Watchtower TANAKIʼAGA TOHI ʼI TE NETI
Watchtower
TANAKIʼAGA TOHI ʼI TE NETI
Faka'uvea
  • TOHI-TAPU
  • TOHI
  • FONO
  • w13 15/2 p. 3-7
  • Koʼena Totatou Tofiʼa Fakalaumalie

Aucune vidéo n'est disponible pour cette sélection.

Il y a eu un problème lors du chargement de la vidéo.

  • Koʼena Totatou Tofiʼa Fakalaumalie
  • Te Tule Leʼo—2013
  • Manatu Tafito
  • He Tahi ʼu Alatike
  • ʼE TOU MAʼU HE TOFIʼA MAKEHE
  • NEʼE PUIPUI E SEHOVA IA TANA FOLAFOLA
  • NEʼE FAIGAʼI E SEHOVA KE TOU ILOʼI TONA HUAFA
  • NEʼE FAIGAʼI E SEHOVA KE TOU ILOʼI TE MOʼONI
  • NEʼE TAʼOFI E SEHOVA IA SATANA KE ʼAUA NAʼA INA FUFU TE MOʼONI
  • ʼE Fakakololiaʼi e Sehova Tona Huafa
    Kua Pule Ia Te Puleʼaga ʼo Te ʼAtua! (kr)
  • Kotou Fakamaʼuhigaʼi Ia Te Huafa Lahi ʼo Sehova
    Te Tule Leʼo—2013
  • Totatou Tofiʼa Maʼuhiga—Koteā Tona Faka ʼUhiga Kia Koutou?
    Te Tule Leʼo—2000
  • 1.4 Te Huafa ʼo Te ʼAtua ʼi Te ʼu Tohi Fakahepeleo
    Tohi-Tapu Fakaliliu ʼo Te Malama Foʼou
Te Tule Leʼo—2013
w13 15/2 p. 3-7
[Paki ʼo te pāsina 3]

Koʼena Totatou Tofiʼa Fakalaumalie

“Koʼena te tofiʼa ʼa te kau kaugana ʼa Sehova.”—ESA. 54:17, MN.

ʼE KOTOU TALI FEAFEAʼI ANAI?

  • Kotea ʼae neʼe fai e te ʼAtua ke feala ai hatatou maʼu ia te Tohi-Tapu?

  • Kotea ʼae neʼe fai e Sehova ke feala ai ke iloʼi e tana hahaʼi ia tona huafa?

  • Kotea ʼae neʼe fai e Sehova ke feala ai hatatou iloʼi ia te moʼoni ʼi te temi nei?

1. Kotea ʼae neʼe foaki e Sehova ki te tagata ke ʼaoga ki ai?

KO SEHOVA ʼe heʼe gata, pea neʼe ina fakaha mai pe kotea ʼae ʼe tonu ke tou fai ke feala hatatou maʼuli ʼo heʼe gata. ʼE mole heʼeki fetogi ʼana fakatotonu. ʼE ui fenei ʼi te Tohi-Tapu: “E tuu te folafola a [Sehova] o heegata.” (1 Pet. 1:23-25) ʼE tonu ke tou loto fakafetaʼi ʼuhi ko tana foaki mai ia tana Folafola.

2. Kotea ʼae ʼe loto e te ʼAtua ke tou iloʼi ʼo ʼuhiga mo ia?

2 ʼE loto e Sehova ke tou iloʼi fuli tona huafa. ʼE ʼuluaki fakaʼaogaʼi ʼi te Tohi-Tapu ia te huafa ʼo Sehova ʼi te fakamatala ʼo tana fakatupu ia te lagi mo te kele. (Sen. 2:4, MN) Neʼe liuliuga ia te tohi fakamilakulo ʼo te huafa ʼo te ʼAtua ʼi te ʼu lauʼi maka, ʼi te temi ʼae neʼe foaki age ai kia Moisese te ʼu Folafola ʼe Hogofulu. Ohage la, ʼe kamata fenei ia te ʼuluaki folafola: “Ko au ia Sehova, tou ʼAtua.” (Eke. 20:1-17, MN) Neʼe faigaʼi e te Tevolo ke pulihi te Tohi-Tapu, ke ʼaua naʼa tou iloʼi ia te ʼAtua pea mo Tona huafa. Kaʼe neʼe mole tuku e Sehova ke hoko ia te faʼahi ʼaia.—Pes. 73:28.

3. Kotea te tahi faʼahi ʼe loto e te ʼAtua ke tou ako mai te Tohi-Tapu?

3 ʼE lahi te ʼu manatu hala ʼe maʼu e te hahaʼi ʼo ʼuhiga mo te ʼAtua. Kaʼe ʼe loto e Sehova ke tou iloʼi fuli ia te moʼoni. Koia ʼe tonu ke tou fiafia heʼe ha lelei ia te moʼoni ʼi te Tohi-Tapu. (Lau ia Pesalemo 43:3, 4.) ʼE hage pe ʼe ina fakamalamaʼi tatou ʼi he malama ʼe fakapoʼuli.—1 Soa. 1:6, 7.

ʼE TOU MAʼU HE TOFIʼA MAKEHE

4, 5. Kotea te fealagia makehe neʼe foaki mai ʼi te taʼu 1931?

4 Ko te hahaʼi ʼae ʼe nonofo ʼi he potu fenua, ʼe lagi ʼi ai ʼanatou aga, mo ʼanatou aga ʼi fenua pea mo ʼonatou faʼahiga maʼuli ʼe natou akoʼi ki te taʼiake ʼae ʼe hoa mai. Ko tonatou tofiʼa ʼaia. ʼE toe feia pe mo tatou ʼaeni ko te kau Fakamoʼoni ʼa Sehova, ʼe ʼi ai totatou tofiʼa. Neʼe tokoni ia Sehova ki tana hahaʼi ke natou mahino ki te Tohi-Tapu, pea mo te moʼoni ʼo ʼuhiga mo ia pea mo ʼana fakatuʼutuʼu. Neʼe ina foaki mai ia te fealagia makehe ʼae ke tou fua ia tona huafa.

[Paki ʼo te pāsina 4]

Neʼe tou toʼo ia te higoa makehe ʼo te kau Fakamoʼoni ʼa Sehova ʼi tatatou fakatahi ʼo te taʼu 1931

5 Neʼe tou toʼo ia te higoa foʼou ʼi te fakatahi ʼi Columbus, ʼi Ohio, ʼi Amelika, ʼi te taʼu 1931. Neʼe ta ʼi te polokalama ʼo te fakatahi ʼaia ia te ʼu mata ʼi tohi ʼaeni “JW” Neʼe feʼuiʼaki e te nofoʼaki peʼe kotea ia te fakaʼuhiga ʼo te ʼu mataʼi tohi ʼaia, pea neʼe ui e ʼihi ʼe fakaʼuhiga ki te kau “Fakamoʼoni ʼa Sehova” (Jehovah’s Witnesses ʼi te lea Fakapilitania). ʼI muʼa ʼo te fai ʼo te fakatahi ʼaia, neʼe fakahigoaʼi tatou ko te kau Ako Tohi-Tapu, pea ʼi te akonaki makehe ʼo te ʼaho 26 ʼo Sulio ʼo te taʼu pe ʼaia, neʼe tali fakafiafia leva e te nofoʼaki ke fakahigoaʼi natou ko te kau Fakamoʼoni ʼa Sehova. Neʼe ko he ʼaho fakafiafia he neʼe foaki mai ia te higoa foʼou neʼe toʼo mai te Tohi-Tapu. (Lau ia Esaia 43:12.) Neʼe ui fenei e te tehina: “ ʼE mole feala ke au galoʼi ia te fiafia pea mo te pasipasi ʼa te hahaʼi.” Neʼe mole he tahi neʼe fia fai ki te huafa ʼo Sehova, kaʼe neʼe fakafealagia e te ʼAtua ke tou toʼo ia te huafa makehe ʼaia ʼo kaku mai ki te temi nei.

6. Ko te ʼu fakamatala fea ʼae ʼe kau ki totatou tofiʼa?

6 Ko te tahi koga ʼo totatou tofiʼa ʼe ko te ʼu fakamatala moʼoni ʼae ʼe tuʼu ʼi te Tohi-Tapu ʼo ʼuhiga mo te ʼu kaugana ʼa te ʼAtua ʼo te temi muʼa. Ohage la ko te ʼu fakamatala ʼo ʼuhiga mo Apalahamo, mo Isaake pea mo Sakopo. Neʼe lagi natou akoʼi ki ʼonatou famili ia te faʼahiga maʼuli ʼae ʼe leleiʼia e Sehova. Neʼe ko te ʼu taʼi ako la ʼaia ʼae neʼe tokoni kia Sosefo ke ʼaua naʼa tono mo te ʼohoana ʼo Potifale. (Sen. 39:7-9) ʼI te temi ʼo te kau apositolo, neʼe fevaevaeʼaki e te kau Kilisitiano ia te ʼu manatu ʼo ʼuhiga mo te ʼAtua. Neʼe fakaha e Paulo ki te kokelekasio pe kotea ʼae neʼe akoʼi age e Sesu ʼo ʼuhiga mo te Taumafa ʼa Te ʼAliki. (1 Ko. 11:2, 23) ʼE tou maʼu ia te ʼu fakamatala fuli ʼaia ʼi te Tohi-Tapu, koia ʼe feala ai ke tou iloʼi peʼe ko te faʼahiga tauhi fea ʼae ʼe leleiʼia e te ʼAtua. (Lau ia Soane 4:23, 24.) ʼE ʼaoga ia te Tohi-Tapu ki te tagata, pea ʼe tonu ke loto fakafetaʼi ia te hahaʼi ʼa Sehova ʼo ʼuhiga mo te faʼahi ʼaia.

7. Ko te fakapapau fea ʼae ʼe kau ki totatou tofiʼa?

7 ʼE toe tokoni ia Sehova ki tana hahaʼi ia ʼaho nei. (Pes. 118:7) ʼE feala ke tou lau ʼi ʼatatou tohi peʼe puipui feafeaʼi e te ʼAtua ia tana hahaʼi. Kapau ʼe tou fai ia te faʼahi ʼaia ʼe mole tou maʼuli tuʼania fau anai, maʼia pe la mo kapau ʼe fakatagaʼi tatou. ʼE fakapapauʼi mai ʼi te Tohi-Tapu, ʼe mole he ʼu mahafu tau peʼe ko he ʼu faiga ke fakamamahiʼi tatou ʼe feala anai ke lava lelei. Pea kapau ʼe tukugakoviʼi tatou ʼi muʼa ʼo he telepinale, ko te faʼahi ʼae ʼe maʼuhiga heʼe tou faitotonu kia mata ʼo Sehova. Ko te tahi koga ʼaia ʼo totatou tofiʼa. (Esa. 54:17) ʼE mole feala ke fai e Satana ia he meʼa ke tou mamahi ai ʼo talu ai.

8. Kotea ʼae ka tou talanoa anai ki ai ʼi te alatike ʼaeni pea mo ʼae ka hoa mai?

8 Neʼe faigaʼi e Satana ke pulihi ia te Tohi-Tapu, ke ʼaua naʼa iloʼi e te hahaʼi ia te huafa ʼo Sehova pea mo te moʼoni. Kaʼe neʼe mole lavaʼi e Satana ia te faʼahi ʼaia. ʼI te alatike ʼaeni pea mo ʼae ka hoa mai, ʼe tou talanoa anai (1) pe neʼe puipui feafeaʼi e te ʼAtua tana Folafola; (2) neʼe faigaʼi feafeaʼi e Sehova ke iloʼi e te hahaʼi ia tona huafa pea (3) neʼe fakafealagia feafeaʼi e te ʼAtua ke tou iloʼi ia te moʼoni ia ʼaho nei.

NEʼE PUIPUI E SEHOVA IA TANA FOLAFOLA

9-11. Neʼe puipui feafeaʼi e Sehova ia te Tohi-Tapu?

9 Neʼe fakahoko ia te ʼu faiga malohi moʼo pulihi ia te Tohi-Tapu, kaʼe neʼe puipui e Sehova ia tana Folafola. Neʼe faigaʼi e te Lotu Katolika ke ʼaua naʼa lau e te hahaʼi ia te Tohi-Tapu. Neʼe ui e te ʼu tuʼi tapu ʼe fakatupu tuʼutamaki ki te hahaʼi ia tanatou lau ia te Tohi-Tapu. ʼI te taʼu 1242, neʼe fai e te Lotu Katolika ia te lao ke tutu ia te ʼu Tohi-Tapu fuli neʼe fakaliliu ki te lea ʼae ʼe mahino ki ai te hahaʼi. Ki muli age, neʼe toe fai te tahi ʼu tonu ʼe tatau, ʼo kau ki ai te ʼu tonu neʼe fai e te ʼu tuʼi tapu ʼi te taʼu 1816, mo te taʼu 1824 pea mo te taʼu 1832.

10 Tatau aipe pe neʼe faigaʼi e te hahaʼi ke natou pulihi ia te Tohi-Tapu, kaʼe neʼe puipui e Sehova ia tana Folafola. ʼI te taʼu 1382, neʼe ta e John Wycliffe ia te ʼuluaki Tohi-Tapu ʼi te lea Fakapilitania. Neʼe toe fakaliliu e William Tyndale ia te Tohi-Tapu ʼi te lea Fakapilitania. ʼUhi ko tana fai ia te faʼahi ʼaia, neʼe mate ai ʼi te taʼu 1536. Neʼe haʼi ia ia ki he pou ʼakau, pea neʼe kalaga fenei: “ ʼAliki, fakamalamaʼi ia te fakakaukau ʼo te hau ʼo Pilitania.” Neʼe matehi pea mo tutu ia ia.

11 ʼI te taʼu 1535, neʼe toe fakaliliu e Miles Coverdale ia te Tohi-Tapu ʼi te lea Fakapilitania. Neʼe fakaʼaogaʼi e Coverdale ia te fakaliliu ʼa Tyndale moʼo fakaliliu ʼaki ia te tahi koga ʼo te Tohi-Tapu pea neʼe ina fakaliliu ʼihi koga mai te lea Fakalatina pea mo te Tohi-Tapu Fakasiamani ʼa Martin Luther. ʼI te temi nei, ʼe ta e te hahaʼi ʼa Sehova ia te Tohi-Tapu Les Saintes Écritures — Traduction du monde nouveau. ʼE mahino gafua, mo totonu pea mo faigafua ia tona fakaʼaogaʼi ʼi te faifakamafola. Neʼe mole feala kia Satana pea mo te tagata ke natou pulihi ia te Tohi-Tapu.

NEʼE FAIGAʼI E SEHOVA KE TOU ILOʼI TONA HUAFA

[Paki ʼo te pāsina 5]

Neʼe fakaliliu e Tyndale pea mo ʼihi atu ia te Tohi-Tapu logo la neʼe natou iloʼi ʼe feala ke natou mamate ai

12. Neʼe tokoni feafeaʼi ia te Tohi-Tapu Traduction du monde nouveau ki te hahaʼi ke natou iloʼi ia te huafa ʼo Sehova?

12 Neʼe faigaʼi e Sehova ʼAtua ke taupau ia tona huafa ʼi ʼihi Tohi-Tapu. ʼI te temi ʼae neʼe ta ai ia te Tohi-Tapu Traduction du monde nouveau, neʼe faigaʼi e te ʼu tehina ke natou tohi ia te huafa ʼo te ʼAtua, ia Sehova, ʼi te ʼu vaega fuli neʼe tohi ai tona huafa ʼi te ʼuluaki Tohi-Tapu. ʼE ha tuʼa 6 973 ʼi te Koga Tohi-Tapu Fakahepeleo pea ʼe toe ha tuʼa 237 ʼi te ʼu Tohi Fakakeleka Fakakilisitiano. Kua maʼu ia te Tohi-Tapu Traduction du monde nouveau ia lea 116 tupu. Neʼe ta ia te ʼu Tohi-Tapu ʼe 178 545 862 tupu.

13. ʼE tou iloʼi feafeaʼi neʼe iloʼi e te hahaʼi ia te huafa ʼo te ʼAtua talu mai te fakatupu ʼo te tagata?

13 Neʼe iloʼi e te ʼuluaki taumatuʼa, ia Atama mo Eva ia te huafa ʼo Sehova pea neʼe nā fakaʼaogaʼi. Neʼe toe fakaʼaogaʼi e Noe ia tona huafa. Neʼe ina ui fenei: “Ke manuʼia ia Sehova, te ʼAtua ʼo Semi.” (Sen. 4:1; 9:26, MN) Neʼe fakaʼaogaʼi e te ʼAtua ia tona huafa ʼi te temi ʼae neʼe palalau ai ki te hahaʼi. Neʼe ina ui fenei: “Ko au ia Sehova. Ko toku huafa ʼaia; pea ʼe mole au foaki anai toku kololia ki he tahi age.” Pea neʼe toe ui e te ʼAtua: “Ko au Sehova, pea ʼe mole ʼi ai he tahi age. ʼE mole he tahi age ʼAtua, gata pe kia au.” (Esa. 42:8, MN; Esa. 45:5, MN) Neʼe faigaʼi e Sehova ke iloʼi e te hahaʼi fuli ʼi te kele ia tona huafa. ʼE tonu ke tou fiafia ʼi te fakaʼaogaʼi ʼo tona huafa ʼae ko Sehova pea mo tou liliu ko ʼana Fakamoʼoni.—Pes. 20:6.

14. ʼE tou toe maʼu ʼifea ia te huafa ʼo te ʼAtua?

14 ʼE mole gata ʼaki pe ki te Tohi-Tapu ʼe ha ai ia te huafa ʼo te ʼAtua. Ohage la, ʼe ha ʼi te Lau ʼi Maka ʼo Moape, ʼae neʼe maʼu ʼi Dhiban (Tiponi ʼi te Tohi-Tapu), ia kilometa ʼe 21 mai te potu esite ʼo te Tai Mate. Neʼe tohi ʼi te lau ʼi maka ʼaia ia te hisitolia ʼe talanoa ai ki te Hau ʼo Iselaele ko Omeli pea neʼe tohi ai ia te fakamatala neʼe fai e te Hau ko Mesa ʼi tana tauʼi ia Iselaele. (1 Hau 16:28; 2 Hau 1:1; 3:4, 5) Neʼe tohi ia te ʼu mata ʼi tohi Fakahepeleo ʼe fa ʼo te huafa ʼo te ʼAtua ʼi te Lau ʼi Maka ʼo Moape. ʼE toe ha liuliuga ia te ʼu mata ʼi tohi ʼaia ʼi te ʼu Tohi ʼo Lakisi, ʼae ko he ʼu lau ʼi maka neʼe maʼu ʼi Iselaele.

15. Kotea ia te Septante, pea he ko ʼe neʼe ʼaoga ke fakaliliu?

15 Kua hili ki ai taʼu ʼe 2 000 tupu, neʼe fakaliliu ia te Koga Tohi-Tapu Fakahepeleo ki te lea Fakakeleka pea neʼe fakahigoaʼi ko te Septante. He ko ʼe neʼe ʼaoga ke fai ia te fakaliliu ʼaia? Neʼe pilisoni ia te kau Sutea ʼi Papilone lolotoga taʼu ʼe 70. ʼI te temi ʼae neʼe fakaʼateaina ai natou ʼi te taʼu 537 ʼi muʼa ʼo te temi ʼo Sesu, ko ʼihi neʼe natou filifili ke natou maʼuʼuli ʼi Papilone. Kaʼe ki muli age, tokolahi te kau Sutea neʼe olo ki Alekasia ʼi Esipito, ʼae neʼe palalau ai ia te hahaʼi ʼi te lea Fakakeleka. Koia, neʼe ʼaoga ki te kau Sutea ʼaia ke fakaliliu ia te Koga Tohi-Tapu Fakahepeleo ki te lea Fakakeleka. Ko ʼihi tohi Fakakeleka ʼo te Septante ʼaia, ʼe maʼu ai ia te huafa ʼo te ʼAtua ʼi te lea Fakahepeleo.

16. ʼE fakaʼaogaʼi feafeaʼi e te tohi ʼi te lea Fakapilitania (Bay Psalm Book) ia te huafa ʼo te ʼAtua?

16 Ko te ʼuluaki tohi ʼae neʼe ta ʼi Amelika neʼe ko te tohi ʼo te ʼu Pesalemo ʼae neʼe tohi ai ia te huafa ʼo te ʼAtua. Neʼe fakaliliu mai te lea Fakahepeleo ki te lea Fakapilitania. Neʼe ʼuluaki ta ia te tohi ʼaia (Bay Psalm Book) ʼi te taʼu 1640. ʼI te ʼu vaega ʼo Pesalemo 1:1, 2, ʼe tou maʼu ai ia te huafa ʼo te ʼAtua, ʼae neʼe tohi ai Iehovah. ʼE ui ʼi te ʼu vaega ʼaeni, ʼe manuʼia ia te tagata ʼae ʼe mole fakalogo ki te kau agakovi, kaʼe ʼe ina leleiʼia ia “te lao ʼa Iehovah.” Kapau ʼe kotou fia maʼu he tahi ʼu fakamahino, vakaʼi te tohi ʼaeni Koteā ʼAē ʼe Akoʼi Moʼoni Mai ʼi Te Tohi-Tapu? ʼi te pasina 195 ki te 197.

NEʼE FAIGAʼI E SEHOVA KE TOU ILOʼI TE MOʼONI

17, 18. (1) Kotea ia te moʼoni? (2) Kotea te ʼu aluʼaga ʼe kau ki te moʼoni ʼo te logo lelei?

17 ʼE tou fiafia ʼi tatatou tauhi ʼae kia “Sehova te ʼAtua ʼo te moʼoni.” (Pes. 31:5, MN) Kotea ia te moʼoni? ʼE ko he ʼu aluʼaga neʼe hoko moʼoni. ʼI te ʼu ʼuluaki lea ʼo te Tohi-Tapu, ko te ʼu kupu ʼae neʼe fakaliliu ʼaki te kupu “moʼoni” neʼe fakaʼuhiga ki he aluʼaga ʼe moʼoni, mo totonu pea mo tuha mo te falala.

18 Neʼe faigaʼi e Sehova ke tou iloʼi ia te moʼoni ʼi te temi nei. Pea ʼe haga tokoni mai ke tou iloʼi ʼihi atu moʼoni. (2 Soa. 1, 2) Ko te faʼahi ʼaia ʼe tou mahino ki ai ia Taaga Lea 4:18, ʼae ʼe ui fenei ai: “Ko te ala o te kau agatonu e hage ko te malama gigila, ae e asilisili gigila tona malama o kaku ki te lotomalie o te aho.” Neʼe faikole fenei ia Sesu ki te ʼAtua: “Ko tau folafola ko te mooni ia.” (Soa. 17:17) ʼE tou maʼu ʼi te Tohi-Tapu ia te moʼoni ʼo te logo lelei, ʼae ʼe tou tui ki ai ʼi totatou ʼuhiga Kilisitiano. (Kal. 2:14) Kotea ʼihi aluʼaga ʼe tou tui ki ai? Te moʼoni ʼo ʼuhiga mo te huafa ʼo Sehova, mo tona pule faʼitaliha, mo te sakilifisio faitotogi ʼa Sesu, mo te toe fakatuʼuake pea mo te Puleʼaga. ʼE tou vakaʼi anai pe neʼe puipui feafeaʼi e te ʼAtua ia te moʼoni logo la te ʼu faiga ʼa Satana ke ina fufu.

NEʼE TAʼOFI E SEHOVA IA SATANA KE ʼAUA NAʼA INA FUFU TE MOʼONI

19, 20. Ko ai ia Nimelote? Kotea ʼae neʼe fai e te hahaʼi ʼi te temi ʼae neʼe ina puleʼi ai natou?

19 ʼI te hili ʼo te Tulivio, neʼe ʼi ai te tagata kapu manu neʼe higoa ko Nimelote, neʼe fakafeagai kia Sehova. (Sen. 10:9) Koteʼuhi ʼae neʼe fakafeagai ia Nimelote kia Sehova ʼAtua, neʼe tauhi ia kia Satana. Neʼe tatau ia Nimelote mo natou ʼae neʼe fakafeagai ki muli age ki te ʼAlo ʼo te ʼAtua. Neʼe ui fenei e Sesu ʼo ʼuhiga mo natou: “E kotou tamai kia Satana, pea e kotou fia fakahoko te u holi o takotou tamai,” ʼae neʼe “mole nofo ia ia i te mooni.”—Soa. 8:44.

20 Neʼe puleʼi e Nimelote ia Papele pea mo ʼihi atu kolo ʼi te vaha ʼo te vaitafe ʼo Eufalate pea mo te vaitafe ʼo Tikeli. (Sen. 10:10) Neʼe lagi ko ia ʼae neʼe ina kamata laga ia Papele pea mo tona tule ʼi te taʼu 2269 ʼi muʼa ʼo te Temi ʼo Sesu. Neʼe mole loto e Sehova ke nonofo ia te hahaʼi ʼi he koga meʼa pe ʼe tahi, kaʼe neʼe ui fenei e te kau laga tule ʼo Papele: “Tou tutuu ki oluga, pea tou fakatuu he kolo mo he tule ae e kaku tona tumutumu ki te lagi; ke logologona ai totatou higoa, pea ke aua naa tou mavetevete anai i oluga o te kele katoa.” Neʼe mole feala ke natou fakaʼosi ia te tule he “nee veuki ai e [Sehova] te lea o te kele katoa.” Ko te tupuʼaga la ʼaia ʼo te mavae ʼo te hahaʼi mai Papele. (Sen. 11:1-4, 8, 9) Neʼe fia fakagata e Satana ia te tauhi moʼoni pea ke atolasio age te hahaʼi kia ia. Kaʼe neʼe puipui e Sehova ia te tauhi moʼoni, pea ʼi te temi nei kua tokolahi ia te hahaʼi ʼe natou tauhi kia te ia.

21, 22. (1) He ko ʼe neʼe mole feala ke pulihi ia te tauhi moʼoni? (2) Kotea ʼae ka tou vakaʼi anai ʼi te alatike ʼae ka hoa mai?

21 Neʼe mole feala ke pulihi ia te tauhi moʼoni. Kotea tona tupuʼaga? Koteʼuhi neʼe faigaʼi e totatou Faiako Lahi ko Sehova ke tou haga maʼu ia te Tohi-Tapu, ke tou iloʼi tona huafa, pea mo tou iloʼi ia te moʼoni. (Esa. 30:20, 21) ʼI te temi ʼae ʼe tou fakahoko ai ia te tauhi ʼae ʼe leleiʼia e te ʼAtua, ʼe tou fiafia moʼoni ai. Kaʼe ʼe tonu ke tou tokakaga ʼo tui pe ki te meʼa ʼae ʼe moʼoni pea mo tou mulimuli ki te takitaki ʼa te laumalie maʼoniʼoni.

22 ʼI te alatike ʼae ka hoa mai, ʼe tou vakaʼi anai pe neʼe kamata akoʼi feafeaʼi e ʼihi lotu ia te ʼu akonaki loi ʼo ʼuhiga mo te ʼAtua. ʼE tou vakaʼi anai ʼe mole akoʼi mai ia te ʼu faʼahi ʼaia ʼi te Tohi-Tapu. Pea ʼe tou vakaʼi anai ʼe tapuakiʼi tatou e Sehova ʼaki tana fakaha mai ia te moʼoni ʼo ʼuhiga mo ia. ʼE ko totatou tofiʼa makehe ʼaia.

    Te ʼu Tohi Fakaʼuvea (1978-2025)
    Mavae
    Hu Ki Loto
    • Faka'uvea
    • Vaevae
    • Préférences
    • Copyright © 2025 Watch Tower Bible and Tract Society of Pennsylvania
    • Conditions d’utilisation
    • Règles de confidentialité
    • Paramètres de confidentialité
    • JW.ORG
    • Hu Ki Loto
    Vaevae