ROPIRE ROPÖ
2 | Ate robꞌuipradzé atsimidzaꞌretse na uprotsi
E MARĨ WA.
Daꞌahö na te natsi romhuri dzaꞌra ni danhimiꞌẽ na bötö tsidöpötsi dahöimanadzéb da hã. Ropire tiꞌai mono bö höimana ré, tahã danhipai u pire di. E marĩ wa.
Ropire ropö höimana ré, marĩ mono waꞌöbö dzaꞌẽtẽ di, ãma ĩtsimiré, datsa duré aluguel.
Ropire ropö höimana ré, romhuri duré dapawaꞌö tsuru di.
Tã duré udzö te te uprotsi waihuꞌu petse dzaꞌra di ꞌri duré romhuridzé. Ãne wamhã, danhimarĩꞌõ mono di.
Ĩwaihuꞌu da tsi
Ate robꞌuipradzé hã atsimidzaꞌretse na uprotsi wẽ waihuꞌu petse wamhã, aima danhipai u wapu di dza ropire ropö höimana nherẽ.
Ãhãna hã ate robꞌuipradzé hã ĩré nherẽ, ãté aptoꞌoré ate robꞌuipradzé duré atsimarĩ mono te dza aiꞌutõrĩ dzaꞌra.
Tsadai õ di uburé uipra da robꞌuipradzém na, ãma ĩtsimiré, uipra waihuꞌu õ di robdzedzé niwamhã dahöimanadzé ĩrowẽ datsitsãnawã norĩ me.
Tsada hã oto ꞌmanharĩ da
Bíblia te tinha: ‘Watsai ré ꞌre wahöimana dzaꞌra mono wamhã, duré waꞌudza ré ꞌre wahöimana dzaꞌra mono wamhã, marĩ dzô tsi watsima ꞌre wanhopré mono õ di dza, marĩ na wa te watsima ãma ꞌre ĩrowẽ dzaꞌra mono dzéb da hã.’ — 1 Timóteo 6:8.
Wama ꞌre rowẽ dzaꞌra mono da, taré wa te rotsaꞌrata dzaꞌra õ di dza marĩ wa te watsima ĩrobꞌruiwapari dzaꞌra na tsi. Taha waꞌrãmimhã, wa dza watsima robdzei petse dzaꞌra ni marĩ wahöimanadzéb da wama ĩhöimana na. Ĩmorĩꞌrata uptabi taha na wapoꞌre puꞌu dzaꞌra da robꞌuipradzé wawi tsô rowaptöꞌö wamhã.
Atsimarĩ na atsima robdze da, ãté ꞌre ĩꞌaihöimana mono da tsi marĩ tsuru na. Uprotsi wamhã aipawaꞌöbödzém nhipai u, taré te dza aima tirowatsété.