Ukunyuka Sisiya Kwikomkhulu LaseSaba, IThe Bottom
ISIQITHI samaDatshi saseSaba sasiyindawo yabaphangi baselwandle ababehamba kwiCaribbean Sea befuna ukuphanga. Namhlanje, esi siqithi sincinane, esikwiikhilomitha ezingama-240 ukusuka kwimpuma yePuerto Rico, sihlala abantu abali-1 600, yaye aba-5 kubo ngamaNgqina kaYehova. Noko ke, aba balungiseleli abakhaliphileyo benza into exabiseke ngakumbi kunokuphanga. Ngenkuthalo bafuna abantu ‘abanotyekelo olufanelekileyo ngobomi obungunaphakade.’—IZenzo 13:48.
Iindaba ezilungileyo zoBukumkani bukaThixo zafika kwesi siqithi ngoJuni 22, 1952, xa kwafika isikhephe kunxweme lwaseSaba esiziimitha ezili-18 ubude esinguSibia, siqhutywa ngamaNgqina kaYehova. (Mateyu 24:14) Abavangeli basemazweni uGust Maki noStanley Carter bahamba kwiThe Ladder, indlela enezinyuko ezinamatye angama-500 esinge kwiThe Bottom, kwikomkhulu leSaba.a Kangangeenkulungwane, le ndlela imxinwa yayiyiyo kuphela indlela yokufikelela kubantu abahlala kwesi siqithi.
Ingxelo yokuqala eyabhalwa ngomsebenzi wokushumayela wamaKristu eSaba yavela kwi-1966 Yearbook of Jehovah’s Witnesses. Ngokutsho kwaloo ngxelo, kwakukho iNgqina elinye kuphela kweso siqithi. Kamva, intsapho evela eKhanada yachitha iminyaka eliqela ishumayela iindaba ezilungileyo apho. Kutshanje, uRussel noKathy, isibini esithabathe umhlala-phantsi esivela eUnited States, saya eSaba saza saqalisa ukushumayela apho. Khawufunde ibali labo.
Ukutyelela ESaba
Mna nomfazi wam safika ngenqwelo-moya siziindwendwe zikaRonald owayehlala apha yaye enguye yedwa iNgqina kwesi siqithi ebudeni beminyaka yee-1990. Umntu oza kusamkela usilindele kwisikhululo seenqwelo-moya. Kumvuyisa gqitha ukubona ukuba siphethe ibhokisi encinane yemifuno esasize nayo njengesipho, ekubeni kungekho ziindawo zithengisa imifuno kwesi siqithi. Emva kokukhwela kwilori encinane, sahamba kancinane kuloo majiko-jiko kwiMount Scenery sisinge kwincopho yale ntaba-mlilo engasadubuliyo.
Sema kwidolophana ekuthiwa yiHell’s Gate, ngoxa uRonald ejonga ibhodi enezaziso yasekuhlaleni ukuze abone enoba sisekho kusini na isaziso sokumemela abantu kwintetho yesidlangalala yangeCawa. Savuya sakubona ukuba sisekho. Wabuyela kwakhona elorini, saza saqhubeka sinyuka sisiya kweyona dolophana inkulu kwesi siqithi, iWindwardside. Le dolophana intle ikwicala elivuthuza umoya kwesi siqithi, kwiimitha ezingama-400 ukuphakama. Njengoko sifika ekhayeni likaRon, sibona ngaphandle ibhodi ebhalwe iHolo YoBukumkani YamaNgqina KaYehova ebhalwe ngamagama aqaqambileyo.
Ebudeni besidlo sasemini ndibuza umbuzo obangele ukuba sityelele apho, “Kwenzeka ntoni ukuze ube ngumvakalisi woBukumkani walapha eSaba?”
URon uyaphendula: “Xa kwaphela umsebenzi wokwakha kwisebe lamaNgqina kaYehova lasePuerto Rico ngowe-1993, mna nomfazi wam sasinomdla wokuya kusebenza kwelinye ilizwe. Ngaphambilana, sasityelele apha eSaba nesinye isibini esingoovulindlela yaye safumanisa ukuba kukho abantu abali-1 400 abahlala apha kodwa amaNgqina akakho. Ngoko sathetha neKomiti yeSebe lasePuerto Rico ukuze sifudukele apha.
“Izinto zazisihambela kakuhle, yaye ekugqibeleni safumana imvume yokuhlala apha. Okubuhlungu kukuba, kwiminyaka emibini kamva umfazi wam wagula kakhulu, yaye sabuyela eKhalifoniya. Emva kokufa kwakhe, ndabuyela apha eSaba. Kaloku, andithandi ukuqala into ndiyiyeke phakathi.”
Ukushumayela Kwindlu Ngendlu ESaba
Igumbi lokuphumla kwindlu kaRon eneminyaka elikhulu ikho iyakwazi nokuba yiHolo yoBukumkani.b Njengoko sisitya isidlo sakusasa yaye silungiselela ukuya entsimini, imvula imanzisa ikhitshi lethu eliphandle. Emva kwesidlo sakusasa, nakuba kusibekele siyahamba sisiya kushumayela kwindlu ngendlu eThe Bottom. Kwindlu nganye, uRon ubulisa mntu ngamnye ngegama. Ngokuyintloko sithetha nabantu ngesiganeko sakutshanje esikwiindaba zasekuhlaleni. Abantu abaninzi bayamazi uRon nomsebenzi wakhe wokushumayela, yaye abaninzi bazamkela lula iincwadi zeBhayibhile.
Kunokuba nzima ukugcina ingxelo yabo banomdla kwisigidimi soBukumkani ukuba akubazi abantu abahlala kule dolophana. Ngoba? URon uthi ngoba “umthetho walapha ufuna zonke izindlu zipeyintwe ngombala ofanayo.” Ndaqonda ukuba oko kunjalo njengoko ndandiqwalasela zonke izindlu eziseSaba ukuba zimhlophe yaye zinophahla olubomvu.
Emva kokugqiba kwethu ukuxubusha nomntu ngeBhayibhile, siyammema loo mntu ukuba aze kwintetho yesidlangalala esekelwe eBhayibhileni ngeCawa kwiHolo yoBukumkani. Xa uRon esekhaya kwesi siqithi, unikela intetho yesidlangalala veki nganye. Ngoku, kuqhutywa izifundo zeBhayibhile ezili-17 eSaba. Kweza abantu abangama-20 kwiSikhumbuzo sokufa kukaKristu ngowama-2004. Yaye nangona eli nani linokubonakala lilincinane kakhulu, limela umntu omnye kwabalikhulu kubemi baseSaba!
Eneneni, amaNgqina kaYehova aye azibhokoxa ukuze afikelele abantu abaninzi kangangoko kunokwenzeka ngesigidimi sikaThixo sosindiso. Enoba sisiqithi esincinane saseSaba okanye lilizwekazi, amaNgqina kaYehova alufeza ngokuthembekileyo uthumo lokuba ‘enze abafundi abantu beentlanga zonke.’—Mateyu 28:19.
Okubuhlungu kukuba, luphelile utyelelo lwethu. Yaye sikhwela inqwelo-moya yethu, size sinduluke. Siya kuhlala silukhumbula olu tyelelo lwaseSaba nexesha esilichithe sinyuka sisiya eThe Bottom!
[Imibhalo esemazantsi]
a Kubonakala ukuba abaphangi babeyibiza le ndawo ngokuthi yiThe Bottom kuba babecinga ukuba yayingummandla osemazantsi kwintabamlilo.
b NgoSeptemba 28, 2003, amatsha-ntliziyo avela eFlorida, eUnited States, aya eSaba aza alungisa isakhiwo esikufuphi, yaye ngoku siyiHolo yoBukumkani.
[Iimaphu ezikwiphepha 10]
(Ukuba ufuna inkcazelo ehlahlelwe kakuhle, yiya kwimpapasho)
PUERTO RICO
[Inkcazelo Ngomfanekiso okwiphepha 10]
Background: www.sabatourism.com