KAPITE 11
Ke Lahi Age Tau Leleiʼia Te Lau ʼo Te Tohi-Tapu
ʼE lagi neʼe kua tuku atu he toe gaue maʼuhiga ke ke fai kae neʼe faigataʼa kia koe. ʼE lagi mole ke fai anai ʼi he moʼi temi pe ʼe tahi kae ʼe ke fakatuʼutuʼu lelei anai te temi ʼae ke ke fakahoahoa ai tau ʼu gaue. Pea ʼe toe feia pe moka ke fia lau te Tohi-Tapu. ʼE lagi ke feuiʼaki anai pe kofea ʼe tonu ke ke kamata ai. ʼI te kapite ʼaeni, ʼe ke maʼu ai anai he ʼu manatu ʼe tokoni atu ke ke fia lau mo ako te Tohi-Tapu.
1. He koʼe ʼe tonu ke ke lau tuʼumaʼu?
Kapau ʼe ke lau tuʼumaʼu te Tohi-Tapu, peʼe ko te ‘lao ʼa Sehova,’ ʼe ke fiafia anai pea mo fua lelei kia koe. (Lau ia Pesalemo 1:1-3.) Kapau ʼe ke fia kamata lau, faiga ke ke lau ʼi ni kiʼi minuta, ʼi te ʼaho fuli. Ka ke iloʼi lelei age te Tohi-Tapu, pea ʼe toe lahi age anai tau fia haga ʼo lau.
2. Kotea ʼe tokoni atu ke lahi age tau leleiʼia tona lau?
ʼE tonu anai ke ke toʼo he temi ʼo fakakaukauʼi te meʼa ʼae ʼe ke lau. Ko tona fakaʼuhiga ‘ke ke metitasio ki ai.’ (Sosue 1:8, nota) Ka ke lau, ʼe lelei ke ke fai te ʼu fehuʼi ʼaeni: ‘Kotea ʼe au ako ʼi heni ʼo ʼuhiga mo Sehova ʼAtua? ʼE feafeaʼi haku maʼuliʼi te vaega ʼaeni? ʼE feafeaʼi haku fakaʼaogaʼi moʼo tokoni ki ʼihi?’
3. Ko te temi fea ʼae ʼe feala ai hau lau?
ʼE faigataʼa koa hau maʼu he temi ke ke lau ai te Tohi-Tapu? Kapau koia, ʼe mole ko koe pe. Kae ʼe ui mai ʼi te Tohi-Tapu faiga ‘ke ke fakaʼaogaʼi lelei tou temi.’ (Efeso 5:16) Ohage la, ʼe feala hau vakaʼi te temi ʼae ka ke lau ai te Tohi-Tapu ʼi te ʼaho fuli. Ko ʼihi ʼe natou lau kei ʼuhuʼuhu, peʼe ʼi te kiʼi temi manava ʼi te fetapa, peʼe ʼi te afiafi ʼi muʼa ʼo tanatou olo ʼo momoe. Kae ʼe feafeaʼi kia koe? Ko te temi lelei fea ke ke lau ai te Tohi-Tapu?
TA FAKALOLOTO
Ta vakaʼi pe kotea ʼe feala ke ke fai ke lahi age tau leleiʼia te lau ʼo te Tohi-Tapu pea mo hau teuteuʼi lelei tau ako ke fua lelei kia koe.
ʼE feala ke tou kamata leleiʼia ʼihi meʼa kai. ʼE toe feia pe, ʼe feala ke tou kamata leleiʼia te lau ʼo te Tohi-Tapu
4. Ako ke ke leleiʼia
ʼE lagi ʼi te kamata ʼe faigataʼa te lau ʼo te Tohi-Tapu. Kae ʼe feala hau ‘ako ke ke leleiʼia,’ ohage pe ko te fakamamahani ʼa he tahi mo he meʼa kai foʼou. Lau ia 1 Petelo 2:2, pea fai te fehuʼi ʼaeni:
Kapau ʼe ke lau te Tohi-Tapu ʼi te ʼaho fuli, ʼe faifai pe anai koa pea ke leleiʼia mo fia lau tuʼumaʼu?
Vakaʼi te ʼATA VITEO ʼae ʼe fakaha ai pe neʼe kamata leleiʼia feafeaʼi e he kau tupulaga te lau ʼo te Tohi-Tapu. Pea fai te ʼu fehuʼi ʼae ʼe hoa mai.
Kotea te ʼu fihifihia neʼe lava tauʼi e te kau tupulaga?
Kotea ʼae neʼe tokoni kia natou ke natou lava fakahoko tanatou fakatuʼutuʼu?
Kotea ʼae neʼe tokoni kia natou ke lahi age tanatou fia lau te Tohi-Tapu?
He ʼu Manatu ʼe Tokoni Atu:
Fili he Tohi-Tapu neʼe lelei mo totonu tona fakaliliu. ʼAhiʼahi lau te Tohi-Tapu Fakaliliu ʼo Te Malama Foʼou ʼae kua fakaliliu fakakoga ʼi te Fakaʼuvea peʼe ko te Tohi-Tapu Fakafalani.
Kamata lau ni vaega ʼe ke leleiʼia. ʼE ke maʼu anai ni tokoni ʼi te ʼa takai “Kamata Lau Te Tohi-Tapu.”
Fakailoga te meʼa ʼae kua ke lau. Fakaʼaogaʼi te ʼu manatu ʼe tuʼu ʼi te ʼa takai “Polokalama ʼo Taku Lau Te Tohi-Tapu.”
Fakaʼaogaʼi te JW Library®. ʼE feala hau lau peʼe fakalogo te Tohi-Tapu ʼi he faʼahi pe ʼe ke nofo ai, ʼaki tau telefoni peʼe ko he tahi atu kiʼi masini.
Fakaʼaogaʼi te kaupepa lahi Tokoni Ki Te Ako ʼo Te Folafola ʼa Te ʼAtua. ʼE maʼu ai te ʼu mape, mo te ʼu pāki pea mo te ʼu fakamahino ʼe tokoni atu ke lahi age tau leleiʼia te lau ʼo te Tohi-Tapu.
5. Ke ke teuteuʼi lelei tau ako
Lau ia Pesalemo 119:34, pea fai te fehuʼi ʼaeni:
He koʼe ʼe lelei ke ke faikole ʼi muʼa ʼo tau lau te Tohi-Tapu peʼe ko tau teuteuʼi tau ako?
ʼE fua lelei feafeaʼi anai kia koe tau ako? Ka ke teuteuʼi he kapite ʼi te tohi ʼaeni, ʼahiʼahi fai te faʼahi ʼaeni:
Lau te ʼu ʼuluaki palakalafe ʼi muʼa ʼo te kupu tafito “Ta Fakaloloto.”
Lau te ʼu vaega mo faiga ke ke mahino pe kotea tona pikipikiga mo te manatu ka talanoa ki ai.
Fakailoga te ʼu kupu peʼe manatu tafito ʼae ʼe tali ki te fehuʼi. ʼE tokoni atu anai moka ke faipalalau mo ia ʼe ina fai tau ako ki te kapite.
Kua ke iloʼi koa?
ʼE fakaʼaogaʼi e te kau Fakamoʼoni ʼa Sehova te ʼu Tohi-Tapu kehekehe. Kae ʼe matou leleiʼia tafito te Tohi-Tapu: Fakaliliu ʼo Te Malama Foʼou he ʼe totonu mo mahino gafua tona fakaliliu pea ʼe tuʼu ai te huafa ʼo te ʼAtua.—Vakaʼi te alatike ʼi te jw.org “ʼE Maʼu Koa e Te Kau Fakamoʼoni ʼa Sehova Hanatou Tohi-Tapu ʼa Natou?”
ʼE UI E ʼIHI: “ʼE faigataʼa te ako ʼo te Tohi-Tapu. Pea ʼe mole maʼu hoku temi ki te faʼahi ʼaia.”
Kotea tau ia manatu?
MANATU TAFITO
Kapau ʼe ke loto ke lahi age tau leleiʼia te lau ʼo te Tohi-Tapu, toʼo he temi ke ke lau ai, mo faikole ke ke mahino ki te meʼa ʼae ʼe ke lau pea mo teuteuʼi lelei tau ako.
Fehuʼi Fakamanatu
Kotea ʼe tokoni atu ke lahi age tau leleiʼia te lau ʼo te Tohi-Tapu?
Ko te temi fea ʼe feala ai ke ke lau mo ako te Tohi-Tapu?
Kotea te ʼu fua lelei ʼe ke maʼu moka ke teuteuʼi lelei tau ako?
TE TAHI ʼU MANATU
He ʼu manatu ʼe tokoni atu ke lahi age tau leleiʼia te lau ʼo te Tohi-Tapu.
“Ke Fua Lelei Age Kia Koe Tau Lau Ia Te Tohi-Tapu” (Ko Te Tule Leʼo N °1 2017)
He ʼu faʼahiga fai ʼe tolu ʼo te lau ʼo te Tohi-Tapu.
Kotea ʼe feala ke ke fai ke ke fiafia ʼi te lau ʼo te Tohi-Tapu?
ʼE fakaha e ni hahaʼi neʼe natou lau te Tohi-Tapu talu mai fualoa he ʼu tokoni.