ʼE Feafeaʼi Te Fakagata ʼo Te Tau Mo Te Agamalohi

ʼE PULIHI ANAI E TE ʼATUA TE ʼU PULEʼAGA FAKATAGATA

ʼE pulihi anai e te ʼAtua te ʼu puleʼaga fakatagata ʼaki te tau ʼo Alamaketone.a (Fakaha 16:16) ʼI te ʼaho ʼaia, ‘ ʼe fakatahitahiʼi anai te ʼu hau ʼo te kele katoa ki te tau ʼo te ʼaho lahi ʼo te ʼAtua te Mafimafi.’ (Fakaha 16:14) Ko Alamaketone ko te tau ʼaia ʼa te ʼAtua ʼae ka ina fakagata te ʼu tau fuli ʼi te kele.

ʼE fetogi anai e te ʼAtua te ʼu puleʼaga fakatagata ʼaki tona Puleʼaga, ʼae ka pule mai te lagi pea ʼe tuʼu anai ʼo talu ai. (Taniela 2:44) Neʼe fakanofo e te ʼAtua tona ʼAlo, ia Sesu Kilisito, ke Hau ʼi te Puleʼaga. (Esaia 9:6, 7; Mateo 28:18) Ko te Puleʼagab ʼaia neʼe akoʼi e Sesu ki ʼana tisipulo ke natou faikole ki ai. (Mateo 6:9, 10) ʼE fakatahiʼi anai te hahaʼi fuli ʼi te puleʼaga pe ʼaia ʼe tahi ʼi te malamanei katoa ʼae ʼe takitaki e Sesu.

ʼE mole fakaʼaogaʼi e Sesu tona ʼuhiga pule ohage ko te kau takitaki moʼo fai te meʼa ʼae ʼe loto ki ai. Koteʼuhi ʼe faitotonu, ʼe mole fakapalatahi, pea ʼe mole ina gaohi koviʼi anai he tahi ʼuhi ko tona lanu peʼe ko tona fenua. (Esaia 11:3, 4) Pea ʼe mole ke toe tau anai ke ke maʼu te meʼa ʼae ʼe tonu ke ke maʼu. Kotea tona tupuʼaga? He ʼe tokaga anai ia Sesu ki te meʼa ʼae ʼe lelei kia tatou takitokotahi. “ ʼE ina haofaki anai te tagata masiva ʼae ʼe kole tokoni age, ʼo toe feia mo ia ʼae ʼe mole maʼuhiga pea mo ia ʼae ʼe hala tokoni. . . . ʼE ina haofaki anai natou mai te taʼomia mo te agamalohi.”—Pesalemo 72:12-14.

ʼE toʼo anai e te Puleʼaga ʼo te ʼAtua te ʼu mahafu tau fakatupu mate ʼi te kele katoa. (Mikea 4:3) ʼE ina toe pulihi anai te kau agakovi ʼae ʼe fia tau pea mo fai te meʼa ʼae ʼe kovi ki ʼihi. (Pesalemo 37:9, 10) ʼE maʼuli fimalie anai te tagata, te fafine, te fanau ʼi he koga meʼa pe ʼe alu ki ai ʼi te kele.—Esekiele 34:28.

ʼE maʼuli fimalie anai te hahaʼi ʼi te Puleʼaga ʼo te ʼAtua. ʼE ina pulihi anai te ʼu tupuʼaga ʼo te ʼu fihifihia ʼae ʼe tupu ai te fetauʼaki ʼa te hahaʼi, ohage la ko te masiva, te fia kai peʼe ko te mole lelei ʼo te nofoʼaga. ʼE maʼu anai e te hahaʼi fuli he meʼa kai lelei pea mo he koga meʼa ʼe maʼuli fimalie ai.—Pesalemo 72:16; Esaia 65:21-23.

ʼI te pule ʼo te Puleʼaga ʼo te ʼAtua ʼe pulihi anai te ʼu fua kovi ʼo te tau. ʼE mole gata pe ʼi te ʼu mamahi fakasino kae ʼe toe kau ai mo te ʼu hoha kehekehe ʼae ʼe logoʼi e te hahaʼi ʼuhi ko te ʼu meʼa fakalialia neʼe hoko ʼi te tau. Maʼia mo natou ʼae kua mamate ʼe fakatuʼuake anai ki te maʼuli ʼi te kele. (Esaia 25:8; 26:19; 35:5, 6) ʼE toe fakatahi anai te ʼu famili ʼo mole natou toe manatuʼi te ʼu nunuʼa kovi ʼo te tau “ko te ʼu meʼa ʼafeā kua puli ia.”—Fakaha 21:4.

ʼE PULIHI ANAI E TE ʼATUA TE AGAHALA

ʼAki te Puleʼaga ʼo te ʼAtua ʼe logo tahi anai te hahaʼi ʼi te tauhi ki te ʼAtua moʼoni ʼe tahi ko Sehova,c “te ʼAtua ʼo te ʼofa pea mo te tokalelei.” (2 Kolonito 13:11) ʼE natou ako anai ke natou maʼuli fakatahi ʼi te tokalelei (Esaia 2:3, 4; 11:9) Pea ko natou fuli ʼae ka natou maʼuliʼi te ʼu ako ʼae neʼe natou maʼu ʼe natou ʼateaina anai mai te nunuʼa ʼo te agahala.—Loma 8:20, 21.

ʼE PULIHI ANAI E TE ʼATUA IA SATANA MO ʼANA TEMONIO

ʼE pulihi anai e te Puleʼaga ʼo te ʼAtua ia Satana mo ʼana temonio, ʼae ʼe natou ʼekenaki te hahaʼi ki te tau. (Fakaha 20:1-3, 10) Ka pulihi anai natou ʼe “lahi anai te tokalelei.”—Pesalemo 72:7.

ʼE feala ke kotou tui papau ʼe fakahoko moʼoni anai e te ʼAtua tana fakapapau ʼae ke ina pulihi te tau mo te agamalohi. ʼE ina maʼu te fealagia pea ʼe ina fia fakahoko.

• ʼE maʼu e te ʼAtua te poto pea mo te malohi ke ina fakagata te tau pea mo te agamalohi. (Sopo 9:4) ʼE mole he meʼa ʼe faigataʼa kia te ia.—Sopo 42:2.

• ʼE mole fia sio te ʼAtua ki te mamahi ʼo te hahaʼi. (Esaia 63:9) Pea tahi, “ ʼE fehiʼa ki he tahi pe ʼe ina leleiʼia te agamalohi.”—Pesalemo 11:5.

• ʼE fakahoko tuʼumaʼu e te ʼAtua ʼana fakapapau, ʼe mole feala ke loi.—Esaia 55:10, 11; Tito 1:2.