“Ndachukumiseka Kukuzimisela Kwakhe”

UGÜNTER GRASS, umbhali weencwadi waseJamani owafumana iBhaso likaNobel Leencwadi ngowe-1999, wapapasha ibali lobomi bakhe ngowama-2006. Kweli bali, uchaza ixesha awathunyelwa ngalo kumkhosi wokhuselo waseJamani. Uphinda abalise nangendoda eyamchukumisa kangangokuba nasemva kweminyaka engama-60 akakayilibali. Yindoda eyayingagungqi kukholo lwayo nakuba yayitshutshiswa.

Kudliwano-ndlebe olwalukwiphephandaba lamihla le iFrankfurter Allgemeine Zeitung, uGrass zange ayilibale le ndoda ibalaseleyo, eyala kwaphela ukuya emfazweni. UGrass uthi le ndoda “yayingamkeli naziphi na iingcamango ezazithandwa gqitha ngelo xesha, enoba zezobuNazi, ubuKomanisi, nkqu nobuSoshiyali. Yona yayiliNgqina likaYehova qha.” UGrass akalikhumbuli igama leli Ngqina, kodwa ulibiza ngokuthi nguThina Asikwenzi Oko. Abaphengululi bamaNgqina kaYehova bafumanisa ukuba le ndoda nguJoachim Alfermann. Wayehlala engonjwa, ethotywa isidima, aze avalelwe yedwa esiseleni. Kuko konke oko zange agungqe, wala ukuya emfazweni.

Kolu dliwano-ndlebe uGrass uthi: “Ndachukumiseka kukuzimisela kwakhe. Ndandizibuza oku: Yintoni le ibangela ukuba anyamezele kangaka? Ukwazi njani yena?” Emva kokunyamezela kwimigudu engapheliyo yokwaphula ingqibelelo yakhe kuThixo, uAlfermann wathunyelwa kwinkampu yoxinaniso eStutthof ngoFebruwari 1944. Emva kokuba ekhululwe ngoAprili 1945, esinde emfazweni, wahlala eliNgqina likaYehova elithembekileyo de kwasa ekufeni kwakhe ngowe-1998.

UAlfermann wayengomnye kumaNgqina ali-13 400—aseJamani nawamanye amazwe awayephantsi kwamaNazi—awayebandezeleka gqitha ngenxa yokholo lwawo. Athobela iBhayibhile, engazingeni ezopolitiko yaye esala ukuya emfazweni. (Mateyu 26:52; Yohane 18:36) Amalunga nama-4 200 amaNgqina awayekwezo nkampu zoxinaniso, ibe kuwo kwafa ali-1 490. Nanamhl’ oku, abaninzi abangengomaNgqina basachukunyiswa kukuma kwawo engagungqi.

[Umfanekiso okwiphepha 32]

UJoachim Alfermann