ROPIRE ROPÖ

1 | Aihöiba ꞌmadöꞌö wẽ na

E MARĨ WA.

Ropipa ĩtsaꞌẽne watobro wamhã, marĩ ahö na te dza ꞌre dahödzé dzaꞌra.

Ropipa höimana ré, ꞌre dahötöꞌö uꞌötsi mono di. Taha wa wapu di ꞌre dahödzé mono da.
Ropipa höimana ré, dawededzé mono ꞌre daꞌmatsitsi di duré dawede dzô te dawi rowaptö.
Ropire ré, robꞌuipradzé tsuru wa, dawede dzô duré datsa dzô te duré dawi rowaptö.

Ĩwaihuꞌu da tsi

Marĩ ĩpipa na ꞌre dahödzé mono wamhã, duré ꞌre dahötöꞌö mono wamhã, rotsaꞌrata watsété na ãté te dza rotsaꞌrata ni. Taha wa, dahöiba hã da te ꞌmadöꞌö wẽ õ di dza. Ãne te dza atsépuꞌu pe.
Dahödzé da te ꞌmadöꞌö wẽ õ wamhã ãne te dza dahöiba wamnarĩ petse, ĩdöꞌödzéb u ãté te dza ãwitsi.
Aihöiba ꞌmadöꞌö wẽ wamhã, aihöiba petse di dza, ĩbö marĩ na rowairébé da hã ropire watobro wamhã.
Atsimarĩꞌõ nherẽ, tsada hã aihöiba ꞌmadöꞌö wẽ da.

Tsada hã oto ꞌmanharĩ da

Niꞌwa ĩtsimidzaꞌretse wẽ, te dza romnhowa rotsaꞌrata ropire ĩwatobro da na tiwi tsiꞌmadöꞌö da. Ãne duré dahödzé wi. Niꞌwa tihöiba te te ꞌmadöꞌö wẽ mono wamhã tihöiba uptsõ na, natsi tsépuꞌu mono õ di dza. Niwamhã dadzépu ĩpipa hã te te dame öri õ di. Danhipai u ĩwẽ dadzépuꞌu wi datsiꞌmadöꞌö petse da ĩwana ré.

“Wahöiba wa te ꞌmadöꞌö petse mono wamhã, duré wanhorõwa uptsõ petse na ĩꞌmadöꞌö wẽ na, robꞌuipradzém na wa te uprotsi dzaꞌra õ di dawededzém na.” — André.a

a Ĩtsõrédzém na niꞌwa norĩ nhitsi ma ãma tsaprĩ dzaꞌra ni.

E MARĨ TSADA HÃ ꞌMANHARĨ DA — Roti ĩpawaptobdzé

Ropire höimana ré, ta norĩ hã te dza aipawaptob dzaꞌra dahödzé wi atsiꞌmadöꞌö da

AIHÖIBA ꞌMADÖꞌÖ WẼ NA ĨꞌUPTSÕ NA

Aihöiba ꞌmadöꞌö wẽ na ĩꞌuptsõ na

Bíblia te tinha: ‘Ĩtsimidzaꞌretse wẽ, marĩ ĩtsimimnha te te ꞌmadöꞌö wamhã, te dza tãma aiꞌré, romhö na ré.’ (Provérbios 22:3) Romnhowa rotsaꞌrata e marĩ te aré watobro dadzépuꞌu wi aihöiba hã ꞌmadöꞌö petse õ wamhã.

Atsibꞌrada natsi uptsõi uꞌötsi ö na duré sabão na. Ĩmorĩꞌrata uptabi ãhã ꞌmanharĩ da datsa upi wana ré duré datõrĩdzém hawi aiwatobro pari.
Atsõrõwa natsi uptsõi uꞌötsi ö na duré sabão na. Uptsõi wẽ na marĩ natsi da te ĩꞌupidzé, ꞌridawa ne duré dahörödzém ne.
Tsada wamhã, dahödzé te te ĩropéi ré ĩhödzé norĩ ꞌratamhã aihöimana tõ.

DATSA DAHÖIBA NHIPTETEDZÉM NA ATSA NA

Atsa na datsa dahöiba nhiptetedzém na

Bíblia te tinha: ‘Niꞌwam norĩ hã tsima ꞌre tsipetse uꞌötsi dzaꞌra mono wamhã...Te dza ꞌre tsaihuri uꞌötsi.’ (Efésios 5:29) Wahöiba hã wama tsawi dzaꞌra wamhã datsa dahöiba nhiptetedzém na tsi wa dza natsi watsaihuri ni.

Ö natsi hötsi uꞌötsi.
Robꞌrã mono na duré wetsuirã mono na atsa na.
Atsa na tsuru na ĩwab ré na, sal duré ö açúcar ré, ãma ĩtsimiré, ödzeire duré datsa dzei na.
Warĩ na atsiwairõrĩ tõ. Warĩtsipãrĩ na aihöimana tõ, warĩ watsarĩ tõ duré ödzé hötsi na tsipa tõ.

“Wa hã ĩ̱mro me, datsa dahöiba nhiptetedzém na wa natsi watsa ni. Wapawaꞌö tsuru di. Taha wa wama wẽ di wate robꞌuipradzé wa te uprotsi da datsa dahöiba nhiptetedzém na dawededzéb waꞌrãmi.” — Carlos.

ATSIWAIRO NA DURÉ AIWAꞌUTU WẼ NA

Atsiwairo na

Bíblia te tinha: ‘We ĩ̱tsiré aiꞌabaꞌréi waꞌaba aꞌubuni u, wawaꞌutu dzaꞌra da aꞌö.’ (Marcos 6:31) Wa te ĩromhuri dzaꞌra da tsi duré ĩwawaꞌutu dzaꞌra da tsi.

Natsi atsiwairo na. Aima wẽ wamhã, te dza natsi aimo nimomo. Datsiwairom na aihöiba hã te dza ĩtsipte a hã ĩhi nherẽ niwamhã aihödzé nherẽ.
Aiwaꞌutu

Aiwaꞌutu wẽ na. Tsuru na atsõtõ wamhã, ãma ronomro ãna, aihötöꞌö di dza duré aima pire di dza ꞌrãdzaꞌõtõ da romhuri na. Duré nimahã bötö pari te dza aihödzé.
Pitsutu bödö ĩwẽ atsõtõdzéb da. Bötö tsidöpötsi atsõtõ duré aiꞌutu tô bötö na.
Atsõtõ da wamhã, ĩropodo ꞌmadöꞌö mono tõ duré dahörödzém na tsi aihöimana tõ.
Atsõtõ wana ré datsa ĩwapu na tsi atsa na. Wẽꞌõ na ödzé niwamhã marĩ cafeína ré, ãma ĩtsimiré wedepro, tereré duré ödzeire.

“Ĩ̱nhotõ wẽ õ wamhã, ĩ̱ma rowẽ õ di. Tsuru na ĩ̱nhotõ wamhã, ĩ̱ꞌrãdzé di duré ĩ̱höiba dzé di. Tadzahã ĩ̱nhotõ wẽ wamhã, ĩ̱nhiptete di tsiwaꞌru marĩ te ꞌmanharĩ da duré pire di ĩ̱hödzé da.” — Justin.