Te ʼu Fehuʼi ʼa Te Kau Lautohi

ʼE tonu ke feafeaʼi te aga ʼa te kokelekasio ʼo ʼuhiga mo te kai vale?

ʼE tapuʼi e te Folafola ʼa te ʼAtua ia te konahia pea mo te kai vale, pea ʼe ko he ʼu aga ʼe mole tonu ke fai e te hahaʼi ʼaē ʼe nātou tauhi ki te ʼAtua. Koia maʼa te kokelekasio, ko he tagata ʼe ʼiloʼi ia tana kai vale, ʼe tatau mo te tagata ʼaē ʼe ina kava tuʼumaʼu. ʼE mole feala ki he tahi ʼe konahia peʼe ko he tahi ʼe kai vale ke kau ki te kokelekasio faka Kilisitiano.

ʼE ʼui fēnei ia Tāʼaga Lea 23:20, 21: “ ʼAua naʼa ke nofo ʼi te lotolotoiga ʼo te hahaʼi ʼinu vino, pea mo te hahaʼi ʼaē ʼe nātou kai vale te kanoʼi manu. He ko te tagata konahia pea mo te tagata ʼaē ʼe kai vale ʼe nā liliu anai ʼo māsisiva, pea ko te tulemoe ʼe ina fakakofuʼi anai he tahi ʼaki he ʼu meʼa popo.” Ia Teutalonome 21:20, ʼi te Lao ʼa Moisese, ko te tagata ʼaē ʼe “logogataʼa pea mo agatuʼu,” neʼe tonu ke matehi. ʼI te vaega ʼaia, ko te ʼu agaaga e lua ʼo te tagata ʼaē ʼe agatuʼu pea ʼe mole fakahemala, ʼe ko he tahi “ ʼe kai vale pea mo ʼinu kava tuʼumaʼu.” ʼE mahino mai, ʼi te Iselaele ʼāfea, ko te kai vale neʼe ko he aga neʼe mole tali ʼi te hahaʼi ʼaē neʼe fia atolasio ki te ʼAtua.

Kae koteā koa te kai vale, pea koteā ʼaē ʼe ʼui ʼi te Tohi-Tapu ʼo ʼuhiga mo te faʼahi ʼaia? ʼE ʼui ko he tahi ʼe kai vale “ ʼe ko he tahi ʼe ko hana agamāhani te kai mānumānu pea ʼe kai mo ʼinu fakalāluvale.” Koia, ko te kai vale ʼe ko he faʼahiga mānumānu, pea ʼe ʼui e te Folafola ʼa te ʼAtua ko “te hahai manumanu” ʼe nātou kau kiā nātou ʼaē ʼe mole tofiʼa ʼi te Puleʼaga ʼo te ʼAtua. (1 Kolonito 6:​9, 10; Filipe 3:​18, 19; 1 Petelo 4:3) Pea tahi ʼaē meʼa, ʼi te fakatokaga ʼaē neʼe fai e te ʼapositolo ko Paulo ki te kau Kilisitiano ʼo ʼuhiga mo “te u gaue a te kakano,” neʼe palalau ai ki “te u konahia, te u kaivale pea mo ihiʼage mea e tatau mo te u mea aeni.” (Kalate 5:​19-​21) ʼE tau hoko te kai vale ʼi te ʼu temi konahia pea mo te ʼu ʼaho lafeti. Tahi ʼaē meʼa, ʼe mahino ʼe kau ia te kai vale ʼi te kupusiga palalau ʼaē neʼe fakaʼaogaʼi e Paulo ʼi tana ʼui ʼaē “pea mo ihiʼage mea e tatau mo te u mea ʼaenī.” Ko te kai vale ʼe kau ki te tahi “u gaue a te kakano,” koia ko te Kilisitiano ʼaē ʼe ʼiloʼi ʼe kai vale pea ʼe mole ina fia fetogi tana aga mānumānu ʼaia, ʼe tonu ke fakamavae ʼi te kokelekasio.​—1 Kolonito 5:​11, 13.a

Logope ʼe mole fakakeheʼi e te Folafola ʼa te ʼAtua ia te tagata ʼaē ʼe konahia pea mo ia ʼaē ʼe kai vale, kae ʼe ʼiloʼi gafua age ia ia ʼaē ʼe ʼinu kava tuʼumaʼu ia ia ʼaē ʼe kai vale. ʼI te agamāhani, ʼe ʼiloga vave he tahi ʼe ʼinu kava tuʼumaʼu. Kae ʼe faigataʼa age te ʼiloʼi papau he tahi kua liliu ʼo kai vale, koteʼuhi ʼe mole feala ke ʼasi ki tuʼa. Koia ʼe tonu ki te kau tagata ʼāfea ke nātou tōkakaga fakalelei pea mo nātou sio tonu mokā nātou fakatokatoka he ʼu ʼaluʼaga feiā.

Ohage la, ʼe lagi feala pe ke ʼui ko he tahi ʼe sino fau ʼe ko he fakaʼiloga ʼaia ʼo tana kai vale, kae ʼe mole moʼoni tuʼumaʼu te faʼahi ʼaia. Ko te sino fau ʼo he tahi ʼe lagi feiā heʼe mahaki. ʼE lagi sino ʼuhi ko he ʼu meʼa neʼe ina maʼu holo mai tanā ʼu mātuʼa. ʼE toe tonu foki ke tou manatuʼi ko te sino fau ʼe ko he ʼaluʼaga ia ʼo te kakano, kae ko te kai vale ʼe ko he ʼaluʼaga ia ʼo te ʼatamai. ʼE ʼui ko te sino fau ʼe ko te lahi fau ʼo te gako, kae ko te kai vale ʼe ko he kai mānumānu. Koia ʼe mole fakafuafua te kai vale ki te sino ʼo he tahi, kae ki tana aga ʼo ʼuhiga mo te meʼa kai. ʼE feala ki he tahi ke sino lelei peʼe sino kovi, kae ʼe lagi ko he tahi ʼe kai vale. Pea tahi ʼaē meʼa, ʼi te ʼu potu kehekehe, ʼe mole tatau tanatou fakafuafua he tahi ʼe sino lelei peʼe mole faʼa sino lelei.

Koteā te ʼu fakaʼiloga ʼo te kai vale? Ko ia ʼaē ʼe kai vale ʼe ko hana agamāhani te mole fakatātāʼofi, ʼo hoko ai mo hona mate kai peʼe ʼuta ai mo tana mahaki. Ko tana mole fakatātāʼofi ʼe hā ʼaki ai tana mole tuʼania ki te laukovi ʼaē ka fai kiā Sehova pea mo te matagafua ʼo Tana hahaʼi. (1 Kolonito 10:31) ʼI ʼihi temi, ʼe lagi kai lahi ai he tahi, kae ʼe mole ʼui leva ʼe ko he “tagata manumanu.” (Efeso 5:5) Kae ʼi te manatu ʼaē ia Kalate 6:1, ʼe ʼaoga ke tokoniʼi te taʼi Kilisitiano ʼaia. ʼE ʼui fēnei e Paulo: “U tehina, kapau e mautoka he tahi i he hala, ko koutou ae e mauli fakalaumalie, koutou fakatafoki mai iaʼia, o fai aki mo te agavaivai.”

He koʼe ʼe maʼuhiga tāfito ia ʼaho nei, te fakatokaga ʼa te Tohi-Tapu ke ʼaua naʼa tou kai vale? Koteʼuhi neʼe fakatokaga fēnei e Sesu ʼo ʼuhiga mo totatou temi: “Koutou tokaga kia koutou, naa mafasia outou loto i te maveuveu, mo te inu vale pea mo te u fakahoha o te mauli, naa ha fakapunamauli kia koutou te aho aia o hage he kupega.” (Luka 21:34, 35) Ko te mole kai vale ʼe ko he faʼahiga hola ʼaia mai te faʼahiga maʼuli ʼaē ʼe fakatupu tuʼutāmaki ʼi te faʼahi fakalaumālie.

Ko te kai fakapotopoto ʼe ko he kalitātē faka Kilisitiano. (1 Timoteo 3:​2, 11) Koia, ʼe tokoni anai ia Sehova kiā nātou fuli ʼaē ʼe nātou faiga fakamalotoloto ke nātou maʼuliʼi te tokoni faka Tohi-Tapu ʼaē ʼe ina ʼui ke tou fakapotopoto ʼi te kai pea mo te ʼinu.​—Hepeleo 4:​16.

[Kiʼi nota]