Te ʼu Fehuʼi ʼa Te Kau Lautohi

ʼE tau koa mo te kau Kilisitiano ke tutu ʼonatou sino mate?

ʼE mole maʼu ʼi te Tohi-Tapu he manatu ʼe fakafeagai ki te tutu ʼo te ʼu sino mate.

ʼE maʼu te ʼu hisitolia Fakatohi-tapu ʼe fakamatala ai neʼe tutu te ʼu sino mo te ʼu hui ʼo te hahaʼi ʼae kua mamate. (Sos. 7:25, MN; 2 Klk. 34:4, 5) ʼE lagi neʼe mole tuha te hahaʼi ʼaia ke fai honatou ʼavaifo. Kaʼe moka tutu te ʼu sino mate ʼe mole fakaʼuhiga tuʼumaʼu ia neʼe mole tuha ke ʼavaifo natou.

ʼE feala ke tou mahino ki te faʼahi ʼaia ʼi te fakamatala ʼo te mate ʼo te Hau ko Saulo pea mo ʼona foha ʼe toko tolu. Ko natou tokofa ʼaia neʼe mamate ʼi tanatou tau mo te kau Filisitini. Pea ʼi ʼona foha ʼaia neʼe kau ai ia Sonatane, ʼae neʼe kaumeʼa lelei mo lagolago agatonu kia Tavite. ʼI te iloʼi e te kau tagata toʼa ʼo Iselaele ʼae ʼe maʼuʼuli ʼi Sapesi ʼi Kalaate te aluʼaga ʼae neʼe hoko ki te Hau mo ʼona foha, neʼe natou ʼuʼufi ai te ʼu sino ʼaia ʼe fa, ʼo tutu pea mo tanu te ʼu hui. Ki muli age, neʼe vikiviki ia Tavite ki te faʼahi ʼae neʼe fai e te kau Iselaele ʼaia.—1 Sam. 31:2, 8-13; 2 Sam. 2:4-6.

Ko te ʼamanaki ʼo te Tohi-Tapu ki te kau mate, ʼe ko te fakatuʼuake, ko tona fakaʼuhiga ʼe toe foaki e te ʼAtua ia te maʼuli ki he tahi kua mate. Kapau ʼe tutu peʼe kailoa he tahi kua mate, ʼe mole he tuʼakoi kia Sehova ke ina fakatuʼuake he tahi ʼaki he sino foʼou. Neʼe tonu ʼe mamate te ʼu Hepeleo agatonu ʼe toko tolu ʼi te gutuʼumu kakaha ohage ko tona fakatotonu e te Hau ko Nepukatenesale. Kaʼe neʼe mole natou tuʼania pe ʼe natou mamate anai ʼi te afi, he ʼe feala anai ke fakatuʼuake natou e te ʼAtua. (Tan. 3:16-18) ʼO toe feia pe mo te ʼu kaugana agatonu ʼa Sehova ʼae neʼe tutu natou ʼi te ʼu lotoʼa fakamamahi ʼo te kau Nasi. Tokolahi te ʼu kaugana ʼa te ʼAtua neʼe mamate ʼi he paʼulu peʼe ʼi hona tahi faʼahiga aluʼaga neʼe pulinoa ai tonatou sino. Kaʼe ko tonatou fakatuʼuake ʼe hoko moʼoni anai ia.—Apk. 20:13.

Ko te meʼa noa kia Sehova te fakatuʼuake ʼo he tahi kua mate koia ʼae ʼe mole ʼaoga ai hana fakatahitahiʼi ʼona eveeve. ʼE ha te faʼahi ʼaia ʼi te fakatuʼuake e te ʼAtua ia te kau Kilisitiano fakanofo ki te maʼuli ʼi te lagi. Ko Sesu, neʼe “liufaki ia ki te maʼuli ʼi te laumalie,” pea ʼe toe feia pe mo te kau Kilisitiano fakanofo ʼe fakatuʼuake anai natou mo tonatou ʼuluagaaga ʼafeā kaʼe ʼaki he sino fakalaumalie. Pea ʼe mole natou hake anai ki selo mo he sino ʼi tagata.—1 Pet. 3:18; 1 Ko. 15:42-53; 1 Soa. 3:2.

ʼE tou ʼamanaki ʼe fakatuʼuake anai tatou he ʼe tou tui ki te malohi ʼo te ʼAtua pea mo tana lava fakahoko ʼana fakapapau, tatau aipe pe ʼe tutu totatou sino peʼe kailoa. (Gaue 24:15) ʼE moʼoni ʼe mole tou mahino katoa pe neʼe fakahoko feafeaʼi e te ʼAtua ia te milakulo ʼo te fakatuʼuake ʼi te temi muʼa ʼo toe feia pe ki te ka haʼu. Kaʼe, ʼe tou falala kia Sehova. Neʼe ina foaki mai “he fakamooni” ʼi tana fakatuʼuake ia Sesu.—Gaue 17:31; Luka 24:2, 3.

ʼE tonu ke tokagaʼi e te kau Kilisitiano te ʼu aga ʼi fenua, mo te manatu ʼa te hahaʼi, pea mo te ʼu lao fakapuleʼaga ʼo ʼuhiga mo te ʼu sino mate. (2 Ko. 6:3, 4) Kaʼe kapau ʼe tutu peʼe kailoa he sino mate ʼo he tahi, ʼe ko he tonu takitokotahi pe anai peʼe fakafamili.