ROTI 5
Ĩwẽ aiꞌuté norĩ ĩprédum norĩ tsiré höimana dzaꞌra da
E MARĨ WA WẼ DI AIꞌUTÉ NORĨ ĨPRÉDUM NORĨ TSIRÉ HÖIMANA DZAꞌRA DA.
Ĩprédum norĩ nhimiroti dzô aiꞌuté norĩ wi te tsô rowaptö. Damama duré dana norĩ nhimiroti hã danhipai u ĩwẽ hã daꞌra norĩ ma hã. A hã damama wamhã, niwamhã dana wamhã, ĩroti da tsi aiꞌra ma. Tadzahã, duré tsada hã ĩprédu ĩhöiba amo norĩ te te pawaptob dzaꞌra da aiꞌra.
E MARĨ WA ĨPRÉDUM NORĨ NHIMIROTI WẼ DI.
Daro ĩꞌahö norĩ ãma hã, aiꞌuté norĩ hã natsi höimana dzaꞌra õ di ĩprédum norĩ tsiré. E marĩ wa:
Aiꞌuté norĩ hã bötö ahö na te aiꞌubumro romnhorédzéb ãma hã. Tame, aiꞌuté ahö di duré ĩprédu umro di.
Damama duré dana ĩꞌahö norĩ hã te romhuri dzaꞌra. Taha wa, aiꞌuté tinhorõwa u apö te te tsina tsiri dzaꞌra parimhã romnhorédzém hawimhã, tsiwaprotsi te natsi ꞌre höimana dzaꞌra.
Romnhoré ĩꞌmanharĩ dzarina Estados Unidos ãma, aiꞌuté norĩ 8 ãma ĩwahub hawi 12 ãma ĩwahub u te natsi uprotsi dzaꞌra nimahã 6 hora bötö tsidöpötsi ĩropoto na, internet na duré vídeo-game na.a
Ĩhöiwarobo daꞌra prédubdzém na te tinha: “Ĩhöibatém norĩ hã te natsi tsadawa dzamarĩ dzaꞌra titsiwaihuꞌu norĩ nhimiroti hã ĩprédum norĩ nhimiroti dzô ꞌre rĩtĩ dzaꞌra mono waꞌrãmimhã.”b
E NIHA TE DZA ĨROTI AIꞌRA MA.
Aiꞌra tsiré natsi aihöimana uꞌötsi.
BÍBLIA NHIMIROTI: ‘Aiꞌuté höimana prédum na ꞌre ĩhöimana mono dzéb da hã, tãma ꞌre roti petse mono. Tawamhã tãma tsimirẽme ãna te dza ãma ꞌre mo, tihöimanadzéb ꞌrãtsutu u.’ — Provérbios 22:6.
Aiꞌuté norĩ te natsi tsima wẽ dzaꞌra timama duré tina te te tãma roti dzaꞌra da te te ĩꞌmanharĩ dzaꞌra dzéb da na hã. Romnhoré petse ꞌwa norĩ te duré nharĩ dzaꞌra wapté norĩ te te natsi ĩwapari dzaꞌra na hã timama duré tina nhimiroti hã titsiwaihuꞌu norĩ nhimiroti nhipai u. Doutor Laurence Steinberg ma tsihötö tite ĩhöiwarobo nacc: “Damama duré dana norĩ hã danhipai u te natsi rétsi dzaꞌra tiꞌra norĩ höimanadzé hã ĩhöibatém hawi ĩprédu dzaꞌra dzéb u. Wapté norĩ hã te natsi rotsaꞌrata dzaꞌra timama duré tina nhimiroti na hã tsõꞌawi te te tiwi waptẽrẽ dzaꞌra õ nherẽ niwamhã uburé na te te tsadze dzaꞌra õ nherẽ.”
Pitsutu niꞌwa tihöimanadzém na tsitsanho da aiꞌra ma.
BÍBLIA NHIMIROTI: “Niꞌwa hã ĩꞌrãi waihuꞌu wẽ norĩ tsiré ꞌre morĩ wamhã, te dza ĩꞌrãi waihuꞌu wẽ dzé hã te te tsina tãma ꞌre höimo uꞌötsi.” — Provérbios 13:20.
Ãma rotsaꞌrata niꞌwa ĩprédu ĩhöimana wẽ na aiꞌra ma te te roti wẽ da. Roti na aiꞌra ma ãma tsiwaihuꞌu da. Tahã ĩprédu ꞌre prédu mono õ di dza aiꞌra hã aiꞌupana. Tadzahã aiꞌra hã ãma tsiwaihuꞌu wamhã, ĩtsimiroti hã atsimiroti me, te dza pawapto aiꞌra prédu wẽ da. Bíblia te höiꞌré Paulo te te ĩpawapto petse na hã Timóteo höibatéb ré hã duré prédu parimhã. Paulo ma duré rowẽ di Timóteo tsiwaihuꞌu wa. — Filipenses 2:20, 22.
à bötö na hã, damama amo, damama wapté, dana wapté duré daꞌrada ĩꞌahö norĩ hã tsiré höimana dzaꞌra õ di oto. Taha wa, aiꞌuté norĩ hã ĩtsiré natsi höimana dzaꞌra õ di duré. Ãne wamhã ate família ꞌremhã, pawapto na aiꞌra norĩ hã tsiwaihuꞌu dzaꞌra da ĩprédum norĩ dza te te ĩpawaptob dzaꞌra ãma hã höimana wẽ dzaꞌra da.
a Tô ãhã romnhoré te höiꞌré wapté norĩ hã te te ĩꞌuprotsi dzaꞌra na hã nimahã 9 hora bötö tsidöpötsi taha na. Ãhã romnhoré hã te te tsaꞌrata õ di bödö hã te te ĩꞌuprotsi dzaꞌra hã rowaꞌuꞌure na romnhorédzéb ãma hã niwamhã ꞌri ãma te te ãma romnhoré dzaꞌra ré.
b Ĩhöiwarobo nhitsi hã inglês mreme na: Hold On to Your Kids
c Ĩhöiwarobo nhitsi hã inglês mreme na: You and Your Adolescent.
Aiꞌra te te tsima wẽ wa atsimiroti hã, natsi ĩtsiré aihöimana uꞌötsi, tãma roti na, aipẽꞌẽ ꞌrem na tãma robdzanhamri duré aihöimanadzém na tãma atsiwatsuꞌu na.