MARĨ DZÔ ꞌRE DATSIWATSUTU MONO WAMHÃ DAMA WẼ DI

E MARĨ DATSIWATSUTUDZÉ.

Niꞌwa marĩ dzô ꞌre ĩtsiwatsutu mono hã te te tsadzöri õ di ropire tsô watobro wamhã. ꞌRe watsiwatsutu waihuꞌu petse dzaꞌra mono da, te dza ãma tironomro. Nimahã na aiꞌuté natsi waptãꞌã pariptsi morĩ waihuꞌu petse di dza. Ãne duré niꞌwa rowẽ te te tsitsô wadzere waihuꞌu petse di dza ropire mono tihöimanadzém na te te ãma aiꞌuté waihuꞌu petse pariptsi.

E MARĨ WA DATSIWATSUTUDZÉ WẼ DI.

Aiꞌra marĩ dzô ꞌre tsiwatsutu mono wamhã dzahadu aiꞌuté ré, ropire te te ꞌwapéi wapu di dza prédu wamhã.

• Niꞌwa aiꞌuté norĩ te natsi tiwi tirobdzeiꞌõ dzaꞌra te te ãma upa dzaꞌra wamhã, ropire te te ꞌwapé dzaꞌra wamhã niwamhã da te tãma pẽtẽ dzaꞌra wamhã. Niꞌwam norĩ robdzeiꞌõ uptabi wa te dza tsadzöri dzaꞌra. Tãma wẽ dzaꞌra di dza te te waihuꞌu dzaꞌra wamhã:

• Wa norĩ hã aihĩni wa te ãma ĩꞌupa dzaꞌra na. — Tiago 3:2.

• Aihĩni nimahã na ropire dza te te ĩꞌwapé dzaꞌra na hã. — Eclesiastes 9:11 TNM.

• Da te wama pẽtẽ dzaꞌra waptsi dza wa te ĩwaihuꞌu wẽ dzaꞌra na hã. — Provérbios 9:9.

E NIHA TE DZA ĨROWAHU AIꞌRA MA MARĨ DZÔ ꞌRE TSIWATSUTU MONO DA.

Aiꞌra te te ãma upai wamhã.

BÍBLIA NHIMIROTI: ‘Tsena na ꞌre ĩhöimana dzaꞌra mono ahö na tihöimanadzém na ꞌre rereꞌe mono nherẽ, te dza apö hã ꞌre wahutu dzaꞌra, höiwi tipẽꞌẽ ꞌremhã para na ꞌre tsimatsa mono da hã.’ — Provérbios 24:16.

Pawapto na aiꞌra te te ꞌmadöꞌö da ropire hã rotsaꞌrata wẽ dzarina. Ãma rotsaꞌrata aiꞌra te te ĩromnhoré watsété na. Ãté te tsina rotsaꞌrata ĩtsimidzaꞌretse õ na hã duré taré dza ĩtsiwatsutu na hã.

Rowahutu da aiꞌra ma tsiwatsutu da, pawapto na te te rotsaꞌrata da te te ĩꞌmanharĩdzéb da na hã te te romnhoré wẽ da. Tawamhã te te tsadzöri waꞌrãmimhã, wẽ na te dza watobro ropire nherẽ.

Tadzahã ãma pibui petse ropire tãma uprotsi tõ da. Taha waꞌrãmimhã pawapto na tsiꞌuihö na ropire te te ꞌwapé da. Tsadanharĩ dza: “e marĩ te dza ĩꞌmanha ãhã romnhoré tsadaihuꞌu petse da.”

Marĩ watsédé watobro wamhã.

BÍBLIA NHIMIROTI: ‘Tadzahã, aima waihuꞌu dzaꞌra waꞌaba õ di, niha awẽm na hã dza aima ĩromhöimana dzaꞌra waꞌaba na hã.’ — Tiago 4:14.

Niꞌwai ma waihuꞌu õ di awẽmhã dza ĩwatobrodzé hã. Niꞌwa ãhãna hã tsibro petse nherẽ, ãté awẽmhã te dza tinhimarĩꞌõ duré niꞌwa ĩhöiba nhiptede te dza tihödzé awẽmhã. Bíblia te tinha: “Ĩwaptu norĩ hã dawara na õnẽ uꞌö te te ãma ꞌre aiꞌuté mono õ di dza, ĩtsiptete norĩ õne uꞌö uꞌö te te ãma ꞌre aiꞌuté mono õ di dza; danhibödö duré tsô ĩtsaꞌrata õ hã uburé ma ꞌre wairébé mono wa.” — Eclesiastes 9:11, TNM.

Damama te ꞌre tsiwatsutu petse tiꞌra ꞌwawi ꞌre tsimapa mono da. Tadzahã tsadai õ di uburé roꞌwaꞌrutu wi te te ꞌmadöꞌö da.

Tô tsena aiꞌra te te ꞌwapéi õ di ropire ĩprédup te ne hã. Tadzahã pawapto waihuꞌu petse di te te ꞌwapé da ropire ĩhöiba amo, ãma ĩtsimiré, niꞌwa titsiwaihuꞌu ma tsitsadaꞌöbö wamhã niwamhã niꞌwa tãma ĩtsawi pe tiwi tsiꞌutõrĩ wamhã.a

Aiꞌra ma da te pẽtẽ wamhã.

BÍBLIA NHIMIROTI: ‘Maꞌãpé danhimiroti hã ꞌre wapari petse mono... Ãne wamhã, nimahã na te dza aiꞌrãi waihuꞌu wẽ na oto ꞌre aimo.’ — Provérbios 19:20.

Aiꞌra petse wamhã, tãma amhödzépa õ di dza duré tãma robꞌmanharĩ watsété õ di dza. Te dza tãma ĩroti duré ĩhöimana prédubdzé te dza ĩhiri wẽ.

Rowahutu wamhã aiꞌra ma tãma rowẽ na höimana da duré te te wapari da da te tãma pẽtẽ wamhã, aima duré õhõ ma rowẽ di dza. Damama John na ĩtsitsi te tinha: “Waꞌra ma wa te roti dzaꞌra õ wamhã marĩ na te te upai wamhã, niwa te te rowaihuꞌu õ di dza. Ãne wamhã, ropire na tsi te dza ꞌre nomro duré te dza ꞌre atsiwatsutu uꞌötsi mo ropire tãma uprotsi da. Taha wa, aihöimanadzé ĩhöimanadzéb dzama pire di dza!”

E niha te dza ĩpawapto aiꞌra te te ãma tsaprĩ da tihöimanadzém na da te tãma ĩpẽtẽdzéb dzarina. Tsiwaꞌru da te tãma pẽtẽ wamhã, tãma watsuꞌu tõ da te ĩpẽtẽdzé hã ĩböiꞌõ na hã. Taha waꞌrãmimhã, pawapto na te te waihuꞌu da ãne:

• “Aima hã, e marĩ wa ma tô aima pẽtẽ ni.”

• “E niha te dza atsihiri wẽ.”

• “E marĩ te dza ĩꞌmanha apö da te aima pẽtẽ wamhã.”

Aipoꞌre puꞌu: aiꞌra ma ĩpẽtẽdzéb uꞌöbö, awaꞌawi duré prédu wamhã tãma rowẽ di dza.