‘Sishumayela ILizwi’
1 Ngokuvisisana nengcaciso yeBhayibhile ‘yemihla yokugqibela,’ namhlanje inkoliso yabantu ‘inohlobo lozinikelo lobuthixo’ kuphela. (2 Tim. 3:1, 5) Oku kubangelwa kukuba iinkokeli zonqulo azikwazanga ukunikela ukhokelo lokwenene lokomoya kwimihlambi yazo. Abefundisi beNgqobhoko abayifundisi iBhayibhile. Bathanda ukubhedesha nje iimfundiso eziphuthileyo zezithandi zobulumko okanye ezeengcali zezakwalizwi okanye ukuzixakekisa ngemibandela yasekuhlaleni neyezobupolitika kunokushumayela iLizwi likaThixo. Uninzi lweenkokeli zonqulo aluyikholelwa kwaiBhayibhile. Zivakalelwa kukuba iphelelwe lixesha, yaye ngobugwenxa zixhasa ingcamango yendaleko kunemfundiso yeBhayibhile engoMdali Ozukileyo. Inkoliso yabefundisi ayilisebenzisi kwaukulisebenzisa igama likaThixo lobuqu, yaye ayizidubi nangokushenxiswa kwalo kwinkoliso yeenguqulelo zeBhayibhile zanamhlanje.
2 Njengokuba kwakunjalo ngeenkokeli zonqulo ngomhla kaYesu, abefundisi banamhlanje bashumayelela ilize. (Mat. 15:8, 9) Kunjengokuba nomprofeti uAmosi waxela kwangaphambili. Kukho ‘ukulamba, kungekuko ukulambela isonka, unxano, kungekuko ukunxanela amanzi, kodwa ukulambela ukuva amazwi kaYehova.’ (Amosi 8:11) Ngaphezu kweento zonke, abantu bafuna ukudla kokomoya okuseLizwini likaThixo.
3 Indlela Yokwanelisa Intswelo Yokomoya Yabantu: UPawulos wabongoza uTimoti esithi makabambelele ‘kwimibhalo engcwele, enokwenza [umntu] abe nobulumko obusa elusindisweni,’ waza ke wamyalela ngokunyanisekileyo ukuba ‘ashumayele ilizwi’ kwabanye. (2 Tim. 3:14, 15; 4:2) NjengamaNgqina kaYehova, simele sibambelele koko kufundiswa yiBhayibhile xa sishumayela, ngaloo ndlela sixelise uMzekelo wethu, uYesu, owathi: “Oko ndikufundisayo asikokwam, kodwa kokwalowo wandithumayo.” (Yoh. 7:16) Xa sifundisa sisebenzisa iLizwi likaThixo kuba siyaqonda ukuba linobulumko bukaThixo, yaye sifuna abantu bawazi umthombo wenkcazelo esibanika yona.—1 Kor. 2:4-7.
4 Okokuqala abantu bamele beve inyaniso yeBhayibhile ukuze bafunde ngoYehova baze bakholwe kuye. Ngokufanelekileyo uPawulos wabhala: “Ngokulandelayo, baya kukholwa njani na kulowo bangevanga ngaye? Ngokulandelayo, baya kuva njani na kungekho bani ushumayelayo?” (Roma 10:14) Ngokushumayela iLizwi likaThixo, sinceda abanye babe nokholo ngokufumana ulwazi oluchanileyo. Olo lwazi lunako yaye luyabuguqula ubomi babantu bulunge ngakumbi. Umbhali oliNgesi uCharles Dickens wabhala ngeBhayibhile esithi: “Iyeyona ncwadi isemagqabini yakha yakho okanye eya kuze ibekho kweli hlabathi, kuba ikufundisa izifundo ezibalaseleyo esinokuthi ngazo isidalwa esingumntu esizama ukunyaniseka nokuthembeka sifumane ukhokelo kuzo.”
5 Abo balambele inyaniso yokomoya bayaqonda ukuba ixhaswa liLizwi likaThixo. Emva phayaa ngowe-1913, uFrederick W. Franz, owayengumfundi oselula wakwanokholeji, wanikwa incwadana eyayinomxholo othi Baphi Na Abafileyo? Emva kokufunda ngomdla omkhulu impendulo yeBhayibhile kulo mbuzo, wathi: “Nantsi inyaniso.” Nezigidi zabantu abafuna inyaniso ziye zavakalelwa ngolo hlobo. Ngenkuthalo nangenzondelelo masiqhubeke sishumayela iLizwi size ngokwenjenjalo nathi sibe novuyo lokuva abanye besithi: “Nantsi inyaniso.”