Atsimiꞌẽ na aihöimana wamhã, aima robdze ti dza

E MARĨ DANHIMIꞌẼ NA DAHÖIMANADZÉ.

Niꞌwa tsimiꞌẽ na ĩhöimana dama umnhatsi di. Romhuri da te tãma tsõmri wamhã, te dza ãma uwaimrami wẽ bödö ĩpitsutu ꞌremhã.

Tsada hã duré aiꞌuté norĩ ma hã tsimiꞌẽ na höimana dzaꞌra da. Ĩhöiwarobo aiꞌuté prédubdzém naa te tinha: “Aiꞌuté norĩ hã 15 aꞌamo ãma wamhã, oto te te tsadawa dzamarĩ waihuꞌu petse di dza timama duré tina, duré 18 aꞌamo ãma wamhã, te dza tsima wẽ dzaꞌra oto timama duré tina te te ĩꞌmanharĩ dzaꞌra dzé hã duré te te ꞌmanharĩ dzaꞌra da.” Ĩhöiwarobo hã te duré tinha: “Dahöimanadzé ĩꞌahö dzarina, aiꞌuté norĩ hã 5 ãma wahu hawi 7 u wamhã, damama duré dana te dza tãma waihuꞌu dzaꞌra ꞌri ꞌmadöꞌö na tsuru na te te ꞌmadöꞌö dzaꞌra da. Dzahadu aiꞌuté nherẽ, marĩ ahö na te te ꞌmanharĩ wẽ waihuꞌu petse dzaꞌra di oto.

E MARĨ WA DANHIMIꞌẼ NA DAHÖIMANADZÉ WẼ DI.

Ĩhöibaté ĩꞌahö norĩ hã te natsi wairé timama duré tina nhorõwa hawi tsiwaprotsi ꞌre höimana dzaꞌra mono da. Tadzahã, nimahã bötö pari, te dza apö tsina tsiri dzaꞌra ropire tsô watobro dzaꞌra wamhã. Nimahã na hã, tahã te dza watobro damama duré dana te te tãma waihuꞌu dzaꞌra õ wamhã robꞌuipradzé tsimidzaꞌretse na te te uprotsi wẽ dzaꞌra da, ꞌri te te ꞌmadöꞌö dzaꞌra da duré tinhimiromhuri te te ãma uwaimrami dzaꞌra da.

Taha wa, damama duré dana te te ĩrowahutu dzaꞌra da tsi tiꞌra norĩ ma hã dzahadu aiꞌuté ré, tinhimiromhuri te te ãma uwaimrami wẽ dzaꞌra da prédub dzaꞌra wamhã. Ĩhöiwarobob te tinha: “Niꞌwa damama duré dana norĩ hã te ꞌmanharĩ dzaꞌra uburé tiꞌra norĩ ma hã. Tawamhã, prédub dzaꞌra wamhã, te dza rẽme dzaꞌra tsiꞌuihö na ꞌre höimana dzaꞌra mono da. Ãne ꞌmanharĩ tõ.”

E NIHA TE DZA ĨROWAHU AIꞌRA MA TSIMIꞌẼ NA HÖIMANA DA.

Pitsutu romhuri ꞌri ãma aiꞌra te te ꞌmanharĩ da.

BÍBLIA NHIMIROTI: ‘Niꞌwa hã tsimiꞌẽ na te te ꞌre romhuri petse mono wamhã, te dza tihöimanadzéb da hã te te tsima ꞌre adzani.’ — Provérbios 14:23.

Aiꞌuté norĩ te te romhuri dze dzaꞌra di timama duré tina me. Ãne mono hã, nimahã romhuri ĩtsuru norĩ hã tãma pitsutu dzaꞌra na.

Ãté damama duré dana norĩ hã ꞌri ꞌmadöꞌö na te te ꞌru dzaꞌra õ di tiꞌra norĩ ma hã romnhoré ahö na te te natsi ꞌmanharĩ dzaꞌra wa.

Tadzahã, aiꞌuté norĩ hã te te ĩpawaptob dzaꞌra ma hã ꞌri ꞌmadöꞌö na danhipai u wapu di romnhorédzéb ãma te te romnhoré wẽ dzaꞌra da. ꞌRi ꞌmadöꞌö na te te pawaptob dzaꞌra wamhã, te dza waihuꞌu dzaꞌra tsimiꞌẽ na romhuri hã romnhorédzéb ãma hã te te ãma uwaimrami dzaꞌra da. Ĩhöiwarobo hã oto ĩwatsuꞌu hã ãhã romnhihötö na te duré tinha: “Wa te waptẽrẽ dzaꞌra õ wamhã aiꞌuté norĩ hã te te dapawaptob dzaꞌra da te te tsima dzaꞌra wamhã dzahadu aiꞌuté ré, te dza waihuꞌu dzaꞌra dapawapto hã ĩwẽ õ na hã. Te dza duré rotsaꞌrata dzaꞌra dama ĩꞌrudzahi na hã marĩ da te tãma ꞌmanharĩ dzaꞌra da.”

Tawamhã, aiꞌuté norĩ hã ꞌri ꞌmadöꞌö na te te pawaptob dzaꞌra wamhã, te te dapawaptob dze ti dza duré tsina tsi te te rotsaꞌrata dzaꞌra õ di dza. Te dza duré waihuꞌu dzaꞌra tite família ma ĩrowẽ na ꞌri ꞌmadöꞌö na te te pawaptob dzaꞌra wamhã.

Pawapto na aiꞌra te te ꞌwapé da te te ĩꞌupadzé hã.

BÍBLIA NHIMIROTI: ‘Maꞌãpé danhimiroti hã ꞌre wapari petse mono, duré atsima ꞌre wẽ mono. Ãne wamhã, nimahã na te dza aiꞌrãi waihuꞌu wẽ na oto ꞌre aimo.’ — Provérbios 19:20.

Aiꞌra marĩ na te te upai wamhã, ãma ĩtsimiré, marĩ date te te pru wamhã, uptsibi tõ te te ĩꞌupadzé hã. Aiꞌuté te te ꞌwapéi waihuꞌu petse di dza te te ĩꞌupadzé hã. Tawamhã, tsada hã dama tsiꞌruiwapari da duré te te dama waꞌrãmi da te te ĩwamnarĩdzé

Aiꞌra tsiꞌuihö na te te ĩꞌupadzé hã te te ꞌwapéi wamhã:

• te te ĩꞌupadzé hã te te dawi uptsibi õ di dza

• te te ĩꞌupadzé hã te te daꞌãma tsaꞌra õ di dza

• dama tsiwatsuꞌu õ di dza ĩbö newa

• te dza dama tsiꞌruiwapa