“Ngaba Ndiyaphupha Bethu?”
Le ngxelo ilandelayo ivela eMalawi ngokuphathelele enye yeeNdibano ZeSithili “Zabadumisi Abanovuyo” zamaNgqina kaYehova ezibalulekileyo embalini ebeziqhutywa kwelo ebudeni behlobo lowe-1995.
“XA USIHLA ngendlela enkulu, malunga nasembindini wonxweme lweLake Malawi, kukho umqondiso obekwe okwesihlandlo sokuqala emva kweminyaka engama-29. Ufundeka ngolu hlobo, ‘iNdibano YeSithili YamaNgqina kaYehova.’
“Ecaleni kwaloo mqondiso kumi ilori enkulu, yaye ngasemva kwakusihla iindwendwe ezingama-200 ezivela kwidolophu yaseMzuzu. Zize nemithwalo yeempahla, iingubo, iimbiza, izinto zokukha amanzi, ukutya, iinkuni neeBhayibhile ukuze zithelele abazalwana noodade bazo abangama-3 000 abavela kwezinye iindawo.
“Ngoxa sibulisa abazalwana abehla kule lori, uGeorge Chikako, oneminyaka engama-63 ubudala, uyafika, eqhuba ibhayisikile yakhe entlabathini, abeyiqhube kangangeentsuku ezimbini ukusuka eNkhotakota. Kangangeminyaka, uMzalwan’ uChikako ubetsala izigwebo ezine zentolongo ngenxa yokungavumi ukulalanisa kwimigaqo yeBhayibhile. Umza wakhe wafa ngenxa yokubethwa ngoxa wayevalelwe entolongweni. ‘Ngaba ndiyaphupha bethu?’ uMzalwan’ uChikako uyabuza. ‘Le ndibano iqhutywa emini emaqanda, yaye aba bantu bavuma iingoma zoBukumkani ngokuvakalayo! Iminyaka le yonke, bekufuneka sihlanganisane ngongcwalazi, iingoma zoBukumkani sizisebeze, yaye sihlikihle izandla zethu endaweni yokuqhwaba. Ngoku sihlanganisana ekuhleni, yaye abantu bamangalisiwe kukusibona sibaninzi kangaka ngoxa bebecinga ukuba siligcuntswana!’
“Indawo yendibano ibiyelwe ngengca yaza yagqunywa ngeengcongolo ukuze kubekho umthunzi. Oongquphantsi abancinane abenziwe ngengca nezindlu zokulala abantu abaninzi ezivulekileyo zakhiwa ukuze iindwendwe zilale kuzo. Impepho yasebusuku izaliswe sisandi samazwi aculayo amnandi angasacinezelwanga kukoyika ukutshutshiswa.
“Hayi indlela ekufaneleke ngayo ukuba umxholo wale ndibano uthi ‘Abadumisi Abanovuyo’!”
[Inkcazelo Ngomfanekiso okwiphepha 32]
Mountain High Maps® Copyright © 1995 Digital Wisdom, Inc.