ROPIRE ROPÖ

3 | Atsiꞌmadöꞌö petse aima ĩtsawi petse norĩ nhiti aihöimana tõ da

E MARĨ WA.

Ropire ropö höimana wa, dahötöꞌö uptabi di taha wa datsima wẽ õ nherẽ daꞌahö na dama ĩtsawi petse norĩ nhiti te ꞌre dahöimana dzaꞌra.

Datsiwaihuꞌu norĩ nhiti hã te ꞌre dahöimana.
Ĩmro ré norĩ te natsi tsitsadaꞌöbö dzaꞌra.
Damama duré dana norĩ tsimipari dzaꞌra õ di daꞌra hötödzém na hã.

Ĩwaihuꞌu da tsi.

Atsiwaihu ĩwẽ norĩ ĩré wamhã, te dza aipawaptob dzaꞌra ropire wamhã. Taha wa aipẽꞌẽ ma rowẽ di dza duré dahödzé wi te dza atsiꞌmadö.
Atsõrõwa ꞌremhã dahötöꞌö uptabi wamhã, ropire uꞌöbö te dza aiwi roꞌwaꞌrutu dzaꞌra waꞌaba ni.
Aiꞌra norĩ romahörö ĩwatsédé te te wapari dzaꞌra wamhã, te dza hötöꞌö wadzere dzaꞌra.

Tsada hã oto ꞌmanharĩ da.

Bíblia te tinha: ‘Niꞌwa hã te dza titsiwaihu te te ꞌre tsawi uꞌötsi. Ropipa hã tsô watobro wamhã, te dza ĩtsitsãnawã ne hã tãma ꞌre höimana.’ — Provérbios 17:17.

E atsiwaihu ĩré hã te te aima roti wẽ da duré te te aipawaptob da ropire wamhã. Tsada atsiptete ĩtsiwaihuꞌu na ꞌre anomro mono da. Õhõ te dza atsiptete duré atsiwaprotsi aihöimana õ di dza.

E MARĨ TSADA HÃ ꞌMANHARĨ DA — Roti ĩpawaptobdzé

Ta norĩ hã te dza aipawaptob dzaꞌra aima ĩtsawi petse norĩ nhiti aihöimana tõ da.

AIMRO ME ATSIPTETE ABA

Aimro me atsiptete aba

Bíblia te tinha: “Maparane mitsi nhipai u ĩwẽ, dapawaꞌö ĩwẽ tãma höimana dzahuré wa tsimiꞌẽ na te te ĩromhuri dzahuré na hã. Mitsi waptãꞌã wamhã ĩhöiba amo te te pawapto waihuꞌu petse di wahutu da.” (Eclesiastes 4:9, 10 TNM) Aibö duré piꞌõ te dza ꞌre höimana dzahuré tô daꞌutsu ꞌre ĩtsipawaptob dzahuré ne. Mare di daꞌutsu aimawi na ĩtsiꞌwapé dzahuré ne. ꞌMadöꞌö roti norĩ ĩmro ré norĩ ma.

Atsiꞌrãi waꞌro nherẽ aihöimana watsété tõ aimro ma. Atsimiparidze na aihöimana wamhã, rowẽ di dza.
Romhuri tsidöpötsi, atsima robdzanhamri aba ropire ĩwatobro na hã. Ropire ꞌwapé aba. Atsiꞌwapé aba tõ.
Bödö pitsutu aba marĩ aima ĩwẽ waꞌwa atsiré ꞌmanharĩ aba da.
Aipoꞌre puꞌu aba romhöimanadzé ĩwẽ atsô ĩwairébé aba na, ãté ꞌmadöꞌö aba aipoto waꞌwa aimro aba dzém na niwamhã romhöimanadzé ĩwẽ podo ĩhöiba amo.

“Aibö duré timro uburé na ãté tsitsadze dzahuré õ di dza, tadzahã tsada hã tsimitsutu te te romhuri dzahuré da. Aibö duré timro tsimitsutu te dza pitsutu dzahuré duré te dza tsiwatsutu dzahuré wẽ na watobro da.” — David.

ATSIWAIHUꞌU NORĨ TẼME ATSINA ROTÉTÉ

Atsiwaihuꞌu norĩ tẽme atsina rotété

Ĩwẽ uptabi atsiwaihuꞌu norĩ te te aipawaptob dzaꞌra wamhã, tadzahã rotsaꞌrata duré e niha a hã te dza ĩpawaptob dzaꞌra. Dapawapto wamhã, aima rowẽ di dza duré.
Bötö tsidöpötsi robdzanhamri nimahã atsiwaihuꞌu norĩ ma waihuꞌu da rowẽ dzô.
Tsadanharĩ atsiwaihuꞌu norĩ e niha ma ꞌwapé dzaꞌra ropire atsô ĩwatobrodzém ne.

“Wanhimirotsaꞌrada ꞌwaꞌrutu wamhã ropire uꞌöbö, watsiwaihuꞌu norĩ wadzaprõniꞌwa na te dza wama ꞌre höimana dzaꞌra. Bödödi ĩbö te dza wama höiꞌré dzaꞌra duré tiha na te dza wapoꞌre puꞌu dzaꞌra. Watsiwaihuꞌu norĩ te waꞌãma ꞌre hötöꞌö dzaꞌra duré tãma waihuꞌu petse dzaꞌra di ãma ꞌre ĩwahötöꞌö dzaꞌra mono na hã.” — Nicole.

AIꞌRA NORĨ UPARI

Aiꞌra norĩ upari

Bíblia te tinha: ‘ꞌRe atsitsaꞌra petse uꞌötsi dzaꞌra waꞌaba mono, aꞌö ꞌre dawapari dzaꞌra waꞌaba mono da hã. Aimreme hã ꞌre tsani tsuꞌu dzaꞌra waꞌaba mono tõ, aꞌö.’ (Tiago 1:19) Ãté pire di aiꞌra norĩ ma te te robdzanhamri dzaꞌra da, ĩpahi dzaꞌra dzém na hã duré ĩhötöꞌö dzaꞌra dzém na hã. Tadzahã atsimiparidze na wapari dzaꞌra wamhã te dza aima tsiwatsuꞌu dzaꞌra.

Pawapto na aiꞌra norĩ tsima ĩwẽ na höimana dzaꞌra da tsiwatsuꞌu dzaꞌra tsina. Nimahã daꞌra norĩ mreme waihuꞌu dzaꞌra õ di damama niwamhã dana nhoꞌa höimana dzaꞌra wamhã. Tadzahã nimomo tsiꞌabaꞌréi ré ãté tsima ĩwẽ na te dza tihöimana dzaꞌra tsiwatsuꞌu dzaꞌra da.
Pibui petse aiꞌra norĩ hã romahörö ĩwatsédé te te natsi wapari dzaꞌra tõ da.
Watsuꞌu na aiꞌra norĩ ma ĩꞌmanharĩdzé hã ropipa wi ate família ꞌmadöꞌö petse da.
Aiꞌra norĩ me, atsitsaꞌra dzaꞌra waꞌaba ĩꞌmanharĩ dzaꞌra waꞌaba dzéb da hã ropipa watobro wamhã duré ãma atsanho dzaꞌra waꞌaba ĩtsarina ꞌmanharĩ dzaꞌra waꞌaba da.

“Aiꞌra norĩ ma robdzanhamri da wamhã, wapari ĩtsimirotsaꞌrata dzaꞌra. Ãté ĩpahidzé, ĩhötöꞌödzé duré tidzahidzé te aiwi udö dzaꞌra. Taha wa, atsitséb ãna tãma watsuꞌu dzaꞌra na ĩtsine ĩꞌaihöimana dzaꞌra na hã duré watsuꞌu na ĩꞌmanharĩdzé ropire ꞌwapé da.” — Bethany.