Iintlanganiso Zenkonzo KaJanuwari
Iveki Eqala NgoJanuwari 6
10 imiz: Izaziso zasekuhlaleni. IZaziso ezikhethiweyo kuBulungiseleli Bethu BoBukumkani. Yithi gqabagqaba ngengxelo yenkonzo yasentsimini kaOktobha yebandla lasekuhlaleni.
20 imiz: Ukunikela Ubungqina Ngehambo Entle. Umdala uxubusha nabaselula ababini okanye abathathu. Le ngxubusho isekelwe kwiMboniselo ka-Agasti 15, 1987, iphepha 10-20. Quka amava apapashiweyo nawasekuhlaleni abonisa indlela abantu abasibukeleyo abaye bachukunyiswa ngayo yihambo entle yolutsha olungamaKristu.
15 imiz: “Ukufanelekela Nokuxhotyiselwa Ukufundisa Abanye.” (Isiqendu 1-6) Yithi gqabagqaba ngesiqendu 1-2, ubethelele intembelo ekufuneka sibe nayo yokuba ngoncedo lukaYehova sinako ukubafundisa ngokuphumelelayo abanye. Yiba nabavakalisi ababini nabaninimzi ababini benze umboniso ngeentshumayelo ezikwisiqendu 3-6, iqela ngalinye libonise indlela yokwenza utyelelo lokuqala nokubuyela.
Ingoma 14 nomthandazo wokuqukumbela.
Iveki Eqala NgoJanuwari 13
10 imiz: Izaziso zasekuhlaleni. Ingxelo yemali. Balaselisa ezinye zeengongoma esinokuthetha ngazo kumaphephancwadi angoku. Nikela namacebiso ngendlela yokuzazisa xa siqalisa incoko kubungqina obungacwangciswanga. Cela abaphulaphuli bachaze intshayelelo abaye bayisebenzisa xa bethetha nabanye ezivenkileni, esitratweni, epakini, kwisithuthi sikawonke wonke, njalo njalo.
20 imiz: Ixesha Lokuhlaziya Iqweqwe IAdvance Medical Directive/Release. Umdala ofanelekayo uxubusha ngokubaluleka kokuzalisa eli qweqwe ngokupheleleyo nokuliphatha ngawo onke amaxesha. Eli qweqwe liyakuthethela ukuba akukwazi kuzithethela ngexesha likaxakeka. (Thelekisa IMizekeliso 22:3.) Nyaka ngamnye kuye kufuneke uzalise iqweqwe elitsha ukuze lichaze isifungo sakho sangoku sokungafuni gazi, ekubeni abanye oogqirha nabantu abathile besithi amaqweqwe amadala ngaphezu konyaka asenokuba akasachazi mbono onayo ngoku. Emva kwale ntlanganiso, bonke abavakalisi ababhaptiziweyo baza kunikwa iqweqwe iAdvance Medical Directive/Release, yaye abo banabantwana abancinane abangabhaptizwanga baza kufumana i-Identity Card yomntwana ngamnye. Bacacisele ukuba la maqweqwe akazokuzaliswa namhlanje. Afanele azaliswe ngobunono emakhaya kodwa AKAMELE atyobelwe. Ukutyobela, ukufaka utyobelo lwamangqina nokubhalwa kwemihla kwawo onke amaqweqwe kuya kwenziwa kwiSifundo Sencwadi Sebandla esizayo, phantsi kweliso lomqhubi wesifundo sencwadi. Uya kuqinisekisa ukuba bonke abakwiqela lakhe balifumene iqweqwe yaye bayancedwa xa kuyimfuneko. Abo batyobela njengamangqina bafanele bambone ngokoqobo umniniqweqwe xa elityobela. Nawuphi na umntu ongekhoyo ngelo xesha uya kuncedwa ngabaqhubi okanye ngabadala kwiNtlanganiso Yenkonzo elandelayo de bonke abavakalisi ababhaptiziweyo babe bawazalisile baza bawatyobela ngokufanelekileyo amaqweqwe abo. (Hlolisisa ileta kaOktobha 15, 1992.) Abavakalisi abangabhaptizwanga basenokuzibhalela elabo iqweqwe nabantwana babo, ngokuhlengahlengisa okuthethwe kweli qweqwe kuvisisane nemeko nenkolelo yabo. Ukusebenzisa ukuqiqa ekusingatheni ezi nkcukacha zibalulekileyo kuya kusenza sifumane okulungileyo kuYehova.—IMize. 16:20.
15 imiz: “Ukufanelekela Nokuxhotyiselwa Ukufundisa Abanye.” (Isiqendu 7-9) Balisa amava angokubuyela afumaneka kwi-1995 Yearbook, iphepha 45, ubethelela imbaluleka yokubuyela naphi na apho kufunyenwe umdla. Yiba nomvakalisi ofanelekayo esenza umboniso ngeentshumayelo ezikwisiqendu 7-8. Nangona ekuqaleni kuhanjiswa ezinye iimpapasho, sifanele senze unako-nako wokuqhuba izifundo kwincwadi ethi Ulwazi ekugqibeleni. Khuthaza bonke bazibekele bucala ixesha lokubuyela kwiveki ezayo.
Ingoma 15 nomthandazo wokuqukumbela.
Iveki Eqala NgoJanuwari 20
10 imiz: Izaziso zasekuhlaleni. Iindaba Ezingokobuthixo.
20 imiz: Xhobisela Abantwana Bakho Unyaka Omtsha Esikolweni. Intetho esekelwe kwincwadana enemifanekiso ethi Imfundo, iphepha 27-30 enikelwa ngumdala. Nceda abazali bayiqonde imfuneko yokuxhobisela abantwana babo ucelomngeni abaya kujamelana nalo esikolweni. Imibandela engekhoyo kwincwadana enemifanekiso ethi Imfundo, njengezinto ezenziwa ngaphandle kweeyure zesikolo, iiholide nemibhiyozo, nezifundo zonqulo, usenokuyiphanda kwincwadana enemifanekiso ethi Isikolo nakwezinye iimpapasho zoMbutho. Abazali nabantwana bafanele benze ngokuvisisana nemigaqo ekuzo. Bonisa indlela ekubaluleke ngayo ukuba abazali baqhelane nabafundisi-ntsapho babantwana babo bangathethi nje nabo xa kuvela iingxaki kuphela. Kwakhona bafanele baqiniseke ukuba banika abafundisi-ntsapho umbhalo wencwadana enemifanekiso ethi Imfundo. Kuthiwa, abanye abazali abayiboni imfuneko yokuya kucela imvume yokuba abantwana babo bangangeniswa kwizifundo zonqulo, nakuba nje umthetho ulenzile eli lungiselelo. Kule nkalo, kubalulekile ukutyelela inqununu ngokobuqu uze uyinike isicelo esibhaliweyo soku. Yiba nomboniso omfutshane, olungiselelwe kakuhle womzali exubusha nomfundisi-ntsapho imibandela ehlobene nomntwana wakhe aze aqukumbele ngokumnika incwadana enemifanekiso ethi Imfundo.
15 imiz: “Zonke Iintlobo Zabantu Ziya Kusindiswa.” Imibuzo neempendulo. Cela abaphulaphuli babalise ngokufutshane ngamanye amava abonisa indlela abayifumene ngayo intsabelo entle ebantwini abaphuma kwiinkalo zonke zobomi.
Ingoma 23 nomthandazo wokuqukumbela.
Iveki Eqala NgoJanuwari 27
5 imiz: Izaziso zasekuhlaleni. Bakhuthaze bonke bazingenise ngokukhawuleza iingxelo zabo zenkonzo yasentsimini ekupheleni kwenyanga.
10 imiz: Ukuhlolisiswa kwesiNgxobo Semibuzo ngumveleli owongamelayo okanye ngumveleli wenkonzo. Bethelela ingongoma yokuba yimbopheleleko yomvakalisi ngamnye ukungenisa ingxelo yakhe ngokukhawuleza ekupheleni kwenyanga nganye.
15 imiz: “‘Sishumayela Ilizwi.’” Imibuzo neempendulo. Quka namagqabaza abonisa isizathu sokuba silixabise kakhulu iLizwi likaThixo.—Bona uVukani! kaSeptemba 8, 1984, iphepha 19-22.
15 imiz: Hlolisisa Umnikelo Woncwadi NgoFebruwari. Chaza iinkalo ezibangel’ umdla zale ncwadi, ezizezi: (1) Imixholo ehlab’ umxhelo, (2) imifanekiso emibalabala, (3) iibhokisi nezicangca zokufundisa, (4) nemibuzo eshicilelweyo ekwenza ucinge. Ngokuvisisana nale nxalenye yandulelayo yentlanganiso, khuthaza ukusetyenziswa kwesibhalo esikhethwe kakuhle kwintshumayelo. Yiba nomboniso wentshumayelo enye okanye ezimbini ezimfutshane. Bakhumbuze bonke bazifumanele iincwadi abaza kuzisebenzisa kule veki.
Ingoma 26 nomthandazo wokuqukumbela.