Ke Tou Mālo Ia Satana Pea Mo Tana ʼu Gāue

“Koia ke koutou fakalogo ki te ʼAtua; kae ke koutou fakafeagai ki te Tevolo, pea ʼe hola mamaʼo anai ia koutou.”—Sake 4:7.

1. Neʼe malave feafeaʼi ia ʼaho nei ki te malamanei “te nima ʼo te mālohi ʼo te agakovi”?

NEʼE moʼoni te ʼui ʼaenī ʼa Sopo: “Ko te kele neʼe tuku ifo ki te nima ʼo te mālohi ʼo te agakovi.” (Sopo 9:24) Pea ʼi te hisitolia katoa ʼo te tagata, ʼe tou felāveʼi nei mo te ʼu temi ʼaē ʼe faigataʼa age. Koteā tona tupuʼaga? Koteʼuhi ko te temi nei ʼe ko te ʼu “ ʼaho fakamuli” ʼo te pule fakatemonio ʼa Satana ki te kele. Koia ʼaē ʼe mole fakapuna’maʼuli ai, ʼi te fakaneke ʼa Satana, ‘ko te kau tagata agakovi pea mo te kau malualoi ʼe nātou laka tuʼumaʼu pe ʼo ʼāsili ki te kovi.’ (2 Timoteo 3:1, 13) ʼO hilifaki atu kiai, ko te ʼu fakataga, te ʼu aga heʼe faitotonu, te ʼu aga fekai, te ʼu fai fakapō, te ʼu faigataʼaʼia faka ekonomike, te ʼu mahaki ʼaē ʼe fualoa tonatou faitoʼo, te ʼu mamahi ʼo te kua matuʼa, te ʼu lotovaivai ʼi te faʼahi ʼaē ʼo te loto—ko te ʼu meʼa ʼaia ʼe fakatupu fakaʼofaʼofa pea mo fakatupu lotovaivai kia tatou.

2. ʼE lava feafeaʼi hatatou tauʼi te ʼu ʼohofi ʼa Satana ia ʼaho nei?

² Ko te fili lahi ko Satana te Tevolo, ʼe fakahaga tana tau ki te malamanei, kae tāfito ki te kau atolasio moʼoni ʼa te ʼAtua. Ko tana fakatuʼutuʼu ke ina fakamaliu kehe te hahaʼi mai te ʼAtua ʼaē ʼe feala ke liliu ko ni hahaʼi agatonu, pea ke ina taki nātou ki te fakaʼauha ʼaē ka hoko anai kia te ia mo tana kau ʼaselo. Kae ʼe mahino papau kia tatou kapau ʼe tou kātaki ʼo nofo agatonu, ko te Tevolo ʼe hola mamaʼo anai ia tatou. Ohage ko Sesu, ʼe feala ke tou ‘ako te fakalogo’ ki te ʼAtua ʼaki te ʼu mamahi ʼaē ʼe tau mo tatou, pea ʼaki Tona ʼofa makehe, ʼe feala ke tou maʼu ia te maʼuli heʼegata.—Hepeleo 5:7, 8; Sake 4:7; 1 Petelo 5:8-10.

3, 4. (a) Koteā te ʼu ʼahiʼahiʼi mai tuʼa ʼaē neʼe tau mo Paulo? (b) Neʼe koteā te tokaga ʼa Paulo ʼi tona ʼuhiga tagata ʼāfea Kilisitiano?

³ Neʼe toe ʼahiʼahiʼi mo te ʼapositolo ko Paulo ʼi te ʼu faʼahiga ʼaluʼaga kehekehe. ʼI tana fakamatala te ʼu fakamoʼoni ʼo tona ʼuhiga minisi ʼa Kilisito, neʼe ina tohi fēnei: “ ʼE ʼau toe fakalaka age ʼi ai: ʼi te ʼu gāue ʼo lahi maumau age; ʼi te ʼu fale pilisoni ʼo lahi maumau age; ʼi te ʼu tā fakavale ʼo meihiʼi mate pe. Neʼe tuʼa nima toku haha e te kau Sutea ʼo taki tolugofulu-ma-hiva, neʼe tuʼa tolu toku tā ʼaki te kauʼi ʼakau, neʼe tuʼa tahi toku taumakaʼi, neʼe tuʼa tolu te moū ʼo te ʼu vaka neʼe ʼau folau ai, neʼe ʼau ʼi te moana ʼi te ʼaho e tahi pea mo te po e tahi; ʼo ʼau tautau folau, ʼi te ʼu tuʼutāmaki ʼo te ʼu vaitafe, ʼi te ʼu tuʼutāmaki mai te kau kaihaʼa, ʼi te ʼu tuʼutāmaki mai te hahaʼi ʼo toku fenua, ʼi te ʼu tuʼutāmaki mai te ʼu puleʼaga, ʼi te ʼu tuʼutāmaki ʼi te kolo, ʼi te ʼu tuʼutāmaki ʼi te ʼu toafa, ʼi te ʼu tuʼutāmaki ʼo te tai, ʼi te ʼu tuʼutāmaki mai te ʼu tēhina loi, ʼi te gāue pea mo te kinakina, ʼo tau mo te ʼu ala pōʼuli tuʼa lahi, ʼi te pakupaku pea mo te fia ʼinu, ʼi te faka sesunio ʼi te ʼu faʼahiga meʼa kai kehekehe tuʼumaʼu, ʼi te momoko pea mo te telefua.

⁴ “ ʼO hilifaki mai ki te ʼu ʼahiʼahiʼi ʼaia, ʼe tau mo ʼau ʼi te ʼaho fuli: te tuʼania ʼaē ʼo ʼuhiga mo te ʼu kokelekasio fuli. Ko ai ʼaē ʼe vaivai ka mole ʼau vaivai ai? Ko ai ʼaē ʼe tūkia ka mole ʼau ʼita ai?” (2 Kolonito 11:23-29) Koia, ʼi te felāveʼi ʼa Paulo mo te ʼu fakataga pea mo te ʼu ʼahiʼahiʼi ʼaē mai tuʼa neʼe nofo agatonu aipe ia, pea ʼi tona ʼuhiga tagata ʼāfea Kilisitiano, neʼe faiga fakamalotoloto ke ina fakaloto mālohiʼi te ʼu tēhina pea mo te ʼu tuagaʼane ʼaē neʼe vaivai ʼi te kokelekasio, ʼo tokoni kia nātou, ke nātou nofo agatonu. ʼE ko he faʼifaʼitaki lelei ki te kau tagata ʼāfea Kilisitiano ia ʼaho nei!

Agatonu ʼi Te Fakataga

5. Koteā te tali ki te fakataga ʼaē ʼe fai fakahagatonu mai?

⁵ Koteā te ʼu puleʼaki ʼe fai e Satana moʼo maumauʼi te agatonu? Ohage ko tona fakahā ʼi ʼoluga, ko te tahi puleʼaki ʼi te ʼu puleʼaki kovi ʼaupito ʼa Satana ʼe ko te fakataga, kae ʼe ʼi ai pe foki mo te tali. ʼE tokoniʼi fēnei tatou e Efesi 6:10, 11: “Koia ke koutou haga maʼu te mālohi ʼi te ʼAliki pea mo te mālohi ʼo tona māfimāfi. Ke koutou kofuʼi te teu tau katoa ʼo te ʼAtua ke feala ai hakotou tuʼu tonu ʼo fakafeagai ki te ʼu kākā [peʼe “ko te ʼu aga fakakākā,” tā fakapilitānia, nota ʼi te lalo pasina] ʼa te Tevolo.”

6. ʼE lava feafeaʼi he fakahā ko te kau Fakamoʼoni ʼa Sehova neʼe nātou maʼu te “mālo lahi”?

⁶ Ko te meʼa ʼe tautau hoko ʼi te lolotoga ʼo te ʼu ʼaho fakamuli ʼaenī, ko te kau Fakamoʼoni ʼa Sehova neʼe nātou tauʼi te ʼu faigataʼaʼia. Koia, ʼe feala ke tou ʼui fakatahi mo Paulo, ʼo fēnei: “ ʼI te ʼu meʼa fuli ʼaia ʼe tou maʼu he mālo ʼe katoa, ʼuhi ko ia ʼaē neʼe ʼofa kia tatou.” (Loma 8:37) Ko te faʼahi ʼaia ʼe lagolago kiai te fakamatala ʼo ʼuhiga mo te agatonu ʼa te kau Fakamoʼoni ʼa Sehova ʼi te ʼu ʼā fakamamahi ʼo Siamani, Otilisia, Polonia, pea mo Iukoselavia ʼi te lolotoga ʼi te temi ʼo te kau Nasi ʼi te taʼu 1933 ki te 1945, ʼi te pule fakamālohi faka kominisi ʼi te Eulopa ʼo te Potu Hahake ʼi te taʼu 1945 pea mo te taʼu 1989, pea ʼi te lolotoga ʼo te ʼu fakataga ʼaē neʼe kovi ʼosi ʼi te ʼu potu ʼo Afelika pea mo Amelika Latina ʼi te ʼu taʼu pe ʼaenī neʼe hoki hili atu.

7. Koteā te ʼu faʼifaʼitaki lelei ʼo ʼuhiga mo te agatonu neʼe fakahā mai Etiopea?

⁷ Ko te kau Fakamoʼoni ʼa Sehova ʼo Etiopea neʼe ko he ʼu faʼifaʼitaki lelei ʼo ʼuhiga mo te agatonu, mai te taʼu 1974 ki te 1991. Ko te tahi tagata ʼi te ʼu tagata leʼo, neʼe ina ʼui fēnei ki te tēhina neʼe pilisoniʼi: “ ʼE ʼataʼata age anai te tuʼutāmaki ʼaē ʼe hoko ʼi te veteki ʼo te ʼu laione mai tonatou ʼā ʼi te tuʼutāmaki ʼaē ʼe hoko anai ʼaki te toe tuku age ʼo takotou ʼu hahaʼi!” Ko te hahaʼi fai fakapō ʼaia neʼe nātou fakamamahiʼi te kau kaugana ʼa Sehova, pea ʼosi te ʼu taʼu kiai, ko te fakatotonu mai te telepinale neʼe fai ke matematehi ia nātou. Ko te sino ʼo te tahi tēhina neʼe tuku fakahāhā ki te hahaʼi ohage ko he faʼifaʼitaki ke fakatokagaʼi. Ko ʼihi ʼu tēhina neʼe fakatūʼa ke matehi neʼe toe hāofaki ia nātou e te telepinale ʼo te puleʼaga ʼe mole fakafihi ki tanatou lotu, pea ko ʼihi ʼi te kau ‘mālo’ agatonu ʼaia neʼe kau ki te fai akonaki pea mo fakamatala te ʼu meʼa neʼe hoko kia nātou ʼi te polokalama ʼo te Fakatahi Faka Tisitilike ʼo te “Akonaki Fakaʼatua” ʼi Addis-Abéba ʼi te kamataʼaga ʼo te taʼu 1994.a—Soane 16:33; vakaʼi ia 1 Kolonito 4:9.

8. Neʼe feafeaʼi te faiga ʼaē ʼa Satana ke ʼaoga ki ai te “fakamaʼa ʼo te lanu”?

⁸ Neʼe mole lavaʼi e Satana ke ina maumauʼi te agatonu ʼa te ʼu tēhina pea mo te ʼu tuagaʼane ʼaia ʼaki hana fakatagaʼi fakahagatonu ia nātou. Koia, koteā te tahi age ʼu kākā ʼe ina fakaʼaogaʼi? ʼE talanoa ia te tohi ʼo Fakahā 12:12 ʼo ʼuhiga mo te ʼu ʼaho fakamuli ʼaenī, ʼo fēnei: “Malaʼia ki te kele pea mo te tai, he kua hifo atu te Tevolo kia koutou, mo tona ʼita lahi, he kua ina ʼiloʼi kua nounou tona temi.” ʼAki tana mole lava fakaʼauha te hahaʼi agatonu ʼa te ʼAtua ʼaki te ʼu fakataga, ʼi tona ʼita ʼe faiga ia ke ina tāmateʼi te hahaʼi fuli, ʼo mahino papau pe ʼaki te manatu ʼaē ke ina fakaʼauha te hahaʼi ʼaē ʼa Sehova kei toe. Koia ko te meʼa neʼe fakahigoaʼi ko te fakamaʼa ʼo te lanu neʼe ina fakatupu ʼaki ai te ʼu fematehiʼaki ʼi te ʼu potu ʼo te Iukoselavia ʼāfea, ʼo toe feiā pe ki te ʼu fai fakapō neʼe fai ʼi Lipelia, Burundi pea mo Rwanda.

9. He koʼe ko te ʼu puleʼaki ʼa Satana neʼe mole iku lelei tuʼumaʼu? Fakahā he ʼu faʼifaʼitaki.

⁹ Kae ʼi te agamāhani, ko te ʼu puleʼaki ʼa Satana ʼe toe maliu mai pe kia te ia totonu, heʼe ko te fakaloto mamahi fakasatana ʼe ina lagaʼi ʼi te loto ʼo te hahaʼi agatonu ke nātou mahino ko te falalaʼaga pe e tahi ʼe tonu ke nātou haga kiai ko te Puleʼaga ʼo te ʼAtua, ʼaē ʼe fakahā ʼaki he faiga fakamalotoloto e te kau Fakamoʼoni ʼa Sehova. (Mateo 12:21) ʼIo, ko te hahaʼi ʼaē ʼe fia logo, ʼe nātou fakamāʼopoʼopo ki te Puleʼaga! Ohage la, ʼi Bosnie pea mo Herzégovine ʼaē ʼe kovi ai te tau, ʼi te ʼaho 26 ʼo Malesio 1994, neʼe fai te ʼaho Fakamanatu ʼo te mate ʼo Sesu, ko te toko 1 307 neʼe kau ai, pea neʼe fakalaka ʼi te toko 291 hahaʼi ʼi te taʼu kua ʼosi. Ko te hahaʼi neʼe kau ki te toʼotoʼoga ʼaia ʼi Sarajevo (ko te toko 414), ʼi Zenica (ko te toko 223), ʼi Tuzla (ko te toko 339), ʼi Banja Luka (ko te toko 255), pea mo ʼihi kolo. ʼI Croatie neʼe ko tona hahaʼi ko te toko 8 326. Ko te aga fakamālohi ʼaē neʼe hoko ʼi te ʼu fenua ʼaia ia tafa ʼo te kau Fakamoʼoni ʼa Sehova neʼe mole ina fakamamaʼo ia nātou mai te fakalogo ki te fakatotonu ʼaē ke nātou “haga fakahā aipe te mate ʼo te ʼAliki, ʼo aʼu ki tana haʼu.”—1 Kolonito 11:26.

ʼI Rwanda ʼAē ʼe Kovi Ai Te Tau

10, 11. (a) Koteā te meʼa neʼe hoko kia nātou ʼaē neʼe nātou ʼui ko nātou ko te kau Kilisitiano ʼi Rwanda? (b) Neʼe feafeaʼi te talanoa ʼa te ʼu misionea agatonu e tolu?

¹⁰ ʼI Rwanda ʼi te taʼu 1993, neʼe ko te lahi ʼo te kau fai faka mafola ʼo te Puleʼaga neʼe ko te toko 2 080, pea neʼe ko te toko 4 075 ʼaē neʼe kau ki te Fakatahi Faka Tisitilike ʼaē ko te “Akonaki Fakaʼatua,” ʼo papitema ai te toko 230. Ia nātou ʼaia, ko te toko 142 neʼe nātou toʼo aipe te pionie vaeluaʼi temi. Ko te ʼu ako faka Tohi-Tapu ʼaē neʼe lolotoga fai neʼe aʼu ki te toko 7 655—ʼe mahino papau ia ko Satana neʼe mole ina leleiʼia te tuputupu ʼaia! Logope la ʼaē ʼe tokolahi te hahaʼi ʼe nātou ʼui ko nātou ko te kau Kilisitiano, ko te ʼu fai fakapō ʼaē ʼi te ʼu telepi ohage la ko te kau Hutus pea mo te kau Tutsis, ʼe ko he meʼa neʼe ʼiloga ai pe ko ai te kau Kilisitiano. Neʼe fakahā fēnei e te tohi (LʼOsservatore Romano) ʼo te Vatikano: “ ʼE ko he toe fai fakapō ia, meʼa fakaʼofaʼofa foki heʼe māʼiape la mo te kau Katolika, neʼe nātou kau ki te fakatupu ʼo te faʼahi ʼaia.” ʼE ko tona fakafuafua pe, ko te ʼu tagata mo te ʼu fafine pea mo te ʼu tamaliki ʼe nimageau afe neʼe mamate, pea ʼe teitei pe ki te toko lua miliona hahaʼi neʼe mole kei ʼi ai honatou ʼapi pe neʼe tonu ke nātou feholaki ki te ʼu nofoʼaga faka temi ʼi te ʼu tafaʼaki ʼo te fenua. ʼAki tanatou taupau ʼaē ʼo tonatou tauʼāteaina faka Kilisitiano, ko te kau Fakamoʼoni ʼa Sehova neʼe nātou faiga aipe ke nātou nonofo fakatahi. Ko te lauʼi teau ʼi ʼotatou ʼu tēhina pea mo tuagaʼane neʼe matehi. Kae ʼi te tahi kokelekasio ʼe toko 65 kau fai faka mafola ʼo te Puleʼaga, neʼe ko te toko 13 neʼe matehi, ko te lahi ʼo te hahaʼi ʼaē neʼe kau ki te fono neʼe aʼu ki te toko 170 ʼi te māhina ʼo ʼAukusito 1994. Ko te ʼu meʼa ʼofa ʼaē mai te kau Fakamoʼoni ʼo ʼihi ʼu fenua neʼe kau ʼi te ʼu ʼuluaki meʼa ʼofa ʼaē neʼe tau mai kia nātou. ʼE tou faikole nei maʼa te kūtuga ʼaē kei maʼuʼuli.—Loma 12:12; 2 Tesalonika 3:1, 2; Hepeleo 10:23-25.

¹¹ ʼI te ʼu meʼa fakalialia fuli ʼaia, neʼe hāo te ʼu misionea e tolu ʼaē neʼe ʼi Rwanda. Neʼe nātou ʼui fēnei: “ ʼE mahino kia mātou ko ʼotatou ʼu tēhina ʼi te malamanei ʼe nātou felāveʼi mo te ʼu faigataʼaʼia feiā peʼe kovi age la ia, pea ʼe mātou ʼiloʼi ko te ʼu meʼa fuli ʼaia ʼe ko he faʼahi ʼo te fakaʼiloga ʼo te ʼu ʼaho fakamuli ʼo te ʼu faʼahiga meʼa ʼo te tuʼu agakovi ʼaenī. Koia, mokā hoko te meʼa ʼaia ki he tahi, ʼe mahino lelei age ʼosi ia ki te moʼoni ʼo te ʼu meʼa ʼaē ʼe hoko pea ʼaki te faʼahi ʼaia ʼe ʼāsili age ʼosi tana mahino ki te maʼuhiga ʼaupito ʼaē ʼo te maʼuli. Ko ʼihi vaega faka Tohi-Tapu neʼe kua ʼi ai tona ʼuhiga makehe kia mātou, pea ʼe mātou fakaʼamu ki te temi ʼaē ka puli ai anai te ʼu meʼa ʼāfea. Kae ʼi te temi nei ʼe mātou fia haga gāue kia Sehova.”

Ko Te Agatonu ʼa Te Kau Tūpulaga

12, 13. (a) Neʼe feafeaʼi te nofo agatonu ʼa te kiʼi taʼahine? (b) ʼE feala koa ke maʼu maifea e ʼatatou ʼu tūpulaga he fakaloto mālohi ia ʼaho nei?

¹² Neʼe fakahā e Sesu ko nātou ʼaē ʼe fakafisi ki ai te hahaʼi ʼo tonatou ʼu famili ʼuhi ko te moʼoni, ʼe fakapale anai nātou ia ʼo tuʼa “teau.” (Maleko 10:29, 30) Neʼe hoko te meʼa ʼaia kia Entellia, ko te taʼahine ʼi te potu tokelau ʼo Afelika ʼe taʼu hogofulu, neʼe ʼofa ki te huafa ʼo te ʼAtua—ko Sehova—ʼi te temi pe ʼaē neʼe fagono ai ki ai. Neʼe ako ia mo te kau Fakamoʼoni ʼa Sehova, pea ko tana ʼalu pea mo tana liliu mai te ʼu fono neʼe minuta 90, logope la te fakafeagai ʼo tona famili, heʼe ʼi ʼihi po mokā liliu mai neʼe nātou tuku ia ia ʼi tuʼa. ʼI tona taʼu 13, neʼe kamata fai faka mafola ʼi te ʼu ʼapi, pea ko te fakafeagai ʼa te famili neʼe ʼāsili age ʼosi tona kovi. ʼI te tahi ʼaho neʼe haga tona ʼu kāiga ʼo haʼi tona ʼu nima pea mo tona ʼu vaʼe, pea neʼe nātou fakatakoto ia ia, ia hola e fitu ʼi te laʼā, pea ʼi ʼihi temi neʼe nātou huaʼi kia ia te vai ʼe mole maʼa. Neʼe kovi ʼosi tanatou haga ʼaē ʼo tā ia ia, ʼo lavea ai la tona tahi foʼi mata, pea neʼe nātou kapu ke mavae ʼi fale. Kae, neʼe maʼu tana gāue ʼi te lopitali pea ki muli age neʼe maʼu tona pepa afilimie. ʼI tona taʼu 20 neʼe papitema pea neʼe kau aipe ʼi te gāue pionie vaeluaʼi temi. ʼI tanatou punamaʼuli ki tana nofo agatonu, neʼe toe tali ia ia e tona famili ke toe liliu mai ki fale, pea ko te toko hiva ʼi tona famili kua nātou ako te Tohi-Tapu.

¹³ Neʼe maʼu e Entellia te lotomālohi mai te Pesalemo 116, tāfito te ʼu vaega 1 ki te 4, ʼaē ko he ʼu vaega neʼe liuliuga tana lau: “ ʼE ʼau ʼofa, he ko Sehova ʼe fagono ki toku leʼo, pea mo taku ʼu kole mamahi. Koteʼuhi neʼe falele mai kia te ʼau tona taliga, pea ʼi te lolotoga ʼo toku ʼu ʼaho ʼe ʼau kalaga anai. Ko te ʼu maea ʼo te mate ʼe nātou takatakai ʼau, pea neʼe maʼu ʼau, e te ʼu hoha ʼo te Seole. Neʼe ʼau mamahi pea mo lotomamahi. Kae neʼe ʼau fetapā ki te huafa ʼo Sehova: ‘Ê, Sehova, hāofaki toku nefesi!’ ” Ko Sehova ʼe ina tali te ʼu faʼahiga faikole ʼaia!

14. Neʼe fakahā feafeaʼi e te kau Fakamoʼoni Polonia he agatonu fakaofoofo?

¹⁴ Ohage ko te temi ʼo Sesu, neʼe tautau fakaʼaogaʼi e Satana te pipiki fakavale ʼaē ʼa te hahaʼi ki te lotu moʼo lagaʼi he ʼu fakataga—kae neʼe mole ina lavaʼi ʼo pulihi te agatonu ʼa nātou ʼaē neʼe fakatagaʼi. ʼE toe fakaofoofo te faʼifaʼitaki ʼo totatou ʼu tēhina ʼaē ʼi Polonia, ohage ko tona fakamatalatala ʼi te Annuaire des Témoins de Jéhovah 1994. Māʼiape la mo nātou kei veliveli neʼe tonu ke nātou fakahā mo nātou tanatou agatonu. ʼI te taʼu 1946 ko te kiʼi taʼahine ʼe taʼu 15 neʼe ʼui fēnei age ki ai: “Ke ke haga pe ʼo fai te pule faka Katolika. Heʼe kapau ʼe mole ke fai ʼe fanahi koe!” Neʼe nofo agatonu pe ia, pea neʼe ʼave ia ia ki te vao matuʼa, ʼo fakamataku ʼosi tona fakamamahiʼi ʼi ai, pea neʼe fanahi ai leva ia ia.—Vakaʼi ia Mateo 4:9, 10.

Ko Te Tahi Age ʼu Kākā ʼa Satana

15, 16. (a) Koteā te takitaki fakatemonio ʼa Satana, pea ʼe lava feafeaʼi hatatou tekeʼi ia ia? (b) He koʼe koa ʼe mole tonu ki totatou ʼu tūpulaga ke nātou tō?

¹⁵ ʼIo ko te takitaki fakatemonio ʼa Satana ko tona faka ʼuhiga ko te “pule peʼe ko te fakaʼauha”! ʼE lahi tana ʼu mahafu fakatupu mate. Koia ʼaē ʼe mole tou feʼeke ai te fakatokaga ʼaenī ʼa te ʼapositolo ko Paulo: “Kia tatou, ko tatatou tau ʼe mole fai ki te toto pea mo te kakano, kae ki te ʼu puleʼaga, ki te kau takitaki, ki te kau pule ʼo te mālama ʼo te ʼu fakapōʼuli, ki te ʼu mālohi fakalaumālie agakovi ʼaē ʼi te ʼu koga meʼa ʼo te lagi. Koia ke koutou toʼo te teu tau katoa ʼo te ʼAtua, ke feala ai hakotou tekeʼi te ʼaho ʼo te agakovi pea, ʼi te kua ʼosi ʼo te fai ʼo te meʼa fuli ke koutou tuʼu mālohi.” (Efesi 6:12, 13) Ko te ʼu holi ʼo ʼuhiga mo te ʼu koloā fakamālama, te ʼu fakafiafia heʼeʼaoga pea mo te ʼu meʼa ʼaē ʼe fakahāhā, te musika fakasatana, te fakahala ʼa te ʼu kaugā ako ʼi te faleako, te fakaʼaogaʼi fakavale ʼo te toloke, pea mo te kava—ko te ʼu meʼa ʼaia ʼe feala ke nātou maumauʼi totatou maʼuli. Koia, ʼe hoko atu te tokoni ʼa te ʼapositolo, ʼo fēnei: “Kae tāfito foki, ke koutou toʼo te meʼa tali tau lahi ʼo te tui, ʼaē ʼe feala ai anai ke koutou matehi te ʼu mahafu kakaha ʼa te agakovi.”—Efesi 6:16.

¹⁶ ʼE ʼiloga tāfito la ia ʼaho nei ʼe ʼaoga te teu ʼaia heʼe ko te musika faikehe ʼaē ʼe fakatafe nei e Satana ki te malamanei. ʼI ʼihi ʼu ʼaluʼaga ʼe ʼi ai tonatou ʼu pikipikiga mo te ʼu meʼa fakasatana. Ko te logo mai te pilō ʼo te shériff ʼo San Diego County (U.S.A.), ʼe ina ʼui fēnei: “ ʼI henī neʼe ʼi ai te mahōlō neʼe fai pea neʼe kau ki te mahōlō ʼaia te kau tūpulaga e toko 15 000, neʼe fakahivaʼi e te mahōlō ki te kau tūpulaga te kupu ʼaē ko te ‘Natas’—ʼaē ʼe ko tona faka ʼuhiga ko Satana mo kapau ʼe lau mai te faʼahi mataʼu ki te faʼahi hema.” Ko te ʼu gāue fakasatana neʼe hinoʼi ohage ko he luo ʼe tō kiai te kau tūpulaga “koteʼuhi ʼe nātou heʼe ʼamanaki, ʼiʼita pea mo tokotahi.” Ko koutou kau tūpulaga ʼo te kokelekasio faka Kilisitiano, ʼe mole tonu ia ke koutou tō! ʼE foaki atu e Sehova te teu tau fakalaumālie ke mole lava ʼi he temi ki te ʼu mahafu ʼa Satana ke nātou fakamamahiʼi koutou.—Pesalemo 16:8, 9.

17. ʼE lava feafeaʼi he tekeʼi ʼo te lotovaivai ʼi te loto?

¹⁷ Ko te ʼu mahafu vela fakasatana neʼe fakatuʼutuʼu ke nātou fakahēhē te ʼu meʼa ʼaē ʼi te loto. ʼAki te ʼu faigataʼaʼia ʼo te maʼuli, ohage la ko te mahaki fakasino peʼe ko he lotovaivai lahi, ko totatou fili ʼe feala ke ina fakatupu he manatu ʼe mole lelei ʼi niʼihi. Ko he tahi ʼe feala ke lotovaivai ʼuhi ʼe mole lahi tona ʼu hola ʼaē ki te gāue ʼa te ʼAtua peʼe ko hana tōtō ʼi ʼihi ʼu fono ʼo te kokelekasio. Ko te tokaga ʼaē ʼa te kau tagata ʼāfea pea mo te ʼu tēhina mo tuagaʼane agalelei, ʼe feala ke tokoni ki te tekeʼi ʼo te ʼu taʼi faigataʼaʼia fakatupu lotomamahi ʼaupito ʼaia. Ke tou manatuʼi ko Sehova ʼe ʼofa ki tana kau kaugana agatonu. (1 Soane 4:16, 19) ʼE ʼui fēnei e te Pesalemo 55:22: “Tuku tau kavega kia Sehova, pea ko ia totonu ʼe lagolago anai kia te koe. ʼE mole ina fakagafua anai ke tūkia ia ia ʼaē ʼe faitotonu.”

18. Koteā te ʼu kākā fakasatana neʼe tonu ke tauʼi e ʼihi?

¹⁸ Ko te ʼu “puleʼaki” kākā ʼa Satana kua toe ʼasi pe ʼi te temi nei ʼi hona tahi age ʼaluʼaga. ʼI ʼihi fenua, ʼe tokolahi te hahaʼi kua fotufotuʼa tagata peʼe fotufotuʼa fafine neʼe mālohi ʼi tonatou ʼu fakakaukau te ʼu manatu ohage la neʼe fakamamahiʼi nātou ʼaki ni ʼu gāue neʼe fai e ni ʼu tauhi fakasatana. ʼE haʼu koa maifea te ʼu taʼi manatu ʼaia? Logope la te ʼu tuʼuga kumi, ko te ʼu manatu ʼa te kau popoto ʼo te malamanei e tahi ʼalu pe. Ki te manatu ʼa ʼihi ko te ʼu manatu ʼaia ʼe ko he ʼu suvenia moʼoni, ki ʼihi leva ʼe ko he ʼu manatu neʼe hoʼi faʼu pe ia—peʼe lagi neʼe fakahū e he faʼahiga faitoʼo ʼe kei fakaapelua pe—pea ki ʼihi leva ʼe ko he faʼahiga misi neʼe tupu mai te faigataʼaʼia neʼe hoko kae kei nātou liliki.

19. (a) Koteā te ʼu manatu ʼaē neʼe tonu ke tauʼi e Sopo? (b) ʼE lava feafeaʼi ki te kau tagata ʼāfea ke nātou muliʼi te faʼifaʼitaki ʼa Eliu?

¹⁹ ʼE maʼuhiga ke fakatokagaʼi ko te tagata kaugana ʼa Sehova ko Sopo neʼe ina tauʼi te ʼu “manatu fakatupu hoha,” ʼaē neʼe fakatupu e Satana ʼaki ia Elifase pea mo Sofale. (Sopo 4:13-18; 20:2, 3) Koia neʼe tau ia Sopo mo te “lotomamahi,” ʼo fefakatupuʼaki tana fai ni ʼu “talanoa noa” ʼo ʼuhiga mo te ʼu “meʼa fakamataku” ʼaē neʼe fakamamahiʼi tona ʼatamai. (Sopo 6:2-4; 30:15, 16) Neʼe fagono fakalelei ia Eliu kia Sopo pea neʼe tokoni fakamalotoloto kia ia ke sio ki te poto ʼo Sehova ʼo ʼuhiga mo te ʼu meʼa ʼaē ʼe hoko. ʼO toe feiā aipe ia ʼaho nei, ko te kau tagata ʼāfea lotomahino ʼe nātou fakahā ʼe nātou tokaga fakamalotoloto ki te hahaʼi lotomamahi ʼaki tanatou mole hilifaki age he ʼu “mamahi” ki te hahaʼi ʼaia. Kailoa ia, ohage ko Eliu, ʼe nātou fagono fakalelei kia nātou pea mo nātou tuku age te lolo fakafimālie ʼo te Folafola ʼo te ʼAtua. (Sopo 33:1-3, 7; Sake 5:13-15) Koia ʼaē ko he tahi pe, ʼe nofo hoha ʼo ʼuhiga mo te ʼu meʼa ʼaē ʼi tona loto ʼuhi ko he faigataʼaʼia moʼoni peʼe kailoa, peʼe neʼe “fakamatakuʼi . . . ʼaki te ʼu misi, pea mo te ʼu meʼa neʼe hā” ohage ko Sopo, ʼe feala ke ina maʼu te fakafimālie faka Tohi-Tapu ʼi te kokelekasio.—Sopo 7:14; Sake 4:7.

20. ʼE lava feafeaʼi ki te kau Kilisitiano ʼaē ʼe loto hoha honatou tokoniʼi ke nātou haga nofo ʼi te fakapotopoto ʼi te faʼahi fakalaumālie?

²⁰ ʼE feala pe ki he Kilisitiano ʼi te temi nei, ke ina ʼiloʼi papau ko Satana ʼaē ko te matapuna ʼo te ʼu taʼi manatu fakamataku ʼaia. Kapau ko ʼihi ʼi te kokelekasio ʼe nātou tau mo te mamahi ʼaia, ʼe tonu ke nātou faka ʼuhiga te ʼu manatu fakamataku ʼaia ohage ko he fakahala ʼe fai fakahagatonu mai e Satana moʼo maumauʼi tonatou fakapotopoto ʼi te faʼahi fakalaumālie. ʼE ʼaoga ke tou loto faʼa kātaki pea mo loto mahino, ʼo tokoni kia nātou ʼaki te Tohi-Tapu. ʼAki te faikole kia Sehova pea mo te fua ʼo te gāue faka tauhi ōvi fakalaumālie, ko nātou ʼaē ʼe lotovaivai ʼe nātou maʼu anai te mālohi ʼaē ʼe fakalaka age ʼi te mālohi māhani. (Isaia 32:2; 2 Kolonito 4:7, 8) Koia ʼe feala ai anai ke nātou agatonu ʼo faʼa kātaki pea ʼaua naʼa nātou fakagafua ke hū ni ʼu manatu fakatemonio ki te tokalelei ʼa te kokelekasio. (Sake 3:17, 18) ʼIo, ʼe feala anai ke nātou fakafeagai ki te Tevolo, ʼo nātou fakahā te manatu ʼaē neʼe ia Sesu ʼi te temi ʼaē neʼe ina ʼui fēnei ai: “ ʼAlu, Satana!”—Mateo 4:10; Sake 4:7.

21. ʼE fakatokagaʼi feafeaʼi e te Tohi-Tapu te ʼu faʼahiga puleʼaki ʼa Satana?

²¹ ʼE tou ʼiloʼi ko te fakatuʼutuʼu ʼa Satana ke ina fakahehema totatou ʼatamai, ohage ko tona ʼiloga mai ʼi te fakatokaga ʼa te ʼapositolo ko Paulo ia 2 Kolonito 11:3: “ ʼE ʼau mataku, naʼa ʼi he faʼahiga ʼaluʼaga pe—ohage ko te haga ʼa te gata ʼo fakahalaʼi ia Eva ʼaki tana kākā,—naʼa fakahehema tokotou ʼatamai pea mo fakamamaʼo ʼi te agatonu pea mo te nofo maʼa ʼaē ʼe tau mo Kilisito.” Ko te hifohifo ʼo te kakano fuli ʼi te temi nei, peʼe ko te sosiete fakatagata ʼaē ʼe mamaʼo mai te ʼAtua, ʼe ina fakamanatuʼi mai kia tatou te hifohifo ʼa te ʼu “hahaʼi maumau meʼa” fakahehema pea mo agamālohi ʼo te temi ʼo Noe. (Senesi 6:4, 12, 13, tā fakapilitānia, nota ʼi te lalo pasina; Luka 17:26) Koia ʼe mole mata fakapuna’maʼuli, te fakaʼaogaʼi e Satana te ʼu gāue kākā pea mo te ʼu puleʼaki fakakākā moʼo fakahā ʼo tona ʼita, tāfito la ki te hahaʼi ʼa te ʼAtua.—1 Petelo 5:8; Fakahā 12:17.

22. ʼAki te pulihi ʼo Satana, koteā te ʼu tapuakina ʼe feala ke tou ʼamanaki kiai?

²² ʼE mole toe talanoa pe la kia Satana ʼi te fakaʼosi ʼo te ʼu kapite ʼo te tohi ʼo Sopo ʼi te Tohi-Tapu. ʼI tona lotokovi neʼe ina ʼui ko te hahaʼi ʼe mole feala hanatou nofo agatonu ki te ʼAtua, kae ʼaki te agatonu ʼa Sopo neʼe ina fakahā te loi ʼaē ʼa Satana. Koia ʼi he temi ka haʼu, mokā “ ʼōmai mai te mamahi lahi” te “toe hahaʼi tokolahi” agatonu, ko Satana ʼe lī anai ia ki te vanu. Ko te ʼu tagata pea mo te ʼu fafine tui, ʼo kau ai foki mo te tagata agatonu ko Sopo, ʼe nātou fakatahi anai ki te “hahaʼi tokolahi,” ke nātou maʼu te ʼu tapuakina faka palatiso, ʼo laka age ʼi te ʼu tapuakina ʼaē neʼe fakapale ʼaki ia Sopo!—Fakahā 7:9-17; 20:1-3, 11-13; Sopo 14:13.

[Nota ʼi te lalo pasina]

Ko Te ʼu Fehuʼi Ke Toe Vakaʼi

◻ Koteā te ʼu faʼifaʼitaki lelei neʼe tuku e Sopo, Sesu pea mo Paulo ʼo ʼuhiga mo te agatonu?

◻ Neʼe feafeaʼi ki te kau agatonu tanatou tauʼi ia Satana?

◻ ʼE lava feafeaʼi ki te kau tūpulaga ke nātou tekeʼi te ʼu kākā ʼa Satana?

◻ Koteā te meʼa ʼe feala ke fai ʼo ʼuhiga mo te kākā fakasatana?

[Paki ʼo te pasina 7]

ʼI Etiopea, ko Meswat pea mo Yoalan ʼe nā gāue katoa nei kia Sehova ʼuhi ko te faʼifaʼitaki ʼa tanā matuʼa, ʼaē neʼe matehi

[Paki ʼo te pasina 7]

Ko Entellia, ko te finemui agatonu ʼi te potu tokelau ʼo Afelika