Roti dadzaprõnidzéb dzarina dahöimana wamhã dama wẽ di

E MARĨ ROTI DADZAPRÕNIDZÉ.

Roti dadzaprõnidzé hã roti hã niꞌwa te te tsima ĩpitsudu ĩtsarina ꞌre höimana mono da. Rowaihu ĩbö dzô niwamhã ĩwatsété dzô taha ma höimana wa, ĩbö hã te dza te te ꞌre ꞌmanharĩ tsiwaprotsi höimana nherẽ.

E MARĨ WA ROTI DADZAPRÕNIDZÉ WẼ DI.

à bötö na hã, datsiré romnhoréꞌwa norĩ, romhörö norĩ, duré ĩropoto norĩ te natsi rowahutu dzaꞌra ĩbö hã ĩwatsété na hã duré ĩwatsédé ĩbö na hã. Aiꞌuté norĩ ãhã roti ĩwatsété norĩ te te natsi wapari dzaꞌra wamhã, te dza tsimirotsaꞌrata wamnarĩ dzaꞌra ĩwatsété na hã duré ĩbö na hã.

Niꞌwa waptéb ré, te dza natsi wati dzaꞌra ni ĩwatsédé te te ꞌmanharĩ da. Ĩhöiwaroboaa te tinha aiꞌuté dzahadu wapté õ ré “wa te tãma ĩrowahutu dzaꞌra da na hã daꞌahö na dza da te ĩrétsi dzaꞌra na hã ĩwatsédé te te ꞌmanharĩ dzaꞌra da aihĩni ma wẽ dzaꞌra da. Aiꞌuté norĩ duré te te ĩwaihuꞌu dzaꞌra da tsi aimawi na da te rotsaꞌrata dzaꞌra nherẽ niwamhã titsiwaihuꞌu norĩ ma wẽ õ nherẽ, ĩwẽ hã te te ĩꞌmanharĩ dzaꞌra da na hã.” Taha wa, damama duré dana norĩ te te ĩroti dzaꞌra da tsi tiꞌra norĩ ma hã dzahadu wapté õ ré.

E NIHA TE DZA ĨPAWAPTO AIꞌRA ROTI DADZAPRÕNIDZÉ ĨWẼ TE TE TSIMA PITSUTU DA.

Tsõꞌawi tãma waihuꞌu e marĩ ĩbö duré e marĩ ĩwatsédé.

BÍBLIA NHIMIROTI: ‘Ĩprédum norĩ. . . tihöimanadzém na te te ꞌre waihuꞌu petse dzaꞌra mono di, marĩ ĩwẽ hã duré ĩwatsété dzama.’ — Hebreus 5:14.

• Aimremedzém na höiꞌré na aiꞌra ma e marĩ ĩbö duré e marĩ ĩwatsédé. Dahöimanadzém na ĩwatobrodzéb dzarina, tãma höiꞌré na e marĩ ĩbö duré e marĩ ĩwatsédé ãma ĩtsimiré: “Tahã tô tsena, tahã dadzadawa nhipe”. “Tahã danhimirẽmeꞌõdzé, tahã danhimirẽme petse dzé.” “Tahã ĩbö, tahã ĩꞌupa”. Bödö ãma morĩ tsidöpötsi, aiꞌra norĩ hã te dza waihuꞌu dzaꞌra e marĩ ĩbö duré e marĩ ĩwatsédé.

• Ãma rowatsuꞌu na e marĩ wa te te ĩtsadawa dzamarĩ da tsi roti dadzaprõnidzé ĩpitsudu hã. Ãma ĩtsimiré, tsadanharĩ: “E marĩ wa dahöimana tsena na tsi. E marĩ wa te dza atsiti tatsiꞌré ni tsadawa nhipetse wamhã. E marĩ wa danhiptsaihuri ĩböi õ di.” Pawapto na aiꞌra te te rotsaꞌrata da tsiꞌuihö na te te waihuꞌu da marĩ ĩbö dzô niwamhã ĩwatsété dzô.

• Ãma rowatsuꞌu na e marĩ wẽ di roti dadzaprõnidzé ĩwẽ dzarina dahöimana. Ãma ĩtsimiré, tãma nharĩ: “Tsena aihöimana wamhã, te dza aiꞌumnhatsi dzaꞌra ni.” Niwamhã: “dawadzé wamhã, te dza aiꞌãma tatsiwaihuꞌu dzaꞌra ni.”

Da te rotsaꞌrata wẽ dzaꞌra da ate família ãma, aihĩni ate família norĩ ꞌre ĩhöimana dzaꞌra mono da tsi roti dadzaprõnidzé ĩwẽ dzarina.

BÍBLIA NHIMIROTI: ‘Aipẽꞌẽ ꞌre, te dza aꞌö ꞌröwi atsiꞌmadöꞌö dzaꞌra waꞌwa, ĩtsadzeiꞌwa norĩ höimanadzéb dzarina, tô tsena ꞌre aihöimana dzaꞌra waꞌaba mono dzô.’ — 2 Coríntios 13:5.

• Aihĩni ate família norĩ roti dadzaprõnidzé ĩwẽ dzarina ꞌre höimana dzaꞌra mono wamhã, te dza ĩnha tô tsena na:

  • “Ĩ̱te família norĩ tsadawa nhipetse dzaꞌra õ di.”

  • “Wa te daꞌahöri dzaꞌra õ di duré daꞌãma wadzadarĩ dzaꞌra õ di.”

  • “Wa te dawaꞌẽ dzaꞌra õ di duré wa te dawatsuꞌu watsété dzaꞌra õ di.”

Aiꞌra te dza waihuꞌu taré ĩpitsutu õ na hã roti dadzaprõnidzé ĩwẽ ate família ma duré ĩꞌubö da te aiꞌãma ĩrotsaꞌrata wẽ dzaꞌra waꞌaba na hã.

• Natsi robdzanhamri aiꞌra ma roti dadzaprõnidzé ate família te na hã. Romhöimanadzé mono hã ĩwairébé dzarina, tãma rowahutu ĩbö na hã. Pawapto na te te rotsaꞌrata da ate famíliaha te roti dadzaprõnidzé hã aiwab dzô hã roti ĩhöimana ne hã ĩropoto na hã, rowaꞌuꞌure na hã duré ĩtsiré romnhoréꞌwa norĩ te na hã. Ãma ĩtsimiré, tsadanharĩ aiꞌra: “E marĩ te aré ĩꞌmanha ãhã romhöimanadzé hã atsô watobro ꞌwaꞌöhã. E marĩ wate família te rotsaꞌrata taha na.”

Tsiptete dzaꞌra na roti dadzaprõnidzé ĩwẽ dzarina ꞌre höimana dzaꞌra mono da.

BÍBLIA NHIMIROTI: “Atsimirotsaꞌrata ꞌremhã marĩ ĩwatsédé hã aima ꞌre höimana dzaꞌra waꞌaba mono ãna ꞌre aihöimana uꞌötsi dzaꞌra waꞌaba mono.” — 1 Pedro 3:16.

• Udzei petse aiꞌra marĩ ĩbö te te ꞌmanharĩ wamhã. Aiꞌra marĩ ĩbö te te ꞌre ꞌmanharĩ mono wamhã, udzei petse dza duré ãma rowatsuꞌu na e marĩ wa ma tô ĩꞌudzei pe. Ãma ĩtsimiré, te dza tãma ĩnha: “A hã tsena ma tô aihöiba, taha wa aiꞌãma hã ĩ̱ma robdze ti.” Aiꞌra aima tsiwatsuꞌu wamhã marĩ ĩwatsédé te te ĩꞌmanharĩ na hã, udzei petse dza tsena ĩtsiwatsuꞌu na hã. Taha parimhã, tãma pẽtẽ.

• Tãma pẽtẽ marĩ ĩwatsédé te te ꞌmanharĩ wamhã. Pawapto na aiꞌra te te ꞌwapé da te te ĩꞌupadzé hã. Aiꞌuté norĩ te te ĩwaihuꞌu dzaꞌra da tsi e marĩ ĩꞌupa ma ꞌmanharĩ dzaꞌra duré e marĩ wa tahã höimana õ di roti dadzaprõnidzé ate família te dzarina. Niꞌwa damama duré dana norĩ te te pẽtẽ dzaꞌra õ di tiꞌra norĩ ma tiwi robdzeiꞌõ dzaꞌra tõ da. Tadzahã, aiꞌra ma robdzanhamri wamhã te te ĩꞌupadzém na hã, ĩtsitsãmridzé ĩwẽ na te dza ꞌre höimana dzaꞌra duré ĩbö hã te dza te te ꞌre ꞌmanharĩ dzaꞌra.