ʼAua Naʼa Ke Lotovaivai!

TE MAʼUHIGA ʼO TE KATAKI

ʼE maʼuhiga ʼaupito ia te taupau ʼo te kataki, mo te moʼoni pea mo te tauhi ʼae kia Sehova. (Tet. 10:20) ʼE ko te meʼa ʼaia neʼe fai e Georgina. Neʼe itaita tona ʼohoana ko Kyriacos ʼi tana kamata ako mo te kau Fakamoʼoni ʼa Sehova ʼi te taʼu 1970. Neʼe faiga ia ke tuku tana ako, ʼo mole ina tali he fakamoʼoni ki tona loto fale pea mo laku fuli te ʼu tohi ʼa te kau Fakamoʼoni ʼa Sehova ʼae ʼe ina maʼu.

Neʼe toe ʼasili te itaita ʼo Kyriacos ʼi te kamata alu ʼae ʼa Georgina ki te ʼu fono ʼo te kokelekasio. ʼI te tahi ʼaho, neʼe alu ai ia Kyriacos ki te Fale Fono ʼo laga ai te ke. ʼI tana tokagaʼi ʼae ʼe palalau lelei age ia Kyriacos ʼi te Fakakeleka, neʼe telefoni ai te Fakamoʼoni ʼa Sehova ki te tehina ʼe lea Fakakeleka ʼo te tahi kokelekasio ke haʼu ʼo tokoni kia natou. Neʼe malū leva te loto ʼo Kyriacos ʼuhi ko te agalelei ʼo te tehina, ʼo ina ako ai te Tohi-Tapu mo ia lolotoga te ʼu mahina. Pea ki muli age neʼe tuku leva e Kyriacos tana ako.

Neʼe hoko atu pe e Georgina tana katakiʼi te fakafeagai ʼo tona ʼohoana lolotoga taʼu ʼe tolu. Neʼe ui age e Kyriacos ʼe nā mavete anai mo kapau ʼe papitema. ʼI te ʼaho ʼo tona papitema, neʼe faikole ia Georgina mo tona loto katoa kia Sehova ke ʼaua naʼa mavete mo Kyriacos. ʼI te temi ʼae neʼe ʼomai ai te kau Fakamoʼoni ʼa Sehova ko tona ave ki te fakatahi, neʼe ui fenei age e Kyriacos kia natou: “Kotou muʼamuʼa atu. ʼE hoki ma olo atu ʼi tamā motoka.” Neʼe kau ʼi te fono ʼo te uhu pea mo mamata ki te papitema ʼo tona ʼohoana.

ʼOsi ʼaia pea neʼe siʼisiʼi ai te fakafeagai ʼa Kyriacos pea mo ina fetogi mamalie tona maʼuli. Hili kiai teitei taʼu ʼe 40 ki tana ʼuluaki fono mo te kau Fakamoʼoni ʼa Sehova, neʼe sio leva ia Georgina ki te papitema ʼo tona ʼohoana. Kotea ʼae neʼe tokoni kia Kyriacos ke fetogi? ʼE ina ui fenei: “Neʼe au fiafia ʼi te mole tuku ʼae e Georgina he meʼa ke ina taʼofi tana tauhi ʼae kia Sehova.” ʼE ui e Georgina: “Logola te fakafeagai ʼo toku ʼohoana, neʼe mole au fia tuku tuʼa tahi taku tauhi ʼae ki toku ʼAtua. ʼI te ʼu temi ʼaia, neʼe au faikole tuʼumaʼu kia Sehova pea neʼe mole au lotovaivai tuʼa tahi.”

TE MAʼUHIGA ʼO TE ʼULUGAAGA FAKAKILISITIANO

Moʼo tokoni ki tokita ʼohoana, ʼe toe maʼuhiga te maʼuliʼi ʼo te ʼulugaaga Fakakilisitiano. Neʼe fakatotonu fenei e te apositolo ko Petelo ki te hahaʼi fafine ʼohoana Kilisitiano: “Kotou fakamalalo i te u mea fuli ki okotou ohoana, koteuhi, kapau e mole fakalogo ni ihi ki te folafola, ke aumai natou ki te tui e te aga a te fafine, hala folafola.” (1 Pet. 3:1) Neʼe maʼuliʼi e Christine te tokoni ʼaia, logola neʼe lau ʼi taʼu tana faiga ke ina ʼaumai tona ʼohoana ki te tui. ʼI tana liliu ʼae ko te Fakamoʼoni ʼa Sehova kua hili kia taʼu ʼe 20 tupu, neʼe manatu tona ʼohoana ko John ʼe mole he ʼaoga ʼo te tui ki te ʼAtua ʼi tona maʼuli. Neʼe mole fia gaohi lotu ia John ʼi tana sio ʼae kua maʼuhiga ʼosi kia Christine tana lotu foʼou. ʼE ina ui fenei: “Neʼe au tokagaʼi te fiafia ʼae ʼe ina maʼu ai. Neʼe liliu ko te fafine ʼe lotomalohi moʼoni pea neʼe tokoni mai kia au te faʼahi ʼaia ʼi te ʼu aluʼaga neʼe faigataʼa.”

Neʼe mole fakakinauʼi tuʼa tahi e Christine tona ʼohoana ke kau ki tana lotu. ʼE fakamahino fenei e John: “Neʼe mahino kia Christine neʼe mole he ʼaoga ʼo tana palalau mai ʼo ʼuhiga mo tana lotu, pea neʼe ina tuku pe ia ke au ako mamalie ʼo fakalogo pe kia au.” Ka tokagaʼi e Christine he alatike ʼi Te Tule Leʼo peʼe ko te Réveillez-vous ! ʼo ʼuhiga mo he ʼu manatu ʼe leleiʼia anai e John, pea ʼe ina fakaha age kia ia pea mo ui : “ ʼE au iloʼi ʼe ke fia lau anai te ʼu alatike ʼaeni.”

Ki muli age, neʼe toʼo leva e John ia tona letelete pea mo ina maʼu tana gaue fai ʼoloto. Mai tona aluʼaga ʼae kua maʼu tona temi, kua feala tana fakakaukau ki te ʼu fehuʼi maʼuhiga ʼaeni ʼo ʼuhiga mo te maʼuli: “Neʼe tou tupu fakafokifa koa? He ko ʼe koa neʼe fakatupu tatou?” ʼI te tahi ʼaho, neʼe fehuʼi fenei age e te tehina neʼe faipalalau mo John: “ ʼE mole ke loto la ki hau ako?” ʼE ui fenei e John: “Neʼe au tali tana fakaui mai te ako koteʼuhi ʼi te temi nei kua au kamata tui ki te ʼAtua.”

ʼE tou sio ai leva ki te maʼuhiga ʼae ʼo te lotomalohi tuʼumaʼu ʼa Christine. Koteʼuhi neʼe hoki papitema ia John ʼi te ʼosi ʼo taʼu ʼe 20, ʼaia neʼe faikole ai ke tali e tona ʼohoana te moʼoni. ʼI te temi nei kua nā gaue tokolua ʼaki he loto katoa kia Sehova. ʼE fakatokagaʼi fenei e John: “Ko faʼahi ʼe lua ʼae neʼe lave kia au. ʼE ko te agalelei pea mo te agaʼofa ʼa te kau Fakamoʼoni ʼa Sehova. Pea kapau ʼe kotou ʼohoana mo he Fakamoʼoni ʼa Sehova, pea ʼe kotou maʼu ai he ʼohoana ʼe ʼofa, mo agatonu pea mo tuha mo te falala.” ʼE mahino ia neʼe maʼuliʼi e Christine ia te ʼu folafola ʼae ia 1 Petelo 3:1, pea neʼe ina maʼu tona fua lelei.

ʼE MAʼULI LELEI TE PULAPULA ʼI NI TAʼU KI MULI AGE

ʼE feafeaʼi la mo kapau ʼe loto he tahi ke tuku tana ako te Tohi-Tapu? Neʼe tohi fenei e te Hau ko Salomone: “Nunusi tau pulapula mai te uhu pea aua naa tuku ke malolo tou nima i te afiafi, koteuhi e mole ke iloi te mea ae e mauli lelei anai, aeni pee ko ae, pee ko naua toko lua.” (Ekl. 11:6) ʼI ʼihi temi, ʼe feala ke hili he temi loaloaga pea hoki maʼuli ai leva te pulapula ʼo te moʼoni ʼi te loto ʼo he tahi, ʼo hoki mahino ai ki te maʼuhiga ʼo tana fakaovi ki te ʼAtua. (Sakp. 4:8) ʼEi, ʼe kotou punamaʼuli mo fiafia ai anai ʼi he ʼaho.

Tou talanoa kia Alice ʼae neʼe haʼu mai Initia ʼo nofo ʼi Pilitania. ʼI te taʼu 1974 neʼe kamata ai tana ako Tohi-Tapu. Neʼe palalau ʼi tana lea kaʼe neʼe loto ia ke poto lelei ʼi te Fakapilitania. Neʼe fai tana ako lolotoga ni taʼu pea mo kau ki ʼihi fono ʼo te kokelekasio lea Fakapilitania. Neʼe mahino kia ia ko te meʼa ʼe ina ako ʼe ko te moʼoni kaʼe neʼe mole heʼeki faʼa maʼuhiga kia ia. ʼI te tahi faʼahi neʼe manako ia ki te paʼaga pea mo te ʼu fakafiafia. Pea ki muli age neʼe tuku leva e Alice tana ako.

Hili ki ai teitei taʼu ʼe 30, neʼe maʼu e Stella te tohi mai ia Alice. Neʼe tohi fenei ai: “ ʼE mahino ia ʼe ke fiafia anai ʼi tau iloʼi ʼae kua papitema tau ako ʼo te taʼu 1974 ʼi te fakatahi fakatisitilike ʼaeni talu mai ai. Neʼe maʼuhiga ʼosi ki au te gaue ʼae neʼe ke fai ʼuluaki. Neʼe ke to te pulapula ʼo te moʼoni ʼi toku loto, pea logola neʼe mole au foaki toku maʼuli ki te ʼAtua ʼi te temi ʼaia, kaʼe neʼe au taupau pe te pulapula ʼaia ʼo te moʼoni ʼi toku loto pea mo toku ʼatamai.”

Kaʼe kotea koa ʼae neʼe hoko? ʼE fakamahino e Alice neʼe tau leva mo te mahaki ʼae ko te lotomamahi ʼi te ʼosi mate ʼo tona ʼohoana ʼi te taʼu 1997. Pea neʼe faikole ki te ʼAtua. Hili pe ki ai minuta ʼe hogofulu, pea neʼe fisifisi e te ʼu Fakamoʼoni ʼa Sehova ʼe palalau ʼi te lea Pendjabi tona matapa pea mo nā tuku age te kiʼi pepa lotu Koteā Te ʼAmanaki Ki Te Kau Mate? Neʼe mahino ai ia Alice kua tali tana kole pea mo ina fakatuʼutuʼu leva ke toe fakatahi mo te kau Fakamoʼoni ʼa Sehova. Kaʼe feafeaʼi hana toe maʼu ia natou? Neʼe ina kumi ʼi te kaupepa ʼafeā ia te tuʼasila ʼo te kokelekasio lea Pendjabi neʼe fakatoʼo age e Stella ʼi muʼa atu. Neʼe alu ia Alice ki te Fale Fono pea neʼe tali leleiʼi ia ia e te ʼu tehina mo tuagaʼane lea Pendjabi. ʼE ui fenei e Alice: “Neʼe au toe logoʼi te ʼofa ʼae neʼe au lituʼa ki ai ʼi muʼa atu pea ko te ʼofa ʼaia neʼe toe tokoni mai ke au tauʼi toku mahaki.”

Neʼe toe kamata ai leva tana kau tuʼumaʼu ki te ʼu fono, mo toe fai tana ako ʼo te Tohi-Tapu, mo te ako pea mo te lau ʼo te lea Pendjabi ke poto lelei ai. Neʼe papitema leva ia ia ʼi te taʼu 2003. Neʼe fakaʼosi fenei tana tohi kia Stella: “ ʼE au fakafetaʼi lahi ki tau to ʼi toku loto ia te pulapula ʼaia kua ʼosi ki ai taʼu ʼe 29 pea mo tau tuku mai he faʼifaʼitaki lelei ke au muliʼi.”

Kotea te ako ʼe tou maʼu mai te ʼu fakamatala ʼaeni? ʼE feala ke ʼaoga he temi ʼe loaloaga age ki te tuputupu ʼo te pulapula ʼo te moʼoni, kaʼe kapau ʼe kumi fakamalotoloto e he tahi ia te ʼAtua, pea ʼe tokoni anai Sehova kia ia ke ina iloʼi pea mo tali te moʼoni. Kotou manatuʼi te palalau ʼaeni neʼe fai ʼi te lea fakata ʼa Sesu: “E homo te pulapula pea mo tupu lelei, kae e mole ina iloi pe e feafeai; e fakatupu toko tahi e te kele tona fua, uluaki ko te homo, pea mo te fisi, pea mo te tegai fulumeto kua katoa i te toulu fulumeto.” (Mko. 4:27, 28) ʼE feala ke alualu mamalie pea mo hoko toko tahi te tuputupu ʼaia. ʼI tona fakahagatonu, ʼe mole iloʼi e he faifakamafola ʼo te Puleʼaga ʼo te ʼAtua peʼe hoko feafeaʼi te tuputupu ʼaia. Koia ke hoko atu tatatou nunusi ke lahi te pulapula pea ʼe tou utu lahi anai.

“ ʼE au fakafetaʼi lahi ki tau to ʼi toku loto ia te pulapula ʼaia kua ʼosi ki ai taʼu ʼe 29 pea mo tau tuku mai he faʼifaʼitaki lelei ke au muliʼi.”—Alice

ʼAua naʼa galo kia tatou ia te maʼuhiga ʼo te faikole. Neʼe taupau e Georgina pea mo Christine ia tanā faikole ʼae kia Sehova. Kapau ʼe tou “agatonu i te faikole” pea mo ʼaua naʼa tou lotovaivai, pea ʼe tou maʼu anai “aki te temi” te ʼu fua lelei ʼae ʼo ʼatatou faiga.—Loma 12:12; Ekl. 11:1.