Icandelo 1: Ukuqhuba Izifundo ZeBhayibhile Ezinenkqubela
Yintoni Isifundo SeBhayibhile?
1 Ehlabathini lonke, nyanga nganye abantu bakaThixo baqhuba izifundo zeBhayibhile ezimalunga nezigidi ezithandathu. Xa sisebenzisa iindlela eziphumelelayo zokufundisa, sinokunceda aba bafundi beBhayibhile benze inkqubela ukusa ekubeni bazahlulele baze babhaptizwe baze ‘bakufanelekele ukufundisa abanye.’ (2 Tim. 2:2) Ngaba akungethandi ukunceda lowo umfundelayo enze inkqubela elolo hlobo? Ukususela kule nkupho, UBulungiseleli Bethu BoBukumkani buza kuba nongcelele lwamanqaku aza kuchaza iinkalo ezisisiseko zendlela yokuqhuba izifundo zeBhayibhile.
2 Unokuqalisa Nini Ukufaka Ingxelo Yesifundo SeBhayibhile: Ukuba nixubusha ngeBhayibhile rhoqo, kwanokuba lixesha elincinane, nisebenzisa iBhayibhile nempapasho enconyelweyo, uqhuba isifundo seBhayibhile. Uqhuba isifundo enoba nithetha nimi emnyango okanye nikwenza ngefoni. Unokusifaka kwingxelo yenyanga emva kokuba siqhutywe izihlandlo ezibini naxa uqinisekile ukuba siza kuqhubeka.
3 Izifundo ezininzi zeBhayibhile ziqhutywa ngencwadana enemifanekiso ethi Okufunwa NguThixo kunye nencwadi ethi Ulwazi. Emva kokuba kugqityiwe ukufunda ezi, xa lo mntu esenza inkqubela, enokuba iyacotha, naxa esiya esiba noxabiso ngoko akufundayo, kunokufundwa incwadi ethi Nqula UThixo. Abantu abangafundanga okanye abanengxaki yokufunda banokufundelwa incwadana enemifanekiso ethi Unokuba Ngumhlobo KaThixo.
4 Umsebenzi wokuqhuba izifundo zeBhayibhile uye waphumelela ekuncedeni izigidi zabantu zaba ngabafundi bokwenyaniso bakaYesu Kristu. (Mat. 28:19, 20) Ngokusebenzisa amacebiso akungcelele lwamanqaku ezayo, unokuqhuba isifundo seBhayibhile esinenkqubela.