au fai te faʼahi ʼaia, ʼuhi ko te manavasiʼi ki te ʼAtua.” (Nehemia 5:15) ʼE tonu ke tou manavasiʼi moʼoni ki te ʼAtua, ke tou tōkakaga naʼa tou fai he meʼa ʼe mole leleiʼia e tatatou Tamai ʼaē ʼe ʼi selō. Ko te taʼi manavasiʼi ʼaia, ʼe ina uga anai tātou ke tou kumi ia te takitaki ʼa te Folafola ʼa te ʼAtua mokā tou fai he ʼu tonu.
Kumi Te ʼu Koloa ʼi Te Tohi-Tapu
(Loma 3:4) Kailoa ia! Kaʼe ke moʼoni te ʼAtua, tatau aipe pe ʼe gutuloi te tagata fuli pe, ohage ko tona tohi fenei: “Ke feala hau fakamoʼoni ʼe ke faitotonu ʼaki ʼau palalau pea mo ke malo moka fakamauʼi koe.”
Ko He ʼu Puani ʼAoga ʼo Te Tohi Ki Te Kau Loma
3:4. ʼI te temi ʼaē ʼe fakafeagai te palalau ʼa te tagata mo te meʼa ʼaē ʼe ʼui e te ʼAtua ʼi tana Folafola, ʼe tou tuku “ke ʼiloʼi ʼe moʼoni te ʼAtua” ʼaki tatatou falala ki te logo ʼo te Tohi-Tapu pea mo fakaʼalutahi ia totatou maʼuli mo te finegalo ʼo te ʼAtua. ʼAki tatatou faʼafai ʼo lagolago ki te fakamafola ʼo te Puleʼaga pea mo te fai ʼo ni ʼu tisipulo, ʼe feala ai ke tou tokoni ki niʼihi ke natou ʼiloʼi ko te ʼAtua ʼe moʼoni.
(Loma 3:24, 25) ʼE natou faitotonu ia muʼa ʼo te ʼAtua ʼuhi ko te totogi ʼae neʼe foaki e Kilisito Sesu moʼo haofaki ʼo natou. ʼE ko te meʼa ʼofa ʼaia neʼe foaki e te ʼAtua ʼuhi ko tona ʼofa makehe. 25 Neʼe foaki e te ʼAtua ia ia ohage ko he molaga, ke fakatokatoka ai te hahaʼi mo te ʼAtua ʼaki tanatou tui ki tona taʼataʼa. Neʼe fakaha ai e te ʼAtua tana faitotonu koteʼuhi, ʼi tana kataki fualoa, neʼe ina fakamolemole te ʼu agahala ʼae neʼe fai e te hahaʼi ʼi te temi muʼa.
Ko He ʼu Puani ʼAoga ʼo Te Tohi Ki Te Kau Loma
3:24, 25—Peʼe feafeaʼi ki te “totogi [ʼa] Kilisito Sesu” hana ʼuʼufi ia “te ʼu agahala ʼaē neʼe fai ʼi te temi muʼa” ʼi muʼa ʼo te fakahoko ʼo te totogi? Ko te ʼuluaki lea fakapolofetā ʼo ʼuhiga mo te Mēsia, ʼaē ʼe tuʼu iā Senesi 3:15, neʼe ʼuluaki fakahoko ʼi te taʼu 33 ʼo totatou temi, ʼi te temi ʼaē neʼe puke ai ia Sesu ke matehi ʼi te pou fakamamahi. (Kal. 3:13, 16) Kae ʼi te temi ʼaē neʼe fakahā ai e Sehova ia te lea fakapolofetā ʼaia, neʼe kua hagē ia kiā ia neʼe kua huʼi ia te totogi, ke ʼaua naʼa ʼi ai he meʼa ʼe ina tāʼofi ia te ʼAtua ʼi te fakahoko ʼo tana fakatuʼutuʼu. Koia ʼo fakatafito ki te sākilifisio ʼa Sesu Kilisito ʼi te kā haʼu, neʼe feala ai kiā Sehova ke ina fakamolemole ia te ʼu agahala ʼo te hōloga ʼo Atama ʼaē neʼe natou tui ki te fakapapau ʼaia. Tahi ʼaē, ko te totogi ʼe ina fakafealagia ia te fakatuʼuake ʼo nātou ʼaē neʼe māʼuʼuli ʼi muʼa ʼo te temi ʼo te kau Kilisitiano.—Gāue 24:15.
VAHAʼA ʼO TE ʼAHO 11-17 ʼO FEPUALIO
TE ʼU KOLOA ʼO TE TOHI-TAPU | LOMA 4-6
“ ʼE Fakaha Mai e Te ʼAtua Ia Tona ʼOfa”
(Loma 5:8) Kaʼe ʼe fakaha mai e te ʼAtua ia tona ʼofa, ʼaki te mate ʼa Kilisito maʼa tatou ʼi tatatou kei agahala.
(Loma 5:12) Koia, ʼaki te tagata pe ʼe tahi neʼe hu ai te agahala ki te malamanei, pea ʼaki te agahala ia te mate, ʼo mafola ai te mate ki te tagata fuli pe he neʼe natou agahala fuli.
ʼE Fakahā Totonu Mai e Te ʼAtua Tona ʼOfa Kiā Tātou
5 ʼE fakamahino e Paulo ia te faʼahi ʼaia, ʼo ina kamata ʼaki te manatu ʼaenī: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” (Loma 5:12) ʼE tou lava mahino ki te ʼu palalau ʼaia, he neʼe tohi e te ʼAtua te fakamatala pe neʼe feafeaʼi te kamataʼaga ʼo te maʼuli ʼo te tagata. Neʼe fakatupu e Sehova ia te tagata pea mo te fafine, ko Atama pea mo Eva. Ko Sehova te Tupuʼaga ʼe haohaoa, pea neʼe toe haohaoa pē foki mo te ʼuluaki taumātuʼa ʼaia ʼaē neʼe ina fakatupu, totatou ʼu tupuʼaga. Neʼe ko te meʼa pē e tahi ʼaē neʼe tapuʼi age e te ʼAtua kiā nāua, pea mo ina fakahā age kiā nāua, kapau ʼe nā talagataʼa ki te lao ʼaia, pea ko tona tūʼā ʼe nā mamate anai. (Sen. 2:17) Kae neʼe nā filifili nāua ke nā fai te aga ʼe fua kovi anai kiā nāua, ʼi tanā talagataʼa ʼaē ki te fakatotonu ʼofa ʼa te ʼAtua, ʼo nā sītuʼa ai ki te ʼu lao ʼa te ʼAtua pea mo tona ʼuhiga Tuʼi ʼAliki.—Teu. 32:4, 5.
(Loma 5:13, 14) Kote‘uhi ne‘e kua ma‘u ia te agahala ‘i te malamanei ‘i mu‘a ‘o te foaki ‘o te Lao, ka‘e kapau ‘e mole ‘i ai he lao, ‘e mole feala ke tukugakovi‘i he tahi takua ne‘e ina fai he agahala. 14 Kaʼe neʼe pule ia te mate ohage ko he hau mai ia Atama ʼo kaku kia Moisese, ʼo feia pe foki kia natou ʼae neʼe mole agahala ohage ko te talagataʼa ʼa Atama. Neʼe hoko ia Atama kia ia ʼae neʼe tonu ke haʼu.
ʼE Fakahā Totonu Mai e Te ʼAtua Tona ʼOfa Kiā Tātou
6 Neʼe hoki hili te agahala ʼaē neʼe fai e Atama pea hoki tutupu ake tana fānau, koia neʼe ina tuku holo ai leva ia te agahala pea mo tona ʼu fua kovi kiā tātou fuli. ʼE moʼoni, neʼe mole natou maumauʼi fakahagatonu te lao ʼa te ʼAtua ohagē ko tona fai ʼaē e Atama, koia ʼaē neʼe mole fakaʼuhiga tatau ai kiā nātou te agahala ʼaē neʼe fai e te ʼuluaki taumātuʼa; pea neʼe mole heʼeki he ʼu lao neʼe kua foaki e te ʼAtua ʼi te lakaga ʼaia. (Sen. 2:17) Kae neʼe tuku holo te agahala ki te hōloga ʼo Atama. Koia, neʼe mafola ai leva te agahala pea mo te mate ʼo aʼu ki te temi ʼaē neʼe foaki ai e te ʼAtua ki te kau Iselaele te ʼu lao. (Lau ia Loma 5:13, 14.) Ko te fua ʼo te agahala ʼaē neʼe tuku holo mai, ʼe lava fakatatau ki te ʼu mahaki ʼaē ʼe tou maʼu mai tatatou ʼu mātuʼa. ʼE moʼoni, ʼe lagi ko ʼihi pē ʼi te fānau ʼo te fāmili kā natou maʼu te ʼu mahaki ʼaia, kae mole ko te fānau fuli ʼaē kā mahaki. Kae ki te agahala ia, ʼe mole fēia heʼe tou maʼu fuli te agahala ʼaē mai ia Atama, koia ʼaē ʼe tou mamate fuli ai. ʼE feala koa ke haofaki tātou mai te ʼaluʼaga fakaʼofaʼofa ʼaia?
(Loma 5:18) Koia ʼaki pe te agahala ʼe tahi kua tauteaʼi te faʼahiga hahaʼi kehekehe, ʼo toe feia aipe, ʼaki pe te gaue faitotonu ʼe tahi kua faitotonu ai te faʼahiga hahaʼi kehekehe ia muʼa ʼo te ʼAtua ʼo natou maʼu ai te maʼuli.
(Loma 5:21) Kotea tona ikuʼaga? Ohage ko te pule ʼa te agahala pea mo te mate ohage ko he ʼu hau, ʼo toe feia aipe mo te ʼofa makehe, ʼe pule ohage ko he hau ʼaki te faitotonu ʼo iku ai ki te maʼuli heʼe gata, ʼaki ia Sesu Kilisito totatou ʼAliki.
w11 1/6 17 9-10
ʼE Fakahā Totonu Mai e Te ʼAtua Tona ʼOfa Kiā Tātou
9 Koteā ʼaē ʼe feala ke tou mahino kiai ʼaki te kupuʼi palalau ʼaenī: “ ʼE tala kua [nātou] faitotonu”? Neʼe tohi fēnei e te tagata fai fakaliliu Tohi-Tapu: “ ʼE ko he ʼu palalau fakatā ʼe pipiki ki te lao pea ʼe fakaʼuhiga mokā fai he fakamāu. ʼE talanoa ʼo ʼuhiga mo te fetogi ʼa te ʼu felōgoi ʼa he tahi mo te ʼAtua, kae mole fakaʼuhiga ki te fetogi ʼo te loto ʼo he tahi . . . ʼE fakatā te ʼAtua ki he tuʼi fakamāu neʼe ina fai te tonu ʼe lelei maʼa te hahaʼi neʼe fakalakahalaʼi, neʼe fakamāuʼi ʼi te telepinale ʼa te ʼAtua, he neʼe natou heʼe faitotonu. Kae neʼe fakamolemole e te ʼAtua te hahaʼi ʼaia.”
10 Koteā ʼaē ʼe fakatafito kiai e te “Tuʼi Fakamāu [faitotonu] ʼo te kele” ia tana fakamolemole ʼaē ki he aga ʼa he tahi ʼe heʼe faitotonu? (Sen. 18:25) ʼI tona ʼofa, neʼe fakatuʼu e te ʼAtua ia te fakatafito, ʼaki tana fekauʼi mai ia tona ʼAlo ʼulu tokotahi ki te kele. Neʼe fakahoko kātoa e Sesu te finegalo ʼo tana Tamai, logolā tona fakahalaʼi ʼaē e ʼihi, mo te lahi ʼaē ʼo tona fakalainoaʼi, pea mo tona gaohi koviʼi. Neʼe ina taupau tana agatonu ʼo ina tali ke matehi ia ia ʼi te pou fakamamahi. (Hep. 2:10) ʼAki te sākilifisioʼi ʼaē e Sesu ia tona maʼuli haohaoa, neʼe ina foaki te totogi ʼe feala ai anai ke fakaʼāteaina te hōloga ʼo Atama mai te agahala pea mo te mate.—Mat. 20:28; Loma 5:6-8.
Kumi Te ʼu Koloa ʼi Te Tohi-Tapu
(Loma 6:3-5) Peʼe mole kotou iloʼi ko tatou fuli ʼae neʼe papitema ia Kilisito Sesu neʼe toe papitemaʼi foki mo tatou ʼi tona mate? 4 Koia, neʼe tanu tatou fakatahi mo ia ʼaki tatatou papitema ʼi tona mate. Pea ʼe feala ai, ohage pe ko te fakatuʼuake ʼa Kilisito mai te kau mate ʼaki te malohi ʼo te Tamai, ke tou toe haʼele foki mo tatou ʼi he maʼuli ʼe foʼou. 5 Koteʼuhi kapau ʼe tou mamate ohage ko ia, ʼe mahino papau ia ʼe fakatuʼuake anai tatou ohage ko ia, pea ʼe tou fakatahi anai mo ia ʼi te ʼu aluʼaga ʼaia.
Ko He ʼu Puani ʼAoga ʼo Te Tohi Ki Te Kau Loma
6:3-5—Koteā ia te fakaʼuhiga ʼo te papitema iā Kilisito Sesu pea mo te papitema ʼi tona mate? ʼI te temi ʼaē neʼe fakanofo ai e Sehova ia te ʼu tisipulo ʼa Kilisito ʼaki ia te laumālie māʼoniʼoni, neʼe fakatahi nātou mo Sesu pea neʼe natou kau ki te kōkelekāsio ʼaē ko te sino ʼo Kilisito, pea ko ia te Pule. (1 Ko. 12:12, 13, 27; Kol. 1:18) Ko tanatou papitema ʼaia iā Kilisito Sesu. Ko te kau Kilisitiano fakanofo ʼe natou toe ‘papitema foki ʼi te mate ʼo Kilisito,’ ʼo natou maʼuli fakasākilifisio pea mo fakafisi ki tanatou ʼamanaki ki te maʼuli heʼegata ʼi te kele. Koia ko tanatou mamate, ʼe ko he mate fakasākilifisio ia, ohagē ko te mate ʼa Sesu, logolā tanatou mamate, kae ʼe mole ʼi ai hona ʼuhiga ki te totogi. Ko tanatou papitema ʼi te mate ʼo Kilisito ʼe hoki kātoa ʼi te temi ʼaē ʼe natou mamate ai pea mo fakatuʼuake ai nātou ki te maʼuli ʼi te lagi.
(Loma 6:7) Koteʼuhi ko ia ʼae kua mate kua ʼateaina ia mai tana agahala.
w14-F 1/6 11 1
Kotea Te ʼAmanaki ʼa ʼAku Kui?
Hili te fakatuʼuake ʼo te kau heʼe faitotonu, ʼe fakamauʼi anai koa ia natou ʼo ʼuhiga mo te ʼu aga ʼae neʼe natou fai ʼi muʼa atu? Kailoa. ʼE ui fenei ia Loma 6:7: “Ko ia ʼae kua mate kua ʼateaina ia mai tana agahala.” ʼI te mate ʼo te kau heʼe faitotonu, ʼe kua natou ʼateaina mai te ʼu agahala ʼae neʼe natou fai. Koia, ʼe fakamauʼi anai natou ʼo mulimuli ki ʼanatou aga hili tonatou fakatuʼuake, kae ʼe mole ki te ʼu meʼa ʼae neʼe natou fai kae heʼeki natou iloʼi te moʼoni ʼi muʼa ʼo tonatou mate. Kotea ka natou fai anai ke fua lelei tonatou maʼuli ʼi te ka haʼu?
VAHAʼA ʼO TE ʼAHO 18-24 ʼO FEPUALIO
TE ʼU KOLOA ʼO TE TOHI-TAPU | LOMA 7-8
“ ʼE Kotou ‘Fakaatalitali Koa Mo He Fakaʼamu Lahi’?”
(Loma 8:19) Koteʼuhi ʼe fakaatalitali te fakatupu mo he fakaʼamu lahi ki te fakaha ʼo te ʼu foha ʼo te ʼAtua.
w12 1/7 16 17
Ke Taki Koutou e Sehova Ki Te ʼĀteaina Moʼoni
17 Neʼe talanoa Paulo ʼo ʼuhiga mo te ʼāteaina ʼaē kā foaki anai e Sehova ki tana hahaʼi ʼi te kele. Neʼe ina ʼui fēnei: “E talitali . . . te malamanei katoa mo he holi mamahi ki te lakaga e fakaha anai e te Atua tana u foha.” Pea neʼe ina toe hoko atu fēnei: “E fakaateainai anai ia mai te popula o te pala, ke kau foki mo ia ki te ateaina o te u foha a te Atua i te kololia.” (Loma 8:19-21) Ko “te malamanei” ʼe ko te hahaʼi ʼaē ʼe natou ʼamanaki ke natou māʼuʼuli ʼo heʼegata ʼi te kele, pea mo maʼu anai te ʼu lelei mai te “fakahā” ʼo “te u foha a te Atua” ʼaē kua fakanofo. ʼE kamata anai te fakahā ʼaia ʼi te temi ʼaē kā tokoni anai te kau fakanofo ʼi selō kiā Kilisito, ke pulihi te kau agakovi pea mo taki “he hahaʼi kaugamalie” ki te mālama foʼou.—Apk. 7:9, 14.
(Loma 8:20) Koteʼuhi neʼe tuku te fakatupu ki te vaʼiganoa, kaʼe neʼe mole loto ia ki ai. ʼE ko te ʼAtua ʼae neʼe ina tuku ki te vaʼiganoa pea mo ina toe foaki foki mo te ʼamanaki
w12 1/3 23 11
Tou Fiafia ʼi Tatatou ʼAmanaki
11 Neʼe foaki e Sehova te “amanaki” ki te mālamanei ʼi tana fai te fakapapau ʼo ʼuhiga mo te fakaʼāteaina mai “te gata afea,” ia Satana te Tēvolo, ʼaki te “hakoga” ʼaē neʼe fakapapau. (Apk. 12:9; Sen. 3:15) Ko te ʼuluaki koga ʼo te “hakoga” ʼaia neʼe fakaʼuhiga kiā Sesu Kilisito. (Kal. 3:16) Neʼe foaki e Sesu ʼaki tana mate pea mo tona fakatuʼuake ia he tafitoʼaga ʼo te fakaʼāteaina ʼo te mālamanei mai te agahala pea mo te mate. Ko te fakahoko ʼo te ʼamanaki ʼaia ʼe ʼi ai tona pikipikiga mo te “fakaha . . . e te Atua tana u foha.” ʼE ‘fakahā’ anai te kau fakanofo ʼaē kua fakakolōlia, te lua koga ʼaia ʼo te “hakoga,” ʼi te temi ʼaē kā natou fakatahi mo Kilisito moʼo fakaʼauha te tuʼu ʼo te ʼu faʼahiga meʼa agakovi ʼa Satana. (Apk. 2:26, 27) ʼE foaki e te faʼahi ʼaia te fakaʼāteaina ki te tahi ʼu ovi ʼaē ʼe ʼomai mai te mamahi lahi.—Apk. 7:9, 10, 14.
(Loma 8:21) ʼae ʼe toe fakaʼateaina anai foki mo te fakatupu mai te popula ki te agahala mo te mate, pea mo natou maʼu te ʼateaina fakakololia ʼo te ʼu fanau ʼa te ʼAtua.
w12 1/3 23 12
Tou Fiafia ʼi Tatatou ʼAmanaki
12 ʼE ko he toe fakafīmālie lahi kā maʼu anai e te “malamanei” lolotoga Te ʼAfio ʼa Kilisito Iā Taʼu e Afe! ʼI te temi ʼaia, ʼe toe ‘fakahā’ anai te ʼu “foha o te Atua” ʼaē kua fakakolōlia mokā natou gāue anai ohagē ko he kau pelepitelō mo Kilisito, ʼo natou fakahoko te ʼu lelei ʼo te sākilifisio faitotogi ʼa Sesu ki te mālamanei. ʼI tanatou fakalogo ki te Puleʼaga ʼaē ʼi selō, ʼe kamata ʼiloʼi anai e te “malamanei” te fakaʼāteaina mai te ʼu fua kovi ʼo te agahala pea mo te mate. Ko te hahaʼi fakalogo ʼe “fakaateainai [mamalie anai] mai te popula o te pala.” Kapau ʼe natou nonofo agatonu kiā Sehova ʼi te ʼu Taʼu e Afe pea mo te ʼahiʼahi fakamuli ʼaē kā hoko ʼi te fakaʼosi ʼo te ʼu taʼu ʼaia, pea ʼe tohi anai tonatou higoa ʼo talu ai ʼi “te tohi o te mauli.” ʼE natou maʼu anai “te ateaina o te u foha a te Atua i te kololia.” (Apk. 20:7, 8, 11, 12) ʼE ko he toe kolōlia lahi ia!
Kumi Te ʼu Koloa ʼi Te Tohi-Tapu
(Loma 8:6) Koteʼuhi ko te manatu ki te kakano ʼe iku ia ki te mate, kaʼe ko te manatu ki te laumalie ʼo te ʼAtua ʼe iku ia ki te maʼuli pea mo te tokalelei.
Kotea te kehekehe ʼo te “manatu ki te kakano” mo te “manatu ki te laumalie”? (Lom. 8:6)
Ko ia ʼae ʼe manatu tuʼumaʼu ki te kakano ʼe tokaga tafito pe ki ʼona holi pea mo palalau tuʼumaʼu pe ki te ʼu manakoʼaga ʼo te kakano. Ko ia ʼae ʼe manatu ki te laumalie ʼe ina fakamuʼamuʼa te ʼAtua mo ʼana manatu, ʼe ina tuku ke taki ia ia e te laumalie maʼoniʼoni. Ko te “manatu ki te kakano” ʼe iku ki te mate pea ko te “manatu ki te laumalie” ʼe iku ia ki te maʼuli mo te tokalelei.
(Loma 8:26, 27) ʼO toe feia aipe, ʼe tokoni mai te laumalie maʼoniʼoni moka tou vaivai. Koteʼuhi ka tonu ke tou faikole, ʼe mole tou iloʼi te ʼu meʼa ʼae ʼe tonu ke tou faikole ki ai, kaʼe ko te laumalie ʼe ina hufakiʼi tatou ʼae ʼe lauga ʼi ʼotatou loto. 27 Pea ko ia ʼae ʼe ina vakavakaʼi ia te ʼu loto, ʼe ina iloʼi te fakaʼuhiga ʼo te meʼa ʼae ʼe kole e te laumalie, koteʼuhi ʼe hufakiʼi e te laumalie ia te kau maʼoniʼoni ʼo mulimuli ki te finegalo ʼo te ʼAtua.
w09 1/11 14 20
Koteā ʼAē ʼe Hā ʼo ʼUhiga Mo Koutou Mokā Kotou Faikole?
20 ʼI ʼihi temi, ʼe lagi mole tou faʼa ʼiloʼi peʼe koteā ʼaē ke tou palalau kiai ʼi tatatou ʼu faikole takitokotahi. Neʼe tohi fēnei e Paulo: “Ko te meʼa ʼaē ʼe faigataʼa: ko te meʼa ʼaē ʼe tonu ke tou kole pea ʼe ʼaoga kiā tātou, ʼe mole tou ʼiloʼi, kae ko te laumālie [māʼoniʼoni] ʼe ina kole totonu maʼa tātou ʼaki he ʼu goʼegoʼe ʼe mole fai ʼaki he palalau. Kae ko ia ʼaē ʼe ina vakaʼi te ʼu loto [ia te ʼAtua] ʼe ina ʼiloʼi te manatu ʼo te laumālie.” (Loma 8:26, 27) Neʼe tokaga ia Sehova ke tohi ia te ʼu tuʼuga faikole ʼi te Tohi-Tapu. ʼE ina tali ia te ʼu faikole ʼaia neʼe tohi ʼaki tana takitaki, ohagē pē ko he ʼu kole ʼe tou fai age kiā te ia pea ʼe ina fakahoko. Ko te ʼAtua ʼe ina ʼiloʼi ia tātou pea mo te fakaʼuhiga ʼo te ʼu meʼa ʼaē neʼe ina uga ke fakahā e tona laumālie ki te ʼu tagata ʼaē neʼe natou tohi ia te Tohi-Tapu. ʼE tali e Sehova ia tatatou ʼu kole mamahi mokā ko te laumālie ʼaē ʼe ina “kole” maʼa tātou. Kae kā lahi age ia tatatou mahino ʼaē ki te Folafola ʼa te ʼAtua, pea ʼe faigafua age anai ia tatatou ʼiloʼi ia te ʼu meʼa ʼaē ʼe tonu ke tou kole.
VAHAʼA ʼO TE ʼAHO 25 ʼO FEPUALIO –3 ’O MALESIO
TE ʼU KOLOA ʼO TE TOHI-TAPU | LOMA 9-11
“Te Lea Fakata ʼo Te Fuʼu Oliveto”
(Loma 11:16) Pea tahi, kapau ʼe maʼoniʼoni ia te moʼi pane ʼae neʼe ʼuluaki momoli, pea ʼe toe maʼoniʼoni foki mo te foʼi pane katoa. Pea kapau ʼe maʼoniʼoni ia te aka, ʼe toe maʼoniʼoni foki mo te ʼu vaʼa.
w11 1/5 25 13
‘Siʼi Loloto ʼo Te Poto ʼo Te ʼAtua!’
13 ʼE hoko atu e te ʼapositolo ko Paulo ʼo ina fakatatau ia nātou ʼaē ʼe kau ki te hako ʼo Apalahamo ki he ʼu vaʼa ʼo he fuʼu oliveto fakatātā. (Loma 11:21) ʼE fakatā e te fuʼu ʼakau ʼaia, ia te fakahoko ʼo te fakatuʼutuʼu ʼa te ʼAtua ʼo ʼuhiga mo te fuakava ʼaē neʼe ina fai mo Apalahamo. Ko te aka ʼo te fuʼu ʼakau ʼaia ʼe māʼoniʼoni pea ʼe ina fakatā ia Sehova, heʼe ko ia ʼaē ʼe ina foaki te maʼuli ki te Iselaele fakalaumālie. (Isa. 10:10; Loma 11:16) Ko te sinoʼi ʼakau ʼe ina fakatā ia Sesu heʼe ko ia te koga tāfito ʼo te hako ʼo Apalahamo. Ko te ʼu vaʼa ʼe fakatā fakatahi “te lahi” ʼo nātou ʼaē ʼe kau ki te lua koga ʼo te hako ʼo Apalahamo.
(Loma 11:17) Kaʼe kapau neʼe tuʼusi ʼihi vaʼa ʼo te fuʼu oliveto ʼae neʼe to pea neʼe haʼi koe ki ai, logo la ko koe ko he vaʼa ʼo te fuʼu oliveto ʼo te vao, pea mo ke maʼu te ʼu lelei mai tona aka,
(Loma 11:20, 21) ʼE ke moʼoni! Neʼe tuʼusi te ʼu vaʼa ʼaia ʼuhi ko tanatou mole tui, kaʼe ko koe ʼe ke tuʼu ʼuhi ko tau tui. ʼAua naʼa ke fialahi kaʼe ke ke manavasiʼi. 21 He ʼe kapau neʼe mole fakahao e te ʼAtua te ʼu vaʼa ʼo te fuʼu oliveto ʼae neʼe to, pea ʼe mole ina fakahao anai mo koe.
w11 1/5 26 15
‘Siʼi Loloto ʼo Te Poto ʼo Te ʼAtua!’
15 Koteā lā ʼaē neʼe fai e Sehova moʼo fakahoko tana fakatuʼutuʼu? ʼE fakamahino e Paulo, moʼo fetogi te ʼu vaʼa ʼaē neʼe tuʼusi, neʼe fakapipiki ki te fuʼu oliveto ʼaē neʼe tō ia te ʼu vaʼa ʼo te fuʼu oliveto vao. (Lau ia Loma 11:17, 18.) Koia, ʼi hona ʼaluʼaga fakatātā neʼe fakapipiki atu ki te fuʼu oliveto fakatā ʼaia ia te kau Kilisitiano ʼo te ʼu puleʼaga ʼaē neʼe fakanofo ʼaki te laumālie, ohagē ko ʼihi ʼi te kōkelekāsio ʼo Loma. Neʼe natou liliu ai ʼo kau ki te hako ʼo Apalahamo. ʼI te kamata, neʼe natou hagē ko he ʼu vaʼa ʼo he fuʼu oliveto vao, neʼe mole natou kau ki te fuakava makehe ʼaia. Kae kua foaki age leva e Sehova kiā nātou te fealagia ʼaē ke natou liliu ko he kau Sutea fakalaumālie.—Loma 2:28, 29.
(Loma 11:25, 26) Koteʼuhi ʼe au loto, ʼu tehina, ke kotou iloʼi te meʼa fakalilo tapu ʼaeni, ke ʼaua naʼa kotou liliu ʼo fia popoto: Neʼe lotofefeka ʼihi kau Iselaele ʼo kaku ki te kua katoa ʼo te hahaʼi ʼae ʼe mole Sutea, 26 pea ʼe feala ai ke haofaki ia Iselaele katoa. Ohage ko tona tohi fenei: “ ʼE haʼu anai mai Sione te fakamaʼuli pea ʼe ina fakamamaʼo anai mai ia Sakopo te ʼu aga ʼae ʼe kovi.
w11 1/5 27 19
‘Siʼi Loloto ʼo Te Poto ʼo Te ʼAtua!’
19 ʼEī, ko te fakatuʼutuʼu ʼa Sehova ʼo ʼuhiga mo “te Iselaele ʼa te ʼAtua” ʼe lolotoga hoko nei ʼi hona ʼaluʼaga fakaofoofo. (Kal. 6:16) Ohagē ko tona ʼui e Paulo: “ ʼE haofaki anai ia Iselaele kātoa.” (Loma 11:26) ʼI te temi ʼaē kua fakakatofa ai e Sehova, ko “Iselaele kātoa,” te kau Iselaele fakalaumālie fuli, ʼe natou hau anai pea mo pelepitelō ʼi selō. ʼE mole he meʼa ʼe ina lava tāʼofi te fakahoko ʼo te fakatuʼutuʼu ʼa Sehova!
Kumi Te ʼu Koloa ʼi Te Tohi-Tapu
(Loma 9:21-23) ʼE mole pule koa la te tagata faʼu ipu kele ki te moʼi kele? ʼE mole feala koa la ke ina faʼu ʼaki te moʼi kele ʼaia he ipu kele ʼe maʼuhiga pea mo he tahi ipu kele ʼe mole maʼuhiga? 22 Pea kapau neʼe fia fakaha e te ʼAtua tona hauhau mo tona malohi, kaʼe neʼe ina katakiʼi fualoa te ʼu ipu ʼo te hauhau ʼae ʼe tuha mo te fakaʼauha, kotea ʼae ka tou ui anai? 23 Pea neʼe ina fai te faʼahi ʼaia moʼo fakaha te lahi ʼo tona kololia ki te ʼu ipu ʼo te manavaʼofa, ʼae kua ina teuteuʼi fakatomuʼa ke natou maʼu ia te kololia.
Kotou Tuku Ke Akoʼi Koutou e Te Fakatonutonu ʼa Sehova
5 Kotea ʼae ʼe feala ke hoko mo kapau ʼe logo gataʼa he tahi pea ʼe mole ina loto ke akoʼi ia ia e Sehova, te Tufuga Faʼu Ipu Kele? Kotea ʼae ka fai anai e Sehova ʼi tona ʼuhiga tufuga faʼu ipu kele? Kapau ʼe faigataʼa ki he tagata tufuga faʼu ipu hana gaueʼi ia te moʼi kele moʼo fai ʼaki ia te meʼa neʼe loto ki ai, ʼe feala ke ina fai he tahi age meʼa, peʼe ina liʼaki ia te moʼi kele ʼaia. ʼE tautau hoko ia te faʼahi ʼaia he neʼe mole gaueʼi fakalelei e te tufuga faʼu ipu ia te moʼi kele ʼaia. Kaʼe ʼe akoʼi fakalelei e Sehova ia te hahaʼi. (Tet. 32:4) Kapau ʼe mole loto he tahi ke akoʼi ia ia e Sehova, ʼe ko tana pe ia hala. ʼE akoʼi e Sehova ia te hahaʼi ʼo mulimuli pe ki tanatou faʼahiga tali ia tana ako. Kapau ʼe fakalogo ia te hahaʼi kia Sehova, ʼe feala anai ke ina fakaʼaogaʼi natou. Ohage la, ʼe fakata te kau Kilisitiano fakanofo ki he ʼu ipu ki hona fakaʼaoga ʼe fakaʼapaʼapaʼia. Kaʼe ki te hahaʼi ʼae ʼe natou fakafisi ki te ʼu tokoni ʼa te ʼAtua, ʼe natou liliu anai ko ni ipu ʼo te hauhau, ʼe mole hona ʼaoga.—Loma 9:19-23.
(Loma 10:2) Koteʼuhi ʼe au fakamoʼoni ʼe natou faʼafai ʼi tanatou tauhi ki te ʼAtua, kaʼe ʼe mole alu tahi ia mo te ʼatamai malama totonu.
it-1-F 1234 6
Faʼafai
Ko He Faʼafai Neʼe Mole Fehoanaki Mo Te Moʼoni. ʼE feala pe ke tou fakamalotoloto peʼe tou faʼafai he meʼa kae meʼa age ʼe tou faihala, pea ʼe mole leleiʼia e te ʼAtua. Neʼe feia te aluʼaga ʼo te tokolahi ʼo te kau Sutea ʼi te ʼuluaki sekulo. Neʼe natou fia fakaha tanatou faitotonu ʼi tanatou mulimuli lelei ki te Lao ʼa Moisese. Kae, neʼe fakamahino e Paulo ko tanatou faʼafai neʼe mole fehoanaki mo te moʼoni. Koteʼuhi neʼe mole ia natou te ʼatamai malama totonu. Koia ʼae neʼe mole natou maʼu ai te faitotonu moʼoni ʼae ʼa te ʼAtua. Neʼe tonu muʼa ke natou mahino ki ʼanatou agahala pea mo tafoki ki te ʼAtua ʼaki ia Kilisito mo kapau neʼe natou fia maʼu te faitotonu pea ke fakaʼateainaʼi ia natou mai te tautea ʼo te Lao. (Lom 10:1-10) Neʼe kau ia natou ʼaia ia Saulo ʼo Talesi, ʼi tana faʼafai ʼaupito ki te Lotu Sutea, neʼe ina ‘fakatagaʼi pea mo maumauʼi ai ia te kokelekasio ʼa te ʼAtua.’ Maʼa ia, neʼe ‘heʼe mele’ ʼuhi he neʼe mulimuli fakalelei ki te Lao. (Kal 1:13, 14; Flp 3:6) Kae ko tana faʼafai ki te Lotu Sutea neʼe ko hana faihala. ʼUhi ko tana fakamalotoloto, neʼe fakaha e Sehova ia tona ʼofa tofu kia Paulo ʼaki ia Kilisito ʼo taki mai ki te ala ʼo te tauhi moʼoni.—1Ti 1:12, 13.