Owona Msebenzi Uvuyisayo
1. Nguwuphi umsebenzi wokuphilisa ngokomoya owenziwayo namhlanje?
1 Ngenkulungwane yokuqala babevuya ngokwenene abo babezibonela ngawabo xa kuphiliswa abantu. (Luka 5:24-26) Namhlanje sivuyiswa ngumsebenzi wokuphilisa ngokomoya. (ISityhi. 22:1, 2, 17) Kuchulumancisa ngokwenene ukufunda amava abonisa indlela obuguqulwa ngayo ubomi babantu liLizwi likaYehova nomoya oyingcwele. Eyona nto isivuyisa ngakumbi kukuba nenxaxheba kumsebenzi wokuqhuba izifundo zeBhayibhile ezinenkqubela.
2. Yintoni esivuyisayo xa sifundisa umntu inyaniso?
2 Ngubani igama likaThixo? Kutheni evumela ukubandezeleka? UBukumkani bukaThixo buya kubenzela ntoni abantu? Asivuyiswa nje kukuphendula le mibuzo kuphela, kodwa nakukubona indlela avuya ngayo umntu xa efunda inyaniso. (IMize. 15:23; Luka 24:32) Njengoko lo mntu esenza inkqubela, uqalisa ukusebenzisa igama likaYehova, aphucule indlela anxiba nazilungisa ngayo, ayeke imikhwa emibi, aze aqalise ukushumayela kwabanye. Ukuba ude azahlulele aze abhaptizwe, uya kuba ngumzalwana nomsebenzi olidlelane lethu. Linyathelo ngalinye kula ke, into esenza sivuye.—1 Tes. 2:19, 20.
3. Zintoni esinokuzenza ukuze siqalise isifundo seBhayibhile?
3 Ngaba Unokuba Nenxaxheba? Ukuba ufuna ukufak’ isandla kulo msebenzi uvuyisayo, thandaza kuYehova ucele isifundo seBhayibhile, emva koko wenze ngokuvisisana naloo mthandazo. (1 Yoh. 5:14) Shumayela apho kukho bantu nangamaxesha abafumaneka ngawo. Sebenzisa lonke ithuba elivelayo ucele abantu ukubaqhubela isifundo seBhayibhile. (INtshu. 11:6) Xa udibana nomntu onomdla uze utyale imbewu yenyaniso, buyela uye kuyinkcenkceshela.—1 Kor. 3:6-9.
4. Kutheni sifanele sicele izifundo zeBhayibhile ngemvo yongxamiseko?
4 Basebaninzi abantu abalambele nabanxanelwe ubulungisa. Ngubani oya kwanelisa loo ntswelo yabo yokomoya ngokubaqhubela isifundo seBhayibhile? (Mat. 5:3, 6) Masizinikele ukuze sifeze umsebenzi wokushumayela nowokwenza abafundi ngaphambi kokuba isivuno siphele.—Isa. 6:8.