ROPIRE ROPÖ

4 | Marĩ ĩwẽ dzô atsimipari

E MARĨ WA.

Ropire ropö ĩhöimana ãma ꞌre dahötöꞌö dzaꞌra mono wamhã, te dza tahödzé dzaꞌra ni duré dapẽꞌẽ nhibꞌuwa na te dza ꞌre dahöimana dzaꞌra. Da te rotsaꞌrata dzaꞌra õ wa romhöimanadzé dza ĩrowẽ na hã, marĩ ĩwẽ dzô ꞌre danhimipari dzaꞌra mono õ di. E niha.

Niꞌwam norĩ te te rotsaꞌrata dze dzaꞌra õ di dza ĩwatobrodzém na hã.
Niꞌwam norĩ ödzé na niwamhã warĩtsipãrĩ na te tihöimana dzaꞌra ropire na te te rotsaꞌrata dzaꞌra tõ da.
Niꞌwam norĩ duré te rotsaꞌrata dzaꞌra döꞌö dzaꞌra da. Te rotsaꞌrata dzaꞌra: “E marĩ da wa dza ꞌre ĩ̱höimana”.

Ĩwaihuꞌu da tsi

Ãté ropire aima ĩhöimana hã te dza tsina tsuru niwamhã te dza aiꞌutõrĩ petse.
Romhöimanadzé ĩwatsédé tsitsaprĩ õ nherẽ, tsada hã marĩ ꞌmanharĩ da aima rowẽdzéb da hã.
Ropotoꞌwai mreme te ropitsutu ropire dama ĩhöimana hã dza ĩtsiꞌutõrĩ na hã. Tahã umnhatsi waihuꞌu petse di.

Tsada hã oto ꞌmanharĩ da

Bíblia te tinha: ‘ꞌRe aihötöꞌö dzaꞌra waꞌaba mono tõ, dza ĩꞌawẽdzém na hã. Awẽ waptsi te dza ropire hã tsina ãwitsi. Awẽ tsidöpötsi te tô ropire hã ꞌre höimana dzaꞌra, taha bötö te hã.’ — Mateus 6:34.

Aihötöꞌö tõ awẽmhã dza ĩwatobro na hã. Aihötöꞌö uptabi wamhã dza ĩꞌawẽdzém na hã, ãma uwaimrami waihuꞌu õ di dza romhuri ĩꞌmanharĩdzéb da hã ãhãna.

Natsi rotsaꞌrata wamhã marĩ ĩwatsédé ãté dza ĩwairébé na hã, taré aihötöꞌö uptabi di dza duré marĩ ĩwẽ dzô atsimipari waihuꞌu õ di dza aptoꞌoré wab da.

E MARĨ TSADA HÃ ꞌMANHARĨ DA — Roti ĩpawaptobdzé

ĨWẼ NA ROTSAꞌRATA

Bíblia te tinha: ‘Robdzei ãna ꞌre ĩhöimana dzaꞌra mono norĩ hã te dza bötö böre ropire na ꞌre höimana dzaꞌra. Tane nherẽ, pẽꞌẽ toi uꞌötsi ꞌre ĩhöimana dzaꞌra mono norĩ hã te dza tihöimana dze dzém na ꞌre höimana uꞌötsi dzaꞌra.’ (Provérbios 15:15) Ropire na tsi rotsaꞌrata wamhã, ꞌmadöꞌö waihuꞌu õ di dza ropire hã dza ĩtsiꞌutõrĩ na hã. Tadzahã, ĩwẽ na rotsaꞌrata wamhã, aima wapu di dza ropire ꞌwapé da.

Roꞌmahörö natsi ꞌmadöꞌö tõ duré ãma rotsaꞌrata uꞌötsi tõ.
Bötö ꞌrãtsutu na, rotsaꞌrata marĩ ĩtsuru niwamhã ĩtsaꞌẽne ãma atsima ĩrowẽ na.
Tsihötö romhuri ã bötö na hã ĩꞌmanharĩdzéb da hã. Romhuri ĩtsaꞌẽne bötö ahö na ꞌmanharĩ da wamhã, bötö tsidöpötsi tsuru na ꞌmanharĩ. Ãne, bötö ꞌrãtsutu na, te dza atsima ĩrowẽ romhuri ãma ĩꞌuwaimrami na hã.

WAPTẼRẼ DANHIMIPAWAPTOBDZÉ

Bíblia te tinha: ‘Niꞌwa datsiré ꞌre höimana mono da, te te tsima ꞌre ĩwẽ mono õ hã te dza tihöimanadzém na tsi ꞌre tsiꞌmadöꞌö. Te dza duré uburé roti ĩwẽ hã te te tsiwi ꞌre awẽꞌõ.’ (Provérbios 18:1) Abꞌre ꞌrehö u aiwaptãꞌã wamhã, atsiꞌuihö na aiwatobro waihuꞌu õ di dza. Niꞌwa te te ĩꞌaipawaptob da tsi.

Waptẽrẽ atsitsãnawã duré atsiwaihuꞌu norĩ nhimipawaptobdzé.
Duré rotsaꞌrata a hã tãma ĩꞌmanharĩ waihuꞌu petse dzaꞌra dzém na hã. Dapawapto wamhã, ãté te dza ĩꞌmadö ropire aima ĩhöimana hã ĩtsaꞌẽtẽ uptabi õ na hã.
Marĩ ĩwẽ dzô atsimipari waihuꞌu õ wamhã, niwamhã aihöimana dzei õ wamhã, ãté tahã te höiꞌré ĩꞌaihödzé na hã, ãma ĩtsimiré robdzeiꞌõ uꞌötsi dzém na. Ãne wamhã, wẽ di dza dawedeꞌwai u aimorĩ da.a

a Ĩtsõrédzé Atsimidzaꞌretse! te te dama roti õ di dawededzém na. Datsiꞌuihö na te dza pitsutu ni.

Bíblia te ropitsutu marĩ ĩꞌuptabi na

Ropotoꞌwai ma romhuriꞌwa ma tô rowaptẽ ãne: ‘Aimreme hã ĩ̱para ma robꞌuiwẽꞌwa. Duré te te ĩ̱ma ꞌre ĩbödödi uiwẽ mono ꞌwa.’ (Salmo 119:105) ꞌMadöꞌö e niha Bíblia — Ropotoꞌwai Mreme hã — tô ãne na hã.

Barana nimomo watsiꞌabaꞌréi wamhã robꞌra wa ĩroꞌore te dza robꞌuiwẽ bödödi watsiꞌabaꞌré da. Ãne duré Ropotoꞌwai mreme nhimiroti te wadzaprõni dzaꞌra bödödi ĩwẽ na duré te wapawaptob dzaꞌra marĩ ĩwẽ na wa te pitsutu dzaꞌra da ropire nherẽ.

Taha nhipai u ĩroꞌore te robꞌuiwẽ bödödi romnhowa wa te ꞌmadöꞌö dzaꞌra da. Ãne duré Ropotoꞌwai mreme te wapawaptob dzaꞌra romnhowa wa te waihuꞌu dzaꞌra da aptoꞌoré dza ĩwatobro hã.

Bíblia ĩhöiwarobo ĩpe. Te rowatsuꞌu romnaꞌrata hawimhã duré te ropitsutu marĩ ĩwẽ na aptoꞌoré wab da. Te duré tsadaꞌö:

E niha.

E niha robdzépada ma tinhanaꞌrata. Ropotoꞌwai mreme te tinha: ‘Dawatsédé ma tô tidzébré naꞌrata, Adão ĩwatsétédzém hawi. Ta hawimhã ma tô duré dawatsédé hã te te ropé, uburé dapoto mono bö. Ta hawim haré, te aihĩni petse oto ꞌre dadöꞌö dzaꞌra, dawatsété na ꞌre danomro mono wa.’ — Romanos 5:12.

E marĩ wa.

E marĩ wa da te uprotsi waihuꞌu dzaꞌra õ di ropire ĩhöimana hã. Ropotoꞌwai mreme te tinha: ‘Ĩ̱ma waihuꞌu petse di, Jeová, aibö ꞌre ĩmorĩ mono tei õ na, ĩmorĩdzé hã. Aibö ꞌre ĩmorĩ mono hã tsitsaprõni waihuꞌu õ di, timorĩdzém na hã.’ (Jeremias 10:23 TNM) Roꞌmadöꞌö wamhã, ꞌmadöꞌö waihuꞌu petse di tahã ĩꞌuptabi na hã.

E marĩ.

E marĩ Ropotoꞌwa te dza ꞌmanha ropire te te dama uprotsi da. Ropotoꞌwai mreme te höiꞌré Ropotoꞌwa dza te te ĩꞌmanharĩdzé hã: ‘Te dza duré oto daꞌatõmo uꞌõ, dapẽꞌẽdzé õ uꞌötsi ꞌre dahöimana uꞌötsi dzaꞌra mono da. Tawamhã duré oto ꞌre dadöꞌö dzaꞌra mono õ di dza. Duré ꞌre datsiwaꞌõ dzaꞌra mono õ di dza oto. Duré dahödzé, da te ꞌre tsépata dzaꞌra mono õ di dza oto.’ — Apocalipse 21:4.