Te ʼu Fehuʼi ʼa Te Kau Lautohi
Koteā anai tona fua ki te kokelekasio mo kapau ko he Kilisitiano ʼe uli motokā ʼe fakaʼī pea mamate ai niʼihi?
ʼE tonu ki te kokelekasio ke ina kumikumi fakalelei pe neʼe hala ia ia ʼaē neʼe uli motokā, heʼe mole tonu ke tukugakoviʼi ia te kokelekasio kātoa mo kapau neʼe ʼi ai he fakaʼī ʼo mamate ai niʼihi. (Teutalonome 21:1-9; 22:8) Kapau ko ia ʼaē neʼe uli motokā neʼe mole haʼele tokaga pe neʼe ina maumauʼi te lao ʼa Sesale ʼo fai he fakaʼī, ʼe feala ai ke mamate ni ʼihi. (Maleko 12:14) Kae tou vakaʼi muʼa te tahi age ʼu faʼahi.
Ko he tagata neʼe fai fakapō pea neʼe hola ki he kolo ʼo te ʼu kolo hāofaki ʼo Iselaele, neʼe tonu ke fakamāuʼi. Kapau ʼi tona fakamāuʼi ʼaia neʼe maʼu neʼe faihala, pea neʼe fakagafua age ke nofo ʼi te kolo ʼaia ke mole matehi e ia ʼaē ʼe fia lagavaka. (Faka au 35:6-25) Koia kapau neʼe mate he tahi ʼi he fakaʼī ʼuhi ko te hala ʼa he Kilisitiano, pea ʼe tonu anai ki te kau tagata ʼāfea ke natou kumikumi lelei te ʼu meʼa ʼaē neʼe hoko. Ko te tonu ʼaē kā fai e te puleʼaga peʼe ko te telepinale ʼe lagi mole ʼalutahi anai mo te tonu ʼaē ʼe fai e te kokelekasio.
Ohage lā, ʼe feala ki he telepinale ke ina fakatūʼā he tahi ʼuhi he neʼe ina maumauʼi te lao, kae ko te kau tagata ʼāfea ʼaki tanatou ʼu kumikumi, ʼe natou mahino ai anai neʼe mole ko ia ʼaē neʼe hala he neʼe mole hoko te fakaʼī ʼuhi ko ia. Kae tatau aipe mo kapau ʼe mole mahino te telepinale ki te ʼu faʼahi fuli ʼaē neʼe hoko, kae ʼe feala pe ke iku te ʼu kumi ʼa te kau tagata ʼāfea ke natou ʼiloʼi ʼe ko te Kilisitiano totonu pe ʼaē neʼe tupu ai te fakaʼī.
Ko te tonu ʼaē kā fai e te kau tagata ʼāfea ʼaki tanatou ʼu kumikumi, ʼe natou fakatafito anai ki te Tohi-Tapu pea mo natou fakahā lelei ia te ʼu agaaga fuli ʼaē neʼe hoko—koia ʼe tonu leva ki te Kilisitiano ke ina fakahā ia te moʼoni ʼo ʼuhiga mo te fakaʼī, pea ke ʼi ai he toko lua peʼe ko he toko tolu moʼo fakamoʼoni ki te ʼu meʼa ʼaē neʼe hoko he neʼe natou sisio mata ki te fakaʼī. (Teutalonome 17:6; Mateo 18:15, 16) Kapau kua kātoa fuli ia te ʼu fakamoʼoni ko te Kilisitiano ʼaē neʼe hala, ʼe tonu leva ʼi te temi ʼaia ke fai ia he komite faifakamāu. Kapau ʼe fakatokagaʼi e te komite ko ia ʼaē neʼe hala ʼe fakahemala, ʼaki te ʼu vaega faka Tohi-Tapu ʼe natou fakatonutonuʼi anai ia ia, pea ʼe natou toʼo anai tona ʼu pilivilesio ʼi te kokelekasio. ʼE toʼo anai tona pilivilesio ʼaē ko te tagata ʼāfea peʼe ko te tagata faifekau faka minisitelio. ʼE ʼi ai mo tona tahi ʼu tūʼā. ʼE hala iā muʼa ʼo te ʼAtua ʼi te fakaʼī pea mo te mate ʼaē neʼe hoko ʼi tana mole taki fakapotopoto ia te motokā.—Kalate 6:5, 7.
Tou toʼo he fakatā: Kapau ʼi te temi ʼaē neʼe hoko ai te fakaʼī neʼe tuʼu kovi te lagi, neʼe tonu kiā ia ʼaē ʼe uli motokā ke lahi age tana haʼele tokaga. Kapau lā neʼe fia moe, pea neʼe tonu ke fakatuʼu tana motokā kae ke mālōlō muʼa ke ʼaua naʼa māʼumoea ʼi te ala, peʼe ke ina tuku age ki he tahi kehe ke ina taki ia te motokā.
E feafeaʼi age lā mo kanapaula neʼe gaholo tana uli motokā ʼo mole mulimuli ki te ʼu faka tuʼakoi ʼi te ala. Kapau ʼe ko he Kilisitiano pea ʼe gaholo tana taki motokā, pea ʼe mahino ia ʼe mole ina liufaki ia “te ʼu meʼa ʼa Sesale kiā Sesale.” ʼE toe fakahā ai foki te mole fakaʼapaʼapa ki te taputapu ʼo te maʼuli, heʼe feala ai ke hoko he tuʼutāmaki. (Mateo 22:21, MN ) Tou vakaʼi age mo te tahi faʼahi. Koteā ʼapē ia he faʼifaʼitaki ʼe tuku anai ki te faga ōvi e he tagata ʼāfea mo kapau ʼe ina meʼa noaʼi te ʼu lao ʼa Sesale ʼi te feʼaluʼaki ʼi te ala peʼe mole fia fakalogo kiai?—1 Petelo 5:3.
ʼE mole tonu anai ki te kau Kilisitiano ke natou fakamaʼua ki niʼihi ke ʼomai fakavilivili ʼi he temi ʼe feala ai anai ke natou lele gaholo ʼi te ala. Kae ʼi te agamāhani, ʼe lelei age hanatou foimo ʼolo tautonu peʼe ke natou fetogi tanatou fakatuʼutuʼu ke feala hanatou aʼu tautonu. Kapau ʼe fai feiā, pea ʼe mole uli motokā vave anai he Kilisitiano, kae ʼe fakalogo anai ki te ʼu lao ʼo te ala ʼaē neʼe fai e “te ʼu pule māʼoluga” ʼo te puleʼaga. (Loma 13:1, 5, MN ) ʼE ko he faʼahi ʼe tokoni anai ki ʼaē ʼe uli motokā ke ʼaua naʼa ina fakaʼī peʼe ina faka tuʼutāmakiʼia niʼihi ʼi te ala. ʼE ina tuku ai anai he faʼifaʼitaki lelei pea mo maʼu he leʼo ʼo loto ʼe lelei.—1 Petelo 3:16.