‘UYihlo Unenceba’

“Qhubekani nisiba nenceba, kanye njengoko uYihlo enenceba.”—LUKA 6:36.

1, 2. Amazwi kaYesu kubabhali nabaFarisi nakubalandeli bakhe abonisa njani ukuba inceba luphawu olufanelekileyo?

UMTHETHO owanikwa uMoses wawuqulethe imithetho nemiyalelo eyahlukahlukeneyo emalunga nama-600. Nakuba yayimele ithotyelwe yonke imiyalelo ekuloo Mthetho, nenceba yayimele iboniswe. Cinga oko kwathethwa nguYesu kubaFarisi ababengenanceba. Kwizihlandlo ezibini wabakhalimela, ebaxelela oko kwathethwa nguThixo esithi: “Ndifuna inceba, kungekhona umbingelelo.” (Mateyu 9:10-13; 12:1-7; Hoseya 6:6) Ngasekupheleni kobulungiseleli bakhe, uYesu wathi: “Yeha nina, babhali nabaFarisi, bahanahanisindini! ngokuba ninikela isishumi setyeleba nesedile nesekumin, kodwa niye nayigatya imibandela enzima ngakumbi yoMthetho, eyile, okusesikweni nenceba nokuthembeka.”—Mateyu 23:23.

² Ayinakuphikwa into yokuba, inceba yayibaluleke gqitha kuYesu. Wathi kubalandeli bakhe: “Qhubekani nisiba nenceba, kanye njengoko uYihlo enenceba.” (Luka 6:36) Noko ke, ukuze sibe “ngabaxelisa uThixo” kule nkalo, kufuneka sazi eyona nto iyiyo inceba. (Efese 5:1) Enye into, xa siziqonda iingenelo zokuba nenceba, siya kutsho sibe nalo ngakumbi olu phawu ebomini bethu.

Inceba Kwabo Basweleyo

3. Kutheni simele sikhangele kuYehova ukuze sazi eyona nto iyiyo inceba?

³ Umdumisi wathi: “UYehova unobabalo nenceba, uzeka kade umsindo yaye unobubele bothando kakhulu. UYehova ulungile kubo bonke, neenceba zakhe zikuyo yonke imisebenzi yakhe.” (INdumiso 145:8, 9) UYehova ‘nguBawo onenceba noThixo wentuthuzelo yonke.’ (2 Korinte 1:3) Inceba ibonakala xa sisiba novelwano kwabanye. Olu phawu lubalasele kubuntu bukaThixo. Umzekelo nemiyalelo yakhe zisinceda sibone eyona nto iyiyo inceba.

4. UIsaya 49:15 usifundisa ntoni ngenceba?

⁴ Njengokuba kubhalwe kuIsaya 49:15, uYehova uthi: “Umfazi angalulibala na usana lwakhe, angavakalelwa ngonyana wesisu sakhe?” Amagama esiHebhere asondeleyo kweli liguqulelwe apha ngokuthi “ukuvakalelwa” anxulunyaniswa nenceba kwiNdumiso 145:8, 9 ecatshulwe ngasentla. Iimvakalelo ezenza uYehova abe nenceba zifaniswa nobubele obudla ngokuboniswa ngumfazi kusana lwakhe. Maxa wambi usana luyalamba okanye lufune okuthile. Ngenxa yobubele novelwano analo, lo mfazi unika usana oko lukufunayo. Yiloo ndlela kanye uYehova avakalelwa ngayo ngabo abenzela inceba.

5. UYehova wazibonakalisa njani ‘esisityebi ngenceba’ kuSirayeli?

⁵ Kuhle kona ukuba novelwano kwabanye, kodwa eyona nto ibaluleke ngakumbi kukubanceda abo basweleyo. Cinga nje ngendlela awasabela ngayo uYehova xa abanquli bakhe babengamakhoboka eYiputa kwiminyaka emalunga nama-3 500 eyadlulayo. Wathi kuMoses: “Ngokungathandabuzekiyo ndiyibonile inkxwaleko yabantu bam abaseYiputa, yaye ndisivile isikhalo sabo ngenxa yabo babaqweqwedisayo emsebenzini; kuba ndiyazi kakuhle intlungu yabo. Ndihlile ke ukuze ndibahlangule esandleni samaYiputa ndize ndibanyuse baphume kwelo lizwe, baye ezweni elilungileyo neliphangaleleyo, ezweni eliqukuqela ubisi nobusi.” (Eksodus 3:7, 8) Malunga neminyaka engama-500 amaSirayeli ekhululwe eYiputa, uYehova wawakhumbuza oku: “Ndim owanyusa uSirayeli ndimkhupha eYiputa nowanihlangulayo esandleni seYiputa nasesandleni sazo zonke izikumkani ezazinicinezela.” (1 Samuweli 10:18) Ngenxa yokuphambuka kwimilinganiselo yobulungisa kaThixo, amaSirayeli ayesoloko ethwaxwa ziinkxwaleko. Sekunjalo, uYehova wayesiba novelwano kuwo emana ukuwahlangula. (ABagwebi 2:11-16; 2 Kronike 36:15) Oku kuyibonisa kakuhle indlela uThixo onothando abaphatha ngayo abo basweleyo, abasengozini, okanye ebunzimeni. UYehova ‘usisityebi ngenceba.’—Efese 2:4.

6. UYesu Kristu wamxelisa njani uYise ekuboniseni inceba?

⁶ Xa wayelapha emhlabeni, uYesu Kristu wamxelisa ngokugqibeleleyo uYise ekubeni nenceba. Wathini uYesu akubongozwa ziimfama ezimbini zisithi: “Nkosi, Nyana kaDavide, yiba nenceba kuthi”? Zazicela uYesu ukuba azivule amehlo. Wawavula amehlo azo, kodwa ekwenza oko ngovelwano. IBhayibhile ithi: ‘Enosizi, uYesu wachukumisa amehlo azo, yaye ngoko nangoko zabona.’ (Mateyu 20:30-34) Ngenxa yosizi uYesu wenza imimangaliso emininzi eyanceda abo babeziimfama, abanye bephethwe ziidemon, abanye beneqhenqa kwakunye nabazali abanabantwana abaxhwalekileyo.—Mateyu 9:27; 15:22; 17:15; Marko 5:18, 19; Luka 17:12, 13.

7. Sifunda ntoni kwimizekelo kaYehova uThixo noNyana wakhe ngokuphathelele inceba?

⁷ Le mizekelo kaYehova uThixo noYesu Kristu ibonisa ukuba inceba ibonakala kwiinkalo ezimbini—ukuba nemfesane, uvelwano, okanye ukuba nosizi ngalowo ufuna uncedo nokwenza okuthile ukuze umncede. Ukuze ube nenceba zimele zenzeke zombini ezi zinto. EZibhalweni, inceba isoloko ibhekisela kwisenzo esihle sobubele kwabo basweleyo. Noko ke, inceba inokubonakaliswa njani xa kuxoxwa amatyala? Ngaba iquka oko kusenokujongwa kakubi, njengokuxolela umoni angohlwaywa?

Ukwenzela Aboni Inceba

8, 9. Yayiquka ntoni inceba eyenzelwa uDavide emva kokona kwakhe noBhatshebha?

⁸ Khawucinge ngoko kwenzekayo emva kokuba umprofeti uNathan ethethe noKumkani uDavide wakwaSirayeli ngokukrexeza kwakhe noBhatshebha. UDavide oguqukileyo wathandaza wathi: “Ndibabale, Thixo, ngokobubele bakho obunothando. Ngokobuninzi beenceba zakho kususe ukunxaxha kwam. Ndihlambe ngokucokisekileyo kwisiphoso sam, undihlambulule nakwisono sam. Kuba ukunxaxha kwam ndiyakwazi, nesono sam siphambi kwam rhoqo. Ndone kuwe, kuwe wedwa, ndenze okubi emehlweni akho.”—INdumiso 51:1-4.

⁹ UDavide wayezisola ngokusuk’ entliziyweni. UYehova wasixolela isono sakhe waza akabohlwaya ngendlela ababelindele ngayo noBhatshebha. NgokoMthetho kaMoses, uDavide noBhatsheba babemele babulawe. (Duteronomi 22:22) Ngoxa bengazange babhungce kuyo yonke imiphumo yesono sabo, bona baxolelwa baza baqhubeka bephila. (2 Samuweli 12:13) Inceba kaThixo iquka ukuxolela iziphoso. Kodwa, akasibandezi isohlwayo xa kufanelekile.

10. Nakuba uYehova esigweba ngenceba, kutheni singamele sone ngabom kuba sithembele ngenceba yakhe?

¹⁰ Ekubeni “isono sangena ngamntu mnye [uAdam] ehlabathini” ‘nomvuzo isono esiwuhlawulayo ikukufa,’ bonke abantu bafanelwe kukufa. (Roma 5:12; 6:23) Simele sibe nombulelo ongazenzisiyo ngokuba nenceba kukaYehova xa esigweba. Kwelinye icala simele silumke singoni ngabom kuba sithembele ngenceba kaThixo. IDuteronomi 32:4 ithi: “Zonke iindlela zakhe [uYehova] zisesikweni.” Xa ekhetha ukusenzela inceba, uThixo akayibethi ngoyaba imilinganiselo yakhe egqibeleleyo yokusesikweni.

11. UYehova wabonisa njani ukuba ukuhlonela ngendlela efanelekileyo okusesikweni xa wayephethe umba wokona kukaDavide noBhatshebha?

¹¹ Ngaphambi kokuba kuncitshiswe isigwebo sokufa kwityala likaDavide noBhatshebha, kwafuneka kuqale kuxolelwe izono zabo. Abagwebi bakwaSirayeli babengenalo igunya lokuxolela izono. Ukuba lalichotshelwe ngabo elo tyala, babengayi kuba nandlela yimbi ngaphandle kokubagwebela ukufa. Wawusitsho njalo uMthetho. Kodwa ngenxa yomnqophiso awawenza noDavide, uYehova waqala wakhangela ukuba sasikho kusini na isizathu sokuxolela uDavide kwisono sakhe. (2 Samuweli 7:12-16) Ngoko ke, uYehova uThixo, “uMgwebi womhlaba wonke,” ‘nongumgocagoci wentliziyo,’ wakhetha ukulisingatha ngokwakhe elo tyala. (Genesis 18:25; 1 Kronike 29:17) UThixo wayekubona kakuhle oko kusentliziyweni kaDavide, ebona ukuba wayeguquke ngokwenene waza ke wamxolela.

12. Yintoni enokwenziwa ngabantu abanesono ukuze benzelwe inceba nguThixo?

¹² Inceba asibonisa yona uYehova ngokwenza ilungiselelo lokusikhulula kwisohlwayo sokufa esasifumana ngenxa yesono ibonisa ukuthanda kwakhe okusesikweni. Ukuze zikwazi ukuxolelwa izono zethu ngaphandle kokwaphulwa kwemilinganiselo yokusesikweni, uYehova uye walungiselela idini lentlawulelo loNyana wakhe, uYesu Kristu—esona senzo sakha sasikhulu esibonisa inceba anayo. (Mateyu 20:28; Roma 6:22, 23) Ukuze sikwazi ukuxhamla kule nceba kaThixo, enokusinceda sisinde kwisohlwayo sokufa esasizuza ngenxa yesono, simele ‘sibonise ukholo kuNyana wakhe.’—Yohane 3:16, 36.

UThixo Onenceba Nokusesikweni

13, 14. Ngaba inceba kaThixo iyakuchaphazela okusesikweni? Cacisa.

¹³ Nakuba inceba kaYehova ingangqubani nemilinganiselo yakhe yokusesikweni, ngaba likho ifuthe eba nalo kokusesikweni kwakhe? Ngaba inceba igxobha okusesikweni kukaThixo? Nakanye.

¹⁴ Esebenzisa umprofeti uHoseya, uYehova wathi kumaSirayeli: “Ndiza kukugana ube ngowam ukusa kwixesha elingenammiselo, ndikugane ube ngowam ngobulungisa nangokusesikweni nangobubele bothando nangenceba.” (Hoseya 2:19) La mazwi abonisa kakuhle ukuba inceba kaYehova isoloko ivisisana nezinye iimpawu zakhe, eziquka okusesikweni. UYehova ‘nguThixo onenceba nobabalo, oxolela isiphoso nokunxaxha nesono, ongakhe amenze msulwa ofanelwe sisohlwayo.’ (Eksodus 34:6, 7) UnguThixo onenceba nokusesikweni. Xa ithetha ngaye, iBhayibhile ithi: “NguLiwa, ugqibelele umsebenzi wakhe, ngokuba zonke iindlela zakhe zisesikweni.” (Duteronomi 32:4) Okusesikweni kukaThixo kugqibelele, njengokuba injalo nenceba yakhe. Kwezi mpawu alukho olubaluleke ngaphezu kolunye, kungekho noluxhomekeke kolunye. Zombini zisebenzisana ngokugqibeleleyo.

15, 16. (a) Yintoni ebonisa ukuba uThixo akabi ngqwabalala xa ephumeza okusesikweni? (b) Yintoni abanokuqiniseka ngayo abakhonzi bakaYehova xa egweba le nkqubo yezinto ikhoyo nengendawo?

¹⁵ UYehova akabi ngqwabalala xa ephumeza okusesikweni. Ngokuqhelekileyo okusesikweni kwenziwa ngokwenza okusemthethweni, ibe isigwebo sako sidla ngokufuna bohlwaywe ngendlela ebafaneleyo abenzi bokubi. Noko ke, okusesikweni kukaThixo kuquka ukusindiswa kwabo bafanelekayo. Ngokomzekelo, xa kwakutshatyalaliswa abangendawo kwisixeko saseSodom nesaseGomora, kwasinda usolusapho uLote neentombi zakhe ezimbini.—Genesis 19:12-26.

¹⁶ Sinokuqiniseka ukuba xa uYehova egweba le nkqubo yezinto ikhoyo nengendawo, “isihlwele esikhulu” sabanquli bokwenyaniso, esiye ‘sayihlamba imiwunduzo yaso sayenza mhlophe egazini leMvana,’ siya kusindiswa. Ngoko ke, siya ‘kuphuma embandezelweni enkulu.’—ISityhilelo 7:9-14.

Kutheni Simele Sibe Nenceba?

17. Sisiphi esona sizathu sokuba nenceba?

¹⁷ Enyanisweni le mizekelo kaYehova noYesu Kristu isifundisa eyona nto iyiyo inceba. Xa isichazela esona sizathu sokuba nenceba, iMizekeliso 19:17 ithi: “Obabala isisweli uboleka uYehova, yaye impatho yakhe uya kumbuyekeza ngayo.” UYehova uyavuya xa sixelisa yena noNyana wakhe ngokuba nenceba kwabanye. (1 Korinte 11:1) Nabanye batsho bafune ukuba nenceba, kuba olu phawu luyasulela.—Luka 6:38.

18. Kutheni simele sizabalazele ukuba nenceba?

¹⁸ Inceba iquka iimpawu ezininzi ezintle. Iquka ukuba nomsa, uthando, ububele nokulunga. Ukuba novelwano okanye usizi zezona zinto zisenza sibe nenceba. Nakuba engalalanisi kokusesikweni xa esenzela abantu inceba, uYehova uzeka kade umsindo yaye ngomonde unika abenzi bokubi ithuba elaneleyo lokuguquka. (2 Petros 3:9, 10) Ngoko inceba iquka umonde nokuzeka kade umsindo. Ekubeni ibunjwa ziimpawu ezininzi ezintle—kuquka iinkalo ezahlukeneyo zesiqhamo somoya kaThixo—inceba iba sisiseko esiluncedo ekuhlakuleleni ezinye zezi mpawu. (Galati 5:22, 23) Kubaluleke gqitha ukuba sizabalazele ukuba nenceba.

“Banoyolo Abanenceba”

19, 20. Kunokutshiwo njani ukuba inceba iyasongamela isigwebo?

¹⁹ Umfundi uYakobi usixelela isizathu sokuba simele sihlale sisiba nenceba kwabanye. Uthi: “Inceba iyasongamela isigwebo.” (Yakobi 2:13b) UYakobi ubhekisela kwinceba abenzelana yona abakhonzi bakaYehova. Iyasongamela isigwebo kuba xa umntu eza “kuziphendulela kuThixo,” uYehova akalibali ukubonisa inceba aze amxolele ngenxa yedini lentlawulelo loNyana wakhe. (Roma 14:12) Akuthandabuzeki ukuba, esinye sezizathu zokuba uDavide enzelwe inceba kwisono sakhe noBhatshebha kukuba naye wayenenceba kwabanye. (1 Samuweli 24:4-7) Kwelinye icala, “lowo ungenanceba uya kugwetywa ngokungenanceba.” (Yakobi 2:13a) Yiloo nto ‘abangenanceba’ bebalelwa phakathi kwabantu uThixo abajonga ‘njengabafanelwe kukufa.’—Roma 1:31, 32.

²⁰ UYesu wathi kwiNtshumayelo yakhe yaseNtabeni: “Banoyolo abanenceba, kuba baya kwenzelwa inceba.” (Mateyu 5:7) La mazwi abonisa phandle ukuba abo bafuna ukwenzelwa inceba nguThixo nabo bamele babe nenceba kwabanye! Inqaku elilandelayo liza kuthetha ngendlela esinokubonisa ngayo inceba kwabanye mihla le.

Ufunde Ntoni?

• Yintoni inceba?

• Ziziphi iindlela eboniswa ngazo inceba?

• Kwenzeka njani ukuba uYehova abe nguThixo wenceba nokusesikweni?

• Kutheni simele sibe nenceba?

[Umfanekiso okwiphepha 21]

Indlela uYehova aba nomsa ngayo kwabasweleyo ifana neyomfazi kusana lwakhe

[Umfanekiso okwiphepha 23]

Yintoni esiyifundayo ngenceba kwimimangaliso kaYesu?

[Umfanekiso okwiphepha 24]

Ngaba uYehova wakutyeshela okusesikweni ngokwenzela uDavide inceba?

[Umfanekiso okwiphepha 25]

Inceba kaThixo kuboni iyavisisana nokusesikweni kwakhe