Kau Tūpulaga—Koutou Akoʼi Takotou ʼu Fealagia Fakakaukau!

“Ko te meakai fefeka maʼa te hahai lalahi, kia natou e natou akoi onatou [“ ʼu fealagia fakakaukau,” MN] ki te iloi o te kehekehe o te lelei pea mo te kovi.”​—Hepeleo 5:​14.

1, 2. (a) Koteā ʼaē ʼe tatau ai tatatou ʼaluʼaga ʼi te temi nei pea mo ʼaē ʼo te kau Kilisitiano ʼo te temi muʼa ʼi Efeso? (b) Koteā te ʼu meʼa ʼaē ʼe feala ke ina puipui koutou mai te tuʼutāmaki, pea ʼe lava feafeaʼi hakotou fakatuputupu te ʼu fealagia ʼaia?

“KOUTOU vakai fakapotopoto, pe feafeai te agaaga fai o [tokotou] mauli: aua naʼa hage ko te hahai galivale, kae hage ko te hahai galipoto, e natou fakaʼaoga lelei te temi-nei, koteuhi ko te u aho e kovi.” (Efeso 5:​15, 16) Mai tona ʼaluʼaga ʼaē neʼe tohi e Paulo te ʼu palalau ʼaia kua hili kiai taʼu e lua afe, koia ‘ko te hahai agakovi mo kaka e fakaʼalu anai tonatou koviʼage.’ ʼE tou maʼuʼuli ʼi “he u temi faigataa,” peʼe ohage ko tona fakaliliu e te tahi Tohi-Tapu, ko te ʼu temi ʼe “lahi ai te ʼu tuʼutāmaki.”​—2 Timoteo 3:​1-5, 13; Phillips.

² Kae ʼe feala ke koutou fai he ʼu meʼa ke mole koutou tuʼutāmakiʼia, ei, ʼe tonu ke koutou fakatuputupu ia koutou te “fakasiosio poto, . . . te ʼatamai mālama pea mo te fealagia fakakaukau.” (Tāʼaga Lea 1:4) ʼE ʼui fēnei ia Tāʼaga Lea 2:​10-​12: “Ka hū anai te poto ki tou loto pea ko te ʼatamai mālama ʼe liliu anai ko he meʼa ʼe leleiʼia e tou nefesi, pea ko te fealagia fakakaukau ʼe ina leʼoleʼo anai koe, ko te fakasiosio tonu ʼe ina taupau anai koe, mo hāofaki koe mai te ala ʼaē ʼe kovi, mai te tagata ʼaē ʼe talanoa ki te ʼu meʼa kovi.” Kae ʼe koutou lava maʼu feafeaʼi te ʼu kalitate ʼaia? ʼE ʼui fēnei ia Hepeleo 5:​14: “Ko te meakai fefeka maʼa te hahai lalahi, kia natou e natou akoi onatou [“ ʼu fealagia fakakaukau,” MN] ki te iloi o te kehekehe o te lelei pea mo te kovi.” Kapau ʼe tou fia poto ʼi te fakaʼaogaʼi fakalelei ʼo tatatou ʼu fealagia fakakaukau, pea ʼe maʼua ke tou akoʼi. Ko te kupu faka Keleka ʼaē neʼe fakaʼaogaʼi e Paulo, ʼi tona ʼuhiga totonu, ʼe faka ʼuhiga ki te ‘akoako ohage ko te hahaʼi faigaoʼi.’ ʼE koutou lava kamata feafeaʼi te ako ʼaia?

Koutou Akoʼi Takotou ʼu Fealagia Fakakaukau

3. ʼE lava feafeaʼi hakotou fakaʼaogaʼi tokotou ʼu fealagia fakakaukau mokā tonu ke koutou fai he tonu?

³ Koutou fakatokagaʼi ‘ ʼe akoʼi’ takotou fealagia fakakaukau​—te fealagia ʼaē ke koutou ʼiloʼi te lelei mo te kovi. Ka tonu ke koutou fai he puleʼaki, pea ʼe mole fua lelei anai te meʼa ʼaē neʼe koutou filifili mo kapau neʼe koutou fai feiā pe kae neʼe mole koutou fakakaukauʼi, peʼe koutou hoko fai pe, peʼe koutou mulimuli ki te meʼa ʼaē ʼe fai e te kaugamālie. Kapau ʼe koutou fia fai he ʼu puleʼaki lelei, pea ʼe tonu ke koutou fakaʼaogaʼi takotou ʼu fealagia fakakaukau. ʼO feafeaʼi? ʼUluaki, ʼe tonu ke koutou vakavakaʼi te ʼaluʼaga katoa pea mo koutou fakatokagaʼi te ʼu faʼahi fuli. ʼE lagi ʼaoga anai ke koutou fai ni ʼu fehuʼi. Koutou faiga ke koutou ʼiloʼi pe koteā te tonu ʼaē ka koutou fai. ʼE ʼui fēnei ia Tāʼaga Lea 13:16: “Ko ia ʼaē ʼe fakasiosio poto ʼe gāue anai ʼaki te poto.” ʼOsi ʼaia, pea koutou faiga ke koutou ʼiloʼi te ʼu lao pea mo te ʼu pelesepeto faka Tohi-Tapu ʼaē ʼe ʼi ai tonatou pikipikiga mo te faʼahi ʼaia. (Tāʼaga Lea 3:5) ʼE mahino ia, moʼo fakahoko te faʼahi ʼaia, ʼe tonu ke koutou maʼu he ʼatamai mālama ʼo ʼuhiga mo te Tohi-Tapu. Koia ʼaē ʼe fakaloto mālohiʼi tatou e Paulo ke tou toʼo te “meakai fefeka”​—ke tou ako “te laulahi, mo te loa, mo te maoluga pea mo te loloto” ʼo te moʼoni.​—Efeso 3:​18.

4. He koʼe koa ʼe maʼuhiga ke tou maʼu te ʼatamai mālama ʼo ʼuhiga mo te ʼu pelesepeto ʼa te ʼAtua?

⁴ ʼE maʼuhiga te fai ʼo te faʼahi ʼaia heʼe tou heʼe haohaoa, pea ʼe tou fia fai tuʼumaʼu te meʼa ʼaē ʼe kovi. (Senesi 8:​21; Loma 5:​12) ʼE ʼui fēnei ia Selemia 17⁠:9: “ ʼE kākā te loto, ʼo laka ʼi te meʼa kehe fuli, pea ʼe mole hona faitoʼo. Ko ai ʼaē ʼe ina lava ʼiloʼi?” Kapau ʼe mole takitaki tatou e te ʼu pelesepeto ʼa te ʼAtua, pea ʼe feala pe ke tou kākāʼi tatou ʼo tou manatu ko te meʼa ʼaē ʼe kovi ʼe lelei ia​—ʼuhi ko te holi kiai ʼo totatou kakano. (Vakaʼi ia Isaia 5:​20.) Neʼe tohi fēnei e te tagata fai pesalemo: “ ʼE lava feafeaʼi anai ki he tūpulaga ke ina fakamaʼa tona ala? Kapau ʼe nofo tokaga ki tau folafola. ʼAki tau ʼu fakatonutonu ʼe ʼau liliu ʼo poto. Koia neʼe ʼau fehiʼa ai ki te ʼu ala kovi fuli pe.”​—Pesalemo 119:​9, 104.

5. (a) He koʼe ʼe muliʼi ʼi ʼihi kau tūpulaga te ala ʼaē ʼe kovi? (b) Neʼe tali feafeaʼi e te finemui ia te moʼoni?

⁵ He koʼe ʼe tokolahi te kau tūpulaga neʼe lahilahi ake ʼi he loto fale Kilisitiano neʼe nātou muliʼi te ala ʼaē ʼe kovi? Neʼe mole lagi nātou kumi ke nātou ‘iloi e natou totonu, pe kotea te finegalo o te Atua, te mea e lelei mo taau mo ia pea mo te mea ae e katoa.’ (Loma 12:2) Ko ʼihi neʼe lagi nātou kau ki te ʼu fono mo tanatou ʼu mātuʼa, pea neʼe feala ke nātou fakamahino te ʼu akonaki tāfito ʼo te Tohi-Tapu. Kae ka kole age kia nātou ke nātou fakamoʼoni ki te ʼu meʼa ʼaē ʼe nātou tui kiai peʼe ke nātou fakamahino he ʼu faʼahi loloto ʼo te Folafola ʼa te ʼAtua, pea ʼe tou fakatokagaʼi ʼe lahi te ʼu meʼa ʼe mole nātou mālama kiai. ʼE faigafua te fakahalaʼi ʼo te kau tūpulaga ʼaia. (Efeso 4:​14) Kapau ʼe koutou feiā, he koʼe koa ʼe mole koutou fakatotonu ke koutou fetogi? ʼE manatuʼi e te tuagaʼane kei finemui: “Neʼe ʼau fai te ʼu kumi. Neʼe ʼau fai kia ʼau te ʼu fehuʼi ʼaenī, ‘E feafeaʼi haku ʼiloʼi ʼe ko te lotu moʼoni ʼaenī? ʼE ʼau ʼiloʼi feafeaʼi ʼe ʼi ai te ʼAtua ko tona huafa ko Sehova?’ ”a ʼAki tana vakavakaʼi fakalelei te Tohi-Tapu, neʼe tui ai ko te ʼu meʼa ʼaē neʼe akoʼi age e tana ʼu mātuʼa neʼe ko te moʼoni!​—Vakaʼi ia Gaue 17:11.

6. ʼE lava feafeaʼi hakotou “vakai te mea ae e lelei ki te Aliki,” ko Sehova?

⁶ Kapau ʼe koutou ʼiloʼi te ʼu pelesepeto ʼa Sehova, pea ʼe faigafua anai hakotou “vakai te mea ae e lelei ki te Aliki.” (Efeso 5:​10) Kae e feafeaʼi mo kapau ʼe hoko he ʼaluʼaga ʼe mole koutou ʼiloʼi ai te aga fakapotopoto ʼaē ʼe tonu ke koutou fai? Koutou kole kia Sehova ke ina takitaki koutou. (Pesalemo 119:144) Koutou faiga ke koutou palalau ki te faʼahi ʼaia mo ʼakotou ʼu mātuʼa peʼe ko he Kilisitiano kua fakapotopoto. (Tāʼaga Lea 15:22; 27:17) ʼE koutou toe maʼu foki mo he ʼu tokoni mokā koutou fai he ʼu kumi ʼi te Tohi-Tapu pea mo te ʼu tohi ʼo te Sosiete. (Tāʼaga Lea 2:​3-5) Kapau ʼe koutou fakaʼaogaʼi lahi takotou ʼu fealagia fakakaukau pea ʼe toe ʼāsili lelei anai.

Koutou Fakasiosio Poto ʼo ʼUhiga Mo Te ʼu Fakafiafia

7, 8. (a) ʼE koutou lava fakaʼaogaʼi feafeaʼi tokotou ʼu fealagia fakakaukau moʼo ʼiloʼi peʼe tonu ke koutou ʼolo ki he lafeti peʼe kailoa? (b) Koteā te manatu ʼa te Tohi-Tapu ʼo ʼuhiga mo te ʼu fakafiafia?

⁷ ʼI te temi nei, tou vakaʼi peʼe koutou lava fakaʼaogaʼi feafeaʼi anai takotou ʼu fealagia fakakaukau ʼi he ʼu ʼaluʼaga moʼoni. Ohage la, ʼe fakaafe koutou ki he lafeti. ʼE lagi foaki atu te kiʼi pepa fakaafe ki te lafeti ʼaia. ʼE fakahā atu peʼe tokofia anai te kau Fakamoʼoni tūpulaga ʼaē ka ʼōmai. Kae ʼe kole atu anai he kiʼi falā moʼo tokoni ki te totogi ʼo te ʼu meʼa ʼo te lafeti. ʼE koutou ʼolo anai koa kiai?

⁸ Koutou fakaʼaogaʼi takotou ʼu fealagia fakakaukau. ʼUluaki, koutou vakaʼi, peʼe ko te tokofia anai ʼaē ka ʼōmai ki te lafeti ʼaia? Ko ai ʼaē ka kau ʼi te lafeti ʼaia? ʼE kamata anai ʼi te hola fia? ʼE fakaʼosi anai ʼi te hola fia? Koteā te ʼu fakatuʼutuʼu ʼaē neʼe fai? Ko ai ʼaē ka ina leʼoleʼo te lafeti ʼaia? Pea koutou fai he ʼu kumi, ʼo koutou vakaʼi ʼi te Index des publications de la Société Watch Tower ʼi te kupu “Divertissement.”b Koteā ʼaē ʼe koutou maʼu ai? ʼUluaki, ʼe mole tapuʼi e Sehova tatatou fakatahitahi pea mo tou fakafiafia. ʼI tona fakahagatonu, ʼe ʼui ia Tagata Tānaki 8:​15, ʼo fakatahi mo te gāue kinakina, “ ʼe mole he tahi age meʼa ʼe lelei ki te hahaʼi, ʼi te lalo laʼā, ʼi hanatou kakai mo hanatou ʼiʼinu pea mo hanatou fakafiafia.” Pea ko Sesu Kilisito totonu neʼe kau ki te kaitahi pea mo te fai ʼohoana. (Luka 5:​27-​29; Soane 2:​1-​10) Koutou vakavakaʼi lelei, heʼe feala ke fua lelei kia koutou takotou fakatahitahi mo ʼihi.

9, 10. (a) Koteā te ʼu tuʼutāmaki ʼaē ʼe feala ke hoko ʼi he ʼu lafeti? (b) Koteā te ʼu fehuʼi ʼaē ʼe lagi koutou fai anai ʼi muʼa ʼo hakotou fai he tonu, peʼe koutou ʼolo anai peʼe kailoa ki he lafeti?

⁹ Kae ko te ʼu fakatahitahi ʼaē neʼe mole fakatuʼutuʼu lelei ʼe feala ke tupu ai he ʼu fihifihia. Ia 1 Kolonito 10:​8, ʼe tou lau ai pe neʼe iku feafeaʼi te ʼu fakatahi neʼe mole lelei ki te feʼauʼaki pea neʼe matehi ai “i he aho e tahi te toko uafulu-ma-tolu afe [kau Iselaelite heʼe agatonu].” Ia Loma 13⁠:​13, ʼe toe fai mai te fakatokaga ʼaenī ke tou fakakaukauʼi: “O hage ko te aho, tou aga mai ke lelei: aua naa tou kaivale mo konahia, aua naa tou tono mo aga fakalialia, mo ke pea mo maheka.” (Vakaʼi ia 1 Petelo 4:3.) ʼE moʼoni, ʼe mole he tuʼakoi kua ʼosi fakatuʼu ʼo ʼuhiga mo te lahi ʼo te kau fakaafe. Kae, ʼaki te ʼu meʼa ʼaē neʼe hoko, ʼe fakahā mai kapau ʼe kaugamālie ʼaupito te hahaʼi ʼi te fakafiafia pea ʼe toe faigataʼa mo te leʼoleʼo ʼo meʼa fuli. Ko te ʼu fakatahi ʼaē ʼe mole faʼa hahaʼi, pea mo fakatuʼutuʼu lelei ʼe mole liliu anai ko he ʼu “lafeti fakavalevale.”​—Kalate 5:​21, Byington.

¹⁰ ʼI takotou fai ʼaia takotou ʼu kumi, ʼe mahino papau ia ʼe lagaʼi ai te tahi ʼu fehuʼi, ohage la: ʼE ʼi ai anai koa he kau Kilisitiano lalahi ʼi te lafeti ʼaia? Ko ai ʼaē ka ina totogi te ʼu meʼa ʼo te lafeti ʼaia? Neʼe fai koa te lafeti ʼaia moʼo fakamālohiʼi te ʼu fakakaugā lelei, pe neʼe fai pe ia ke ʼaoga ki he tokotahi? ʼE ʼi ai koa he ʼu meʼa ʼe tapuʼi kia nātou ʼaē ka kau kiai? Kapau ʼe fai te lafeti ʼi te fakaʼosi vāhaʼa, ʼe gata anai koa ʼi he hola ʼe fakapotopoto ke feala ai kia nātou ʼaē ʼe kau kiai ke nātou fai faka mafola ʼi te uhu ake? Kapau ʼe ʼi ai he musika pea mo meʼe, ʼe ʼalutahi anai koa mo te ʼu lekula faka Kilisitiano? (2 Kolonito 6:3) ʼE mole faigafua tatatou fai te ʼu fehuʼi ʼaia. Kae ʼe fakatokagaʼi fēnei mai ia Tāʼaga Lea 22:3: “ ʼE poto ia ia ʼaē neʼe sio ki te malaʼia, pea nono, kae ko nātou ʼaē ʼe mole popoto neʼe mole nātou tokagaʼi pea ʼe tonu ke hoko kia nātou te tautea.” Ei, ʼe feala ke koutou tekeʼi te ʼu ʼaluʼaga fakatupu tuʼutāmaki mo kapau ʼe koutou fakaʼaogaʼi takotou ʼu fealagia fakakaukau.

Koutou Fakasiosio Tonu ʼo ʼUhiga Mo Takotou Temi Ako

11. ʼE lava fakaʼaogaʼi feafeaʼi e te kau tūpulaga tonatou ʼu fealagia fakakaukau ki te fakatuʼutuʼu ʼo tanatou ka haʼu?

¹¹ ʼE ʼui e te Tohi-Tapu ʼe ko he aga poto te fakatuʼutuʼu ʼo tatatou ka haʼu. (Tāʼaga Lea 21:5) Neʼe kua koutou fai palalau koa mo ʼakotou ʼu mātuʼa ki tokotou ka haʼu? ʼE lagi koutou fakatuʼutuʼu ke koutou toʼo te selevisi pionie katoa. ʼE koutou fiafia lahi anai mo kapau ʼe koutou toʼo te selevisi ʼaia. Kapau kua koutou māhani ʼi te ako pea mo fakatuputupu takotou poto ʼi te fai faka mafola, pea ʼe koutou teuteu nei ke koutou hū ki te selevisi fakafiafia ʼaia. Neʼe koutou fakakaukauʼi koa peʼe feafeaʼi anai hakotou maʼu te ʼu meʼa ʼaē ʼe ʼaoga kia koutou ʼi te minisitelio? Kapau, ʼi te ka haʼu, ʼe koutou fia ʼohoana, ʼe feala anai koa ke koutou fakahoko te ʼu maʼua foʼou ʼaia? ʼE tonu ke koutou fakaʼaogaʼi takotou ʼu fealagia fakakaukau moʼo fai he ʼu tonu ʼe fakapotopoto pea mo lelei.

12. (a) Koteā ʼaē neʼe filifili ke fai e ʼihi famili moʼo mulimuli ki te fetogi ʼo te ʼaluʼaga faka ekonomika? (b) Ko te hoko atu ʼa he tahi tana ako ʼe faka ʼuhiga koa ʼe mole feala ia ke pionie? Koutou fakamahino.

¹² ʼI ʼihi koga meʼa, ʼe kei feala pe ke akoako e he tahi te faʼahi ʼaē ʼe faiva ai peʼe ko he gāue. ʼE ʼi ai te kau tūpulaga ʼe nātou ako gāue ʼi te gāue ʼaē ʼe fai e tanatou famili peʼe nātou akoako gāue ʼi te ʼu gāue ʼo tanatou ʼu kaumeʼa lalahi. ʼE ʼi ai ʼihi ʼe nātou ʼolo ʼo ako ke feala hanatou maʼu he gāue ki ʼamuli. ʼI te ʼu koga meʼa ʼaē ʼe mole maʼu ai te ʼu fealagia ʼaia, ʼe feala ke fakatuʼutuʼu e te ʼu mātuʼa ke hoko atu te ako ʼo tanatou fānau ʼi te ʼosi ʼo tanatou ako ʼi te ʼu kalasi lalahi. ʼE koutou fakamuʼamuʼa te Puleʼaga mokā koutou fai te ʼu fakatuʼutuʼu fakatomuʼa ʼaia, ke feala ai hakotou fakahoko takotou ʼu maʼua mokā koutou lalahi anai, pea tāfito ke feala ke koutou kau fualoa ʼi te selevisi pionie. (Mateo 6:​33) Pea kapau ʼe hoko atu takotou ako ʼe mole faka ʼuhiga leva ʼe mole feala hakotou pionie. Ohage la ko te Fakamoʼoni kei finemui, neʼe fia nofo fualoa ʼi te selevisi. ʼI te ʼosi ʼo tana ako, ko tana ʼu mātuʼa​—ʼaē neʼe pionie mo nāua​—neʼe nā fakatuʼutuʼu ke hoko atu tana ako. Neʼe pionie lolotoga tana ako, pea ʼi te temi nei kua poto ʼi te fakaʼaluʼalu tona maʼuli, pea mo hoko atu tana selevisi pionie.

13. Koteā te ʼu fakatuʼutuʼu ʼaē ʼe feala ke vakaʼi e te famili ʼo ʼuhiga mo te hoko atu ʼo te ako ʼo tanatou fānau?

¹³ ʼO ʼuhiga mo te hoko atu ʼo te ako, ʼe feala pea ʼe maʼua ki te ʼu famili takitokotahi ke nātou fai hanatou tonu kiai. Kapau ʼe filifili lelei te ako ʼaia, pea ʼe ko he tokoni moʼoni anai. Kae ʼe feala ke liliu ko he hele. Kapau ʼe koutou vakavakaʼi te faʼahiga ako ʼaia, koteā takotou fakatuʼutuʼu? ʼE ko hakotou teuteu koa ke koutou fakahoko takotou ʼu maʼua mokā koutou lalahi anai, pea mo koutou fakahoko ʼi hona ʼaluʼaga fakapotopoto? Peʼe koutou “kumi [koutou] he ʼu meʼa lahi”? (Selemia 45:⁠5; 2 Tesalonika 3:​10; 1 Timoteo 5:8; 6:9) E feafeaʼi ki te hoko atu ʼo takotou ako ʼi he tahi koga meʼa, lagi ʼi te nofoʼaga ʼo te univelesitē? ʼE fakapotopoto anai koa te tonu ʼaia? Heʼe fakatokagaʼi mai e Paulo: “Ko te u fakakauga ae e kovi, e ina maumauʼi te u aga e lelei.” (1 Kolonito 15:33; 2 Timoteo 2:​22) Koutou manatuʼi foki, ko “te temi kua nounou.” (1 Kolonito 7:​29) ʼE fualoa anai koa te temi ʼaē ka koutou fakaʼaogaʼi ki te ako ʼaia? ʼE koutou fakaʼaogaʼi katoa anai koa tokotou temi tūpulaga ki te ako ʼaia? Kapau koia, pea ʼe koutou maʼuliʼi feafeaʼi anai te fakaloto mālohi ʼa te Tohi-Tapu ke koutou “manatuʼi [takotou] Tupuʼaga lahi ʼi te ʼu ʼaho ʼo [tokotou] temi tūpulaga”? (Tagata Tānaki 12:1) Pea tahi ʼaē meʼa, ʼe feala anai koa hakotou fakahoko te ʼu gāue faka Kilisitiano maʼuhiga, ohage ko te kau ki te ʼu fono, mo te gāue fai faka mafola, pea mo te ako takitokotahi? (Mateo 24:14; Hepeleo 10:24, 25) Kapau ʼe lelei takotou ʼu fealagia fakakaukau, pea ʼe koutou manatuʼi tuʼumaʼu anai te ʼu fakatuʼutuʼu fakalaumālie mokā koutou fakatuʼutuʼu anai mo takotou ʼu mātuʼa, te ʼu meʼa ʼaē ka koutou fai ʼi te ka haʼu.

Ke Lelei Takotou Fakatahi

14. (a) Koteā te ʼu pelesepeto ʼaē ʼe tonu ke manatuʼi e he toko lua ʼe nā fakatahi? (b) Neʼe fakahā feafeaʼi e ʼihi tanatou mole fakapotopoto ʼi te faʼahi ʼaia?

¹⁴ Ko te tahi faʼahi ʼaē ʼe tonu ai ke koutou fakaʼaogaʼi tokotou ʼu fealagia fakakaukau ʼe ko takotou fakatahi mo he taʼahine pe ko he tama. ʼE tou holi fuli ke tou fakahā tatatou ʼofa ki he tahi ʼe tou leleiʼia. ʼE mahino ia, ko te tama pea mo te taʼahine aga maʼa ʼaē ʼe talanoa kiai te tohi ʼo te Katiko ʼo te ʼu Katiko, neʼe nā fefakahāʼaki tanā feʼofaʼaki ʼi muʼa ʼo tanā ʼohoana. (Katiko ʼo te ʼu Katiko 1:2; 2:6; 8:5) Ia ʼaho nei, ʼe lagi manatu e he tama pea mo he taʼahine ʼe lelei ke tapiki ʼona ʼu nima, pea ke na feʼumaʼaki tāfito mokā kua ōvi mai te ʼaho ʼo tana ʼohoana. Kae koutou manatuʼi: “Ko ia ʼaē ʼe falala ki tona loto ʼe vale ia.” (Tāʼaga Lea 28:26) Meʼa fakaʼofaʼofa foki, he neʼe mole fakapotopoto ʼihi, pea neʼe nātou tuʼutāmaki ʼi te faʼahi ʼaia. Neʼe lahi fau tanatou fefakahāʼaki tanatou feʼofaʼaki pea neʼe mole kei feala hanatou lolomi tonatou loto. Neʼe iku ai ki he ʼu aga heʼemaʼa pea mo he ʼu felāveʼi fakasino.

15, 16. Koteā te ʼu meʼa ʼaē ʼe tonu ke tokakaga kiai he toko lua e nā fakatahi moʼo taupau maʼa tanā fakatahi ʼaia?

¹⁵ Kapau ʼe koutou ʼolo ʼo haʼele fakatahi, ʼaua naʼa koutou tō ʼāteaina ʼi he ʼu ʼaluʼaga ʼe feala ke koutou tuʼutāmaki ai. Koia, ʼe lelei age takotou fakatahi mo ʼihi peʼe ʼi he ʼu koga meʼa ʼe hahaʼi ai. ʼE fakatuʼutuʼu e ʼihi ke ʼi ai he tahi ʼe ina leʼoleʼo nāua. Tahi ʼaē, koutou fakatokagaʼi te ʼu palalau ʼaē ʼe tuʼu ia Osea 4:​11: “Ko te feauaki pea mo te vino ʼaē ʼe nā pulihi te ʼu manatu lelei.” ʼE mole feala ke kita fai he tonu ʼe lelei mokā kita kavaʼia, pea ʼe ina taki he tokolua ke nā fai he meʼa ʼe nā fakahemala anai ki ʼamuli.

¹⁶ ʼE ʼui fēnei ia Tāʼaga Lea 13:10: “ ʼE tupu te kē ʼuhi ko te fiatuʼu, kae ko te poto ʼe maʼu ia nātou ʼaē ʼe talaga.” Ei, koulua fefakalavelaveʼaki pea mo fai palalau ʼo ʼuhiga mo takolua aga. Fakatuʼu he ʼu tuʼakoi ʼo ʼuhiga mo te fakahā ʼo takolua ʼofa, ʼo koulua fefakaʼapaʼapaʼaki ki takolua ʼu manatu pea mo takolua leʼo ʼo loto. (1 Kolonito 13:5; 1 Tesalonika 4:​3-7; 1 Petelo 3:​16) Ko te palalau ki te ʼu faʼahi ʼaia ʼe lagi faigataʼa ʼi te kamata, kae ʼe feala ke ina tekeʼi te ʼu fihifihia mamafa ʼaē ʼe feala ke hoko ki ʼamuli.

Ke Akoʼi Koutou ‘Talu Mai Takotou Temi Tūpulaga’

17. Neʼe fakahā feafeaʼi e Tavite ko Sehova ‘tona falalaʼaga talu mai tona temi tūpulaga,’ pea koteā tona ʼaoga ki te kau tūpulaga ʼi te temi nei?

¹⁷ Ke mole koutou tō ki te ʼu hele ʼa Satana ʼe tonu ke koutou nofo tokaga tuʼumaʼu​—pea ʼi ʼihi temi, ʼe tonu ke koutou lototoʼa. ʼI ʼihi temi, ʼe koutou sio anai ʼe mole koutou tatau mo takotou ʼu kaumeʼa pea mo te malamanei katoa. Neʼe faikole fēnei te tagata fai pesalemo ko Tavite: “Ko koe ko toku falalaʼaga, Ê Tui ʼAliki ko Sehova, toku falalaʼaga talu mai toku temi tūpulaga. Ê ʼAtua, neʼe ke akoʼi ʼau talu mai toku temi tūpulaga, pea ʼo aʼu mai ki te temi nei ʼe ʼau fakamatala tau ʼu gāue fakatalakitupua.” (Pesalemo 71:​5, 17)c ʼE ʼiloʼi e te hahaʼi ko Tavite neʼe ko he tagata lototoʼa. Kae neʼe ko te temi fea ʼaē neʼe ina maʼu ai te lototoʼa? ʼI tona temi tūpulaga! Neʼe kua fakahā e Tavite tana lototoʼa, ka heʼeki felāveʼi mo Koliate, he neʼe ina puipui te faga manu ʼo tana matuʼa​—ʼo ina matehi te laione pea mo te uluso. (1 Samuele 17:34-​37) Kae neʼe ʼui e Tavite neʼe ko Sehova ʼaē neʼe ina foaki age ki ai te lototoʼa ʼaia, ʼo ina ʼui ko Sehova ‘tana falalaʼaga talu mai tona temi tūpulaga.’ Ko te falala ʼa Tavite kia Sehova neʼe tokoni kia ia ke ina lava tauʼi te ʼu ʼahiʼahi fuli ʼaē neʼe felāveʼi mo ia. ʼO feiā mo koutou, kapau ʼe koutou falala kia Sehova, pea ʼe ina foaki atu anai te lototoʼa pea mo te lotomālohi ke koutou “malo i te malama-nei.”​—1 Soane 5:4.

18. Koteā te fakaloto mālohi ʼaē ʼe fai ki te kau tūpulaga ʼo te temi ʼaenī, ʼaē ʼe ʼoʼofa ki te ʼAtua?

¹⁸ Ko te lauʼi afe kau tūpulaga ohage ko koutou, neʼe nātou lototoʼa pea ʼi te temi nei ko he kau fai faka mafola ʼo te logo lelei kua papitema. ʼE mātou fakamālo ki te ʼAtua ʼo ʼuhiga mo te tui pea mo te lototoʼa ʼaē ʼe koutou maʼu! Koutou lotomālohi tuʼumaʼu ke koutou mālo ʼi te mālama aga fakahehema. (2 Petelo 1:4) Koutou haga fakaʼaogaʼi takotou ʼu fealagia fakakaukau ʼaē neʼe koutou akoʼi ʼaki te Tohi-Tapu. Kapau ʼe koutou fai feiā, pea ʼe ina puipui anai koutou mai te ʼu tuʼutāmaki ʼi te temi nei, pea ʼi te fakaʼosi ʼe ina hāofaki moʼoni anai koutou. Koia, ohage ko tona fakahā anai ʼi tatatou alatike fakaʼosi, ʼe lava lelei anai tokotou maʼuli.

[Nota ʼi te lalo pasina]

Fehuʼi Fakamanatu

◻ ʼE lava akoʼi feafeaʼi e he tūpulaga tona ʼu fealagia fakakaukau?

◻ ʼE lava fakaʼaogaʼi feafeaʼi e he tūpulaga tona ʼu fealagia fakakaukau ʼo ʼuhiga mo tana kau ki te ʼu fono faka Kilisitiano?

◻ Koteā te ʼu faʼahi ʼaē ʼe tonu ke vakavakaʼi e he tūpulaga ʼo ʼuhiga mo tona temi ako?

◻ Koteā ʼaē ʼe lava fai e he tama pea mo he taʼahine ʼe nā fakatahi, ke mole nā folonikasio?

[Paki ʼo te pasina 15]

Koutou ako ke koutou fai he ʼu kumi pea ʼe toe akoʼi ai mo takotou ʼu fealagia fakakaukau

[Paki ʼo te pasina 16]

Ko te ʼu lafeti ʼaē ʼe mole faʼa hahaʼi, ʼe faigafua age tonatou leʼoleʼo pea ʼe mole hoko ai anai he ʼu aga fakavale

[Paki ʼo te pasina 16]

ʼE tonu ke tokoni te ʼu mātuʼa ki tanatou ʼu fānau ʼo ʼuhiga mo te fakatuʼutuʼu ʼo tonatou temi ako

[Paki ʼo te pasina 17]

ʼE ko he puipui mokā feʼaluʼaki tahi he tama pea mo he taʼahine ʼi te kaugamālie