Ukuvuyiswa ‘Kukoyisa NeMvana’
KWILETA awayibhala ngowe-1971, uCarey W. Barber wathetha ngeminyaka yakhe yokuqala engama-50 yokukhonza uThixo wenyaniso wathi: “Le minyaka ndikwinkonzo kaYehova ibimnandi ngeyona ndlela. Ukunxulumana nabantu bakhe; ukukhuseleka kubenzi bobubi behlabathi likaSathana; ithemba lokoyisa neMvana, uYesu Kristu; nokuqiniseka ukuba uYehova uyakuthanda, kubangela uxolo nolwaneliseko olulondoloza intliziyo luze lukuqinisekise ukuba uza koyisa ekugqibeleni.”
Kuthe kwiminyaka emithandathu emva koko, uMzalwan’ uBarber, umKristu othanjiswe ngomoya, wamiselwa njengelungu leQumrhu Elilawulayo lamaNgqina kaYehova. Kwiminyaka engama-30 ekweso sigxina, uqhubekile ekhangele phambili ‘ekoyiseni neMvana.’ Ukwazile ukuyenza loo nto ngokuqhubeka ethembekile de wafa eneminyaka eli-101 ubudala ngeCawa, Aprili 8, 2007.—1 Korinte 15:57.
UCarey Barber wazalelwa eNgilani ngowe-1905, waza wabhaptizwa eWinnipeg, eKhanada, ngowe-1921. Kwiminyaka emibini emva koko, benewele lakhe uNorman, bathunyelwa eBrooklyn, eNew York, ukuya kuncedisa kwesinye isabelo. Ngelo xesha, abantu bakaYehova babesele beza kuqalisa ukuzenzela ngokwabo iincwadi zabo ababeza kuzisebenzisa ekuvakaliseni iindaba ezilungileyo zoBukumkani “kuwo wonke umhlaba omiweyo.” (Mateyu 24:14) Omnye wemisebenzi yokuqala kaMzalwan’ uBarber yayikukusebenza kumatshini omncinane wokushicilela. Phakathi kwezinto ezazishicilelwa ziingxelo zamatyala athile ezazithunyelwa kwiNkundla Ephakamileyo YaseUnited States. Ekuhambeni kwexesha, uMzalwan’ uBarber wasebenza kwiSebe Lenkonzo, ejongene nemiba yamabandla nomsebenzi wokushumayela kulo lonke elo lizwe.
Ekubeni wayewazi loo msebenzi, uMzalwan’ uBarber wakufanelekela kakuhle ukuba ngumlungiseleli ohambahambayo ngowe-1948, etyelela iindibano namabandla kwinxalenye esentshona yeUnited States. Wayesithi kumvuyisa gqitha ukubethwa ngumoya, eshumayela iindaba ezilungileyo ebantwini. Esi sabelo sanika abazalwana noodade abaninzi ilungelo lokusebenza noMzalwan’ uBarber. Ubukrelekrele bakhe nokuwuthanda kwakhe umsebenzi wokushumayela kwaba luncedo gqitha xa kamva waya kwiklasi yama-26 yeSikolo seBhayibhile seWatchtower saseGiliyadi. Esekweso sikolo, waqhelana nomnye umfundi owayevela eKhanada eSydney, uLee Brewer. Emva kokuba bephumelele batshata nje kwabe sekufuneka bangen’ endleleni baye kukhonza amabandla akummandla waseChicago, eIllinois. UDade Barber waba liqabane nomxhasi othembekileyo kumyeni wakhe kwiminyaka engamashumi amabini yokuhambahamba kwabo.
Abantu abamazi kakuhle uMzalwan’ uBarber kwiminyaka awayengumveleli wesithili nowesiphaluka okanye kwiminyaka engama-30 ayichithe esebenza yaye ehambahamba njengelungu leQumrhu Elilawulayo abasayi kuze bazilibale iintetho zakhe namagqabaza akhe achukumisayo. Ngokwenene kuyasivuyisa ‘ukoyisa kwakhe neMvana.’