Te Foaki Lahi ʼe Fakatupu Fiafia
ʼI TONA ʼuhiga tagata taupau faka Kilisitiano ʼofa, neʼe tuʼaniaʼi tāfito e te ʼapositolo ko Paulo te ʼu meʼa ʼaē ʼe ʼaoga ki tona ʼu kaugā fagona. (2 Kolonito 11:28) Koia, ʼi te vaelua ʼo te taʼu 50 ʼo te ʼuluaki sēkulō ʼo totatou temi, neʼe fakatuʼutuʼu ke tānaki he falā maʼa te kau Kilisitiano māsisiva ʼaē ʼi Sutea, pea neʼe ko he faigamālie ʼaia ke ina fai te akonaki maʼuhiga ʼo ʼuhiga mo te loto fia foaki. Neʼe fakahā lelei e Paulo ko te foaki fakafiafia ʼe ko he meʼa ʼe leleiʼia ʼaupito e Sehova: “Ke tahi foakipe o fai ki te mea kua tonu ki ai tona loto, aua naa fai mo te loto mamahi, pe ko he maua, koteuhi e ofa te Atua kia ia ae e ina foaki fakafiafia.”—2 Kolonito 9:7.
Logola Te Masiva Fakaʼofaʼofa Kae Lahi Te Loto Fia Foaki
Tokolahi te kau Kilisitiano ʼi te ʼuluaki sēkulō neʼe mole faʼa lelei tonatou maʼuli faka sosiale. Neʼe fakatokagaʼi e Paulo, ia nātou ʼaia neʼe “mole lahi . . . he kau mālohi.” Ko nātou neʼe ko “te ʼu meʼa ʼaē ʼe vaivai ʼo te malamanei,” “ko te ʼu meʼa fakalialia ʼo te malamanei.” (1 Kolonito 1:26-28, MN ) Ohage la, ko te kau Kilisitiano ʼaē ʼi Masetonia neʼe nātou maʼuʼuli ʼi te “masiva fakaofaofa” pea neʼe nātou tau mo “te mamahi lahi.” Kae ko te kau Kilisitiano agavaivai ʼaia ʼo Masetonia neʼe nātou kole fakamālohi ke nātou kau ki te pilivilesio ʼaē ke nātou lagolago ki te tānaki falā maʼa ‘te minisitelio ʼo te kau maʼoniʼoni’; pea ko te ʼu meʼa ʼaē neʼe nātou foaki, ʼaē neʼe fakamoʼoni kiai e Paulo, neʼe ‘fakalaka maumau ʼi ʼonatou fealagia moʼoni ʼo nātou’!—2 Kolonito 8:1-4.
Kae neʼe mole maʼuhiga te taʼi foaki ʼo te ʼu meʼa ʼofa ʼaia ʼuhi ko tona lahi. Kae ko te meʼa ʼaē neʼe maʼuhiga tāfito, ko te fia kau ʼaē kiai, ko te fia foaki ʼaki he lotolelei. Neʼe fakahā e Paulo ki te kau Kilisitiano ʼo Kolonito, ko te foaki ʼo he ʼu meʼa ʼofa ʼe tonu ke fai ʼaki te ʼatamai pea mo te loto. Neʼe ina ʼui fēnei: “E au iloi toutou loto lelei, o au vikiviki ai koutou ki te kau Masetonia, . . . pea nee fakaʼalaʼala e tautou faafai he tokolahi.” Neʼe ‘kua tonu ki ai te loto’ ʼo te kau Kilisitiano ʼo Kolonito ke nātou foaki he meʼa ʼofa.—2 Kolonito 9:2, 7.
‘Neʼe Uga Nātou e Tonatou ʼAtamai’
Neʼe manatuʼi e te ʼapositolo ko Paulo te faʼifaʼitaki ʼi muʼa atu ʼo ʼuhiga mo te loto fia foaki, neʼe hoko ʼi te toafa kua hili sēkulō e 15 ki tona temi. Neʼe faka ʼāteaina te ʼu telepi e 12 ʼo Iselaele mai tanatou nonofo popūla ʼi Esipito. Neʼe nātou nonofo ʼi te vaʼe Moʼuga ʼo Sinai, pea neʼe fakatotonu age e Sehova ke nātou faʼu he tapenakulo pea mo nātou teuteuʼi te fale ʼaia ki te tauhi. Neʼe ko he gāue ʼe fakamaʼua anai kiai he ʼu koloā, pea neʼe fakaafe te puleʼaga ʼo Iselaele ke nātou lagolago kiai.
Koteā anai te meʼa ka fai e te kau Iselaele? “Neʼe nātou ʼōmai ai, ia nātou fuli ʼaē neʼe uga e tonatou loto, pea neʼe nātou fetuku mai, ia nātou fuli ʼaē neʼe uga e ʼonatou ʼatamai, te meʼa ʼofa kia Sehova maʼa te gāue ʼaē ki te fale fehikitaki ʼo te fono.” (Ekesote 35:21) Neʼe fai koa e te kau Iselaele he ʼu meʼa ʼofa ʼaki he loto fia foaki? Ei, pea neʼe lahi ʼaupito! Neʼe tala fēnei age kia Moisese: “Ko te hahaʼi ʼe nātou ʼaumai ʼo laka ake ʼi te ʼu meʼa ʼaē neʼe fakafuafua ki te gāue ʼaē neʼe fakatotonu e Sehova ke fai.”—Ekesote 36:5.
Neʼe feafeaʼi te ʼaluʼaga fakakoloa ʼo te kau Iselaele ʼi te temi ʼaia? ʼI muʼa atu, neʼe nātou maʼuli popūla, ‘mafasia ʼi tanatou ʼu kavega,’ ʼo tupu ʼaki ai tonatou ‘maʼuli kona,’ tonatou maʼuli “fakaloto mamahi.” (Ekesote 1:11, 14; 3:7; 5:10-18) Koia lagi neʼe mole nātou maʼu koloā. ʼE moʼoni neʼe mavae te kau Iselaele mo te ʼu faga manu mai te fenua ʼaē neʼe nātou maʼuli popūla ai. (Ekesote 12:32) Kae neʼe mole lagi lahi tonatou ʼu koloā ʼaia, koteʼuhi, mole fualoa ki tanatou mavae ʼaē mai Esipito, neʼe nātou meo he neʼe mole kei ʼi ai hanatou kanoʼi manu, mo he moʼi pane moʼo kai.—Ekesote 16:3.
Koia, neʼe maʼu maifea e te kau Iselaele tonatou ʼu koloā ʼaē neʼe nātou lagolago ai leva ki te faʼu ʼo te tapenakulo? Neʼe nātou maʼu mai tonatou ʼu pule ʼāfea, te kau Esipito. ʼE ʼui fēnei e te Tohi-Tapu: “Ko te ʼu foha ʼo Iselaele . . . neʼe nātou kole ki te kau Esipito te ʼu meʼa siliva, pea mo te ʼu meʼa aulo, pea mo te ʼu kofu pulupulu. . . . [Ko te kau Esipito neʼe] nātou foaki age te ʼu meʼa ʼaē neʼe nātou kole.” Ko te ʼu meʼa ʼofa ʼaia mai te kau Esipito neʼe ko he tapuakina mai ia Sehova, kae neʼe mole haʼu ia mai ia Falaone. ʼE ʼui fēnei e te Tohi-Tapu: “Neʼe fai e Sehova ke tali te kole ʼa te hahaʼi e te kau Esipito ke nātou foaki age te ʼu meʼa ʼaē neʼe nātou kole age.”—Ekesote 12:35, 36.
Pea koutou fakakaukauʼi age la pe neʼe koteā te manatu ʼa te kau Iselaele. Ko he ʼu taʼiake neʼe nātou maʼuli mamahi ʼuhi ko te maʼuli popūla pea mo masiva. ʼI te temi nei kua nātou ʼāteaina pea mo maʼu koloā. Koteā anai tanatou manatu ki te vaevae ʼo tonatou ʼu koloā ʼaia? Neʼe feala ke nātou ʼui neʼe nātou maʼu te ʼu koloā ʼaia pea ʼe mole maʼua ke nātou foaki. Kae ʼi te temi ʼaē neʼe fakaafe ai nātou ke nātou lagolago ki te tauhi maʼa ʼo foaki he ʼu koloā, neʼe nātou fai te faʼahi ʼaia—ʼo mole nātou fai fakakinau peʼe nātou fulupipiki! Neʼe mahino kia nātou neʼe ko Sehova ʼaē neʼe ina faka fealagia ke nātou maʼu te ʼu koloā ʼaia. Koia, neʼe lahi tanatou foaki ʼo tanatou ʼu siliva pea mo te aulo, pea mo tanatou ʼu manu. Neʼe nātou “lotolelei.” ‘Neʼe uga nātou e ʼonatou ʼu loto.’ Neʼe ‘uga nātou e tonatou ʼatamai.’ Neʼe ko he ʼu “meʼa ʼofa [moʼoni] kia Sehova.”—Ekesote 25:1-9; 35:4-9, 20-29; 36:3-7.
Koutou Lotolelei ʼo Foaki
ʼE mole faka ʼuhiga leva, kapau ʼe lahi te meʼa ʼofa ʼa he tahi pea ʼe loto fia foaki moʼoni. ʼI te tahi ʼaho neʼe sio ia Sesu Kilisito ki te hahaʼi neʼe nātou tuku te ʼu falā ki te ʼu puha tānaki paʼaga ʼo te fale lotu. Ko te hahaʼi maʼu koloā neʼe lahi te ʼu piesi neʼe nātou tuku, kae neʼe malave kia Sesu ʼi tana sio ki te fafine vitua masiva neʼe ina ʼai kiai te ʼu kiʼi foʼi piesi e lua ʼe mole faʼa maʼuhiga. Neʼe ʼui maʼana: “Ko te fafine vitua ʼaenī, logope tona masiva, ka kua lahi age te meʼa ʼaē neʼe ina ʼai ia nātou fuli ʼaē. . . . Logope tona masiva, neʼe ina ʼai fuli te meʼa ʼaē ʼe ina maʼu.”—Luka 21:1-4, MN; Maleko 12:41-44.
Ko te palalau ʼa Paulo ʼaē ki te kau Kolonito neʼe ʼalutahi mo te manatu ʼaia ʼa Sesu. ʼO ʼuhiga mo te foaki ʼo he ʼu meʼa ʼofa moʼo tokoni ki te ʼu kaugā fagona māsisiva, neʼe ʼui fēnei e Paulo: “Kapau ʼe ʼi ai tāfito te lotolelei, ʼe lelei tāfito ia, ʼo fakalogo pe ki te meʼa ʼaē ʼe maʼu e he tahi, ka mole fai ʼaki he meʼa ʼe mole maʼu e he tahi.” (2 Kolonito 8:12, MN ) Ei, ko te ʼu meʼa ʼofa ʼe mole fai ʼuhi ko he fakataupiepie peʼe mo fesiosioʼaki. ʼE foaki e he tahi hana meʼa ʼo mulimuli pe ki tona fealagia, pea ʼe fiafia Sehova mokā ina foaki ʼaki te manatu ʼaia.
Logola ʼe mole feala ki he tahi ke ina fakakoloaʼia ia Sehova, heʼe ina maʼu ia meʼa fuli, kae ko te foaki ʼo he ʼu meʼa ʼofa ʼe ko he pilivilesio ʼe maʼu e te ʼu kaugana ʼa Sehova moʼo fakahā tonatou ʼofa ʼaē kia te ia. (1 Fakamatala 29:14-17) Ko te ʼu meʼa ʼofa ʼaē neʼe foaki, ʼe mole fai ke fakahāhā peʼe ke tokagaʼi kita, kae moʼo fakahaʼele ki muʼa te tauhi maʼa, ʼo kita maʼu ai te fiafia pea mo te tapuakina ʼa te ʼAtua. (Mateo 6:1-4) Neʼe ʼui fēnei e Sesu: “E leleiʼage takita foaki i takita tali.” (Gaue 20:35) ʼE feala ke tou maʼu te fiafia ʼaia ʼi tatatou foaki totatou mālohi ki te gāue ʼa Sehova pea mo foaki totatou ʼu koloā fakamālama moʼo lagolago ki te tauhi maʼa pea mo tokoni ki te hahaʼi ʼaē ʼe tāu ke foaki kia nātou te tokoni ʼaia.—1 Kolonito 16:1, 2.
Koutou Lotolelei ʼo Foaki Ia ʼAho Nei
Ia ʼaho nei, ʼe fiafia te kau Fakamoʼoni ʼa Sehova ʼi tanatou sio ki te tuputupu faka malamanei ʼo te faka mafola ʼo te “logolelei aeni ʼo te Puleaga.” (Mateo 24:14) ʼI te fakaʼosi ʼo te 20 sēkulō, neʼe papitemaʼi te hahaʼi e toko 3 000 000 tupu moʼo fakahā tanatou foaki ʼaē ʼo tonatou maʼuli kia Sehova ʼAtua, pea neʼe fakatuʼu ko kokelekasio foʼou e 30 000. ʼIo, ko te vahe e tahi ki te tolu ʼo te ʼu kokelekasio ʼa te kau Fakamoʼoni ʼa Sehova ia ʼaho nei, neʼe fakatuʼu ʼi te ʼu taʼu e hogofulu ʼaenī kua hili! Ko te tuputupu ʼaia ʼe ko te fua tāfito ʼo te gāue kinakina ʼa te ʼu fafine pea mo te ʼu tagata Kilisitiano, ʼaē neʼe nātou foaki tonatou temi pea mo tonatou mālohi moʼo ʼaʼahi te hahaʼi ʼo fakahā age kia nātou te ʼu fakatuʼutuʼu ʼa Sehova. Ko ʼihi tuputupu ʼe ko te fua ʼaia ʼo te gāue ʼa te kau misionea, ʼaē neʼe nātou mavae ʼi ʼonatou fenua, ʼo nātou folau ki te ʼu potu taupotu ʼo te kele moʼo tokoni ki te fagonogono ʼo te Puleʼaga. Neʼe tupu ai leva te ʼu silikosikilipisio foʼou, pea neʼe ʼaoga ke hinoʼi kiai he ʼu tēhina taupau faka silikosikilipisio foʼou. Pea tahi ʼaē meʼa, neʼe toe ʼaoga ke lahi te ʼu Tohi-Tapu ki te fai faka mafola pea mo te ʼu ako. Neʼe toe ʼaoga ke tā he tahi ʼu tohi. Pea ʼe lahi te ʼu fenua, neʼe tonu ke fakalahi ai te ʼu filiale pe neʼe tonu ke fetogi ʼaki he tahi ʼu fale ʼe lalahi age. Ko te ʼu fakatuʼutuʼu fuli ʼaia neʼe maui mālie he neʼe lagolago kiai te ʼu meʼa ʼofa ʼaē mai te hahaʼi ʼa Sehova.
Neʼe ʼAoga He Tahi ʼu Fale ʼo Te Puleʼaga
ʼAki te tuputupu ʼo te hahaʼi ʼa te kau Fakamoʼoni ʼa Sehova, neʼe hā ai ʼe ʼaoga ke laga he ʼu Fale ʼo te Puleʼaga. ʼI te ʼu meʼa ʼaē neʼe vakavakaʼi ʼi te kamataʼaga ʼo te taʼu 2 000, neʼe hā ai te ʼaoga ʼaē ke laga he ʼu Fale ʼo te Puleʼaga e 11 000 tupu ʼi te ʼu fenua ʼaē ʼe faigataʼa ai te maʼuli, ʼaē ko te ʼaluʼaga faka ekonomika ʼe mole faʼa lelei. Koutou fakatokagaʼi ʼi Angola. Logola te ʼu tau faka sivile, kae ʼe ʼi ai te tupu foʼou ʼi te taʼu fuli, ko te 10 ki te teau ʼi te hahaʼi ʼo te kau fai faka mafola ʼo te Puleʼaga. Kae ʼe lahi ʼi te ʼu kokelekasio ʼaia e 675 ʼo te fenua lahi ʼo Afelika, ʼe mole ʼi ai honatou ʼu fale fono. Ko fale pe e 22 ʼo te Puleʼaga ʼi te fenua ʼaia, pea ʼi te ʼu fale ʼaia, ko fale pe e 12 ʼe ʼi ai tonatou ʼato.
ʼE toe feiā ʼi te République Démocratique ʼo Congo. ʼI te kolo lahi ʼo Kinshasa, ʼe teitei ko kokelekasio e 300, kae ʼe ko te ʼu Fale ʼo te Puleʼaga e 10 pe. ʼI te fenua katoa ʼaia, neʼe ʼaoga fakavilivili ke laga he ʼu Fale ʼo te Puleʼaga e 1 500 tupu. ʼI te tuputupu vave ʼaē ʼe hoko ʼi te ʼu fenua ʼo te Eulopa ʼo te Potu Esite, ʼe ʼaoga ki Lusia pea mo Ukraine ke laga honā ʼu Fale ʼo te Puleʼaga e teau. Ko te tuputupu fakavilivili ʼi Amelika latina ʼaē neʼe ʼiloga tāfito ʼi Pelesile, ʼaē ʼe ko te toko nimageau afe kau Fakamoʼoni ʼa Sehova, ʼe ʼaoga tāfito kiai he ʼu Fale ʼo te Puleʼaga.
Moʼo tokoni ki te ʼu fenua ʼaia, neʼe fai e te kau Fakamoʼoni ʼa Sehova te polokalama fakavilivili ʼo te laga fale. ʼE fakahoko te polokalama ʼaia ʼaki te ʼu meʼa ʼofa ʼa te ʼu tēhina ʼo te malamanei, koia tatau aipe mo te ʼu kokelekasio ʼaē ʼe nātou māsisiva ʼe feala anai ke nātou maʼu honatou ʼu fale fono.
Ohage ko te temi ʼo Iselaele, ʼe lahi te ʼu meʼa ʼe feala ke fakahoko ʼuhi ko tanatou ‘faka maʼuhigaʼi ia Sehova ʼaki tonatou ʼu koloā.’ (Tāʼaga Lea 3:9, 10) ʼE fai he fakamālo lahi ʼa te Kolesi Pule ʼo te kau Fakamoʼoni ʼa Sehova kia nātou fuli ʼaē ʼi ʼonatou loto takitokotahi neʼe nātou fia foaki te ʼu meʼa ʼofa ʼaia. Pea ʼe feala ke tou falala ko te laumālie ʼo Sehova ʼe ina haga uga anai te ʼu loto ʼo tana hahaʼi ke nātou lagolago lahi ki te ʼu meʼa ʼaē ʼe ʼaoga ki te faka mafola ʼo te Puleʼaga.
Mai tona ʼuhiga ʼaē ʼe haʼele ki muʼa te faka mafola ʼi te malamanei, ʼofa pe ke tou fakahā tuʼumaʼu totatou loto tokoni pea mo totatou lotolelei ʼaē ke tou foaki totatou mālohi, totatou temi pea mo totatou ʼu koloā. Pea ʼofa pe ke tou maʼu te fiafia moʼoni ʼaē ʼe tou maʼu mai te taʼi foaki ʼaia ʼaki te lotolelei.
[Talanoa ʼo te pasina 29]
“KOUTOU FAKAʼAOGAʼI LELEI!”
“Ko toku taʼu hogofulu. ʼE ʼau momoli atu te falā ʼaenī ke feala hakotou totogi he ʼu pepa peʼe ko he tahi atu ʼu meʼa moʼo fai te ʼu tohi.”—Cindy.
“ ʼE ʼau foaki noa atu te falā ʼaenī ke lahi te fai ʼo he ʼu tohi. Neʼe ʼau maʼu te falā ʼaenī ʼi taku tokoni ki taku tāmai. Koia koutou fakaʼaogaʼi lelei!”—Pam, taʼu fitu.
“Neʼe ʼau lotomamahi ʼuhi ko te afā. ʼE ʼau fakaʼamu pe ʼe koutou haohaoa. ʼE ko te gataʼaga [$2, U.S.] pe ʼaia ʼo taku falā ʼi taku kiʼi foʼi puha.”—Allison, taʼu fā.
“Ko toku higoa ko Rudy, pea ko toku taʼu 11. Ko toku tēhina ko Ralph ʼe ko tona taʼu ono. Pea ko toku tokolua ko Judith ʼe ko tona taʼu lua vaelua. Neʼe mātou maʼu tomatou mota ia māhina e tolu moʼo tokoni ki ʼomātou ʼu tēhina ʼaē [ʼi te ʼu fenua ʼaē ʼe hoko ai te ʼu tau]. Neʼe feala ke mātou maʼu te ʼu tola e 20 pea ʼe mātou fakamomoli atu.”
“ ʼE ʼau lotomamahi ʼo ʼuhiga mo te ʼu tēhina ʼaē [neʼe tau mo te afā]. Neʼe ʼau maʼu ko tola e 17 ʼi taku gāue mo taku tāmai. ʼE mole ʼau momoli atu te paʼaga ʼaia ki he ʼaluʼaga tāfito, kae ʼa koutou pe anai tona vakaʼi peʼe fakaʼaogaʼi ki te faʼahi fea.”—Maclean, taʼu valu.