“Koutou Haga Maʼu Te Mālohi ʼi Te ʼAliki”
“Koutou haga maʼu te mālohi ʼi te ʼAliki pea mo te mālohi ʼo tona māfimāfi.”—Efeso 6:10, MN.
1. (a) Koteā te tau fakatalakitupua neʼe hoko kua hili nei kiai teitei taʼu e 3 000? (b) He koʼe neʼe mālo ia Tavite?
KUA hili nei kiai teitei taʼu e 3 000, neʼe fefakafeagaiʼaki te ʼu foʼi kautau e lua pea neʼe fehōkosi te ʼu tagata tau e toko lua. Ko te tahi ia nāua ko te tama neʼe higoa ko Tavite pea neʼe tauhi manu. Neʼe fehōkosi mo Koliate, te tagata neʼe makehe tona mālohi pea neʼe lahi ʼaupito. Ko tona teu tau neʼe kilo 57, pea neʼe lahi mo mamafa ʼaupito tana tao pea mo tana heletā. Neʼe mole he teu tau ʼo Tavite, pea ko tana mahafu tau pe ko te makamaka. Neʼe mata galivale te tagata Filisitini lahi ko Koliate ʼi tana sio neʼe ko te tamasiʼi ʼaē neʼe fekauʼi e te kau Iselaele ke tau mo ia. (1 Samuele 17:42-44) ʼI te mamata ʼa te kau Iselaele pea mo te kau Filisitini, neʼe kua nātou ʼiloʼi lelei pe ko ai ʼaē ka mālo. Kae ʼi te tau ʼe mole mālo tuʼumaʼu pe te tagata ʼaē ʼe mālohi. (Tagata Tānaki 9:11) Neʼe mālo ia Tavite ʼuhi he neʼe tau ʼaki te mālohi ʼo Sehova. Neʼe ina ʼui fēnei: “ ʼE ʼa Sehova te tau.” ʼE fakahā e te Tohi-Tapu ko “Tavite neʼe mālohi age ʼi te Filisitini ʼaki pe he makamaka pea mo he foʼi maka.”—1 Samuele 17:47, 50.
2. E feafeaʼi te tau ʼaē ʼe kau kiai te kau Kilisitiano?
2 ʼE mole kau te kau Kilisitiano ki he tau moʼoni. Logope la tanatou maʼuli tokalelei mo te hahaʼi fuli, kae ʼe nātou kau ki te tau fakalaumālie ʼe nātou fakafeagai ai ki te ʼu fili ʼe mālohi ʼaupito. (Loma 12:18) ʼI te kapite fakaʼosi ʼo tana tohi ki te kau Efeso, ʼe fakamatalatala e Paulo te tau ʼe kau kiai te kau Kilisitiano fuli. Neʼe ina tohi fēnei: “Ko tatatou fehōkosi ʼe mole fai ki te toto pea mo te kakano, kae ki te ʼu puleʼaga, ki te kau takitaki, ki te kau pule ʼo te mālama ʼo te ʼu fakapōʼuli, ki te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.”—Efeso 6:12, MN.
3. ʼO mulimuli ki te manatu ia Efeso 6:10, koteā ʼaē ʼe ʼaoga kia tatou ke tou mālo ʼi te tau?
3 Ko “te ʼu mālohi fakalaumālie agakovi” ʼaia, ʼe ko Satana pea mo te kau temonio, pea ʼe nātou fia maumauʼi tatatou ʼu felogoi mo Sehova ʼAtua. Mai tona ʼaluʼaga ʼaē ʼe nātou mālolohi age ia tatou, ʼe tou hage ko Tavite, hoki feala ke tou mālo mo kapau ʼe tou falala ki te mālohi ʼo te ʼAtua. Koia, ʼe fakaloto mālohiʼi tatou e Paulo ke tou “haga maʼu te mālohi ʼi te ʼAliki pea mo te mālohi ʼo tona māfimāfi.” (Efeso 6:10, MN ) ʼI tana ʼosi foaki te tokoni ʼaia, ʼe fakahāhā e te ʼapositolo te ʼu fakatuʼutuʼu fakalaumālie pea mo te ʼu kalitate faka Kilisitiano ʼaē ʼe tou lava mālo ai ʼi te tau.—Efeso 6:11-17, MN.
4. Koteā te ʼu puani e lua ka tou vakaʼi anai ʼi te alatike ʼaenī?
4 Tou vakaʼi muʼa te manatu ʼa te Tohi-Tapu ʼo ʼuhiga mo te ʼu fakahala mālohi ʼo totatou ʼu fili. ʼOsi ʼaia, pea ʼe tou vakaʼi anai te ʼu fakatuʼutuʼu ʼe tonu ke tou fai moʼo puipui ʼo tatou. Kapau ʼe tou fakalogo ki te ʼu fakatotonu ʼa Sehova, ʼe tou mālo anai ia nātou ʼaē ʼe fakafeagai mai kia tatou.
ʼE Tou Fehōkosi Mo Te ʼu Mālohi Fakalaumālie Agakovi
5. ʼE tou ʼiloʼi feafeaʼi te fakatuʼutuʼu ʼa Satana ʼaki te kupu “fehōkosi” ʼaē ia Efeso 6:12?
5 ʼE fakahā e Paulo ʼe tou “fehōkosi . . . [mo] te ʼu mālohi fakalaumālie agakovi ʼaē ʼe nonofo ʼi te ʼu potu ʼo te lagi.” ʼIo ko te laumālie agakovi tāfito ʼe ko Satana te Tevolo, “te pule ʼo te kau temonio.” (Mateo 12:24-26, MN ) ʼE fakahā e te Tohi-Tapu ko tatatou tau ʼe hage ko hatatou “fehōkosi.” ʼI te ʼu fuhu ʼo te Keleka ʼāfea, neʼe faiga ia nātou ʼaē neʼe kau kiai ke nātou tokahi ʼonatou ʼu fili. ʼE toe feiā mo te Tevolo, ʼe ina faigaʼi ke puli ia tatou te fakapotopoto fakalaumālie. ʼE ina fakahoko feafeaʼi te faʼahi ʼaia?
6. Koutou fakaʼaogaʼi te Tohi-Tapu moʼo fakahā te ʼu kākā ʼaē ʼe fai e Satana moʼo maumauʼi tatatou tui.
6 Ko te Tevolo ʼe feala ke liliu ko he gata, he laione fekai, peʼe ko he ʼaselo ʼo te mālama. (2 Kolonito 11:3, 14; 1 Petelo 5:8) ʼE feala ke ina fakaʼaogaʼi ni hahaʼi moʼo fakatagaʼi peʼe mo fakaloto vaivaiʼi tatou. (Apokalipesi 2:10) Kapau ko Satana ʼe pule katoa ki te malamanei, pea ʼe feala ke ina fakaʼaogaʼi te ʼu holi pea mo te ʼu koloā ʼo te malamanei moʼo kākāʼi ʼo tatou. (2 Timoteo 2:26; 1 Soane 2:16; 5:19) ʼE feala ke ina fakaʼaogaʼi te malamanei peʼe ko te ʼu manatu faka ʼaposita moʼo fakahalaʼi ʼo tatou, ohage ko tana kākāʼi ia Eva.—1 Timoteo 2:14.
7. Koteā ʼaē neʼe faka tuʼakoi ki te kau temonio, pea koteā te ʼu faigamālie ʼe tou maʼu?
7 Logola ʼe hage ʼe tou tāʼomia ʼi te ʼu mahafu tau pea mo te mālohi ʼo Satana mo tana kau temonio, kae ʼe ʼi ai tonatou ʼu tuʼakoi. Ko te ʼu laumālie agakovi ʼaia ʼe mole nātou lava fakakinauʼi tatou ke tou fai ni ʼu meʼa ʼe mole leleiʼia e totatou Tāmai ʼaē ʼe ʼi selo. ʼE tou maʼu te loto faʼitaliha, pea ʼe tou pule ki totatou ʼatamai pea mo te ʼu meʼa ʼaē ʼe kita fai. Koia, ʼe mole tou tokotahi ʼi te tau. Ko te meʼa ʼaē neʼe hoko ʼi te temi ʼo Eliseo ʼe feala ke toe hoko feiā kia tatou: “ ʼE tokolahi age ia nātou ʼaē ʼe kau mo [tatou] ia nātou ʼaē ʼe kau mo nātou.” (2 Hau 6:16) ʼE fakapapauʼi mai e te Tohi-Tapu kapau ʼe tou fakalogo ki te ʼAtua kae tou fakafeagai ki te Tevolo, pea ʼe hola mamaʼo anai ia ia tatou.—Sakopo 4:7.
ʼE Tou ʼIloʼi Te ʼu Fakatuʼutuʼu ʼa Satana
8, 9. Koteā te ʼu ʼahiʼahi ʼaē neʼe fai e Satana kia Sopo moʼo maumauʼi tana agatonu, pea koteā te ʼu tuʼutāmaki fakalaumālie ʼe felāveʼi mo tatou ia ʼaho nei?
8 ʼE tou ʼiloʼi lelei te ʼu fakatuʼutuʼu ʼa Satana heʼe fakahā mai e te Tohi-Tapu tana ʼu gāue. (2 Kolonito 2:11) ʼI tana tauʼi te tagata agatonu ko Sopo, ko te Tevolo neʼe ina pulihi tona ʼu koloā, matehi tana ʼu fānau, fakatupu he fakafeagai ʼi tona famili, tuku kiai te ʼu mamahi fakasino, pea mo te ʼu fasituʼu mai te ʼu kaumeʼa loi. Neʼe lotovaivai ia Sopo pea neʼe kua hage kia ia kua līʼakina ia ia e te ʼAtua. (Sopo 10:1, 2) Ko Satana ʼe mole ina lava fakatupu he ʼu fihifihia feiā ia ʼaho nei, kae ʼe feala ke lotomamahi te kau Kilisitiano tokolahi ʼaki ni ʼu meʼa feiā, pea fakaʼaogaʼi ai e te Tevolo te ʼu meʼa ʼaia moʼo fakahalaʼi ʼo tatou.
9 Kua lahi ʼaupito te ʼu tuʼutāmaki fakalaumālie ʼi te temi fakaʼosi ʼaenī. ʼE tou maʼuʼuli nei ʼi te mālama ʼe faiga mālohi age te hahaʼi ki te ʼu koloā kae mole ko te ʼu fakatuʼutuʼu fakalaumālie. Tuʼumaʼu ʼi te ʼu tala logo ʼe nātou fakahā ko te ʼu felāveʼi fakasino heʼeʼaoga ʼe ko he ʼu meʼa ʼe fakatupu fiafia kae mole ko he meʼa fakatupu lotomamahi. Pea tokolahi te hahaʼi kua nātou liliu ʼo “kaumeʼa mo te ʼu fakafiafia kae mole kaumeʼa mo te ʼAtua.” (2 Timoteo 3:1-5, MN ) Ko te taʼi manatu ʼaia ʼe ina lava maumauʼi tatatou aga fakapotopoto fakalaumālie kae kapau ʼe tou “tau mālohi ʼo ʼuhiga mo te tui,” ʼe mole hoko anai he meʼa feiā.—Suta 3, MN.
10-12. (a) Koteā te fakatokaga neʼe foaki mai e Sesu ʼi tana lea fakatātā ʼo te tagata tūtū pulapula? (b) Koutou toʼo he fakatātā moʼo fakamahino peʼe feafeaʼi he pulihi ʼo totatou ʼu koloā fakalaumālie.
10 ʼE ʼi ai te fakahala ʼa Satana ʼe fua, ʼe ko tana faigaʼi ʼaē ke tou tokakaga tāfito ki te ʼu meʼa ʼo te malamanei pea mo tou kumi tona ʼu koloā. ʼI tana lea fakatātā ʼo ʼuhiga mo te tagata tūtū pulapula, neʼe fakatokagaʼi e Sesu ʼi ʼihi ʼaluʼaga “ko te hoha ki te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloā ʼe nā taʼotaʼo te folafola [ʼo te Puleʼaga].” (Mateo 13:18, 22, MN ) Ko te kupu faka Keleka ʼaē neʼe fakaliliu ʼaki te kupu “taʼotaʼo” ko tona faka ʼuhiga “taʼomia katoa.”
11 ʼI te ʼu vao matuʼa ʼi te ʼu fenua vevela, ʼe tou maʼu ai te faʼahiga fuʼu fiku te Ficus aurea. Ka lahilahi ake ʼe ina ʼatakai te tafitoʼaga ʼo te fuʼu ʼakau ʼaē ʼe homo ōvi age kiai. ʼAki te temi, ʼe ina ʼatakai te fuʼu ʼakau ʼaia mo tona ʼu aka ʼaē kua liliu ʼo mālohi. Ko te ʼu aka ʼo te fuʼu fiku ʼe nātou kai te ʼu meʼa fakagako ʼo te fuʼu ʼakau pea mo ina faka malumoea te fuʼu ʼakau, ʼaē ʼe fakaʼaluʼalu ʼo feala pe ke mate ai.
12 ʼE toe feala māmālie mo te ʼu hoha ki te tuʼu ʼaenī pea mo te faiga ki te ʼu koloā pea mo he maʼuli fakafīfīmālie, ke nātou pulihi totatou temi pea mo totatou mālohi. ʼI tatatou hoha ki te ʼu meʼa ʼo te malamanei, ʼe feala ai ke tou meʼa noaʼi tatatou ako takitokotahi faka Tohi-Tapu pea mo tōtō ʼi te ʼu fono faka Kilisitiano, ʼo mole kei tou maʼu te meʼa kai fakalaumālie. ʼE feala leva ki te ʼu fakatuʼutuʼu faka mālama ke nātou fetogi tatatou ʼu gāue fakalaumālie, pea ʼaki te temi ʼe tou tō ai ki te hele ʼa Satana.
ʼE Tonu Ke Tou Nonofo Mālolohi
13, 14. Koteā te meʼa ʼaē ʼe tonu ke tou fai moʼo fakafeagai kia Satana?
13 Neʼe fakaloto mālohiʼi e Paulo tona ʼu tēhina mo tuagaʼane ke nātou “tutuʼu mālohi ʼo fakafeagai ki te ʼu kākā ʼa te Tevolo.” (Efeso 6:11, MN ) ʼIo, ʼe mole tou lava fakaʼauha te Tevolo pea mo tana kau temonio, pea ko te gāue ʼaia neʼe foaki e te ʼAtua kia Sesu Kilisito. (Apokalipesi 20:1, 2) Kae ʼo aʼu ki te fakaʼauha ʼo Satana, ʼe tonu ke tou “tutuʼu mālohi” ke mole tou taʼomia ʼi tana ʼu fakahala.
14 Neʼe toe fakahā e te ʼapositolo ko Petelo te maʼuhiga ʼaē ke tou tutuʼu mālohi ʼo fakafeagai kia Satana. Neʼe ʼui fēnei e Petelo: “Koutou nonofo ʼalaʼala, koutou nonofo tokakaga. Ko tokotou fili, ia te Tevolo, ʼe feʼaluʼaki ohage ko he laione ʼe gugulu, ʼo ina kumi ke ina kai he tahi. Kae ke koutou fakafeagai kia ia, ʼo koutou mālohi ʼi te tui, heʼe koutou ʼiloʼi ko te ʼu meʼa ʼaia ʼo ʼuhiga mo te ʼu mamahi ʼe hoko ki te famili katoa ʼo tokotou ʼu tēhina ʼi te malamanei.” (1 Petelo 5:8, 9, MN ) ʼE mahino ia, ʼe maʼuhiga ʼaupito te tokoni ʼo totatou ʼu tēhina mo tuagaʼane fakalaumālie ke tou tutuʼu mālohi mokā ʼe ʼohofiʼi tatou e te Tevolo ohage ko he laione fekai.
15, 16. Koutou tuku mai he faʼifaʼitaki moʼo fakahā ʼaki te tokoni ʼa te ʼu tēhina mo tuagaʼane ʼe feala ke tou tutuʼu mālohi ai.
15 Ka gugulu he laione ʼi te ʼu vao matuʼa ʼo Afelika, ʼe foimo hola te tia ki he potu ʼe mole kei tuʼutāmaki ai. Kae ʼe tuku mai e te ʼu alefani te faʼifaʼitaki lelei ʼo ʼuhiga mo te fetokoniʼaki. ʼE fakamahino fēnei e te tohi Elephants—Gentle Giants of Africa and Asia: “Ko te puleʼaki ʼi te agamāhani ʼe fai e te ʼu alefani moʼo hāofaki ʼo tonatou maʼuli, ʼe nātou fakaʼatuʼatu takafoli kae fakatafa ki loto te ʼu ʼuhiʼi alefani, kae tafa ki tuʼa te ʼu alefani lalahi moʼo tali te tuʼutāmaki pea mo puipui ʼo te ʼu ʼuhiʼi alefani.” Ka sisio te ʼu laione ki te taʼi mālohi pea mo te fetokoniʼaki ʼaia, ʼe tahitahiga tanatou ʼohofiʼi te ʼu alefani ʼo feiā mo te ʼu ʼuhiʼi alefani.
16 ʼE tonu mo tatou ke tou fai feiā mokā tauʼi tatou e Satana pea mo tana kau temonio, tou nofo fakatahi, tou fetokoniʼaki mo ʼotatou tēhina mo tuagaʼane ʼaē ʼe mālolohi ʼi te tui. Neʼe ʼiloʼi e Paulo ko ʼihi tēhina mo tuagaʼane Kilisitiano neʼe nātou liliu ko “he tokoni ʼe fakaloto mālohi” maʼa ia ʼi te temi ʼaē neʼe pilisoni ai ʼi Loma. (Kolose 4:10, 11, MN ) Ko te kupu faka Keleka ʼaē neʼe fakaliliu ʼaki te kupu “he tokoni ʼe fakaloto mālohi” ʼe ʼasi tuʼa tahi ʼi te ʼu Tohi Faka Keleka Faka Kilisitiano. ʼI te Expository Dictionary of New Testament Words ʼa Vine, “ ʼe faka ʼuhiga ko he faitoʼo moʼo fakafimālie he lavea.” Ohage ko he faitoʼo ʼe fakafimālie, ʼe feala ki te tokoni ʼa te ʼu tēhina mo tuagaʼane ʼa Sehova kua fakapotopoto ke nātou fakamaʼamaʼa te ʼu mamahi ʼaē ʼe tupu mai te ʼu mamahi ʼo te loto pea mo te ʼu mamahi fakasino.
17. Koteā ʼaē ʼe lava tokoni mai ke tou agatonu ki te ʼAtua?
17 ʼE feala ia ʼaho nei ke tou lotomālohi ʼo tauhi agatonu ki te ʼAtua ʼaki te fakaloto mālohi ʼo totatou ʼu tēhina mo tuagaʼane Kilisitiano. Tāfito la te kau tagata ʼāfea Kilisitiano ʼe nātou foaki fakamalotoloto he tokoni fakalaumālie. (Sakopo 5:13-15) Ke tou nonofo agatonu, ʼe tonu ke tou fai tuʼumaʼu hatatou ako takitokotahi, tou kau tuʼumaʼu ki te ʼu fono, mo te ʼu fakatahi lalahi. ʼE tokoni mai anai tatatou ʼu felogoi lelei mo te ʼAtua ke tou nofo agatonu kia te ia. ʼIo, ka tou kakai, mo ʼiʼinu, peʼe mo fai he faʼahiga meʼa pe, ʼe tonu ke tou fai ia meʼa fuli moʼo faka kolōliaʼi te ʼAtua. (1 Kolonito 10:31) Pea ko te falala kia Sehova ʼi te faikole ʼe ko he faʼahi maʼuhiga moʼo hoko atu takita fai te meʼa ʼaē ʼe lelei kia te ia.—Pesalemo 37:5.
18. He koʼe ʼe mole tonu ke tou lotovaivai tatau aipe mo kapau ʼe tou felāveʼi mo ni ʼu ʼaluʼaga fakaloto mamahi?
18 ʼI ʼihi temi, ʼe tou tō ki te ʼu fakahala ʼa Satana mokā ʼe tou vaivavai ʼi te faʼahi fakalaumālie. ʼE kai e te laione he manu kua vaivai. ʼE feala ki te ʼu fihifihia faka famili, mo faka ekonomika, peʼe ko te mahaki ke nātou fakavaivaiʼi totatou mālohi fakalaumālie. Kae ʼaua naʼa tou tuku te fai ʼo te meʼa ʼaē ʼe lelei ki te ʼAtua, he neʼe ʼui fēnei e Paulo: “ ʼI te temi ʼaē ʼe ʼau vaivai ai, ʼe ko te temi ʼaia ʼaē ʼe ʼau mālohi ai.” (2 Kolonito 12:10, MN; Kalate 6:9; 2 Tesalonika 3:13) Koteā tona faka ʼuhiga? ʼE feala ki te mālohi ʼo te ʼAtua ke ina fakamālohiʼi totatou ʼu vaivaiʼaga, mo kapau ʼe tou kole te mālohi kia Sehova. ʼE hā mai ʼi te mālo ʼa Tavite ʼaē ia Koliate, ko te ʼAtua ʼe feala pea ʼe ina fakamālohiʼi tana hahaʼi. Ko te kau Fakamoʼoni ʼa Sehova ia ʼaho nei, ʼe feala ke nātou fakamoʼoni mokā ʼe nātou faigataʼaʼia lahi, ʼe nātou maʼu te mālohi mai te ʼAtua.—Taniela 10:19.
19. Koutou tuku mai he faʼifaʼitaki moʼo fakahā te fakaloto mālohi ʼe foaki e Sehova ki tana ʼu kaugana.
19 ʼO ʼuhiga mo te tokoni ʼaē neʼe foaki e te ʼAtua ki te taumatuʼa, neʼe nā tohi fēnei: “Lolotoga te ʼu taʼu ʼaē neʼe ma gāue ai kia Sehova ʼi tomā ʼuhiga taumatuʼa, neʼe lahi te ʼu tapuakina neʼe ma maʼu, pea neʼe lahi te hahaʼi neʼe feʼiloʼiʼaki mo māua. Neʼe toe akoʼi foki māua pea mo fakaloto mālohiʼi māua e Sehova ke ma fakatokatoka tomā ʼu fihifihia. Ohage pe ko Sopo, ʼi ʼihi temi neʼe mole ma mahino ki te ʼu meʼa ʼaē neʼe hoko kia māua, kae logola te ʼu temi faigataʼa ʼaia neʼe tokoni aipe ia Sehova kia māua.”
20. Koteā te fakamoʼoni faka Tohi-Tapu ʼe hā ai ko Sehova ʼe tokoni tuʼumaʼu ki tana hahaʼi?
20 ʼE mole nounou fau te nima ʼo Sehova ke ina foaki mai te tokoni pea mo te lotomālohi ki tana hahaʼi. (Isaia 59:1) Neʼe hiva fēnei e te tagata fai pesalemo ko Tavite: “ ʼE poupouki e Sehova ia nātou fuli ʼaē ʼe fetokaʼi, ʼe ina fakatuʼu ake ia nātou fuli ʼaē kua mapelu ki lalo.” (Pesalemo 145:14) ʼIo, ko tatatou Tāmai ʼaē ʼe ʼi selo ʼe ina “ ʼamo te kavega maʼa tatou ʼi te ʼaho fuli” pea ʼe ina foaki mai kia tatou te meʼa ʼaē ʼe ʼaoga moʼoni kia tatou.—Pesalemo 68:19.
ʼE Tonu Ke Tou Kofuʼi “Te Teu Tau Katoa ʼo Te ʼAtua”
21. Neʼe fakahā feafeaʼi e Paulo te maʼuhiga ʼo te teu tau fakalaumālie?
21 Neʼe tou vakaʼi te ʼu faʼahiga fakahala ʼa Satana pea neʼe tou sio ʼe ʼaoga ke tou tutuʼu mālohi logola tana ʼu kākā. ʼE tou vakaʼi leva te tahi tokoni maʼuhiga moʼo hāofaki tatatou tui. Tuʼa lua ʼi tana tohi ki te kau Efeso, neʼe talanoa ia Paulo ki te meʼa maʼuhiga ke tou tutuʼu mālohi moʼo tauʼi te ʼu kākā ʼa Satana pea mo tou mālo ʼi tatatou fehōkosi mo te ʼu laumālie agakovi. Neʼe tohi fēnei e Paulo: “Koutou kofuʼi te teu tau katoa ʼo te ʼAtua ke feala ai hakotou tutuʼu mālohi ʼo fakafeagai ki te ʼu kākā ʼa te Tevolo. Koia ke koutou toʼo te teu tau katoa ʼo te ʼAtua, ke feala ai hakotou tekeʼi te ʼaho ʼo te agakovi pea, ʼi te kua ʼosi ʼo te fai ʼo te meʼa fuli ke koutou tuʼu mālohi.”—Efeso 6:11, 13, MN.
22, 23. (a) Koteā ʼaē ʼe toe kau ki totatou teu tau fakalaumālie? (b) Koteā anai ka tou vakaʼi ʼi te alatike ka hoa mai?
22 Ei, ʼe tonu ke tou kofuʼi “te teu tau katoa ʼo te ʼAtua.” ʼI te temi ʼaē neʼe faitohi ai Paulo ki te kau Efeso, ko te tagata solia Loma ʼaē neʼe ina leʼoleʼo ia ia, lagi ʼi ʼihi temi neʼe ina kofuʼi tona teu tau. Kae neʼe ko te laumālie maʼoniʼoni ʼaē neʼe ina uga te ʼapositolo ke talanoa ki te teu tau fakalaumālie maʼuhiga ʼaē neʼe ʼaoga ki te ʼu kaugana fuli ʼa Sehova.
23 ʼE toe kau ki te teu tau ʼaia ʼo te ʼAtua te ʼu kalitate ʼaē ʼe tonu ke maʼu e te kau Kilisitiano, pea mo te ʼu fakatuʼutuʼu fakalaumālie ʼaē neʼe fai e Sehova. ʼI te alatike ka hoko mai, ʼe tou vakaʼi anai te ʼu koga fuli ʼo te teu tau fakalaumālie ʼaia. ʼE tokoni mai anai kia tatou ke tou fakafuafua peʼe tou teuteu feafeaʼi ki tatatou tau fakalaumālie. Pea ʼe tou toe vakaʼi anai te faʼifaʼitaki taulekaleka ʼa Sesu Kilisito peʼe tokoni feafeaʼi mai ke tou tekeʼi te ʼu fakahala ʼa Satana te Tevolo.
ʼE Koutou Tali Feafeaʼi Anai?
• E feafeaʼi te tau ʼaē ʼe kau kiai te kau Kilisitiano fuli?
• Koutou fakamatalatala ni ʼu fakahala ʼa Satana.
• ʼE fakaloto mālohiʼi feafeaʼi tatou e te tokoni ʼaē ʼe foaki mai e ʼotatou ʼu tēhina mo tuagaʼane?
• Ko ai te mālohi ʼaē ʼe tou fakalogo kiai, pea koteā tona tupuʼaga?
[Paki ʼo te pasina 11]
Ko te kau Kilisitiano ʼe nātou ‘fehōkosi mo te ʼu laumālie mālohi agakovi’
[Paki ʼo te pasina 12]
ʼE feala ki te ʼu hoha ʼo te tuʼu ʼaenī ke nātou taʼotaʼo te folafola ʼo te Puleʼaga
[Paki ʼo te pasina 13]
Ko he ʼu kaugā fagona Kilisitiano ʼe feala ke nātou liliu ko “he tokoni ʼe fakaloto mālohi”
[Paki ʼo te pasina 14]
ʼE koutou faikole koa ki te ʼAtua ke ina foaki atu te mālohi?